انار بۇلت \ شينجياڭ گازەتىنىڭ ءتىلشىسى جاڭ يۇنمەي 11 - ايدىڭ 7 - كۇنى ۇرىمجىدەن حابارلايدى. 11 - ايدىڭ 7 - كۇنى كەشتە اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز ۇرىمجىدە كيپر ەڭبەكشى حالىق العاباسار پارتياسى (تومەندە قىسقارتىلىپ ەڭبەكشى حالىق العاباسار پارتياسى دەلىنەدى) ورتالىق كوميتەتى ساياسي بيۋروسىنىڭ مۇشەسى، ەكونوميكاعا جاۋاپتى شۋجيى نيكوس يوونۋمەن كەزدەسىپ، جۇڭگو شينجياڭىنىڭ كيپرمەن ءار سالاداعى سەلبەستىكتى اناعۇرلىم تەرەڭدەتۋى جونىندە ىشكەرىلەي پىكىرلەستى، اڭگىمەلەستى.
ەركىن تۇنياز اۆتونوميالى رايوندىق پارتكوم مەن ۇكىمەت اتىنان نيكوس يوونۋدىڭ ساپارلاي كەلگەندىگىن قارسى الاتىندىعىن ءبىلدىردى ءارى بيىل جىل باسىنان بەرگى شينجياڭنىڭ ەكونوميكالىق، قوعامدىق دامۋ جاعدايىن تانىستىردى. ول بىلاي دەدى: ءتوراعا شي جينپيڭنىڭ ىقىلاستى قامقورلىعىندا، شينجياڭ جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىن، ورنالاستىرۋلارىن دەن قويا دايەكتىلەندىرىپ، دامۋ جاعدايى بارعان سايىن جاقسارا ءتۇستى، تاياۋدا جۇڭگو (شينجياڭ) ەركىن ساۋدا سىناق رايونى بەكىتۋدەن ءوتىپ قۇرىلدى، شينجياڭنىڭ سىرتقا اشىلعان ەسىگى ونان ارى ايقارا اشىلادى. جۇڭگو، كيپر ەكى ەلدىڭ دوستىق قارىم - قاتىناسى ارىدان جالعاسقان، ۋاقىت وتكەن سايىن بەكەمدەلە ءتۇستى، ەڭبەكشى حالىق العاباسار پارتياسى جۇڭگونىڭ جانە جۇڭگو حالقىنىڭ كونە دوسى، جۇڭگو كوممۋنيستىك پارتياسىنىڭ جاقسى دوسى. ەكى جاقتىڭ دوستىق بارىس - كەلىستى ۇزدىكسىز نىعايتىپ، بايلانىستى، اۋىس - كۇيىستى كۇشەيتىپ، ەكونوميكا، مادەنيەت - ساياحات سياقتى جاقتارداعى سەلبەستىكتى اناعۇرلىم كۇشەيتىپ، ەكى جاقتىڭ دوستىعىنىڭ ۇزدىكسىز تەرەڭدەۋىن ۇزبەي جەبەۋدى ءۇمىت ەتەمىن.
نيكوس يوونۋ مىنالاردى ءبىلدىردى: ۇرىمجىدە جانە تۇرپاندا ەكسكۋرسيادا، ساپاردا بولۋ ارقىلى شينجياڭ حالقىنىڭ ىقىلاستى قوناعۋارلىعىن جانە شينجياڭ ەكونوميكاسىنىڭ قارىشتاپ دامىعاندىعىن سەزىندىك، شينجياڭدا كورگەن - بىلگەندەرىمىزدى اناعۇرلىم كوپ اداممەن بولىسەمىز، سونىمەن بىرگە 8 - كەزەكتى جۇڭگو − ازيا − ەۆروپا كورمەسىنە قاتىناسۋدىڭ قاتىستى دايىندىق قىزمەتتەرىن بەلسەنە ويداعىداي ىستەپ، جۇڭگونىڭ شينجياڭىمەن ءار سالاداعى اۋىس - كۇيىستى، سەلبەستىكتى ونان ارى ىلگەرىلەتەمىز.
اۆتونوميالى رايوننىڭ قاتىستى ايماق، وبلىس، قالالارىنداعى جانە تاراۋلارىنداعى جاۋاپتى جولداستار كەزدەسۋگە قاتىناستى.
