سىرت جەرلەردەگى ساۋداگەرلەر شينجياڭنىڭ سۋ ونىمدەرىن تالاسا ساتىپ الدى

سىرت جەرلەردەگى ساۋداگەرلەر شينجياڭنىڭ سۋ ونىمدەرىن تالاسا ساتىپ الدى

　　□ انار بۇلت \ شينجياڭ گازەتىنىڭ ءتىلشىسى ما ينيڭ

　　10 - ايدىڭ 5 - كۇنى التاي ايماعىنىڭ 2 توننا قىسقىشى، ىلە قازاق اۆتونوميالى وبلىسىنىڭ 6. 3 توننا سالمون بالىعى ءۇرىمجى ارقىلى شاڭحاي، چىڭدۋ قاتارلى جەرلەرگە جەتكىزىلىپ، جەر - جەردىڭ مەرەكەلىك داستارقانىنا شينجياڭ ءدامىن تاعى قوستى. 9 - ايدان بەرى شينجياڭنىڭ جاس ونىمدەرى قاجەتتى قامداي الماي، سىرت جەرلەردەگى ساۋداگەرلەردى ىركەس - تىركەس كەلىپ ساتىپ الۋعا باۋرادى.

　　سوڭعى كۇندەرى شاڭحايدان كەلگەن ساتىپ الۋشى ساۋداگەر باي جىحۋا التاي قالاسىندا قىسقىش ساتىپ الدى. ”بيىل شينجياڭنىڭ سۋ ونىمدەرى، اسىرەسە، التاي ايماعىندا وندىرىلگەن قىسقىش ەرەكشە ءوتىمدى بولدى“. ول بىلاي دەدى: جەرگىلىكتى ورىننىڭ سۋ ساپاسى جاقسى، قىسقىشتاردىڭ ەتى ءبىرشاما جۇمساق بولعاندىقتان، كوپتەگەن قايتا قايىرىلعان الارماندارعا يە بولدى.

　　التاي قالالىق اۋىل شارۋاشىلىعى، اۋىل - قىستاق مەكەمەسىنىڭ ساناعىنا قاراعاندا، بيىل بۇكىل قالا بويىنشا قىسقىشتىڭ ءونىم مولشەرى مەجەمەن 180 توننا اينالاسىندا بولادى ەكەن. ”9 - ايدىڭ 1 - كۇنى اۋلاعاننان بەرى بازادا باعىلعان قىسقىش شينجياڭ سىرتىنداعى بازارعا ىركەس - تىركەس جونەلتىلدى“. 10 - ايدىڭ 4 - كۇنى التاي قالاسى جينيۋان سۋ ونىمدەرى باعىمشىلىعى شەكتى جاۋاپكەرشىلىك سەرىكتەستىگىنىڭ باس ديرەكتورى ليۋ ياڭ تىلشىگە بىلاي دەدى: قازىرگە دەيىن سەرىكتەستىك 16 توننا قىسقىش جونەلتىپ، نەگىزىنەن، نانجيڭ، شاڭحاي سياقتى جەرلەرگە تاسىمالدادى.

　　ليۋ ياڭ تانىستىرىپ بىلاي دەدى: باعىمشىلىق بازاسىنىڭ سۋى ەرىگەن قار - مۇز سۋى، سۋ ساپاسى وتە جاقسى، وندا وسىرىلگەن قىسقىش ەتى جۇمساق، ءدامدى، قىسقىش سارىسى مول بولعاندىقتان بازاردىڭ قارسى الۋىنا بولەندى، شينجياڭ سىرتىنداعى تاپسىرىس سەرىكتەستىگىمىز كاسىبىنىڭ ％90ىن يەلەدى. بيىل سەرىكتەستىكتىڭ قىسقىش باعىمشىلىق كولەمى 4000 مۋعا جەتىپ، جالپى ءونىم مولشەرى مەجەمەن 20 توننا، ءونىم قۇنى مولشەرمەن ءبىر ميلليون 400 مىڭ يۋان اينالاسىندا بولادى. سونىمەن بىرگە سەرىكتەستىك تاعى ساتىپ الۋشى ساۋداگەرلەرمەن 2 جىلدىق سەلبەستىك كەلىسىمىن جاساسىپ، كەلەر جىلى شاباق سالۋ مولشەرىن ％50 ارتتىرادى.

　　مەرەكەلىك بازاردىڭ جەبەۋىندە 9 - ايدان بەرى وڭتۇستىك اۆياتسيا زات اينالىمى جارنا شەكتى سەرىكتەستىگى شينجياڭ بولىمشە سەرىكتەستىگىنىڭ تاسىمال مولشەرى سايكەس مەزگىلدەگىدەن 2 ەسەگە جۋىق ارتتى، اسىرەسە، شينجياڭنىڭ ”سۋ ونىمدەرى“ 5. 2 ەسەدەن استام ارتتى.

　　چىڭدۋلىق ساتىپ الۋشى ساۋداگەر سۇي جۇن بيىل تۇڭعىش رەت شينجياڭنىڭ ”سۋ ونىمدەرىن“ ەنگىزدى، ول مىنالاردى ءبىلدىردى: تەڭىز - مۇحيتتان شالعاي شينجياڭدا وسىنداي ەتتى، ءدامدى سۋ ونىمدەرى شىعارىن ويلاماعان ەكەنمىن.

　　شينجياڭنىڭ جەرگىلىكتى ورنىندا وندىرىلگەن سالمون بالىعى دا بۇكىل ەلگە ايگىلى. ”شينجياڭنىڭ سالمون بالىعىنىڭ بازارى كۇسەت بولدى“. جياڭسۋلىق ساتىپ الۋشى ساۋداگەر ليۋ ليميڭ وسى ءۇشىن ارنايى شينجياڭعا كەلىپتى، ”وتباسىمداعىلارمەن بىرگە ءدامىن تاتىپ كوردىم، ءدامى ءتىل ۇيىرەدى، سودان ساۋدا ورايىن بايقاپ، ارنايى شينجياڭعا كەلىپ زەرتتەدىم“.

　　جۇڭچيۋ، مەملەكەت مەرەكەسى دەمالىسىندا وڭتۇستىك اۆياتسيا زات اينالىمى شينجياڭ بولىمشە سەرىكتەستىگىنىڭ زات تاسىمالى دا شاعىن ورلەۋگە كوتەرىلدى. وڭتۇستىك اۆياتسيا زات اينالىمى شينجياڭ بولىمشە سەرىكتەستىگىنىڭ قىزمەتكەرى لي جيان بىلاي دەدى: ”9 - ايدان بەرى ءبىز جاس، ءتىرى زاتتارعا سايكەس ەرەكشە قامتاماسىز ەتۋمەن قامدادىق، تەك سالمون بالىعىنىڭ ءوزى سايكەس مەزگىلدەگىدەن ءبىر ەسەدەن استام ارتتى“.