پارتيا سىرتىنداعى اكادەميكتەر، ماماندار، شەتەلدە وقىپ جاتقاندار ەل جاعدايىن تەكسەرۋ، قىزمەت وتەۋ ۇيىرمەسىندەگىلەر شينجياڭعا كەلدى −
جوعارى ساپالى دامۋدى جەبەۋگە ”پاراسات“ كۇشىن توپتادى
انار بۇلت \ شينجياڭ گازەتىنىڭ ءتىلشىسى ميھىرگۇل عوپۇر
7 - ايداعى شينجياڭ تىرشىلىك تىنىسىنا شومدى. 7 - ايدىڭ 23 - كۇنىنەن 30 - كۇنىنە دەيىن ورتالىق كوميتەت بىرلىكساپ ءبولىمى ۇيىمداستىرعان پارتيا سىرتىنداعى اكادەميكتەر، ماماندار، شەتەلدە وقىپ جاتقاندار ەل جاعدايىن تەكسەرۋ، قىزمەت وتەۋ ۇيىرمەسىندەگىلەر شينجياڭعا كەلىپ ىلگەرىندى - كەيىندى قاشقار، ىلە قازاق اۆتونوميالى وبلىسى، ءۇرىمجى سياقتى جەرلەرگە باردى، ۇكىمەت تاراۋلارى، عىلمي زەرتتەۋ ورىندارى، باقشا رايونى، كاسىپورىن، جوعارى مەكتەپ، شەكارا وتكەلى سياقتى جەرلەردى ىشكەرىلەي ارالاپ، شينجياڭنىڭ ەكونوميكالىق، قوعامدىق دامۋ جاعدايىن جاپپاي ۇعىسىپ، وزدەرىنىڭ كاسىپتىك باسىمدىعىنان پايدالانىپ، شينجياڭنىڭ ەكونوميكاسىنىڭ، قوعامىنىڭ جوعارى ساپالى دامۋىن جەبەۋگە ”پاراسات“ كۇشىن توپتادى.
جۇڭگو عىلىم اكادەمياسىنىڭ شينجياڭ فيزيكا - حيميا، تەحنيكا زەرتتەۋ ورنى، جۇڭگو عىلىم اكادەمياسى شينجياڭ استرونوميا ستانسياسى، شينجياڭ داشۋەسى، قاشقار داشۋەسى سياقتى جەرلەردە قىزمەت وتەۋ ۇيىرمەسىندەگىلەر عىلمي زەرتتەۋ جەتىستىكتەرىن كادەگە جاراتۋ، ءپان قۇرىلىسى، دارىندىلاردى باۋلۋ، شينجياڭنىڭ دامۋىنا قىزمەت وتەۋ سىندى قاتىستى جاعدايلاردى تاپتەشتەي ۇعىسىپ، زەرتتەۋ قىزمەتكەرلەرى جانە وقىتۋشى قاتارلىلارمەن بەتپە - بەت اۋىس - كۇيىس جاساسىپ، پىكىر - ۇسىنىس قويدى.
تەكسەرۋ، قىزمەت وتەۋ ۇيىرمەسىنىڭ باستىعى، مەملەكەتتىك ساياسي كەڭەستىڭ تۇراقتى مۇشەسى، جۇڭگو عىلىم اكادەمياسىنىڭ بۇرىنعى ورىنباسار باستىعى گاۋ حۇڭجۇن بىلاي دەدى: تاياۋ جىلداردان بەرى شينجياڭ دارىندىلاردا قۋاتتى رايون قۇرۋ ستراتەگياسىن ىشكەرىلەي اتقارىپ، دارىندىلار، عىلىم - تەحنيكانى دامىتۋ ءتۇزىلىس - مەحانيزم رەفورماسىن ۇزدىكسىز تەرەڭدەتىپ، دارىندىلاردىڭ دامۋ ورتاسىن ساپالىلاندىرىپ، عىلىم - تەحنيكادا جاڭالىق اشۋعا جانە دارىندىلاردى ەنگىزۋدە، باۋلۋدا تاماشا راي قالىپتاستىردى.
”دارىندىلار، اسىرەسە، عىلىم - تەحنيكا دارىندىلارى −شينجياڭنىڭ جوعارى ساپالى دامۋىن جۇزەگە اسىرۋداعى تەتىك “. گاۋ حۇڭجۇن بىلاي دەدى: شينجياڭنىڭ ءتۇرلى دارىندىلاردى، اسىرەسە، ستراتەگيالىق عالىمداردى باۋراۋ قۋاتى كورنەكتى كۇشەيدى، جاڭالىق اشۋعا ىنتالاندىرۋ، دارىندىلاردى باعالاي ءبىلۋ، دارىندىلاردى ايالاۋ رايى اناعۇرلىم قويۋلادى، الداعى جەردە الەمدەگى دارىندىلاردىڭ شينجياڭعا توپتالاتىن جاعدايىنىڭ قالىپتاساتىندىعى ءشۇباسىز.
