قامداۋ تىزبەگىن باسقارۋشى جاڭ پىڭجياڭ:
تۇتىنۋشىلارعا ساپالى، جاقسى زاتتاردى تاڭداپ بەرەمىن
− جانىمىزداعى جاڭا كاسىپپەن شۇعىلدانۋشىلار ②
□ انار بۇلت \ شينجياڭ گازەتىنىڭ ءتىلشىسى سو رۇڭجى
ءۇرىمجى قالاسىندا تۇراتىن ما شياۋلي تاۋباۋ APPى ارقىلى ي - ۋ قالاسىنداعى ساۋداگەردەن ماگنيت كۇشىندىك جاپسىرما قۇراما سۋرەتىن ساتىپ الىپ، ءبىر كۇننەن كەيىن جەدەل جولدامانى تاپسىرىپ الدى؛ قۇمىل قالاسىندا تۇراتىن جاڭ يۇڭحۇڭ دوۋيىن APPى ارقىلى پۋياڭ قالاسىنداعى ساۋداگەردەن 3 قالتا تيەباڭ شانياۋ جاپىراقتاما كەسپەسىن ساتىپ الىپ، ەكى كۇننەن كەيىن جەدەل جولدامانى تاپسىرىپ الدى؛ اقسۋ قالاسىنىڭ تۇرعىنى ليۋ حۇڭيان جيڭدۇڭ APPى ارقىلى سۋجوۋ قالاسىنداعى ساۋداگەردەن رەڭدى رازينكە تاسپاسىن ساتىپ الىپ، ءۇش كۇننەن كەيىن جەدەل جولدامانى تاپسىرىپ الدى...
بۇل تاۋارلار ەلىمىزدىڭ جەر - جەرىنەن كەلگەنىمەن، ءبىر تۇتاس زات تاراتۋ ورنىنان − ءۇرىمجى قالاسى ميدۇڭ رايونىنداعى بۇلتتىق قامبادان تاراتىلادى. ءسىز، بالكىم، بۇلتتىق قامبا دەگەن نە؟ وسىنشاما كوپ تاۋاردى قالاي ساقتاۋعا بولادى؟ تاۋار ساتىپ الۋشىنىڭ قولىنا قالاي تەز جەتەدى؟ دەپ تاڭدانۋىڭىز مۇمكىن. وسى ماسەلەلەردى تۇسىنۋدەن بۇرىن، الدىمەن جاڭا كاسىپپەن شۇعىلدانۋشى − قامداۋ تىزبەگىن باسقارۋشى جاڭ پىڭجياڭمەن تانىسايىق.
تاۋاردى ”سول كۇنى جەتكىزۋدى“، ”كەلەسى كۇنى جەتكىزۋدى“ جۇزەگە اسىردى
ءۇرىمجى قالاسى ميدۇڭ رايونى گۋمۋدي قالاشىعى شيگۇڭ قىستاعىنا ورنالاسقان شينجياڭ جوۋجي بۇلتتىق قامبا قامداۋ تىزبەگىن باسقارۋ شەكتى سەرىكتەستىگىنە بارعانىمىزدا، 3 قاباتتى قامبانىڭ ساقتاۋ اۋماعىندا باسىنا كوز جەتپەيتىن ءىرى زات سورەسى بار ەكەن. ءبىر قاباتتاعى سۇرىپتاۋ اۋماعىنىڭ زات سورەسىنە ءتۇرلى تاۋارلار قويىلىپ، ارلى - بەرلى قايشالىسقان سۇرىپتاۋشىلار زات جونەلتۋ تالونىنا نەگىزدەلىپ تاۋاردى تەز تاڭداپ، رەتى بويىنشا قوراپتاپ، زات جونەلتۋدە.
28 جاستاعى جاڭ پىڭجياڭ تاقتاشا كومپيۋتەرىن الىپ، سوڭعى 7 كۇنگى تاۋار شىعارۋ مولشەرىنە تالداۋ جاسادى. ”وسى جەردە وندىرىلگەن دامدەندىرگىش، پۋياڭنىڭ جاپىراقتاما كەسپەسى، اياق كيىم شوتكىلەۋ ’كەرەمەت بۇيىمى‘ ەرەكشە ءوتىمدى بولۋدا“، جاڭ پىڭجياڭ سويلەي ءجۇرىپ، ءبىر جولدا 2 باسپالداقتى اتتاپ 2 - قاباتتاعى ساقتاۋ اۋماعىنا سەكىرىپ شىعىپ، وسى 3 ءتۇرلى تاۋاردىڭ قامباداعى قالدىعىن انىقتادى، جاپىراقتاما كەسپەسىنىڭ قامباداعى قورى جەتكىلىكسىز ەكەنىن بايقاپ، دەرەۋ ساۋداگەرلەرمەن بايلانىس جاساپ زات تولىقتادى.
