رايونىمىز «اتقارۋ جوباسىن» باسىپ تاراتتى
27 شارا اۋدان ورتالىقتارىن دانەكەر ەتكەن قالا - قالاشىقتاندىرۋدى ىلگەرىلەتەدى
انار بۇلت \ شينجياڭ گازەتىنىڭ ءتىلشىسى شى شين 7 - ايدىڭ 14 - كۇنى ۇرىمجىدەن حابارلايدى. جۋىقتا اۆتونوميالى رايوندىق دامۋ جانە رەفورما كوميتەتى «اۋدان ورتالىقتارىن باستى دانەكەر ەتكەن قالا - قالاشىقتاندىرۋ قۇرىلىسىن ىلگەرىلەتۋ جونىندەگى اتقارۋ جوباسىن» باسىپ تاراتتى (تومەندە قىسقارتىلىپ «اتقارۋ جوباسى» دەلىندى).
«اتقارۋ جوباسىندا» مىنالار اتاپ كورسەتىلدى: ادامدى نەگىز ەتكەن قالا - قالاشىقتاندىرۋدى وزەك، ساپانى جوعارىلاتۋدى جەتەكشى ەتۋگە تاباندى بولىپ، اۋدان ورتالىقتارىن قالا - قالاشىقتاندىرۋدا ولقىلىقتاردى تولىقتاۋدى، ءالسىز تۇستاردى كۇشەيتۋدى جەدەل ىلگەرىلەتىپ، اۋدان ورتالىقتارى كاسىپ سالاسىنىڭ سايكەستى قۇرىلعىلارىنىڭ ساپاسىن جوعارىلاتىپ، ونىمدىلىگىن ارتتىرۋدى، قالا الەۋمەتتىك قۇرىلعىلارىنىڭ دارەجەسىن جوعارىلاتۋدى، الەۋمەتتىك قىزمەت وتەۋ قۇرىلعىلارىنىڭ ولشەمىن جوعارىلاتىپ، اياسىن كەڭەيتۋدى، قورشاعان ورتا نەگىزدىك قۇرىلعىلارىنىڭ دارەجەسىن جوعارىلاتىپ، يقۋاتىن كەڭەيتۋدى جەبەپ، اۋدان ورتالىقتارىنىڭ جالپىلىق كوتەرىمدىلىك قۋاتىن كۇشەيتىپ، اۋدان ورتالىقتارىنىڭ دامۋ ساپاسىن جوعارىلاتىپ، ەكونوميكانىڭ جوعارى ساپالى دامۋىن، قوعام ورنىقتىلىعى مەن باياندى تىنىشتىقتى ىلگەرىلەتۋگە ماڭىزدى تىرەك قامتاماسىزدىعىن ازىرلەۋ كەرەك. 2025 - جىلعا بارعاندا وڭىرلىك ورىن باسىمدىعى كورنەكتى، كاسىپ سالاسى نەگىزى تاماشا، بايلىق ورتاسىنىڭ كوتەرىمدىلىك قۋاتى ءبىرشاما كۇشتى، شوعىرلى وتىرعان حالىقتىڭ ەكونوميكالىق شارت - جاعدايى ءبىرشاما جاقسى اۋدان ورتالىعىنان ءبىر توبىن قۇرىپ، ەكونوميكانىڭ جاڭا ارتۋ ءتۇيىنىن جەتىلدىرۋ، قالىپتاستىرۋ كەرەك.
«اتقارۋ جوباسى» اۋدان ورتالىقتارىنىڭ نەگىزدىك شارت - جاعدايى مەن دامۋ زاڭدىلىعىن تياناق ەتىپ، ءوندىرىس، تۇرمىس، ەكولوگيا، حاۋىپسىزدىك قاجەتىن ءبىر تۇتاس جوسپارلاپ، سەرىك فۋنكتسيالىق اۋدان ورتالىعى، كاسىپتىك فۋنكتسيالى اۋدان ورتالىعى، اۋىل شارۋاشىلىعى فۋنكتسيالى اۋدان ورتالىعى، ەكولوگيالىق فۋنكتسيالى اۋدان ورتالىعى، اشىق فۋنكتسيالى اۋدان ورتالىعى سياقتى تۇرلىشە اۋدان ورتالىقتارىنىڭ دامۋ بەتالىسى مەن قۇرىلىس جولىن ايقىندادى.
«اتقارۋ جوباسى» ەرەكشەلىككە، باسىمدىققا يە كاسىپ سالالارىن جەتىلدىرىپ، دامىتىپ، جۇمىسقا قابىلداۋ يقۋاتىن كۇشەيتۋ، قالا قۇرىلعىلارى جۇيەسىن كەمەلدەندىرىپ، اۋدان ورتالىقتارىنىڭ اينالىم نەگىزدىك تىرەگىن بەكەمدەۋ، الەۋمەتتىك قىزمەت وتەۋمەن قامداۋدى كۇشەيتىپ، اۋدان ورتالىعىنداعى حالىق تۇرمىسىنىڭ قۇت - ىرىسىن ارتتىرۋ، تاريحي مادەنيەت ەكولوگيالىق ورتاسىن قورعاۋدى كۇشەيتىپ، اۋدان ورتالىقتارىنىڭ قونىس ورتاسى ساپاسىن جوعارىلاتۋ، اۋدان ورتالىقتارىنىڭ اۋىل - قىستاقتى شارپۋ، باستاماشىلدىق ەتۋ قابىلەتىن جوعارىلاتىپ، اۋداننىڭ، اۋىلدىڭ، قىستاقتىڭ فۋنكتسيالىق ءتۇيىلىسۋىن، ءبىرىن - ءبىرى تولىقتاۋىن جەبەۋ، ءتۇزىلىس - مەحانيزمدە جاڭالىق اشۋدى تەرەڭدەتىپ، اۋدان ورتالىعى قۇرىلىسىنا ساياسات جاعىنان قامتاماسىزدىق ازىرلەۋ سياقتى 7 جاقتان 27 ءتۇرلى مىندەت - شارانى باعىتتامالى العا قويدى.
اۆتونوميالى رايوندىق دامۋ جانە رەفورما كوميتەتى اۆتونوميالى رايوندىق پارتكوم مەن ۇكىمەتتىڭ ورنالاستىرۋىنا ساي، تاراۋلاردىڭ سايكەسۋىن كۇشەيتىپ، جوعارى مەن تومەننىڭ بىرلەسىپ قيمىلداۋىن كۇشەيتىپ، «اتقارۋ جوباسىنداعى» مىندەتتەردىڭ تياناقتانۋىن شىن مانىندە ويداعىداي يگەرىپ، اۋدان ورتالىقتارىنىڭ جوعارى ساپالى دامۋىن جەدەل ىلگەرىلەتەدى.
