ما شيڭرۇي، ەركىن تۇنياز، ٴزۇمىرات وبۇل، نۇرلان ٴابىلماجىن، لي يفي، حى جۇڭيوۋ قاتىناستى
انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 4 ـ ايدىڭ 24 ـ كۇنى ۇرىمجىدەن حابارلايدى. 4 ـ ايداعى ۇرىمجىدە كوكتەم لەبى ەسىپ، بار الەم قۇلپىرىپ، اعاش ەگىپ، ورمان وسىرەتىن تاماشا مەزگىل تاعى دا جەتىپ كەلدى. 4 ـ ايدىڭ 24 ـ كۇنى تۇستەن بۇرىن اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز، اۆتونوميالى رايوندىق حالىق قۇرىلتايى تۇراقتى كوميتەتىنىڭ مەڭگەرۋشىسى ٴزۇمىرات وبۇل، اۆتونوميالى رايوندىق ساياسي كەڭەستىڭ ٴتوراعاسى نۇرلان ٴابىلماجىن، اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى لي يفي، اۆتونوميالى رايوندىق پارتكومنىڭ ورىنباسار شۋجيى، ٴۇرىمجى قالالىق پارتكومنىڭ شۋجيى حى جۇڭيوۋ قاتارلى اۆتونوميالى رايوننىڭ باسشىلارى ٴۇرىمجى اۋدانى ٴۇرىمجى _ بانفاڭگوۋ، ٴۇرىمجى _ شۇيشيگوۋ تاس جولدارىنىڭ ەكى جاعالاۋىنداعى ەكولوگيالىق ىقتاسىن ورمان قۇرىلىسى ينجەنەرياسىنىڭ جۇمىس باسىنا كەلىپ، مىندەتتى اعاش ەگۋ قيمىلىن ورىستەتتى.
اسپان شايداي اشىق، ەركە سامال بەتتى ايمالايدى. كوكتەمنىڭ قوڭىر سامالى ەسىپ، ٴار ۇلت كادىر، بۇقاراسى بىلەك بىرىكتىرىپ اعاش ەككەن قاربالاس كورىنىس مەن مۇندالايدى. ما شيڭرۇي، ەركىن تۇنياز قاتارلى اۆتونوميالى رايون باسشىلارى كولىكتەن تۇسە سالىسىمەن اعاش ەگۋشىلەردىڭ قاتارىنا قوسىلىپ، ٴۇرىمجى قالاسىنداعى پارتيا مۇشەلەرىمەن، كادرلارمەن، پيونەرلەرمەن بىرگە ەڭبەك ىستەدى. توپىراق تولتىرىپ، بوگەن جاساپ، سۋ تاسىپ، سۋ قۇيدى، كوپشىلىك تاس الما، الما سياقتى اعاشتاردى جاعالاتا ەكتى.
”ۇيرەنۋلەرىڭ قانداي؟“، ”ادەتتە كوپ ارەكەت جاسايسىڭدار ما؟“ ما شيڭرۇي اعاش ەگە ٴجۇرىپ، بالالارمەن جانە مۇعالىمدەرمەن شىن ىقىلاسپەن اڭگىمەلەستى. ول ساباقتاستاردى دەنە تاربيە شىنىعۋىن كۇشەيتىپ، ٴتۇرلى عىلىم جالپىلاستىرۋ قيمىلدارىن كوپتەپ ورىستەتىپ، دەنە شىنىقتىرىپ، جىگەردى شىڭداپ، ٴبىلىمدى مولايتىپ، جان ـ جاقتى جەتىلۋگە جىگەرلەندىردى. ما شيڭرۇي بىلاي دەدى: جۇڭحۋا ۇلتى بەرەكەلى ۇلكەن شاڭىراق، ٴار ۇلت حالقى ٴبىر وتباسىنىڭ ادامدارى. بارلىقتارىڭىز تاريحي مادەنيەت بىلىمدەرىن كوبىرەك ۇيرەنىپ، بىرگە وقىپ، بىرگە ويناپ، كىشكەنتايلارىڭىزدان باستاپ جۇڭحۋا ۇلتى ورتاق تۇلعا تانىمىن جۇرەك تۇكپىرلەرىڭىزگە تەرەڭ ۇيالاتۋلارىڭىز كەرەك. بارلىقتارىڭىز ەڭ تاماشا داۋىردە تۋىلدىڭىزدار، سىزدەردىڭ ۋاقىتتى قاستەرلەپ، جاقسى ۇيرەنىپ، كۇن سايىن العا باسىپ، تىرەكتى دارىندى بولۋعا قۇلشىنۋلارىڭىزدى ٴۇمىت ەتەمىن.
