وزگەشە «اق حالاتتى جاۋىنگەرلەر»:
مەديتسينالىق قوقسىقتاردى ءبىر جاقتى ەتۋدىڭ ءبىرىنشى شەبىنەن تاپجىلمادى
2 - ايدىڭ 7 - كۇنى وزگەشە «اق حالاتتى جاۋىنگەرلەر» ءۇرىمجى قالاسىنداعى مەديتسينالىق قوقسىقتاردى ءبىر جاقتى ەتۋ ورتالىعىنىڭ جاراقسىز زاتتاردى ءتۇسىرۋ ۇلكەن زالىندا مەديتسينالىق قوقسىق سالىنعان شەلەكتەردى جوتكەۋدە.
شاڭ - توزاڭ، جوعارى تەمپەراتۋرا، شۋىل، فىڭ تاۋدىڭ ارت جاعىنداعى سەح قابىرعاسىندا ”كاسىپتىك حاۋىپ - قاتەر قۇلاقتاندىرۋ تاقتاسىنان“ ۇشەۋى ءىلىنىپ، اشىق سيگنال بەرىپ تۇر.
36 جاستاعى فىڭ تاۋ ءۇرىمجى قالاسى مەديتسينالىق قوقسىقتاردى ءبىر جاقتى ەتۋ ورتالىعىنىڭ شارلاپ تەكسەرۋشىسى. ءتىلشى ءبىر جاقتى ەتۋ ورتالىعىنان فىڭ تاۋدى جولىقتىرعان كەزدە، ول ۇستىنە اق ءتۇستى قورعانۋ كيىمىن، باسىنا قىزىل ءتۇستى حاۋىپسىزدىك باس كيىمىن كيىپ، تۇيىق كوزىلدىرىك جانە ماسكى تاعىپ، بەت - اۋىزىن مىقتى تۇمشالاپ الىپتى.
فىڭ تاۋدىڭ قاسىندا، بيىكتىگى 10 نەشە مەتردەن اساتىن قىزدىرىپ ىدىراتىپ ورتەۋ پەشى تۇر. پەشتەگى جالىننىڭ تەمپەراتۋراسى 1000 سەلتسي گرادۋستان اسادى، جاڭا تيپتى ايدارشا ۆيرۋس وكپە قابىنۋ مەديتسينالىق قوقسىقتارىن قامتىعان كوپ ءتۇرلى مەديتسينالىق قوقسىقتار ورتەلىپ جاتىر.
7 باسقىش ءبىر جاقتى ەتۋ جۇمىس تارتىبىنەن سوڭ، مەديتسينالىق قوقسىقتار نەگىزىنەن بۇكىلدەي ىعىستىرۋ ولشەمىنە لايىق گازعا اينالىپ، نەبارى ％0.07 بولىگى عانا ەڭ سوڭىندا قالدىققا اينالىپ، ۋىتى تەكسەرىلىپ ولشەمگە تولعان سوڭ كومىپ تاستالادى.
”قىزمەت بارىسىندا مۇمكىندىكتىڭ بارىنشا تاماق جەمەيمىز، سۋ ىشپەيمىز، تازالىق ۇيىنە بارمايمىز“. فىڭ تاۋ بىلاي دەدى: الدا - جالدا تاماقتانساق نەمەسە ۇلكەن - كىشى دارەتكە وتىرساق، جاڭا قورعانۋ كيىمىن اۋىستىرۋعا تۋرا كەلەدى، ونىڭ ۇستىنە ۇزاق ۋاقىت زارارسىزداندىرۋ كەرەك، قورعانۋ كيىمىنىڭ سانى شەكتى، مۇمكىندىگىنشە ۇنەمدەۋ كەرەك.
سەحتىڭ اۋماعى ونشا ۇلكەن ەمەس، استى - ءۇستى 3 قابات. وسى ارادا ۇزدىكسىز 8 ساعات قىزمەت ىستەگەن فىڭ تاۋ 20 مىڭ دا 30 مىڭ قادام باسادى.
ماسكىدەن شىققان دەم فىڭ تاۋدىڭ تۇيىق كوزىلدىرىگىن بۋلاپ تاستايدى، ول كوپ ءادىس قولدانسادا، بۇل ماسەلەنى شەشە العانى جوق. سول جاق كەۋدەسىنە ءىلىپ العان تىلدەسكىدەن تولاسسىز داۋىس شىعىپ تۇر، قورعانۋ كيىمىن كيگەن فىڭ تاۋ تىلدەسكىنىڭ انا باسىنان كەلگەن بۇيرىقتى ارەڭ ەستيدى.
