انار بۇلت \ شينجياڭ گازەتىنىڭ ٴتىلشىسى ما بەي
تارتىمدى ٴان ـ ٴبي كونسەرتى، باي مازمۇندى دەنە تاربيە قيمىلدارى اسا پەيىلدى شەتەلدىك وقۋشىلارعا جولىققاندا قانداي ۇشقىن شىعار ەكەن؟ 4 ـ ايدىڭ 16 ـ كۇنى تۇستەن كەيىن 2024 ـ جىلعى ”حانزۋ ٴتىلى كوپىرى“ شاڭحاي سەلبەستىك ۇيىمىنا مۇشە ەلدەردەن كەلگەن جاس وقۋشىلار كوكتەمگى لاگەرىنىڭ مۇشەلەرى شينجياڭ شىفان داشۋەسى كۇنلۇن مەكتەپ اۋماعىنداعى مۋزيكا شۋەيۋانى مەن دەنە تاربيە شۋەيۋانىنا بارىپ، وسى اراداعى وقىتۋشى ـ وقۋشىلارمەن پىكىر اۋىستىرىپ ۇيرەندى.
سول كۇنى تاجىكستان گرۋپپاسىنداعى لاگەر مۇشەلەرى شينجياڭ شىفان داشۋەسى كۇنلۇن مەكتەپ اۋماعىنداعى مۋزيكا شۋەيۋانىنا بارعاندا وقىتۋشى ـ وقۋشىلار ولارعا مۋزيكا سالتاناتىن سيلادى. داپ، دومبىرا، گۋجىڭ، پيپا... مۋزيكا شۋەيۋانىنداعى وقىتۋشىلار 10 ٴتۇرلى مۋزيكا اسپابىمەن شينجياڭ مۋزيكاسىن ورىنداعاندا ساحنا استىنان ٴالسىن ـ ٴالى شاپالاق ٴۇنى ەستىلىپ تۇردى. پىكىر اۋىستىرۋ بارىسىندا كوپشىلىك كوپتەگەن ٴبي تۇرىنە جاتتىعۋدان ٴلاززاتتانىپ قانا قويماي، تاعى اندىك مۋزيكا ساباعىن تاماشالادى. مۋزيكانىڭ اسەرىندە تاجىكستاننىڭ لاگەر مۇشەلەرى مەن مۋزيكا شۋەيۋانىنىڭ وقىتۋشى ـ وقۋشىلارى ساحنادا بىرگە ونەر كورسەتتى، تاجىكستاننىڭ لاگەر مۇشەلەرى تاعى كۇيساندىقپەن كۇي ورىندادى. قيمىلدىڭ ەڭ سوڭىندا شينجياڭ شىفان داشۋەسى وقىتۋشى ـ وقۋشىلارىنىڭ ىقىلاسپەن ۇسىنىس ەتۋىمەن كوپشىلىك بىرگە شينجياڭ بيىنە باستى.
”بۇل قيمىلعا قاتىناسقانىما قاتتى قۋاندىم، وقىتۋشى ـ وقۋشىلار دايىنداعان ويىن نومىرلەرىنىڭ ٴبارى توتەنشە جاقسى ەكەن. ٴبارىمىز جۇڭگو مادەنيەتىن ەرەكشە ۇناتامىز، كوپشىلىك ورىنداعان ٴبي، ٴان، مۋزيكا اسپاپتارىن شەرتۋ سياقتىلاردىڭ ٴبارى مەنى قاتتى باۋرادى. كەيىن، وراي بولسا، جۇڭگونىڭ شينجياڭىنا تاعى دا كەلۋدى ٴۇمىت ەتەمىن“، ـ دەدى تاجىكستان رەسەي ـ تاجىكستان سلاۆيان داشۋەسى 2 ـ جىلدىعىنىڭ وقۋشىسى مۇحاباتوۆا شاحنوزا.
