انار بۇلت \ شينجياڭ گازەتىنىڭ ءتىلشىسى جاڭ يۇنمەي 8 - ايدىڭ 6 - كۇنى قۇلجادان حابارلايدى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز 8 - ايدىڭ 6 - كۇنى قۇلجا قالاسىندا قازاقستان الماتى وبلىسىنىڭ باستىعى مارات سولتانعازيەۆپەن جانە ونىڭ ساپارلاستارىمەن كەزدەسىپ، جۇڭگو شينجياڭىنىڭ قازاقستاننىڭ الماتى وبلىسىمەن ءتۇرلى سالاداعى اۋىس - كۇيىسىن، سەلبەستىگىن ونان ارى تەرەڭدەتۋ جونىندە ىشكەرىلەي پىكىرلەستى.
ەركىن تۇنياز اۆتونوميالى رايوندىق پارتكوم مەن ۇكىمەت اتىنان مارات سولتانعازيەۆتىڭ جانە ونىڭ ساپارلاستارىنىڭ كەلگەندىگىن قارسى الدى. ول بىلاي دەدى: جۇڭگو - قازاقستان ەكى ەلدىڭ ءداستۇرلى دوستىعى ۋاقىت وتكەن سايىن بەكەمدەلە ءتۇستى، ديپلوماتيالىق قارىم - قاتىناس ورناتقاننان بەرى ەكى ەلدىڭ قارىم - قاتىناسى ماڭگىلىك جان - جاقتى ستراتەگيالىق سەرىكتەستىك قارىم - قاتىناس جوعارى دەڭگەيىنە جەتتى. اسىرەسە، بيىل جۇڭگو − ورتا ازيا باسشىلار ءماجىلىسى كەزىندە جۇڭگو − قازاقستان ەكى ەلدىڭ مەملەكەت باسشىلارى ەكى ەلدىڭ سەلبەستىك نيەتىن اناعۇرلىم جوعارىلاتىپ، جاڭا داۋىردەگى جۇڭگو − قازاقستان ماڭگىلىك جان - جاقتى ستراتەگيالىق سەرىكتەستىك قارىم - قاتىناسىنا جاڭا قوزعاۋشى كۇش قوستى. بيىل جۇڭگو شينجياڭ دوستىق اۋىس - كۇيىس ساپارلاۋ ۇيىرمەسى قازاقستاندا ساپاردا بولىپ، ەكى جاقتىڭ دوستىق بەينەدەگى ىشكەرىلەي اۋىس - كۇيىسىن ىلگەرىلەتتى. وبلىس باستىعى مىرزانىڭ بۇل جولعى جۇڭگو شينجياڭىنداعى ساپارىندا ەكى جاقتىڭ شەكارا وتكەل قۇرىلىسى، وسى زامانعى اۋىل شارۋاشىلىعى، مادەنيەت - ساياحات، ساۋدا، زات اينالىمى، قالا قۇرىلىسى سياقتى سالالاردا سەلبەستىكتى، اۋىس - كۇيىستى ونان ارى كەڭەيتىپ جانە تەرەڭدەتىپ، جاڭا داۋىردەگى جۇڭگو − قازاقستان تاعدىرلاس ورتاق تۇلعاسىن تۇلعالاۋعا ءتىپتى دە كوپ ۇلەس قوسۋىن ءۇمىت ەتەمىن.
مارات سولتانعازيەۆ الماتى وبلىسىنىڭ دامۋ جاعدايىن تانىستىردى ءارى ەكى جاقتىڭ سەلبەستىكتى ونان ارى تەرەڭدەتۋى جونىندە پىكىر - ۇسىنىستارىن قويدى. ول جۇڭگو شينجياڭىمەن ءتۇرلى سالاداعى اۋىس - كۇيىستى، سەلبەستىكتى بەلسەندى، ىرىقتى تۇردە كۇشەيتىپ، ەكى جاق سەلبەستىگىنىڭ جاڭا دەڭگەيگە كوتەرىلۋىن ىلگەرىلەتەتىندىكتەرىن ءبىلدىردى.
الماتى وبلىسىنىڭ ورىنباسار باستىعى الماس باتانوۆ جانە الماتى وبلىسىنىڭ جەرگىلىكتى ورىندارىنىڭ، ۇكىمەتتىڭ قاتىستى تاراۋلارىنىڭ جاۋاپتىلارى كەزدەسۋگە قاتىناستى. ياڭ شيۋلي جانە اۆتونوميالى رايوننىڭ قاتىستى تاراۋلارىنداعى جاۋاپتى جولداستار، كاسىپورىندار ۋاكىلدەرى كەزدەسۋگە قاتىناستى.
