انار بۇلت \ شينجياڭ گازەتىنىڭ ٴتىلشىسى ساۋ حۋا 4 ـ ايدىڭ 14 ـ كۇنى ۇرىمجىدەن حابارلايدى. اۆتونوميالى رايوندىق ورمان شارۋاشىلىعى جانە جايلىم مەكەمەسىنەن ۇعىسۋىمىزشا، سوڭعى جىلدارى شينجياڭنىڭ جەمىس ورمانى ونىمدەرىنىڭ حالىقارالىق بازاردى اشۋ سەرپىنى ۇزدىكسىز ارتقان، قازىر جەمىس ـ جيدەك ەكسپورت ەتۋ بويىنشا تىركەۋگە الدىرىلعان جەمىس باعى 205كە جەتىپ، ٴجۇزىم، الما، قۇمىل قاۋىنى، شينمەي، شاپتول سياقتى 10 نەشە ٴتۇردى قامتىعان.
ۇعىسۋعا قاراعاندا، شينجياڭدا جەمىس ـ جيدەك ەكسپورت ەتۋ بويىنشا تىركەۋگە الدىرىلعان جەمىس باعى نەگىزىنەن ىلە قازاق اۆتونوميالى وبلىسى، بايىنعولين موڭعۇل اۆتونوميالى وبلىسى، سانجى حۇيزۋ اۆتونوميالى وبلىسى، اقسۋ ايماعى، قاشقار ايماعى جانە شىحىزى قالاسى سياقتى جەرلەرگە شوعىرلانعان، مۇنىڭ ىشىندە ٴجۇزىم ەكسپورتى جەمىس باقتارى جەمىس ـ جيدەك ەكسپورت ەتۋ بويىنشا تىركەۋگە الدىرعان جەمىس باقتارى جالپى سانىنىڭ جارىمىنا جۋىعىن ۇستاعان، نەگىزىنەن تيانشاننىڭ سولتۇستىك بوكتەرىندەگى قالالارعا تارالعان، سانجى قالاسى مەن شىحىزى قالاسى بۇكىل شينجياڭداعى جاس ٴجۇزىم ەكسپورت ەتەتىن شوعىرلى ٴوڭىر؛ كورلا المۇرتىن ەكسپورت ەتەتىن جەمىس باقتارى بايىنعولين وبلىسى مەن اقسۋ ايماعىنا تارالعان؛ ىلە وبلىسىنداعى ەكسپورت ەتەتىن جەمىس باقتارىنىڭ ٴونىم ٴتۇرى الۋان ٴتۇرلى، شيە، شينمەي، ورىك، قۇم المۇرت، ٴجۇزىم، الما سياقتى كوپتەگەن ٴونىم ٴتۇرىن قامتيدى، قورعاس شەكارا وتكەلىنىڭ باسىمدىعىن سۇيەنىش ەتكەندىكتەن، بۇل وبلىس شينجياڭداعى جەمىس ـ جيدەك ەكسپورت ەتۋ بويىنشا تىركەۋگە الدىرعان جەمىس باعى ەڭ كوپ ٴوڭىر سانالادى. بۇدان سىرت، قۇمىل قاۋىنىن ەكسپورت ەتەتىن جەمىس باقتارى قۇمىل قالاسى مەن تۇرپان قالاسىنا شوعىرلانعان، شىرعاناق ەكسپورت ەتەتىن جەمىس باقتارى التاي ايماعىنىڭ شىڭگىل اۋدانىنا، شينمەي ەكسپورت ەتەتىن جەمىس باقتارى ٴپايزاۋات اۋدانىنا شوعىرلانعان.
سوڭعى جىلدارى شينجياڭ ەرەكشە جەمىس ورمانى بايلىعى باسىمدىعىنا سۇيەنىپ، جەمىس ـ جيدەك ساپاسىن جوعارىلاتۋ، ەكسپورت ەتىلەتىن جەمىس ـ جيدەك بازاسى قۇرىلىسىن كۇشەيتۋ، جەمىس ورمانى ەكسپورت كاسىپورىندارىن زورايتۋ سياقتى شارالار ارقىلى جەمىس ـ جيدەكتى سىرتقا ساتۋ ارناسىن ۇزدىكسىز كەڭەيتكەن. جەر ـ جەر ”ەكى ٴونىم، ٴبىر ولشەم“، ”جەمىس ـ جيدەك ەكسپورت ەتۋ بويىنشا تىركەۋگە الدىرعان جەمىس باعىن“ تۇتقا ەتىپ، جاسىل، ورگانيكالى، ساپالى جەمىس ـ جيدەك ٴوندىرۋ قۋاتىن جوعارىلاتقان. قازىرگە دەيىن شينجياڭنىڭ جەمىس ورمانى تۇرىندەگى جاسىل ونىمدەرىنەن 81ى كۋالاندىرىلعان، ورگانيكالىق اۋىل شارۋاشىلىق ونىمدەرىنەن 322سى كۋالاندىرىلعان، اۋىل شارۋاشىلىق ونىمدەرىنىڭ جاعراپيالىق بەلگىسىنەن 28ى كۋالاندىرىلعان. 2023 ـ جىلدىڭ سوڭىنا دەيىن شينجياڭدا ەكسپورت ەتۋ تولىمدىلىعىنا يە جەمىس ورمانى كاسىپورنى 300دەن اسىپ، كاسىپورىنداردىڭ سانى 2022 ـ جىلداعىدان %30تەن استام ارتقان.
بيىل شينجياڭ كاسىپورىنداردى شەتەلدە بولىمشە سەرىكتەستىك قۇرۋعا، الدىڭعى قامبا قۇرۋعا شابىتتاندىرۋ جانە قولداۋ ارقىلى جەمىس ورمانىندا قالامشا ٴوسىرۋ، ەگۋ، وڭدەۋ، ساتۋ، ماركا قۇرىلىسى سياقتى جاقتاردا شەتەلدەگى وزىق كاسىپورىندارمەن سەلبەستىك، اۋىس ـ كۇيىس جاساسۋدى كۇشەيتىپ، جەمىس ورمانى كاسىپورىندارىن حالىقارالىق كورمەگە بەلسەنە قاتىناسۋعا ۇيىمداستىرىپ، شينجياڭنىڭ جەمىس ـ جيدەك ونىمدەرىن سىرتقا ساتۋدىڭ جاڭا دامۋ جاعدايىن جەدەل قالىپتاستىرادى.
2023 ـ جىلدىڭ سوڭىنا دەيىن شينجياڭنىڭ جەمىس ورمانى اۋدانى 18 ميلليون 160 مىڭ مۋعا (بيڭتۋاندى قامتىمايدى) جەتىپ، ٴونىم مولشەرى 8 ميلليون 760 مىڭ توننا بولىپ، ٴونىم قۇنى 60 ميلليارد يۋاننان اسقان.