”تاجىكستاندىق وقۋشىلارمەن پىكىر اۋىستىرۋ بارىسىندا تۇرلىشە مادەنيەتتىڭ وزگەشە تارتىمدىلىعىن تەرەڭ سەزىندىم، ولاردىڭ جۇڭگو مادەنيەتىنە قىزىعۋشىلىعىن ٴبىلدىم، سونداي ـ اق ولاردىڭ ىنتاسى مەن دوستىعىنان اسەرلەندىم. وسى رەتكى پىكىر اۋىستىرۋ كوز ايامدى كەڭەيتىپ قانا قويماي، تۇرلىشە مادەنيەتتەر اراسىنداعى ايىرماشىلىق پەن ورتاقتىقتى تىپتەن ۇعىندىردى“، ـ دەدى شينجياڭ شىفان داشۋەسى مۋزيكا شۋەيۋانىنىڭ وقۋشىسى ميھىربان ابدۇعىني.
4 ـ ايدىڭ 19 ـ كۇنى شينجياڭ شىفان داشۋەسى ۋىنچۋان مەكتەپ اۋماعىنداعى دۋشۋە عيماراتىنىڭ مادەنيەت زالىندا قىرعىزستان گرۋپپاسىنداعى لاگەر مۇشەلەرى جاڭا لەپ اڭعارتقان بەيزاتتىق مادەنيەت مۇرالارىن سەزىنۋ، پىكىر اۋىستىرۋ قيمىلىنا قاتىناستى.
95 ـ جىلدان كەيىن تۋعان مەملەكەت دارەجەلى بەيزاتتىق مادەنيەت مۇرا ۋاكىلدىك نىسانى ماناستىڭ وبلىس دارەجەلى جالعاستىرۋشىسى تىلەۋالدى بەيسەناحۇن سول جەردە «ماناستى» ايتتى. ونىڭ ٴان اۋەنى بىردە شارىقتاپ، بىردە مامىرلاپ تۇردى. «ماناس» ٴوزىنىڭ وزگەشە كوركەمونەرلىك تارتىمدىلىعىمەن لاگەر مۇشەلەرىن قاتتى باۋرادى.
قيمىل كەزىندە قىرعىزستان مەن تاجىكستاننىڭ لاگەر مۇشەلەرى تاعى شينجياڭ شىفان داشۋەسىندە ٴتۇيىن ٴتۇيۋ، حاتكەرلىك، ۋشۋ سياقتى جۇڭگونىڭ ٴداستۇرلى مادەنيەت ساباقتارىن سەزىندى ٴارى شينجياڭ شىفان داشۋەسىنىڭ وقۋشىلارىمەن بىرگە بىرلەسكەن دوستىق قيمىلىن ورىستەتتى.
الداعى شينجياڭ ساپارىندا لاگەر مۇشەلەرى تاعى شينجياڭ مۇراجايىنا بارىپ، ٴۇرىمجى قالاسىنىڭ 1 ـ ٴنومىرلى مەتروسىنا ٴمىنىپ، جۇڭگو شينجياڭىنىڭ مايەكتى تاريحي مادەنيەت ٴمانىن جانە قولايلى قاتىناسىن سەزىنەتىن بولادى.
”2024 ـ جىلعى ’حانزۋ ٴتىلى كوپىرى‘ شاڭحاي سەلبەستىك ۇيىمىنا مۇشە ەلدەر جاس وقۋشىلارىنىڭ كوكتەمگى لاگەر قيمىلىنا قاتىناسقانىم مەن ٴۇشىن مەرەي بولدى، جۇڭگو مادەنيەتىنىڭ تارتىمدىلىعىن ٴوز باسىمنان سەزىندىم. بولاشاقتا وسىنداي قيمىلدارعا كوپتەپ قاتىناسىپ، اناعۇرلىم كوپ دوستارمەن جۇڭگو مادەنيەتىنىڭ دارقان دا شۇرايلىلىعى جونىندە بىرگە ىزدەنىس جاساۋدى كۇتەمىن“، ـ دەدى تاجىكستان ۇلتتىق داشۋەسى كۇڭزى شۋەيۋانى ورتالىق ٴبولىمىنىڭ وقۋشىسى اليقۇلوۆا ٴديلوروم.