”مەكەمە ءبىزدىڭ ۆيرۋسپەن جۇعىمدالىپ، وندىرىسكە ىقپال جەتكىزۋىمىزدەن الاڭدايدى. ال ءبىز ۇيدەگىلەرگە جۇقتىرىپ الۋدان الاڭداپ، ۇيگە قايتۋعا دا باتىنا المايمىز“. كوكتەم مەرەكەسىنىڭ 2 - كۇنىنەن باستاپ، فىڭ تاۋ مەن ونىڭ 31 قىزمەتتەسى ءبىر جاقتى ەتۋ ورتالىعىنان تاپجىلعان جوق. 5 جاستاعى قىزى گوگونى تىلگە العاندا، فىڭ تاۋ ەرىكسىزدەن جىلاپ جىبەرە جازداپ، تەز ارادا ءوزىن باسىپ الدى، تۇيىق كوزىلدىرىگى بۋلانىپ كەتكەندەي عانا كورىندى.
تۇتاس ءبىر جاقتى ەتۋ ورتالىعىنىڭ ساقتىق دارەجەسى ەڭ جوعارى ءوڭىرى 5 - قاباتتا، ول ارا مەديتسينالىق قوقسىقتاردى ۋاقىتشا ساقتايتىن قامبا.
مەديتسينالىق قوقسىقتار سالىنىپ اۋىزى پەشەتتەلگەن شەلەكتەر مەديتسينالىق قوقسىقتار ارناۋلى تاسيتىن ماشينادان تۇسىرىلگەننەن كەيىن، ليفت ارقىلى ءبىر جاقتى ەتۋ ورتالىعىنىڭ 1 - قاباتىنداعى جاراقسىز زاتتاردى ءتۇسىرۋ ۇلكەن زالىنان تىكە 5 - قاباتتاعى ۋاقىتشا ساقتاۋ قامباسىنا جەتكىزىلەدى. مەديتسينالىق قوقسىقتار سالىنعان سارى ءتۇستى شەلەكتەر ۋاقىتشا ساقتاۋ قامباسىنداعى زات تاسۋشى مەن زات سالۋشىنىڭ سەلبەسۋىندە، ەڭ سوڭىندا جالىن اتىپ تۇرعان ورتەۋ پەشىنە سالىنادى.
46 جاستاعى حىناندىق ليۋ يۇنحى زات تاسۋشى، ول تۇتاس ورتالىقتاعى ەڭ جاقسى قورعانۋ جابدىعىن ىستەتكەنىمەن، سوندا دا ءبىر قابات قورعانۋ قولعابىمەن ءار الۋان مەديتسينالىق قوقسىقتارعا جاقىن ارالىقتا جاناسادى.
ەكى جۇمىسشىدان باسقا، مۇندا ءارقانداي ادامنىڭ جاقىنداۋىنا جول قويىلمايدى. ليۋ يۇنحىنىڭ سىرتپەن بايلانىسى تۇگەلدەي تىلدەسكى ارقىلى جۇرىلەدى، ال 6 − 7 ەكران ىلىنگەن ءبىر جاقتى ەتۋ ورتالىعىنىڭ باس باقىلاۋ - مەڭگەرۋ بولمەسىندە، قىزمەتكەرلەر كامەرادان وسى وڭىردەگى قىزمەت اياق الىسىن قالت جىبەرمەي قاداعالاپ وتىر.
ۋاقىتشا ساقتاۋ قامباسىنداعى ىستەردىڭ ءبارى كۇش كەتەتىن جۇمىستار، ءار رەت جۇمىستان قايتاردا، ليۋ يۇنحىنىڭ قورعانۋ كيىمىنىڭ ىشىنەن كيگەن ەكى پار كيىمى تۇگەلدەي تەرگە مالشىنادى. الايدا ليۋ يۇنحى مۇنى كاپەرىنە دە المايدى، ونىڭ ەڭ الاڭدايتىنى جۇمىستان تۇسەرگە جاقىنداعاندا دارەت قىساتىنى. كەيدە، قورعانۋ كيىمىن ۇنەمدەۋ ءۇشىن، شىداپ دارەتكە بارمايتىن ليۋ يۇنحىنىڭ ەكى اياعى دىرىلدەپ تە كەتەدى.
