شي جينپيڭ قاتىناستى ءارى سپورت جارىسىنىڭ باستالعاندىعىن جاريالادى
9 - ايدىڭ 15 - كۇنى كەشتە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شانشي ولكەسىنىڭ شي - ان قالاسىندا جۇڭحۋا حالىق رەسپۋبليكاسىنىڭ 14 - كەزەكتى سپورت جارىسىنىڭ باستالۋ سالتىنا قاتىناستى ءارى سپورت جارىسىنىڭ باستالعاندىعىن جاريالادى.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
9 - ايدىڭ 15 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شانشي ولكەسىنىڭ شي - ان قالاسىندا بۇقارالىق دەنە تاربيەدە مەملەكەتتىك وزات ورىنداردىڭ، وزات جەكەلەردىڭ ۋاكىلدەرى جانە مەملەكەتتىك دەنە تاربيە جۇيەسىندەگى وزات كوللەكتيۆتەردىڭ، وزات قىزمەتكەرلەردىڭ ۋاكىلدەرى، توكيو وليمپيادا سپورت جارىسى جۇڭگو دەنە تاربيە ۋاكىلدەر ۇيىرمەسى سپورتشىلارىنىڭ جانە جاتتىقتىرۋشىلارىنىڭ ۋاكىلدەرى قاتارلىلارمەن ىقىلاسپەن كەزدەستى ءارى كوپشىلىكپەن بىرگە سۋرەتكە ءتۇسىپ ەستەلىك قالدىردى.
□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگىنىڭ 9 - ايدىڭ 15 - كۇنى شي - اننان بەرگەن حابارى. جۇڭحۋا حالىق رەسپۋبليكاسى 14 - كەزەكتى سپورت جارىسى 9 - ايدىڭ 15 - كۇنى كەشتە شانشي ولكەسىنىڭ شي - ان قالاسىندا سالتاناتپەن باستالدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ باستالۋ سالتىنا قاتىناستى ءارى سپورت جارىسىنىڭ باستالعاندىعىن جاريالادى.
9 - ايدىڭ 15 - كۇنى كەشتە شي - ان وليمپيادا سپورت ورتالىعى دەنە تاربيە الاڭى شام نۇرىمەن جارقىراپ، قىزۋ دۋمانعا بولەندى.
ساعات 19دان 58 مينۋت وتكەندە، مەرەيلى مۋزيكا ءۇنى ىشىندە، شي جينپيڭ مەن حانىمى پىڭ لييۋان قاتارلىلار ءتوراعالار مىنبەسىنە شىعىپ، كورەرمەندەرگە قول بۇلعاپ قۇرمەت ءبىلدىردى. بۇكىل الاڭنان كوپكە دەيىن دۋ قول شاپالاق ءۇنى كوتەرىلدى.
ساعات 20دا 14 - كەزەكتى مەملەكەتتىك سپورت جارىسىنىڭ باستالۋ سالتى رەسمي باستالدى. «وتاندى جىرلايمىز» اسقاق اۋەنىمەن، قۇرمەت قاراۋىلدارى نارت قىزىل بەس جۇلدىزدى تۋدى قورعاي كوتەرىپ نىق قاداممەن دەنە تاربيە الاڭىنا كىردى. الاڭنان ەكپىندى «سپورتشىلار مارىشى» كوتەرىلدى، مەملەكەتتىك سپورت جارىسىنىڭ جارىس تۋى، 14 - كەزەكتى مەملەكەتتىك سپورت جارىسىنىڭ جارىس تۋى جانە 60 تۋ ۇستاۋشىدان قۇرام تاپقان جارىس تۋى شارشى توبى، تورەشىلەر ۋاكىلدەرى شارشى قاتارى ءتوراعالار مىنبەسىنە قاراي بەت الدى. ولاردىڭ سوڭىنان ىلە - شالا ءارقايسى ولكە، اۆتونوميالى رايون، توتە قاراستى قالالاردىڭ، شياڭگاڭ ەرەكشە اكىمشىلىك رايونىنىڭ، اۋمىن ەرەكشە اكىمشىلىك رايونىنىڭ، شينجياڭ ءوندىرىس - قۇرىلىس بيڭتۋانىنىڭ، سونداي - اق 3 كاسىپتىك دەنە تاربيە قوعامىنىڭ 37 ۋاكىلدەر ۇيىرمەسىنىڭ سپورتشىلارىنىڭ ۋاكىلدەرى كوتەرىڭكى رۋحپەن كەلەدى. بۇكىل الاڭداعى كورەرمەندەر قىزۋ قول شاپالاق ۇنىمەن جانە الاقايلاعان داۋىسپەن سپورتشىلاردىڭ كەلگەندىگىن قارسى الدى.
الاڭعا كىرۋ سالتى اياقتاعاننان كەيىن، بۇكىل الاڭداعىلار ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى. ايبىندى مەملەكەت ءانى ىشىندە بەس جۇلدىزدى قىزىل تۋ باياۋ كوتەرىلىپ، جەلمەن جەلبىرەدى.
شانشي ولكەسىندەگى، مەملەكەتتىك دەنە تاربيە باس مەكەمەسىندەگى جاۋاپتى جولداستار جەكە - جەكە ءسوز سويلەدى.
ساعات 20دان 40 مينۋت وتكەندە، شي جينپيڭ اسقاق داۋىسپەن: ”جۇڭحۋا حالىق رەسپۋبليكاسى 14 - كەزەكتى سپورت جارىسى باستالدى!“ دەپ جاريالادى. سول ساتتە بۇكىل الاڭ دۋمانعا بولەنىپ، شاپالاق ءۇنى، الاقايلاعان داۋىستار كوپكە دەيىن تولاستامادى.
