«كوكتەم مەرەكەسىندە شينجياڭعا ساياحاتتاۋ» جوعارى ورلەۋگە كوتەرىلدى

ءتىلشى اۆتونوميالى رايوندىق مادەنيەت جانە ساياحات مەڭگەرمەسىنەن مىنانى ۇعىستى: كوكتەم مەرەكەسى دەمالىسىندا رايونىمىزدىڭ ساياحات بازارى جاندانعان. ساناققا قاراعاندا، كوكتەم مەرەكەسى دەمالىسىندا شينجياڭ ەل ىشىنەن جالپى 3 ميلليون 11 مىڭ 700 ادام - رەت ساياحاتشى قابىلداپ، سايكەس مەزگىلدەگىدەن 71.33％ ارتقان؛ ساياحات جالپى كىرىسى 3 ميلليارد 616 ميلليون يۋانعا جەتىپ، سايكەس مەزگىلدەگىدەن ％ 74.42 ارتىپ، ەكەۋىندە دە تاريحتاعى تىڭ ورە جاراتىلعان.
　　تۇرمىس ورەسىنىڭ جوعارىلاۋىنا بايلانىستى، ساياحاتتاۋ ادامداردىڭ كوكتەم مەرەكەسىن قۋانىشپەن قۇتتىقتاۋداعى ماڭىزدى تاسىلىنە اينالدى. مەرەكە كەزىندە تۇتاس شينجياڭنىڭ جەر - جەرى جۇرت جابال قاتىناسقان، ءماندى دە ءساندى ساياحات مەرەكەسىن قۇتتىقتاۋ قيمىلدارىن ورىستەتتى، قار - مۇزدى تاقىرىپ ەتكەن قيمىلدار ساياحاتشىلاردى ەرەكشە باۋراپ، ساياحات بازارى قىزۋ دۋمانعا بولەندى.
　　مەرەكەلىك قوراپتى شامدار، الۋان ءتۇرلى شىراقتار بۇراتالا قالاسىن مەرەكە مەرەيىنە شومدىردى. كوكتەم مەرەكەسى كەزىندە بۇراتالا قالاسى «قار - مۇز كارنيۆالى» قيمىلىن وتكىزدى، بۇراتالا قالاسى كايپيڭحۋ كورىنىس اۋماعى قالا تۇرعىندارىنىڭ ساياحاتتاۋداعى ءبىرىنشى تالعامىنا اينالىپ، الىسقا بارماي - اق تاماشا كورىنىستەن ءلاززاتتانىپ، ساياحاتتاۋعا بولاتىن بولدى.
　　«قاشقاردىڭ مەرەكە رايى قويۋلانا ءتۇستى». كوكتەم مەرەكەسى كەزىندە شي - اندا وقيتىن لي كاي ىشكەرىدەگى ساباقتاستارىن ەرتىپ قاشقار كونە قالا كورىنىس اۋماعىن ساياحاتتاپ، قويۋ مەرەكە رايىن سەزىندى. كوكتەم مەرەكەسى قارساڭىندا قاشقار كونە قالا كورىنىس اۋماعى 12 مۇشەل، جۇڭگو تۇيىنشەگى سياقتى مازمۇنداعى ءتۇستى شىراقتارمەن بەزەندىرىلىپ، شىت جاڭا بەينەگە ەندى. جۇڭگو شىراقتارى تۇڭعىش رەت اسىلعان قاشقار كونە قالاسى شىراقتاردىڭ ساۋلەسى استىندا ەرەكشە اسەم تۇسكە بولەندى.
　　كوكتەم مەرەكەسى دەمالىسىندا قار - مۇز ساياحاتىنىڭ دۋمانى ۇزدىكسىز ارتتى. 2 - ايدىڭ 6 - كۇنى باعراش كولىنىڭ داحىكوۋ (شيحاييۇي قىستاعى) كورىنىس اۋماعى ساياحاتشىلارعا لىق تولىپ، ەرەكشە دۋمانعا بولەندى، تارتىمدى قار - مۇز ويىندارى توڭىرەكتىڭ ءتورت بۇرىشىنان كەلگەن ساياحاتشىلاردى باۋرادى. ساناققا قاراعاندا، سول كۇنى باعراش كولى داحىكوۋ (شيحاييۇي قىستاعى) كورىنىس اۋماعى 12 مىڭنان استام ادام - رەت ساياحاتشى قابىلداعان.
　　كوكتەم مەرەكەسى دەمالىسىندا قار شاڭعى تەبۋ كوپتەگەن ساياحاتشىلاردىڭ باستى تالعامىنا اينالدى. ءۇرىمجى، التاي، شاۋەشەك سياقتى جەرلەردىڭ قار شاڭعى الاڭدارى كوكتەم مەرەكەسى كەزىندە ساياحاتشى قابىلداۋدىڭ قاۋىرت مەزگىلىنە ءوتىپ، قار شاڭعى الاڭدارىندا ءار كۇنى ساياحاتشىلاردىڭ اياعى ۇزىلمەدى. ساياحاتشىلاردىڭ قار شاڭعى تەبۋىنە قولايلىلىق جاراتۋ ءۇشىن، التاي گەنەرال تاۋى قار شاڭعى الاڭى التاي قالا رايونىنان گەنەرال تاۋى قار شاڭعى تەبۋ الاڭىنا ارناۋلى قاتىنايتىن جولاۋشىلار اۆتوبۋزى جەلىسىن اشتى.
　　جۇڭحۋانىڭ ءداستۇرلى مادەنيەتى جانە ۇلتتىق سالت - سانا قيمىلدارى ساياحاتشىلاردى ءتىپتى دە باۋراي ءتۇستى. كوكتەم مەرەكەسى دەمالىسىندا جەمسارى اۋدانى تۇڭعىش كەزەكتى «مەرەكەلىك بۇيىمدار جارمەنكەسىن» وتكىزدى، موري «موريدىڭ دۇڭچىڭىنداعى مەرەكە مەرەيى» سياقتى قيمىلداردى وتكىزدى. شينجياڭنىڭ كوپتەگەن اۋدان، قالالارى مەرەكەلىك بۇيىمدار جارمەنكەسى، ويىن - ساۋىق، ۇلتتىق سالت - سانا مادەنيەتى كورمەسى سياقتىلاردى وتكىزىپ، كوپتەگەن ساياحاتشىنى ەكسكۋرسيالاۋعا، تاماشالاۋعا باۋرادى.