ءۇرىمجى قالاسىنىڭ باتىس شەتىنە ورنالاسقان ءبىر جاقتى ەتۋ ورتالىعىنىڭ مەديتسينالىق قوقسىقتاردى ءبىر جاقتى ەتۋ كولەمى بۇكىل شينجياڭ بويىنشا ماڭداي الدى ورىندا تۇرادى. ءبىر جاقتى ەتۋ ورتالىعى جىلىنا ەڭ كوپ بولعاندا 9000 توننا مەديتسينالىق قوقسىق ورتەيدى، ءۇرىمجى قالاسى، شىحىزى قالاسى، ۋجياچۇي قالاسى، قۇتىبي اۋدانى، فۋكاڭ قالاسى سياقتى جەرلەردىڭ مەديتسينالىق قوقسىقتارىن ءبىر جاقتى ەتۋ قىزمەتىنە جاۋاپتى.
2014 - جىلى ىسكە قوسىلعاننان بەرى، ءبىر جاقتى ەتۋ ورتالىعىن شينجياڭ حۇيحىحانياڭ قورشاعان ورتا ينجەنەرياسى تەحنيكالىق شەكتى سەرىكتەستىگى ەرەكشە رۇقساتپەن جۇرگىزىپ كەلگەن. سەرىكتەستىكتىڭ جاۋاپتىسى حى حايلۇڭ بىلاي دەدى: قازىر ءار كۇنى ءبىر جاقتى ەتىلەتىن مەديتسينالىق قوقسىق مولشەرى شامامەن 14 توننا، ”اۆتونوميالى رايون 1 - دارەجەلى ساقتىق دابىلىن ىسكە قوسقاننان كەيىن، ءبىز مەديتسينالىق قوقسىقتاردى ءبىر جاقتى ەتۋدە بۇكىلدەي ’كۇندەگىسىن كۇندە ءبىر جاقتى ەتۋ‘دى ورىندادىق، جاڭا تيپتى ايدارشا ۆيرۋس وكپە قابىنۋ مەديتسينالىق قوقسىقتارىن، اسىرەسە، ەڭ الدىمەن ءبىر جاقتى ەتەمىز“.
اۆتونوميالى رايوندىق ەكولوگيالىق قورشاعان ورتا تاراۋلارىنىڭ ساناعىنا نەگىزدەلگەندە، قازىر اۆتونوميالى رايونداعى 14 ايماق، وبلىس، قالادا قالىپتى اينالىمداعى مەديتسينالىق قوقسىقتاردى شوعىرلى ءبىر جاقتى ەتۋ قۇرىلعىلارى جالپى 20، ءار كۇنى ءبىر جاقتى ەتىلەتىن مەديتسينالىق قوقسىقتاردىڭ مولشەرى شامامەن 60 توننا. 1 - ايدىڭ 20 - كۇنىنەن قازىرگە دەيىن، بۇكىل رايوندا جالپى ءىس جۇزىندە ءبىر جاقتى ەتىلگەن مەديتسينالىق قوقسىقتاردىڭ مولشەرى 1100 توننادان اسقان.
”ىندەت توسقاۋىل شايقاسىنىڭ دابىلى قاعىلعاننان بەرى، شينجياڭنىڭ جەر - جەرىندەگى مەديتسينالىق قوقسىقتاردى ءبىر جاقتى ەتۋ سالاسىنىڭ قىزمەتكەرلەرى تۇگەلدەي ءبىرىنشى شەپتەگى قىزمەت ورىندارىنان تاپجىلمادى. ولار قۇلشىنىس جاساپ، مەديتسينالىق قوقسىقتاردىڭ دەر كەزىندە ءونىمدى ءبىر جاقتى ەتىلۋىنە شىنايى كەپىلدىك ەتىپ، ىندەتتەن ساقتانۋ - تىزگىندەۋ قىزمەتىنىڭ قاجەتىن قاناعاتتاندىردى“، - دەدى اۆتونوميالى رايوندىق ەكولوگيالىق قورشاعان ورتا مەڭگەرمەسى قاتتى كۇيدەگى قوقسىقتار جانە حيميالىق زاتتار باسقارماسىنىڭ جاۋاپتىسى ياڭ چۇن.