14 - كەزەكتى مەملەكەتتىك سپورت جارىسى ءانىنىڭ اۋەنىنە ىلەسە، مەملەكەتتىك سپورت جارىسىنىڭ تۋى مەن 14 - كەزەكتى مەملەكەتتىك سپورت جارىسىنىڭ جارىس تۋى باياۋ كوتەرىلدى.
سپورتشى ياڭ شۇنحۇڭ، جاتتىقتىرۋشى چىن رۇڭشۋە، تورەشى جۇڭ حاڭۋي جەكە - جەكە 14 - كەزەكتى مەملەكەتتىك سپورت جارىسىنا قاتىناساتىن سپورتشىلار، جاتتىقتىرۋشىلار، تورەشىلەر اتىنان سەرت بەردى.
14 - كەزەكتى مەملەكەتتىك سپورت جارىسىنىڭ جارىس ءانى − «بولاشاقتى بەتكە الىپ اتتانايىق» «جاڭا داۋىردە كۇرەس جۇرگىزىپ، جاڭا ساپارعا اتتانايىق» اتتى مادەنيەت - دەنە تاربيە كونسەرتىنىڭ شىمىلدىعىن اشتى، تۇتاس كونسەرت بەتاشار كۇي ”قوناقتاردى قارسى الۋ بارابانشىلارى“ جانە ”ۇلت تامىرى“، ”يان - ان رۋحى“، ”جۇڭگو ارمانى“ سىندى ءۇش تاراۋدان قۇرالىپ، كوپ مەديالى تەحنيكا جانە دىبىس، نۇر، ەلەكتر سىندى تاسىلدەردەن پايدالانىپ، وسى كەزەكتى مەملەكەتتىك سپورت جارىسىنىڭ ”جالپى حالىق مەملەكەتتىك سپورتقا ات سالىسۋ، ءبىر نيەتپەن العا ۇمتىلۋ“ سىندى نەگىزگى تاقىرىبىن جاندى بەينەلەدى.
الاڭعا الاۋ جەتكىزۋ مەن باس الاۋدى تۇتاندىرۋدىڭ دۋماندى سالتى باستالدى. 8 - ايدىڭ 16 - كۇنىنەن باستاپ 14 - كەزەكتى مەملەكەتتىك سپورت جارىسىنىڭ الاۋى شانشي ولكەسى كولەمىندە ۇزدىكسىز جەتكىزىلىپ، ەڭ سوڭىندا شي - ان وليمپيادا سپورت ورتالىعى دەنە تاربيە الاڭىنا كەلدى. كۇللى جۇرتتىڭ كوز تىگۋىندە، سۋ بيڭتيان، جاڭ يۇيفەي، چين كاي، گو ۋىنجۇن، ما لۇڭ قاتارلى 5 الاۋ جەتكىزۋشى كۇش جالعاپ جەتكىزىپ، ەڭ سوڭىندا توكيو وليمپيادا سپورت جارىسىنداعى تۇڭعىش التىن مەدال يەگەرى ياڭ چيان مەملەكەتتىك سپورت جارىسىنىڭ باس الاۋىن تۇتاندىردى.
ساعات 21دەن 35 مينۋتتا 14 - كەزەكتى مەملەكەتتىك سپورت جارىسىنىڭ باستالۋ سالتى ارقاۋ ءان «شارىقتاۋ» انىمەن دۋماندى بەينەدە ءساتتى اياقتادى.
9 - ايدىڭ 15 - كۇنى تۇستەن كەيىن شي جينپيڭ شانشي سارايىندا بۇقارالىق دەنە تاربيەدە مەملەكەتتىك وزات ورىنداردىڭ، وزات جەكەلەردىڭ ۋاكىلدەرى جانە مەملەكەتتىك دەنە تاربيە جۇيەسىندەگى وزات كوللەكتيۆتەردىڭ، وزات قىزمەتكەرلەردىڭ ۋاكىلدەرى، توكيو وليمپيادا سپورت جارىسى جۇڭگو دەنە تاربيە ۋاكىلدەر ۇيىرمەسى سپورتشىلارىنىڭ جانە جاتتىقتىرۋشىلارىنىڭ ۋاكىلدەرى قاتارلىلارمەن ىقىلاسپەن كەزدەستى ءارى كوپشىلىكپەن بىرگە سۋرەتكە ءتۇسىپ ەستەلىك قالدىردى. شي جينپيڭ كوپشىلىكپەن ىقىلاستى تۇردە اڭگىمەلەسىپ، ولاردى قايراتتانا سايىسىپ، تاعى دا تاماشا ناتيجەلەر جاراتۋعا شابىتتاندىردى.
ديڭ شۋەشياڭ، ليۋ حى، شۇي چيلياڭ، سۇن چۇنلان، چىن شي، ساي دافىڭ، لۋ جانگۇڭ، حى ليفىڭ جوعارىداعى قاتىستى قيمىلدارعا قاتىناستى.
14 - كەزەكتى مەملەكەتتىك سپورت جارىسى 9 - ايدىڭ 27 - كۇنى اياقتايدى، جالپى 12 مىڭنان استام سپورتشى باسەكەلىك جارىس تۇرلەرىنە قاتىناسادى، 10 مىڭنان استام بۇقارا سپورتشى بۇقارالىق جارىس قيمىلدارىنا قاتىناسادى.
