انار بۇلت \ شينجياڭ گازەتىنىڭ ءتىلشىسى ۋاڭ شيڭرۇي 11 - ايدىڭ 6 - كۇنى ۇرىمجىدەن حابارلايدى. ايگىلى جازۋشى، تۇڭعىش كەزەكتى لۋشۇن ادەبيەت سيلىعىنىڭ يەگەرى جوۋ تاۋ 11 - ايدىڭ 4 - كۇنى تۇتقيىل جۇرەك بۇلشىق ەتىنىڭ ولەتتەنۋى سەبەبىنەن ۇرىمجىدە قايتىس بولدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز جەكە - جەكە گۇل شەڭبەر ۇسىنىپ، ونىڭ قايتىس بولعاندىعىنا ازا ءبىلدىردى ءارى ونىڭ وتباسىنداعىلارىنان شىنايى حال سۇرادى.
ما شيڭرۇيدىڭ، ەركىن تۇنيازدىڭ تاپسىرۋىمەن اۆتونوميالى رايوندىق پارتكومنىڭ تۇراقتى مۇشەسى، باس حاتشى قادەن كابەن 11 - ايدىڭ 6 - كۇنى تۇستەن بۇرىن جوۋ تاۋدىڭ وتباسىنداعىلارىنا امانداسىپ، اۆتونوميالى رايوندىق پارتكوم، ۇكىمەت اتىنان ولاردان حال سۇرادى ءارى جوۋ تاۋدىڭ شينجياڭ ادەبيەت ىستەرىنىڭ دامۋىنا قوسقان ۇلەسىنە جوعارى باعا بەردى.
جوۋ تاۋ، 1946 - جىلى تۋعان، سانشيلىق، 1955 - جىلى اتا - اناسىمەن بىرگە بەيجيڭنەن شينجياڭعا كوشىپ كەلىپ قونىستانعان، كوزى تىرىسىندە شينجياڭ اسكەري رايونى جاسامپازدىق كەڭسەسىنىڭ مەڭگەرۋشىسى، شينجياڭ ادەبيەت - كوركەمونەرشىلەر بىرلەستىگىنىڭ جانە جازۋشىلار قوعامىنىڭ قۇرمەتتى ءتوراعاسى بولعان. جوۋ تاۋ شينجياڭنىڭ وڭىرلىك شىعارماشىلىعىمەن تانىلعان، ول ۇزاق ۋاقىت شينجياڭعا تامىر تارتىپ، ءومىر بويى شينجياڭدى ءسۇيىپ، شينجياڭعا قاتىستى قىرۋار ادەبيەت تاڭداۋلى تۋىندىلارىن جازدى، ايگىلى شىعارمالارىنان ولەڭدەر جيناقتارى «قاسيەتتى تاۋ»، «كەرقۇلان ءۇيىرى»، شالقىمالار جيناقتارى «دۇنيەدە سيرەك كەزدەسەتىن قۇس»، «ۇلى قورعان بويىنداعى كوشپەندى مالشىلار» سياقتى 40تان استام تۋىندىسى بار. ونىڭ شالقىمالار جيناعى «جۇڭحۋا شالقىمالارى ەرەكشە ساقتالاتىن كىتاپتارى . جوۋ تاۋ تومى» مەملەكەتتىك تۇڭعىش كەزەكتى لۋشۇن ادەبيەت سيلىعىن العان، تۋىندىلارى جۇڭگو جاڭا ولەڭدەر سيلىعىنا يە بولعان، كوپ رەت ازاتتىق ارميا ادەبيەت - كوركەمونەر سيلىعىنا يە بولعان.
