الەۋمەتتىك يگىلىك ىستەرى جولىن نۇرلاندىرۋشى
_ 8 ـ كەزەكتى اۆتونوميالى رايوندىق ٴمورال ۇلگىسى ۋاڭ يۇڭچياڭ تۋرالى
انار بۇلت \ شينجياڭ گازەتىنىڭ ٴتىلشىسى يان شياۋتيان، پراكتيكانت ياڭ يانيۇي
ەرىكتىلەر دەگەنىمىز كىمدەر؟ باسقالارعا كومەكتەسۋدى قۋانىش ساناۋ، قالتقىسىز ۇلەس قوسۋشىلار ەرىكتىلەر سانالادى. قارسى اتتانۋشىلار دەگەنىمىز كىمدەر؟ حاۋىپ ـ قاتەردەن تايسالماي، كەۋدە كەرىپ العا شىققاندار قارسى اتتانۋشىلار سانالادى. 8 ـ كەزەكتى اۆتونوميالى رايوندىق ٴمورال ۇلگىسى، ٴۇرىمجى قالالىق جاستار ەرىكتى قىزمەت وتەۋ قوعامىنىڭ باس حاتشىسى ۋاڭ يۇڭچياڭنىڭ بويىنان وسى ەكەۋىن دە كورۋگە بولادى.
4 ـ ايدىڭ 2 ـ كۇنى ۋاڭ يۇڭچياڭ ”اۆتيزمگە شالدىققان بالالارعا قامقورلىق“ اتىنداعى قوعامدىق توعىسۋ كوكتەمگى سەيىل قيمىلىن باستاپ، ەرىكتىلەرمەن بىرگە ٴۇرىمجى قالاسىنداعى اۆتيزمگە شالدىققان بالالاردى توقسۇن اۋدانى شياجىن قالاشىعى نانحۋ قىستاعىنداعى ورىك گۇلى باقشاسىنا ەرتىپ بارىپ، ”كوكتەمگى ۋادە“ قيمىلىن ورىستەتتى. باققا تولعان ورىك گۇلىن كورگەن ۋاڭ يۇڭچياڭ بىلاي دەدى: ”اۆتيزمگە شالدىققان بالالارعا كومەكتەسۋدە ولارعا اناعۇرلىم تەرەزەسى تەڭ، قۇرمەتكە تولى جانە سيىسىمدى قوعامدىق ورتا ازىرلەۋ كەرەك“.
ۋاڭ يۇڭچياڭنىڭ الەۋمەتتىك يگىلىك ىستەرىمەن شۇعىلدانعاندىعىنا 20 جىلدىڭ ٴجۇزى بولدى. كەزىندە ”جۇڭگوداعى جاقسى ادام تىزىمىنەن“ ورىن العان، جۇڭگو جاس ەرىكتىلەر تاڭداۋلى جەكە سيلىعىن ەنشىلەگەن. ول تۇراقتاندىرۋعا يە بولعاندىعىنان اسا تەبىرەنىپ: ”كوپتەگەن ادام ٴبىزدىڭ قاتارىمىزعا قوسىلدى، الەۋمەتتىك يگىلىك ىستەرى جولىندا ەندىگارى قۇلازىمايتىن بولدىم، سونداي ـ اق بارعان سايىن قيىرعا جول تارتتىم“، ـ دەدى.
”شينجياڭ مەنىڭ 2 ـ مەكەنىم، مەن كەزىندە وسى ارادا كوپتەگەن قامقورلىققا جانە قولداۋعا يە بولدىم، وسى سۇيىسپەنشىلىكتى جالعاستىرا تۇسسەم دەيمىن“، ـ العاشقى ويىن تىلگە العان ۋاڭ يۇڭچياڭ ٴسوز تيەگىن اعىتتى.
2004 ـ جىلى ۋاڭ يۇڭچياڭ قوسىننان قايتقاننان كەيىن، شارۋاشىلىق قۇرۋدا ساتسىزدىككە ۇشىرايدى، اسحانا اشاتىن ٴبىر ۇيعۇر اعاسى وعان 3 اي بويى قول ۇشىن بەرىپ، اقىرى ونى قيىنشىلىق قىسپاعىنان قۇتىلدىرادى. وسى اعايدىڭ ىقپالىندا، ۋاڭ يۇڭچياڭ سول جىلى بوفىڭ شياۋبيڭ ەرىكتىلەر قىزمەت وتەۋ اترەتىن قۇرىپ، الەۋمەتتىك يگىلىك ىستەرى جولىنا قادام تاستايدى.
