تاشقورعان تاجىك اۆتونوميالى اۋدانى
”بۇل وڭىردە شەكسىز ساۋدا ورايى بار“
انار بۇلت \ شينجياڭ گازەتىنىڭ ءتىلشىسى سۇڭ ۋيگو
”بۇل ارادا تۇرمىس كەشىرگەنىمە 12 جىل بولدى. بۇل وڭىردە شەكسىز ساۋدا ورايى بار، وسىندا كەلىپ ساۋدا ىستەيتىن پاكيستاندىقتار بارعان سايىن كوبەيۋدە“، - دەدى 11 - ايدىڭ 5 - كۇنى تاشقورعان تاجىك اۆتونوميالى اۋدانىنداعى ءبىر اشەكەي بۇيىمدار ساۋدا دۇكەنىندە پاكيستاندىق ساۋداگەر اليكىرىم البەك.
بيىل 28 جاستاعى اليكىرىم البەك پاكيستاننىڭ حۇنزا وڭىرىنەن كەلگەن، قازىر تاشقورعان تاجىك اۆتونوميالى اۋدانىندا پاكيستان ۋارشيدي اشەكەي بۇيىمدار ساۋدا دۇكەنىن اشىپ وتىر.
”اكەم 1993 - جىلدان باستاپ وسىندا ساۋدا ىستەدى. قازىر نەمەرە ءىنىم ەكەۋىمىز وسى دۇكەندە تيجارات جۇرگىزەمىز. اعام مەن نەمەرە اعام ەكەۋى تاعى ءبىر دۇكەن اشتى“، - دەدى اليكىرىم البەك.
اليكىرىم البەكتىڭ ەسىندە قالۋىنشا، بالا كۇنىندە اكەسى مەن كىشى اكەسى ۋاق - ۋاق الىس ساپارعا اتتانىپ، قايتا ورالعاندا كامپيت، كيىم - كەشەك، سونداي - اق ءتۇرلى جابدىقتار مەن ەلەكتر اسپاپتارى سياقتى تاڭسىق تاۋارلاردى الا كەلەتىن. بۇل تاۋارلار پاكيستاندا وتە از بولاتىن، اكەسى وعان بۇل تاۋارلاردىڭ جۇڭگودان كەلگەندىگىن ايتىپ وتىراتىن.
2011 - جىلى اليكىرىم البەك تۇڭعىش رەت اكەسىمەن بىرگە جۇڭگوعا كەلدى. وعان ءبارى دە ەرەكشە تاڭسىق سەزىلدى. بىرتىندەپ ول بۇل اراداعى ادامداردىڭ وزىنە جانە اكەسىنە ۇنەمى جىلى جۇزبەن قارايتىندىعىن، اكەسى ەكەۋى مەيلى قانداي قيىنشىلىققا جولىقسا دا، قول ۇشىن بەرەتىن ادامداردىڭ بار ەكەنىن بايقايدى. تۇرمىس بارىسىنداعى وسىنداي ۇساق ىستەر وعان قاشاندا ىزگىلىك پەن مەيىردى سەزىندىرەتىن.
ءدال وسى جىلى اكەسى تاشقورعان تاجىك اۆتونوميالى اۋدانىنداعى دۇكەندى اليكىرىمنىڭ باسقارۋىنا تاپسىرىپ، ءوزى پاكيستاننىڭ حۇنزاسىنا قايتىپ، جۇڭگو تاۋارلارىن ساتاتىن دۇكەن اشتى، كىشى اكەسى نەگىزىنەن ەكى ەل زاتتارىن تاسىمالداۋعا جاۋاپتى بولدى. اليكىرىم البەك ”ساۋداگەر ۇرپاعىنا“ اينالدى.
