لين ۋ، ەركىن تۇنياز، جوۋ نايشياڭ قيمىلعا قاتىناستى
انار بۇلت \ شينجياڭ گازەتىنىڭ ءتىلشىسى لي ياڭ 7 - ايدىڭ 14 - كۇنى جيناننان حابارلايدى. 7 - ايدىڭ 14 - كۇنى اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز اۆتونوميالى رايوننىڭ پارتيا، ۇكىمەت ۋاكىلدەر ۇيىرمەسىن باستاپ شاندۇڭ ولكەسىندە ۇيرەنۋدە، تەكسەرۋدە بولدى. شاندۇڭ ولكەلىك پارتكومنىڭ شۋجيى، ولكەلىك حالىق قۇرىلتايى تۇراقتى كوميتەتىنىڭ مەڭگەرۋشىسى لين ۋ، شاندۇڭ ولكەلىك پارتكومنىڭ ورىنباسار شۋجيى، ولكە باستىعى جوۋ نايشياڭ قيمىلعا قاتىناستى.
7 - ايدىڭ 14 - كۇنى تۇستەن بۇرىن لين ۋ، جوۋ نايشياڭ ەركىن تۇنياز جانە ونىڭ ساپارلاستارىمەن قىزمەتتىك كەڭەس وتكىزدى.
لين ۋ بىلاي دەدى: تاياۋ جىلداردان بەرى شاندۇڭ ولكەسى باس شۋجي شي جينپيڭنىڭ ماڭىزدى نۇسقاۋلارىن، تالاپتارىن جانە پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، ”الدىدا ءجۇرىپ، جاڭا جاعداي اشۋدان“ كوز جازباي، ارتۋدى ورنىقتىرۋ، قۇرىلىمدى رەتتەۋ، حالىق تۇرمىسىنا تيىمدىلىك جاساۋ، حاۋىپ - قاتەردەن ساقتانۋ قىزمەتتەرىن ءبىر تۇتاس جوسپارلاپ ىلگەرىلەتىپ، جاسىل، تومەن كومىر قىشقىل گازدى جوعارى ساپالى دامۋدى الدىمەن اتقارۋ رايونىن قۇرۋدى جەدەلدەتتى. كەزەكتە ەكونوميكاسى جاپپاي قايتا جاندانىپ، جەدەل جاقسارىپ، كۇشتى دامۋ سەرپىمدىلىگى مەن ارتۋ كومەسكى كۇشىن ايگىلەدى. شينجياڭ وتانىمىزدىڭ باتىس سولتۇستىك شەكاراسىنا، ەۆروپا − ازيا قۇرلىعىنىڭ قويناۋىنا ورنالاسقان، ەلىمىزدىڭ ورتا ازيامەن، باتىس ازيامەن تۇتاساتىن ماڭىزدى تورابى. جۋىق جىلداردان بەرى شينجياڭ باس شۋجي شي جينپيڭنىڭ شينجياڭ جونىندەگى جەلىلەس ماڭىزدى سوزدەرىنىڭ، ماڭىزدى نۇسقاۋلارىنىڭ، بەكىتۋلەرىنىڭ رۋحىن ىشكەرىلەي دايەكتىلەندىرىپ، قوعام ورنىقتىلىعى مەن باياندى تىنىشتىق باس نىساناسىن مىقتاپ يگەرىپ، ءتۇرلى قىزمەتتەردە جان - جاقتى ىلگەرىلەۋشىلىككە قول جەتكىزۋدى جەبەپ، تيانشان الابىندا ىنتىماقتى، ورنىقتى، قارىشتاپ دامىعان جاڭا بەينە جارىققا شىقتى. شينجياڭعا باعىتتامالى كومەكتەسۋ − پارتيا ورتالىق كوميتەتىنىڭ بىزگە تاپسىرعان كەلەلى ساياسي مىندەتى، شاندۇڭ ولكەسى پارتيا ورتالىق كوميتەتىنىڭ شەشىمدەرىن، ورنالاستىرۋلارىن باتىل تياناقتاندىرىپ، شينجياڭمەن سەلبەستىكتى تەرەڭدەتىپ، قول ۇستاسا ىلگەرىلەپ، ەكى جەردىڭ ارالاسۋىن، ىشتەسۋىن، توعىسۋىن اناعۇرلىم كەڭەيتەدى، تەرەڭدەتەدى. الداعى جەردە ءبىز شينجياڭنىڭ ءىس جۇزىندىك قاجەتىمەن تىعىز ۇشتاستىرىپ، نازاردى كاسىپ سالاسى، حالىق تۇرمىسى، دارىندى، مادەنيەت، وقۋ - اعارتۋ، ەمدەۋ سياقتى سالالارعا شوعىرلاندىرىپ، شاندۇڭنىڭ باسىمدىعىن تولىق ساۋلەلەندىرىپ، شينجياڭداعى ءار ۇلت كادر، بۇقاراسىمەن بىرگە قۇلشىنىپ، شاندۇڭ مەن شينجياڭنىڭ سەلبەستىگىنىڭ تاعى دا ماۋەلى جەمىس بەرۋىن ىلگەرىلەتەمىز.
