زەردەلىلەندىرۋ قۇرىلىسىن جەدەلدەتىپ، ءوندىرىس حاۋىپسىزدىگى دەڭگەيىن جوعارىلاتايىق

اۆتونوميالى رايوننىڭ كومىر كەندەرىن زەردەلىلەندىرۋ قۇرىلىسىن جۇمىس باسىندا ىلگەرىلەتۋ ءماجىلىسى وتكىزىلدى

　　زەردەلىلەندىرۋ قۇرىلىسىن جەدەلدەتىپ، ءوندىرىس حاۋىپسىزدىگى دەڭگەيىن جوعارىلاتايىق

　　انار بۇلت \ شينجياڭ گازەتىنىڭ ءتىلشىسى يۇي جياڭيان 8 - ايدىڭ 5 - كۇنى ۇرىمجىدەن حابارلايدى. 8 - ايدىڭ 4 - كۇنىنەن 5 - كۇنىنە دەيىن اۆتونوميالى رايوننىڭ كومىر كەندەرىن زەردەلىلەندىرۋ قۇرىلىسىن جۇمىس باسىندا ىلگەرىلەتۋ ءماجىلىسى وتكىزىلدى، اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ورىنباسار ءتوراعاسى ءيۇسۇپجان مامەت ماجىلىسكە قاتىناستى ءارى ءسوز سويلەدى.

　　كەزەكتە اۆتونوميالى رايونىمىزدا قالىپتى ءوندىرىس جۇرگىزەتىن 74 كومىر كەن بار، مۇنىڭ ىشىندە 24ى اشىق كومىر كەن، 50ى قۇدىق ونەركاسىپتىك كومىر كەنى. تۇتاس شينجياڭدا العاشقى ادىمدا 169 ميلليون توننا زەردەلىلەنگەن كومىر كەن ءوندىرىس قۋاتى قالىپتاستى.

　　ماجىلىستە مىنالار اتاپ كورسەتىلدى: كومىر كەندەرىن زەردەلىلەندىرۋ قۇرىلىسىن جەدەل ىلگەرىلەتۋ − شينجياڭنىڭ كومىر جاعىندا شۇعىل جاعدايعا توتەپ بەرۋدە قامداۋدى قامتاماسىز ەتۋ قابىلەتىنىڭ دەڭگەيىن جوعارىلاتىپ، شينجياڭنىڭ بايلىق باسىمدىعىن ەكونوميكالىق باسىمدىققا اينالدىرۋدى ىلگەرىلەتۋدەگى پارمەندى شارا. جەر - جەر، تاراۋلار، ءارقايسى كومىر كەن كاسىپورىندارى، ءسوز جوق، ايرىقشا ءمان بەرىپ، كومىر كەندەرىن زەردەلىلەندىرۋ قۇرىلىسىن جەدەل ىلگەرىلەتۋدەگى ناقتى، قاتاڭ شارالاردى جوسپارلاپ، كومىر كاسىپ سالاسىنىڭ جوعارى دەڭگەيلىلەنۋگە، زەردەلىلەنۋگە، جاسىلدانۋعا قاراي تيبىن وزگەرتىپ، دارەجەسىن جوعارىلاتۋىن ىلگەرىلەتۋى كەرەك.

　　ماجىلىستە مىنالار باسا دارىپتەلدى: جەر - جەر تاياۋدا العا قويىلعان «شينجياڭ ۇيعۇر اۆتونوميالى رايونىنىڭ كومىر كەندەرىن زەردەلىلەندىرۋ قۇرىلىسىنىڭ 3 جىلدىق ارەكەت جوسپارىن (2023 − 2025 - جىل)» ويداعىداي تياناقتاندىرىپ، قاراستى وڭىردەگى كومىر كەندەرىن زەردەلىلەندىرۋ قۇرىلىسى قىزمەتىن ءبىر تۇتاس جوسپارلاپ ويداعىداي يگەرىپ، حاۋىپسىزدىككە شىنايى كەپىلدىك ەتۋ العى شارتىندا بەلگىلەنگەن نىسانا - مىندەتتەردى ءساتتى ورىنداۋى كەرەك.

　　ماجىلىستەن ىلگەرى ماجىلىسكە قاتىناسقان باسشىلار مەن ماجىلىسكە قاتىناسقاندار شينجياڭ تيانچى ەنەرگيا شەكتى جاۋاپكەرشىلىك سەرىكتەستىگىنىڭ وڭتۇستىك اشىق كومىر كەنىندە جانە مەملەكەتتىك ەنەرگيا توبى شينجياڭ ەنەرگيا شەكتى جاۋاپكەرشىلىك سەرىكتەستىگىنىڭ ۋدۇڭ كومىر كەنىندە تەكسەرۋ - زەرتتەۋ جۇرگىزدى ءارى كومىر كەندەرىن زەردەلىلەندىرۋ جابدىقتارىنىڭ جەتىستىكتەر كورمەسىن ەكسكۋرسيالادى.

　　جۇڭگو ينجەنەريا اكادەمياسىنىڭ اكادەميگى وشۇر ءسىلام قاتارلى مامان - وقىمىستىلار كومىر كەندەرىن زەردەلىلەندىرۋ قۇرىلىسى سياقتىلار جونىندە ارناۋلى تاقىرىپتا لەكسيا جاسادى.

　　ءماردان مۇحيت ءماجىلىستى باسقاردى ءارى قاتىستى قيمىلدارعا قاتىناستى.