قاشقار كەشەندى قورعامالى باجى اۋماعىندا كونتينەرلىك كولىكتەر باياۋ جولعا شىعىپ، اۋىل شارۋاشىلىق ونىمدەرى، جەڭىل ونەركاسىپ ونىمدەرى سياقتىلاردى ”ءبىر بەلدەۋ، ءبىر جول“ بويىنداعى ەلدەرگە تاسىدى؛ قورعاس تاس جولى شەكارا وتكەلىندە تاۋار كولىكتەرى، قۇرىلىس ماشينالارى، جۇك كولىكتەرى سياقتى اۆتوكولىكتەر كەدەننەن رەت ءتارتىبى بويىنشا ءوتىپ، قازاقستاننىڭ التىنكول شەكارا وتكەلىنە قاراي جول الدى... تەكسەرۋ، قىزمەت وتەۋ ۇيىرمەسىنىڭ مۇشەلەرى جابال مىنالاردى ءبىلدىردى: شينجياڭ وڭىرلىك ورىن باسىمدىعىن تولىق ساۋلەلەندىرىپ، جىبەك جولى ەكونوميكالىق بەلدەۋى وزەكتى رايونىنىڭ جوعارى ساپالى دامۋىن ىلگەرىلەتىپ، مەملەكەتتىڭ باتىسقا ەسىك اشۋ جالپى تۇلعالىق ورنالاستىرۋىنا بەلسەنە توعىسىپ، قاشقار، قورعاس ەكونوميكالىق اشۋ رايوندارىنىڭ تىرەكتىلىك رولدارىن ءۇرتىس كۇشەيتتى.
”شينجياڭ تىرشىلىك تىنىسى مەن ومىرشەڭدىك كۇشكە تولى قۇتتى مەكەن، دامۋ تەبىنى كۇشتى، كومەسكى كۇشى زور“. جۇڭگو ينجەنەريا اكادەمياسىنىڭ اكادەميگى، جۇڭگو گاڭيان عىلىم - تەحنيكا توبى شەكتى سەرىكتەستىگىنىڭ ورىنباسار باس ينجەنەرى لي ۋي بىلاي دەپ قارادى: شينجياڭ دامۋدا ءوز جەرىنىڭ ەرەكشەلىگىمەن ۇشتاستىرىپ، جاڭالىق اشۋ جاعىنا كوبىرەك كۇش سالىپ، عىلىم - تەحنيكانىڭ كۇشىنەن ويداعىداي پايدالانىپ، 1 -، 2 -، 3 - كاسىپتەردىڭ توعىسا دامۋىن اناعۇرلىم كۇشەيتىپ، تىزبەكتى ۇزارتۋ، تىزبەكتى تولىقتاۋ، تىزبەكتى كۇشەيتۋ ارقىلى تۇتاس كاسىپ سالاسى تىزبەگىن كەمەلدەندىرەتىن بولسا، بولاشاقتا اناعۇرلىم زور، اناعۇرلىم تەز دامۋشىلىقتارعا قول جەتكىزەتىن بولادى.
”ءبىر مۋ جەردىڭ قانشا ونىمدىلىگى بولادى“؟ ”قانشا ادام كۇشى جۇمسالادى“؟... 7 - ايدىڭ 25 - كۇنى كونەشار اۋدانى ۇعۇساق قالاشىعىنداعى وسى زامانعى اۋىل شارۋاشىلىق كاسىپ سالاسى باقشاسىنىڭ ءبىر تۇسىنداعى 400 نەشە مۋ جەردەگى ماقتا اتىزىندا اكادەميكتەر، ماماندار ماقتاشى ءمىرادىل ھۇرايىممەن ىقىلاستى اڭگىمەدە بولدى.
”ءبىر مۋ جەردەن 1500 يۋاننان استام كىرىس كىرەدى. ماقتا ەگۋدە جەر جىرتۋ، تۇقىم سەبۋ، باپتاۋ، جيناۋ بۋىندارىندا تۇگەلدەي ماشينالاسۋ جۇزەگە اسىرىلدى“. ءمىرادىلدىڭ مىعىم سەنىممەن قايتارعان جاۋابىنان اكادەميكتەر، ماماندار ءدان ريزا بولدى.
