انار بۇلت \ شينجياڭ گازەتىنىڭ ءتىلشىسى مايگۇل ايتقازى 4 - ايدىڭ 13 - كۇنى ۇرىمجىدەن حابارلايدى. 4 - ايدىڭ 13 - كۇنى كەشتە تۇڭعىش كەزەكتى شينجياڭ مادەنيەت - كوركەمونەر فەستيۆالىنداعى تاڭداۋلى تەاتر قويىلىمىنا قاتىناسقان ءان - ءبي تەاترى «جيەيوۋ حانىشا» ءۇرىمجى مادەنيەت ورتالىعى ۇلكەن تەاترحاناسىندا تارتىمدىلىعىن ايگىلەدى. ىلە قازاق اۆتونوميالى وبلىستىق ءان - ءبي تەاترحاناسىنىڭ ارتيستەرى جاندى ءبي ءتىلى، جان تەبىرەنتەرلىك دراما ورىنداۋ شەبەرلىكتەرى ارقىلى حان پاتشالىعى داۋىرىندەگى ەكى حانىشانىڭ ىلگەرىندى - كەيىندى شالعايداعى ۇيسىنگە ۇزاتىلعان تاريحي حيكاياسىن بايانداپ، جۇڭحۋا پەرزەنتتەرىنىڭ وتباسى - وتان سۇيىسپەنشىلىگىن ايگىلەدى.
ەكپىندەگەن بارابان ءۇنى مەن تامىلجىعان مۋزيكا اۋەنىنىڭ سۇيەمەلىندە ليۋ جيەيوۋ، ليۋ شيجۇن، جۇن شۇيمي قاتارلىلار ارت - ارتىنان ساحناعا شىقتى. باتىس حان پاتشالىعى اۋلەتىندە دۇنيەگە كەلگەن جيەيوۋ حانىشا شالعايداعى ۇيسىنگە ۇزاتىلادى، ول ءوزىنىڭ اسىل قاسيەتى جانە ساياسي اقىل - پاراساتى ارقىلى سوعىس اپاتىن الاستاپ، حالىققا باقىت جاراتىپ، قۇرمەتكە بولەنەدى، وتان تۇتاستىعىن قورعاپ، ۇلتتاردىڭ ىنتىماعىن جەبەۋگە ماڭىزدى ۇلەس قوسادى.
ءان - ءبي تەاترى «جيەيوۋ حانىشا» تاريحي شىندىققا قۇرمەت ەتۋ نەگىزىندە، قازىرگى زامانعى ءان - ءبي تەاترىنىڭ بەينەلەۋ ءتاسىلى ارقىلى حان ۇلگىسىندەگى كونە ىرعاق پەن ۇلتتىق سالت - سانانى توعىستىرىپ، جيەيوۋ حانىشانىڭ اق پەيىل ىزگى نيەتى مەن نازىك سەزىمىن كوركەمدىك تاسىلمەن ايگىلەيدى. ءان ايتىپ، بيگە باسقان ايبىندى تاريحي كورىنىس، وسى زامانعى تەاتردىڭ ەستەتيكالىق بەينەلەۋى وسى تەاتردى تەرەڭ تاريحي مادەني مانگە جانە وزگەشە كوركەمونەرلىك تارتىمدىلىققا يە ەتتى.
ىلە وبلىسىنىڭ ”شينجياڭدى مادەنيەتپەن نارلەندىرۋدەگى“ ءتۇيىندى كوركەمونەر سارا تۋىندىسى، جياڭسۋ ولكەسىنىڭ مادەنيەت ارقىلى شينجياڭعا كومەكتەسۋدەگى ءتۇيىندى نىسانى بولعان «جيەيوۋ حانىشانى» جياڭسۋ ولكەسىنىڭ ىلە قازاق اۆتونوميالى وبلىسىنا باعىتتامالى كومەكتەسۋ الدىڭعى جاق قولباسشىلىق شتابى قارجىلاي دەمەگەن، ول مەملەكەتتىك كوركەمونەر قورىنىڭ 2022 - جىلعى تاراتۋ، اۋىس - كۇيىس، جالپىلاستىرۋ قارجىلاي كومەكتەسۋ نىسانى.
ىلە وبلىستىق ءان - ءبي تەاترحاناسى پارتكومىنىڭ شۋجيى لي شياۋمەي بىلاي دەدى: ”ءبىزدىڭ بۇل تەاتر ىلگەرىندى - كەيىندى جياڭسۋ ولكەسىنىڭ كوپ جەرىندە جانە شاڭحايدا ارالاپ قويىلدى، جۇڭگو حيكاياسىنىڭ شينجياڭ تاراۋىن ويداعىداي بايانداپ، كورىكتى ىلە وبرازىن ايگىلەپ، شينجياڭنىڭ ءىشى - سىرتىنداعى مادەنيەت اۋىس - كۇيىسىن كۇشەيتۋگە بەلسەندى ۇلەس قوستى. وسى رەت تۇڭعىش كەزەكتى شينجياڭ مادەنيەت - كوركەمونەر فەستيۆالىنا قاتىناسۋ بارىسىندا ءبىز وزگە ادەبيەت - كوركەمونەر ۇيىرمەلەرىنەن اناعۇرلىم ويداعىداي ۇيرەنىپ، اناعۇرلىم ويداعىداي اۋىس - كۇيىس جاسايمىز“.
بۇل تەاتر 4 - ايدىڭ 13 -، 14 - كۇندەرى كەشتە ەكى مايدان قويىلادى.