ول تالاي رەت ”شينجياڭنىڭ اۋىل ـ قىستاقتارىنداعى بالالاردىڭ ارمانىن جۇزەگە اسىرۋ“ نىسانىن باستادى، كوز شيپاگەرى بولۋدى ٴوز باسىنان كەشىرۋ، ٴورت ٴسوندىرۋ، ورتتەن ساقتانۋ جاۋىنگەرلەرىنىڭ كيىمىن كيۋ، تەڭىز ـ مۇحيت سارايىنا بارىپ اكۋلانى كورۋ... ٴسويتىپ، ٴار ۇلت اۋىل ـ قىستاق بالالارىنىڭ تۇرلىشە تۇرمىستى سەزىنۋىنە مۇمكىندىك جاسادى. ساناققا نەگىزدەلگەندە، 2015 ـ جىلدان قازىرگە دەيىن ” شينجياڭنىڭ اۋىل ـ قىستاقتارىنداعى بالالاردىڭ ارمانىن جۇزەگە اسىرۋ“ نىسانى 35 مىڭ ادامدى(رەت) قاتىناسۋعا باۋراپ، 1442 وقۋشىنىڭ ارمانىن جۇزەگە اسىرۋىنا قول ۇشىن بەرگەن. نىسان ىلگەرىندى ـ كەيىندى اۆتونوميالى رايوندىق جاستار ەرىكتى قىزمەت وتەۋ نىسانى جارىسىنىڭ تاڭداۋلى سيلىعىن، جۇڭگو جاستار ەرىكتى قىزمەت وتەۋ نىسانى جارىسىنىڭ قولا مەدال سيلىعىن الدى.
ٴۇشتۇرپاندا تۋىلعان 7.1 بال جەر سىلكىنىسى، جيشىشاندا تۋىلعان 6.2 بال جەر سىلكىنىسى سياقتى قاتەردەن اراشالاۋ، اپاتتان قۇتقارۋ ورىندارىنىڭ بارىنەن ۋاڭ يۇڭچياڭنىڭ قاربالاستىققا تۇسكەن بەينەسىن كورۋگە بولادى.
”ٴبىر جاقتا قيىنشىلىق بولسا كوپ بولىپ كومەكتەستى، جيشىشان حالقى سىزگە العىس ايتادى!“ بيىل 1 ـ ايدىڭ 7 ـ كۇنى ۋاڭ يۇڭچياڭ 30 اتكريتكا تاپسىرىپ الدى، اتكريتكانى جولداۋشى گانسۋ ولكەسى لينشيا حۇيزۋ اۆتونوميالى وبلىسى جيشىشان باۋ ـ ان، دۇڭشياڭ، سالا اۆتونوميالى اۋدانى پۋچۋان اۋىلى شياجۋاڭ باستاۋىش مەكتەبىنىڭ وقۋشىلارى ەكەن.
جيشىشاندا جەر سىلكىنگەننەن كەيىن، ۋاڭ يۇڭچياڭ جانە جۇڭگو اۋىل ـ قىستاق ىستەرىن دامىتۋ قور قوعامىنىڭ 3 ەرىكتىسى ٴۇرىمجى قالاسىنان ۇشاققا وتىرىپ لانجوۋ قالاسىنا بارىپ، ونان سوڭ اۆتوكولىكپەن جيشىشان اۋدانىنا بارىپ قۇتقارۋ ـ كومەكتەسۋ قىزمەتىن ورىستەتتى. ول تاعى جان ـ جاقتان جينالعان جىلۋ اقشاعا اپات رايونىنا شۇعىل قاجەتتى ماقتالى سۇيرەتپە شاقاي، اۋىز سۋ قاتارلى زاتتىق بۇيىمداردى ساتىپ الىپ، اپاتقا ۇشىراعان بۇقارانىڭ قولىنا تابىس ەتتى.
ۋاڭ يۇڭچياڭ تاعى ٴۇرىمجى قالاسىنداعى ەرىكتىلەردى 40 قالتا كۇرىشتى، 10 قويدى شۇعىل تاسىپ جەتكىزۋگە سايكەستىرىپ، جيشىشان اۋدانىنداعى ٴبىر ۋاقىتتىق ورنالاستىرۋ تۇيىنىندە پالاۋ باستى. ونىڭ اپاتقا ۇشىراعان بۇقاراعا پالاۋ سالىپ بەرگەن كەسكىنى توراپتا جاريالانىپ، كوپتەگەن توراپتاستىڭ القاۋىنا بولەندى.
جۇرەگىندە قالتقىسىز ۇلەس قوسۋ رۋحى، يىعىندا الەۋمەتتىك يگىلىك ىستەرى ٴۇشىن قىزمەت وتەۋ جاۋاپكەرشىلىگى، تابانىنىڭ استىندا قارسى اتتانعان اياق ٴىزى جاتىر. 20 جىلدان بەرى، ۋاڭ يۇڭچياڭ ٴىس ـ ارەكەتتەرى ارقىلى الەۋمەتتىك يگىلىك رۋحى جونىندەگى تانىمدى ٴتۇسىندىردى. ”قاي جەرگە كومەك قاجەت بولسا، مەن سول ارادان تابىلامىن، الەۋمەتتىك يگىلىك ىستەرى جولىندا بۇلجىماي جۇرە بەرەمىن“، ـ دەدى ۋاڭ يۇڭچياڭ.