ەركىن تۇنياز شاندۇڭ ولكەسىنىڭ ۇزاق ۋاقىتتان بەرى شينجياڭدى بار كۇشپەن قولداپ كەلگەندىگىنە جانە قالتقىسىز كومەك كورسەتكەندىگىنە شىنايى العىس ايتتى. ول بىلاي دەدى: پارتيا 18 - قۇرىلتايىنان بەرى شي جينپيڭ جولداستى ۇيتقى ەتكەن پارتيا ورتالىق كوميتەتى شاندۇڭ قىزمەتىنە وسكەلەڭ ءمان بەرىپ، شاندۇڭعا ”الدىدا ءجۇرىپ، جاڭا جاعداي اشۋ“ سىندى ماڭىزدى بورىش جۇكتەدى. شاندۇڭ ولكەلىك پارتكوم، ولكەلىك ۇكىمەت پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، جوعارى ساپالى دامۋدى ىلگەرىلەتۋدە كورنەكتى تابىسقا قول جەتكىزدى. بۇعان ءبىز ەرەكشە سۇيىنەمىز، شىن كوڭىلدەن قۇتتىقتايمىز. جۋىق جىلداردان بەرى شاندۇڭ ولكەسى شينجياڭعا باعىتتامالى كومەكتەسۋ قىزمەتىن باستان - اياق ءبىر ماڭىزدى ساياسي جاۋاپكەرشىلىك ساناپ، ”لۋيان اقىل - پاراسات ەنگىزۋ“، ”اۋىل - قىستاقتى گۇلدەندىرۋ · چيلۋ ۇلگى كورسەتۋ“، ”ۇلكەن قامبانى شىعىسقا جىلجىتۋ · تۇتىنۋ جاعىنان شينجياڭعا كومەكتەسۋ“، ”شينجياڭدى مادەنيەتپەن نارلەندىرۋ · چيلۋ الدىمەن اتقارۋ“، ”شاندۇڭ مەن شينجياڭ اناردىڭ دانىندەي“ سىندى بەس ۇلكەن ماركا ينجەنەرياسىن تۇلعالاپ، شينجياڭنىڭ ەكونوميكاسىنىڭ، قوعامىنىڭ دامۋىنا ماڭىزدى ۇلەس قوستى. كەزەكتە شينجياڭ جوعارى ساپالى دامۋدى ىلگەرىلەتۋدىڭ شەشۋشى مەزگىلىندە تۇر، شاندۇڭ ولكەسىنىڭ شينجياڭمەن ”ءبىر بەلدەۋ، ءبىر جولدى“ بىرگە قۇرۋ، ”سەگىز ءىرى كاسىپ سالاسى شوعىرىن“ قۇرۋ سياقتى جاقتاردا سەلبەستىكتى كۇشەيتىپ، اناعۇرلىم كوپ تىزبەكتەگى تىرەكتى كاسىپورىنداردىڭ شينجياڭعا كەلىپ دامىپ، شارۋاشىلىعىن گۇلدەندىرۋگە شابىتتاندىرۋىن؛ مادەنيەت - ساياحات سەلبەستىگىن كۇشەيتىپ، بىرىككەن كۇش قالىپتاستىرىپ، جۇڭحۋا ۇلتى ورتاق تۇلعا تانىمىن ۇزدىكسىز بەرىك ورناتۋىن؛ ”لۋيان اقىل - پاراسات ەنگىزۋ“ ينجەنەرياسىن تەرەڭدەتىپ، ”ۇيىرمە ۇلگىسىندە“ وقۋ - اعارتۋ جاعىندا شينجياڭعا كومەكتەسۋ تەبىنىن ارتتىرىپ، شينجياڭنىڭ جوعارى ساپالى دامۋىنا اقىل - پاراسات جاعىنان اناعۇرلىم كوپ قولداۋ كورسەتۋىن ءۇمىت ەتەمىز.
شاندۇڭداعى كەزىندە اۆتونوميالى رايوننىڭ پارتيا، ۇكىمەت ۋاكىلدەر ۇيىرمەسى جاڭا ەنەرگيا، ينفورماتسيا تەحنيكاسى، وسى زامانعى اۋىل شارۋاشىلىعى، مادەنيەت - ساياحات كاسىپورىندارىندا تەكسەرۋدە بولدى.
شاندۇڭ ولكەسىنىڭ جانە جينان قالاسىنىڭ باسشىلارىنان زىڭ زانرۇڭ، جاڭ حايبو، سۇڭ جۇنجي، يۇي حايتيان، اۆتونوميالى رايوننىڭ جانە بيڭتۋاننىڭ باسشىلارىنان جاڭ جۋ، چىن ۋيجۇن، ۋاڭ ميڭشان، ءمامتىمىن قادىر، قايسار ابدۇكەرىم، كۇڭ شيڭلۇڭ، ليۋ شينجيان قاتارلىلار قيمىلعا قاتىناستى.
