كوكتەم مەرەكەسىنە ارنالعان مۋزيكا ساۋىعى ۇرىمجىدە سالتاناتپەن وتكىزىلدى
1 - ايدىڭ 18 - كۇنى كەشتە ”ءبىزدىڭ جۇڭگو ارمانىمىز مادەنيەتتى بارشا وتباسىنا جەتكىزۋ“ − 2020 كوكتەم مەرەكەسىنە ارنالعان مۋزيكا ساۋىعى شينجياڭ كوركەمونەر تەاترحاناسىندا سالتاناتپەن وتكىزىلدى.
مۋزيكا ساۋىعىنىڭ بەتاشارى قىزۋ دۋماندى بولدى، ويناقى سازدى «كوكتەم مەرەكەسى بەتاشار كۇيى» دۋماندى قۋانىشقا بولەگەن، شاتتىعى شارىقتاعان مەرەكە مەرەيىن اسقاقتاتتى. سيمفونيالىق شالقىما كۇيى «باۋاڭ بيەجي»دى جيڭجۇي ونەرپازى جاۋ لان وركەسترمەن بىرگە ورىندادى، بۇل كۇي جۇڭگو ءداستۇرلى اسپاپتىق مۋزيكاسىن، جيڭجۇي اۋەنىن باتىس سيمفونياسىمەن توعىستىرعان كلاسسيكالىق شوقتىقتى شىعارما بولىپ، شىت جاڭا كوركەمونەرلىك بەينەلەۋ فورماسى ارقىلى جۇڭحۋانىڭ تاڭداۋلى، ءداستۇرلى مادەنيەتىنىڭ تارتىمدىلىعىن ايگىلەدى. رويالشى تان شياۋتاڭ الەمگە ايگىلى كۇي − چايكوۆسكيدىڭ «ءبىرىنشى رويال بىرىكپە كۇيىن»، رويال توعىسپالى كۇيى «حۋاڭحى»نى وينادى، ايگىلى ەرلەر شىعان داۋىستى ءانشىسى مو حۋالۇن بار ونەرىن سالا «ۇيقىسىز ءتۇن»، «مەنىڭ كۇنىم»، «دابانچىڭدىق بويجەتكەن» سياقتى اندەردى ورىندادى. مۋزيكا ساۋىعىندا تاعى ەل اۋزىنان تۇسپەيتىن، ويناقىلىعىمەن كوڭىلدى جەلپىندىرەتىن «كوگىلدىر دوناي وزەنى ۆاليس كۇيى»، «رادەتزكي مارشى» سياقتى الەمگە ايگىلى كۇيلەردى كىرىستىرە ورىندادى، كورەرمەندەرگە ۋاقىت پەن كەڭىستىك اياسىنان شالقىپ وتكەن، سەزىم مۇشەلەرىنىڭ تۇيسىنۋىنەن شارىقتاپ شىققان كورۋ - تىڭداۋ سالتاناتتى سياپاتىندا وتىرعانداي اسەر بەردى. ”ورىنداعاندارى تۇگەلدەي كلاسسيكالىق ءان - كۇيلەر، كۇي ويناۋ، ءان ايتۋ ورەسى وتە جوعارى ەكەن، بۇل، شىنىندا، ءبىر مادەنيەت سالتاناتتى سياپاتى بولدى“، - دەدى كورەرمەن گو سان مۋزيكا ساۋىعىن اۋىز جاپپاي ماقتاپ.
شينجياڭ اييۋە وركەسترىنىڭ باستىعى ۋاڭ شياۋلياڭ تانىستىرىپ بىلاي دەدى: مۋزيكا ساۋىعى جۇڭحۋا ءداستۇرلى مادەنيەتىنىڭ جاۋھارى مەن باتىستىڭ كلاسسيكالىق كوركەمونەرىن ورگانيكالى ۇشتاستىرىپ، كورەرمەندەردى اسەم اۋەندى مۋزيكا ءۇنى ىشىندە، سەنىمدى، ماقتانىشتى، مەيىرىمدى، باقىتتى تۇردە جاڭا كوكتەممەن قاۋىشتىردى.
مۋزيكا ساۋىعىن اۆتونوميالى رايوندىق مادەنيەت جانە ساياحات مەڭگەرمەسى باس بولىپ، شينجياڭ كوركەمونەر تەاترى ۇستىنە الىپ وتكىزدى. كوكتەم مەرەكەسىنىڭ الدى - ارتىندا، شينجياڭ كوركەمونەر تەاترىنىڭ وپەرا ۇيىرمەسى، تەاتر ۇيىرمەسى، سەرىك ۇيىرمەسى، تۇتىكتى - ىشەكتى اسپاپتار مۋزيكا ۇيىرمەسى، ۇلتتىق مۋزيكا ۇيىرمەسى ءار ۇلت بۇقاراسىنا 10 كەزەك - رەت تارتىمدى ويىن قويادى، مۇنىڭ ىشىندە مۋزيكالىق دراما «مۇزتاۋعا كەلگەن قوناق»، تەاتر «بەييۋانچۇن الەۋمەتتىك اۋماعىنداعى سىزدەر مەن بىزدەر»، سەرىك ونەرى كەشكى ساۋىعى «كۇن ساۋلەسىنە شومىلعان بىزدەر» سياقتىلار قامتىلدى.
