انار بۇلت \ شينجياڭ گازەتىنىڭ ءتىلشىسى لۋ فىڭباۋ 8 - ايدىڭ 10 - كۇنى ۇرىمجىدەن حابارلايدى. جۇڭگو تەمىر جول ءۇرىمجى مەكەمەسى توبى شەكتى سەرىكتەستىگىنەن ۇعىسۋىمىزشا، 8 - ايدىڭ 9 - كۇنىنە دەيىن، قورعاس تەمىر جول شەكارا وتكەلىنەن قاتىناعان جۇڭگو − ەۆروپا (ورتا ازيا) كەزەكشى پويەز جالپى سانى 30 مىڭ 188 كەزەككە جەتكەن.
سوڭعى جىلدارى شينجياڭنىڭ تەمىر جول تاراۋلارى شينجياڭنىڭ ”ءبىر پورت، ەكى رايون، بەس ۇلكەن ورتالىق، شەكارا وتكەلى ەكونوميكالىق بەلدەۋى“ قۇرىلىسىنا بەلسەنە توعىسىپ، تاسىمال ۇيىمداستىرۋدى ساپالىلاندىرۋ، شەكارا وتكەلىنىڭ يقۋاتىن كەڭەيتۋ، جاڭالاۋ سياقتى شارالار قولدانۋ ارقىلى جۇڭگو − ەۆروپا (ورتا ازيا) كەزەكشى پويەزىنىڭ قاتىناۋ سانىن جىلدان - جىلعا ارتتىردى.
بيىل 3 - ايدان بەرى قورعاس بەكەتىندە ايلىق قاتىناعان كەزەكشى پويەز سانى 600 كەزەكتىڭ ۇستىندە بولدى، كۇندەلىكتى تۇرمىس بۇيىمدارى، ماشينا - ەلەكتر جابدىقتارى، ەلەكترون ونىمدەرى سياقتى بارعان سايىن كوپ ”جۇڭگو جاساعان“ ونىمدەر وسى ارادان شەتەلگە شىعارىلدى. اسىرەسە، وتاندىق اۆتوكولىكتەردىڭ جۇڭگو − ەۆروپا (ورتا ازيا) كەزەكشى پويەزىمەن ەكسپورت ەتىلۋى بيىلعى جارقىن تۇيىندەردىڭ بىرىنە اينالدى، كوپ ءتۇرلى ماركاداعى ەلىمىزدە وندىرىلگەن اۆتوكولىكتەر قورعاس تەمىر جول وتكەلى ارقىلى ورتا ازيا، ەۆروپا بازارىنا ەكسپورت ەتىلدى. قورعاس بوباۋ حالىقارالىق جۇك تاسىمالى وكىلەتتى شەكتى سەرىكتەستىگىنىڭ كاسىپ ىستەرى جاۋاپتىسى لي شۋەفىڭ بىلاي دەدى: بيىل جىل باسىنان بەرى اتاۋلى سەرىكتەستىكتىڭ وكىلەتتى ەكسپورت ەتكەن تاۋارلارىنىڭ اراسىندا جوعارى، جاڭا تەحنيكالىق ونىمدەر، ءبۇتىن اۆتوكولىك سياقتى ۇستەمە قۇنى جوعارى تاۋارلار كورنەكتى ارتتى، ”سەرىكتەستىك بيىل 30 مىڭنان استام اۆتوكولىكتى وكىلەتتى ەكسپورت ەتتى، بۇل سايكەس مەزگىلدەگىدەن ％20 ارتتى“.
قاۋىرت ارتقان تاسىمال قاجەتىنە ساي، قورعاس ۆوگزالى كەزەكشى پويەزدىڭ قاتىناۋ جوباسىنا نەگىزدەلىپ، ۆاگونداردى ءبولىپ ورنالاستىرۋ، ۆاگونمەن زات الۋ - جەتكىزۋ جانە قابىلداۋ - جونەلتۋ جەلىسىنەن پايدالانۋدى ۇيلەسىمدى ورنالاستىرۋ، جاي بەلەتتەردى اۋدارتىپ تەكسەرۋ، پويەز ورنالاستىرۋ جوسپارىن جەتكىزۋ سياقتى جۇمىس بۋىندارىن الدىنا قاراي ورنالاستىرىپ، پويەزدەردى قابىلداۋ - جونەلتۋ، ۆاگونداردى ءبولىپ ورنالاستىرۋ، جۇكتەردى تيەۋ - ءتۇسىرۋ سياقتى جۇمىستاردىڭ ءتارتىپتى ءتۇيىلىسۋىن جۇزەگە اسىرىپ، كەڭ، ولشەمدى رەليستى پويەزدەردىڭ اينالىم سالىستىرماسىن جوعارىلاتىپ، پويەزدەردى ىركىلىسسىز قابىلداۋ - جونەلتۋگە شىنايى كەپىلدىك ەتتى.
ۇعىسۋعا قاراعاندا، 2016 - جىلى 3 - ايدىڭ 19 - كۇنى قورعاس تەمىر جول شەكارا وتكەلىندە تۇڭعىش كەزەكتى جۇڭگو - ەۆروپا (ورتا ازيا) كەزەكشى پويەزى قاتىناعان، وسىدان كەيىن كەزەكشى پويەزدەردىڭ قاتىناۋ سانى جىل سايىن كوبەيىپ، 2016 - جىلعى 386 كەزەكتەن 2022 - جىلى 7000نان استام كەزەككە جەتىپ، شارپىعان اۋماعى العاشقى كەزدەگى 2 مەملەكەت، 3 قالادان كوبەيىپ، قازىرگى كۇندە 18 مەملەكەت پەن رايوندى، 45 قالانى قامتىپ، اشىلعان كەزەكشى پويەز لەنياسى 77دەن استى.
