انار بۇلت \ شينجياڭ گازەتىنىڭ ٴتىلشىسى شيە حۇيبيان 4 ـ ايدىڭ 14 ـ كۇنى ۇرىمجىدەن حابارلايدى. اۆتونوميالى رايوندىق عىلىم ـ تەحنيكا مەڭگەرمەسىنەن ۇعىسۋىمىزشا، شينجياڭ 15 ميلليون يۋان قارجى قوسىپ، ٴتوزىمدى ماقتا بيولوگيالىق تۇقىم جەتىلدىرۋ تۇعىرىن قۇرادى ەكەن، ٴسويتىپ، شينجياڭ ماقتاسىنىڭ ماڭىزدى سورتتارىنىڭ توزىمدىلىگىن جوعارىلاتىپ، سورتاڭ، جوعارى تەمپەراتۋرا، ۇسىك اپاتى سياقتى ٴتيىمسىز ىقپالدارعا توتەپ بەرەدى ەكەن.
وسىمدىكتىڭ توزىمدىلىگى دەگەنىمىز وسىمدىكتىڭ ۇسىك اپاتىنا، قۋاڭشىلىققا، سورتاڭدىققا، دەرت ـ دەربەزگە قارسىلىق قۋاتى سياقتى ٴتيىمسىز ورتاعا قارسىلىق قۋاتىن مەڭزەيدى. وسىمدىكتەردىڭ تاماشا توزىمدىلىك كۇيى تابيعي شارت ـ جاعدايدا باسقا تۇردەگى وسىمدىكتەردىڭ دەنەسىنە اۋىسۋى وتە قيىن، بۇل ٴۇشىن گەن ينجەنەرياسىندىق جاقسارتۋ سياقتى بيولوگيالىق تۇقىم جەتىلدىرۋ تەحنيكاسىنان پايدالانىپ، ساپالى گەندى باسقا داقىلدارعا ەنگىزۋ جولىمەن توزىمدىلىكتى جوعارىلاتۋعا تۋرا كەلەدى.
ٴتىلشىنىڭ ۇعىسۋىنا قاراعاندا، قازىر شينجياڭ ماقتاسىنىڭ نەگىزگى ەگىلەتىن سورتتارى، سونداي ـ اق كەڭ كولەمدە جالپىلاستىرىلاتىن سورتتاردىڭ جالپىلىق قاسيەتى جاقسى، جوعارى ٴونىمدى، ساپالى بولۋ سياقتى ەرەكشەلىكتەرگە يە، ٴبىراق توزىمدىلىگى سياقتى جاقتاردا قۋاتىن تاعى دا جوعارىلاتا تۇسۋگە تۋرا كەلەدى ەكەن. ەرەكشە ناشار اۋا رايى، كليمات وقيعالارى ٴجيى تۋىلعان، كوپ تۋىلعان جاعدايدا، شينجياڭ ماقتاسى سورتىنىڭ توزىمدىلىگىن جوعارىلاتۋ ٴتىپتى دە كوكەي تەستى بولىپ وتىر.
ماقتا سورتىنىڭ جالپى تۇلعالىق قاسيەتىن جوعارىلاتۋ ٴۇشىن، شينجياڭ اۋىل شارۋاشىلىق عىلىم اكادەمياسى ەكونوميكالىق داقىلداردى زەرتتەۋ ورنى قايتا ـ قايتا دالەلدەۋ ارقىلى ”ماقتا سورتىنىڭ كەلەلى اۋىل شارۋاشىلىق تەحنيكالىق قاسيەتىنە تالداۋ جاساۋ جانە مولەكۋلالىق جوبالاۋ، تۇقىم جەتىلدىرۋ“ نىسانىن جوبالاپ جوسپارلادى. بۇل نىسان شينجياڭنىڭ بيىل جاريالاعان ”قابىلەتتىلەر باستاماشى بولۋ“ 5 نىسانىنىڭ بىرەۋى بولىپ، نىسانعا ساياتىن سوما 15 ميلليون يۋان، اتقارۋ مەرزىمى 3 جىل بولدى.
جۇڭگو اۋىل شارۋاشىلىق عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعى _ وسى نىسانعا ات سالىسۋشى جاق. بولاشاقتا ەكى جاق دارىندىلاردى باۋلۋ، تۇعىر قۇرىلىسى، بيولوگيالىق تۇقىم جەتىلدىرۋدە جاڭالىق اشۋ جۇيەسىن ورناتۋ سياقتى جاقتاردا سەلبەستىكتى كۇشەيتىپ، شينجياڭنىڭ ماقتا بيولوگيالىق تۇقىم جەتىلدىرۋىندە جاڭالىق اشۋىنا نەگىز قالايدى.
نىسانعا نەگىزگى ات سالىسۋشى، جۇڭگو اۋىل شارۋاشىلىق عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعىنىڭ اعا زەرتتەۋشىسى گى شياۋياڭ بىلاي دەدى: بۇل نىسان شينجياڭ ماقتاسى ماڭىزدى سورتىنىڭ قاينارى ماقتا 8 ـ ٴنومىرلى نەمەسە باسقا دا ماڭىزدى ماقتا سورتتارىن دانەكەر ەتىپ، باسقا قورشاعان ورتا اسەرىنە ٴتوزىمدى وسىمدىكتەردىڭ جوعارى تەمپەراتۋراعا، سۋىققا نەمەسە سورتاڭدىققا ٴتوزىمدى تاماشا گەندەرىن اشادى ٴارى ونى گەن قۇرىلىسىن جاقسارتۋ تەحنيكاسى ارقىلى ماقتاعا ەنگىزىپ، ماقتا سورتىنىڭ جالپى تۇلعالىق قاسيەتىن جوعارىلاتادى، سول ارقىلى ٴتۇرلى توتەنشە ناشار جاعدايعا ٴونىمدى توتەپ بەرۋگە بولادى.
وسى نىسانعا سۇيەنە وتىرىپ، جۇڭگو اۋىل شارۋاشىلىق عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعى، شينجياڭ اۋىل شارۋاشىلىق عىلىم اكادەمياسى ەكونوميكالىق داقىلداردى زەرتتەۋ ورنى سياقتى ورىندار شينجياڭ ٴتوزىمدى ماقتا بيولوگيالىق تۇقىم جەتىلدىرۋ تۇعىرىن بىرگە قۇرادى. بۇل تۇعىر بيولوگيالىق تۇقىم جەتىلدىرۋ تەحنيكاسى، گەن اشۋ، چيپ اشۋ، ماتەريال جاساۋ سياقتى تاجىريبە تەحنيكالارى مەن تاجىريبە ادىستەرىن ٴبىر تۇلعالاندىرىپ، ماقتا تۇقىمىن جەتىلدىرۋ بارىسىندا تاماشا گەندى اشۋدان تاماشا ماتەريالداردى جاساۋعا دەيىنگى پەريودتى 1 _ 2 جىلعا قىسقارتىپ، شينجياڭ ماقتاسىنىڭ بيولوگيالىق تۇقىم جەتىلدىرۋ ونىمدىلىگىن ٴونىمدى جوعارىلاتادى.
گى شياۋياڭ بىلاي دەدى: بۇل تۇعىر جاپپاي قولدانىلاتىن بيولوگيالىق تەحنيكا جۇيەسى سياقتىلاردى زەرتتەپ اشادى، بۇل ماقتادان باستالعانىمەن، ماقتامەن عانا شەكتەلمەيدى، باسقا داقىلداردىڭ توزىمدىلىگىن جوعارىلاتۋعا دا پايدالانىلادى.