”شينجياڭنىڭ ماقتاسى دۇنيە جۇزىندەگى ەڭ جاقسى ماقتا“، جۇڭگو − ەۆروپا بىرلەسكەن قارجى قوسۋ شەكتى سەرىكتەستىگىنىڭ ورىنباسار باس جوراسى گاۋ جىكاي بىلاي دەدى: ماشينالاسقان جيناۋ ماقتاشىلارعا ءتىپتى دە كوپ جەڭىلدىك اپەردى، ولاردىڭ قالتاسىن قامپايتتى، تۇرمىستارى دا بارعان سايىن جاقسارىپ كەلەدى. باتىستاعى ءىشىنارا ەلدەردىڭ وسەك - اياڭ تاراتىپ، كۇيە جاعۋى جانە قىسىم جاساپ، شەكتەمەك بولعانى شينجياڭنىڭ ماقتا كاسىپ سالاسىن ويسىراتا العانى جوق، كەرىسىنشە، بارعان سايىن دامىپ، زورايدى. جول بويى تاماشا جاعدايلاردى ءوز كوزىممەن كوردىم، ءوز باسىمنان شىنايى سەزىندىم، مەن سىرتقى دۇنيەنىڭ شىنايى شينجياڭدى ءتىپتى دە سەزىنۋىنە مۇمكىندىك جاسايمىن.
قويۋ ۇلتتىق ەرەكشەلىك پەن وڭىرلىك مادەنيەت ەرەكشەلىگىنە يە قاشقار بايىرعى قالاسىنا، قۇلجا قالاسى قازانشى ۇلتتىق سالت - سانا ساياحات اۋماعىنا باردى... بىرنەشە كۇننەن بەرى چيڭحۋا داشۋەسى ۋداۋكوۋ فينانس شۋەيۋانىنىڭ ورىنباسار باستىعى تيان شۋان ىستىق ىقىلاستى، جاراسىمدى، جانعا جايلى دەگەن سەزىمدى بارىنشا ءتۇيسىندى.
”شينجياڭنىڭ مول مادەنيەت جانە ساياحات بايلىعى بار، تاريحي گۋمانيتارلىعى الۋان ءتۇرلى، وزىندىك ەرەكشەلىككە يە باۋرامدىلىققا يە“. تيان شۋان: ساياحات بايلىعىن ونان ارى اشىپ، ساياحات ساپاسى مەن قىزمەت وتەۋ ساپاسىن ءۇرتىس جوعارىلاتىپ، تاماشا ساياحات بازارى ورتاسىن كۇش سالا قالىپتاستىرىپ، ساياحات كاسىبىن شينجياڭنىڭ ەكونوميكاسىنىڭ جوعارى ساپالى دامۋىن ىلگەرىلەتەتىن تەبىندى كاسىپ سالاسىنا شىن مانىندە اينالدىرۋ ۇسىنىسىن بەردى.
قىزمەت وتەۋ ۇيىرمەسىندەگىلەر جول بويى جۇرە ءجۇرىپ زەر سالىپ، دەن قويا تىڭداي ءجۇرىپ سۇراۋ قويىپ، شينجياڭ جونىندەگى تانىمدارى مەن تۇسىنىكتەرىن ۇزدىكسىز تەرەڭدەتتى. كوپشىلىك ءبىر اۋىزدان مىنالاردى ءبىلدىردى: بۇل ءبىر رەتكى ۇيرەنۋ ساپارى، باستان كەشىرۋ ساپارى، تەبىرەنىستى ساپار، سەلبەسۋ ساپارى بولدى، تابىسىمىز زور بولدى، كوز ايامىز كەڭەيدى، ەل جاعدايىن ۇعىستىق، شينجياڭنىڭ وتكەنىن، قازىرگىسىن جانە كوركەم بولاشاعىن كوردىك.
”وسى ساپار ارقىلى ءبىز جاڭا داۋىردەگى پارتيانىڭ شينجياڭدى باسقارۋ جالپى جوباسىنىڭ جاندى امالياتى جونىندە اناعۇرلىم تەرەڭ تانىمعا يە بولدىق“، گاۋ حۇڭجۇن: شينجياڭنىڭ دامۋىنا ءۇرتىس نازار اۋدارىپ ءارى قولداۋ كورسەتىپ، ءوزىمىزدىڭ كاسىپتىك باسىمدىعىمىزدى بەلسەنە ساۋلەلەندىرىپ، اناعۇرلىم كوپ پايدالى تاجىريبەمەن جانە جەتەكشىلىكپەن قامداپ، كورىكتى شينجياڭ قۇرۋعا كۇش ۇستەيتىندىگىن ءبىلدىردى.