ۋاقىتتىڭ وتۋىمەن اليكىرىم البەكتىڭ دۇكەنىنە كەلىپ پاكيستاننىڭ ەرەكشە ونىمدەرىن ساتىپ الاتىن الارماندار بارعان سايىن كوبەيدى. ساۋداسى كۇسەتتەنە ءتۇستى، ول ءوزى دۇكەن اشىپ وتىرعان وسى 2 قاباتتى عيماراتتى ساتىپ الىپ، استىڭعى قاباتىن دۇكەن جانە قامبا، ۇستىڭگى قاباتىن ءوزى مەن نەمەرە اعاسىنىڭ جاتىن بولمەسى ەتتى. پاكيستانعا قايتقان سايىن، ول ءوتىمدى جۇڭگو تاۋارلارىن الا باراتىن دا، قايتارىندا پاكيستاننىڭ زاتتارىن الا كەلەتىن.
تاشقورعان تاجىك اۆتونوميالى اۋدانىندا اليكىرىم البەك سياقتى ءبىرتالاي پاكيستاندىق ساۋداگەر بار، احمەتوللا بەك تە وسىلاردىڭ ءبىرى. ول اۋدانداعى ىنتىماق شاعىن اۋماعىندا كۇندەلىكتى بۇيىمدار ساۋدا دۇكەنىن اشادى.
”بۇل دۇكەندى اشقانىما 7 جىل بولدى، ساۋدا جامان ەمەس. ساياحاتتىڭ قاۋىرت مەزگىلىندە ءبىر كۇنگى ساۋدا كىرىسىم 1000 يۋاننان اسادى. قازىر 2 ۇلىم، ءبىر قىزىم دا سىرتقى ساۋدامەن اينالىسادى، جۇڭگونىڭ تاۋارلارى پاكيستاندا ەرەكشە قارسى الىنادى“، - دەدى احمەتوللا بەك.
قاجەت ەتكەن الارمانداردىڭ وزىمەن دەر كەزىندە حابارلاسۋىنا قولايلى بولۋ ءۇشىن، احمەتوللا بەكتىڭ دۇكەنىنىڭ ماڭدايشالىعىنا سەرىكتەستىكتىڭ اتىنان سىرت، ونىڭ جۇڭگو، پاكيستان ەكى ەلدەگى قول تەلەفون ءنومىرى دە جازىلىپتى.
دۇكەندە ءيىس سابىن، ءاتىر، قالپاق سياقتى كۇندەلىكتى بۇيىمدار مەن قاس تاسى بۇيىمدارى تولىپ تۇر، احمەتوللا بەك ءار كۇنى وسى تاۋارلاردى ءسۇرتىپ تازالاپ تۇرادى. ”وسىلاي بولعاندا الارماندارعا جاقسى كوڭىل كۇي سيلاۋعا بولادى“، - دەيدى ول.
”ءبىر بەلدەۋ، ءبىر جولدى“ بىرگە قۇرۋدىڭ ىشكەرىلەي ىلگەرىلەتىلۋىنە بايلانىستى، تاشقورعان تاجىك اۆتونوميالى اۋدانىنىڭ شارۋاشىلىق - ساۋدا ورتاسى ۇزدىكسىز ساپالىلانىپ، كەلەتىن پاكيستاندىق ساۋداگەرلەر بارعان سايىن كوبەيە ءتۇستى.
ساناققا قاراعاندا، 10 - ايدىڭ 31 - كۇنىنە دەيىن حونچيراپ شەكارا وتكەلىنەن بيىل شەكارادان 7798 اۆتوموبيل (رەت) كىرىپ - شىعىپ، جۇك تاسىمال مولشەرى 24 مىڭ تونناعا جەتكەن. جۇڭگو مەن پاكيستان ساۋداگەرلەرىنە ءتىپتى دە جاقسى قىزمەت وتەۋ ءۇشىن، بيىل قىس ماۋسىمىنان باستاپ حونچيراپ كەدەنى ماۋسىم سيپاتتى بەكىتىلمەيتىن بولدى، بيىل 12 - ايدان كەلەر جىلى 3 - ايعا دەيىن، ءار ايدا شەكتى مەرزىمدە كەدەننەن ۋاقىتشا 10 كۇن وتكىزىپ، جۇڭگو مەن پاكيستان ەكى ەل ساۋداگەرلەرىنىڭ جانە جۇكتەرىنىڭ اناعۇرلىم قولايلى، جوعارى ءونىمدى اينالىمىنا مۇمكىندىك جاسايدى.