ٴۇرىمجى اۋدانىنىڭ ٴۇرىمجى _ بانفاڭگوۋ، ٴۇرىمجى _ شۇيشيگوۋ تاس جولدارىنىڭ ەكى جاعالاۋىنداعى اۋماقتا ٴار ۇلت كادر، بۇقاراسىنىڭ قاجىماي ـ تالماي اعاش ەگىپ، ورمان ٴوسىرۋىنىڭ ارقاسىندا ىقتاسىن ورمانى اۋماعىنىڭ قۇرىلىس كولەمى 29 مىڭ 300 مۋعا جەتتى. اعاش ەگۋ ارەدىگىندە ما شيڭرۇي قاتىستى جاۋاپتى جولداستارمەن اڭگىمەلەسىپ، قاتىستى جاعدايلاردى ىشكەرىلەي ۇعىسىپ، بىلاي دەپ اتاپ كورسەتتى: وسىناۋ جاسىل ٴتۇستى ويداعىداي قۇرىپ، ودان ويداعىداي پايدالانىپ، ەكولوگيالىق ىقتاسىننىڭ قاجەتىمەن جانە بۇقارانىڭ ارەكەتتەنۋ، كوڭىل اشۋ سياقتى قاجەتتەرىمەن ۇشتاستىرىپ، ورمان باقشاسىن قۇرۋدى عىلمي جوسپارلاپ، جاسىلداندىرىلعان اۋماقتىڭ ورتانى قورعاۋ، ەكولوگيا ارقىلى حالىققا تيىمدىلىك جەتكىزۋ سياقتى جاقتارداعى رولىن اناعۇرلىم ويداعىداي ساۋلەلەندىرۋ كەرەك.
ما شيڭرۇي بىلاي دەپ باسا دارىپتەدى: شي جينپيڭ ەكولوگيالىق وركەنيەت يدەياسىن ىشكەرىلەي دايەكتىلەندىرىپ، باس شۋجي شي جينپيڭنىڭ استانادا مىندەتتى اعاش ەگۋ قيمىلىنا قاتىناسقاندا سويلەگەن ماڭىزدى ٴسوزىنىڭ رۋحىن مۇقيات ۇيرەنىپ، دايەكتىلەندىرىپ، جاسىلدى كەڭەيتۋ، جاسىلدى گۇلدەندىرۋ، جاسىلدى قورعاۋدى قاتار اتقارۋعا تاباندى بولىپ، شينجياڭنىڭ ٴىس جۇزىندىك جاعدايىمەن تىعىز ۇشتاستىرىپ، تاۋ، سۋ، ورمان، ەگىنجاي، كول، جايلىم، قۇمدىقتى ٴبىر تۇلعالاندىرا قورعاۋ مەن جۇيەلى وڭاۋدى ٴبىر تۇتاس جوسپارلاپ، مەملەكەت جەرىن جاسىلداندىرۋ قىزمەتىن عىلمي، ناقتى ىلگەرىلەتىپ، كورىكتى شينجياڭنىڭ جاسىل نەگىزىن ۇزدىكسىز تەرەڭ تامىر تارتتىرۋ كەرەك. ساپانى، ونىمدىلىكتى جوعارىلاتۋعا ٴمان بەرىپ، ورماندى، جايلىمدى قورعاۋ، ورماندا ورتتەن ساقتانۋ سياقتى قىزمەتتەردى دەن قويا ويداعىداي ىستەپ، وڭايلىقپەن كەلمەگەن جاسىلداندىرۋ جەتىستىكتەرىن ويداعىداي ساقتاپ، تاكلاماكان ٴشول جيەگى توسقاۋىل شايقاسى سياقتى ٴتۇيىندى ينجەنەريالاردى تىڭعىلىقتى ىلگەرىلەتىپ، ەكولوگيا قالتقىسىن شىنايى تۇلعالاۋ كەرەك. تۇنىق سۋ، جاسىل تاۋدى باعالى بايلىققا اينالدىرۋ جولىن ۇزدىكسىز كەڭەيتىپ، شينجياڭنىڭ ەكولوگيالىق وركەنيەت قۇرىلىسى جەتىستىكتەرىنىڭ ٴار ۇلت بۇقاراسىنا اناعۇرلىم كوپ، اناعۇرلىم ويداعىداي تيىمدىلىك جەتكىزۋىنە مۇمكىندىك جاساۋ كەرەك.
بيىل تۇتاس رايوندا ٴبىر ميلليون 200 مىڭ مۋ جەرگە ورمان ٴوسىرۋ جوسپارلاندى، قازىرگە دەيىن 450 مىڭ مۋ جەرگە ورمان ٴوسىرىلىپ بولدى.
اۆتونوميالى رايوندىق پارتكومنىڭ، حالىق قۇرىلتايى تۇراقتى كوميتەتىنىڭ، ۇكىمەتتىڭ، ساياسي كەڭەستىڭ جانە شينجياڭ اسكەري رايونىنىڭ، شينجياڭ ٴوندىرىس ـ قۇرىلىس بيڭتۋانىنىڭ قاتىستى باسشى جولداستارى، اۆتونوميالى رايوندىق جوعارى حالىق سوتى مەكەمەسىنىڭ، حالىق پروكۋراتۋراسىنىڭ نەگىزگى جاۋاپتى جولداستارى، اۆتونوميالى رايونداعى جانە ٴۇرىمجى قالاسىنداعى ٴىشىنارا كادرلار، جۇمىسشى ـ قىزمەتشىلەر مىندەتتى اعاش ەگۋ قيمىلىنا قاتىناستى.