جاڭ پىڭجياڭ − شينجياڭ جوۋجي بۇلتتىق قامبا قامداۋ تىزبەگىن باسقارۋ شەكتى سەرىكتەستىگىنىڭ ديرەكتورى ءارى قامداۋ تىزبەگىن باسقارۋشى. 2020 - جىلى 2 - ايدا قامداۋ تىزبەگىن باسقارۋشى جاڭا كاسىپ رەتىندە مەملەكەتتىڭ كاسىپتىك تۇرگە ايىرۋ تىزىمدىگىنە ەنگىزىلدى.
ءىس جۇزىندە، جاڭ پىڭجياڭ 2018 - جىلدان باستاپ وسىعان قاتىستى قىزمەتتەرمەن شۇعىلدانا باستاعان. ول كەزدە جاڭ پىڭجياڭ مەن دوستارى ەلەكتروندى ساۋدا تۇعىرى ارقىلى شىلان، مەيىز سياقتى شينجياڭنىڭ ەرەكشە ونىمدەرىن ساتاتىن. شارۋاشىلىق قۇرعان العاشقى كەزدە، ولار ءار كيلوگرامىن 18 يۋاندىق وزىندىك قۇن باعاسىمەن دۇكەندەرگە ەنگىزگەندە، ءارقايسى ءىرى قالالارعا جولداعان جەدەل جەتكىزۋ قاراجاتى تاۋار باعاسىنىڭ تەڭ جارتىسىنداي ەكەنىن بايقايدى.
”پوچتا اقىسى جوعارى بولعاندىقتان، ءبىزدىڭ العاشقى قادامدى ءساتتى باسۋىمىز قيىنعا سوقتى“. جاڭ پىڭجياڭ شاڭحاي، بەيجيڭ سياقتى جەرلەرگە بارىپ ۇيرەنۋ ارقىلى ەلەكتروندى ساۋدانىڭ ۇشقان قۇستاي دامۋىنا بايلانىستى ەلەكتروندى ساۋدا كاسىپورىندارى ءوزى قامبا سالۋدان ءۇشىنشى جاق قامداۋ تىزبەگى كاسىپورنى بۇلتتىق قامبا قۇرىپ، جەلىدە ساتىلاتىن ونىمدەردى الدىن الا جەر - جەردەگى بۇلتتىق قامباعا قويىپ، جەرگىلىكتى الارماندار تاپسىرىس بەرگەننەن كەيىن، زەردەلى بۇلتتىق قامبا باسقارۋ جۇيەسى تاپسىرىس قابىلداپ، زات تەكسەرىپ، قوراپتاپ، جونەلتىپ ءارى ەلەكتروندى ساۋدا سەرىكتەستىكتەرىنىڭ قامبا قۇرۋداعى وزىندىك قۇنىن ۇنەمدەۋمەن بىرگە، تاۋارلاردىڭ ”سول كۇنى جەتۋىن“، ”كەلەسى كۇنى جەتۋىن“ جۇزەگە اسىراتىندىعىن بىلەدى.
ەلەكتروندى ساۋدا كاسىپورىندارىن يگىلىككە كەنەلتتى
جاڭ پىڭجياڭ بۇلتتىق قامبا جانە قامداۋ تىزبەگى جۇيەسى قۇرىلىسىنا ەرەكشە قىزىعىپ، ۇزدىكسىز ۇيرەنۋ ارقىلى كوپتەگەن كاسىپتىك بىلىمدەردى يگەردى. 2018 - جىلى 7 - ايدا ول شينجياڭ جوۋجي بۇلتتىق قامبا قامداۋ تىزبەگىن باسقارۋ شەكتى سەرىكتەستىگىنە كەلىپ قىزمەت ىستەدى. ”قامداۋ تىزبەگىن باسقارۋشى الدىڭعى لەكتە ءجۇرىپ، ساپالى، جاقسى زاتتاردى تاڭداۋمەن بىرگە، تاۋاردىڭ تاريحي ساتىلىم ساندى مالىمەتىن ساراپتاپ، وزىندىك قۇن مەن تاپسىرىس سانىنىڭ سالىستىرماسىن ۇيلەسىمدى ەسەپتەپ، ساندى مالىمەتتەگى ساتىلىمى از تاۋارلاردى دەر كەزىندە قاتاردان قالدىرىپ، وزىندىك قۇن دەڭگەيى مەن قىزمەت وتەۋ دەڭگەيىن تەڭگەرۋى كەرەك“. جاڭ پىڭجياڭ ءوزىنىڭ قۇلشىنىسى ارقىلى كاسىپ سالاسىندا ءوز قابىلەتىن ايگىلەي باستادى.
باستابىندا ءونىمدى قالاي تاڭداۋ سەرىكتەستىك ءدوپ كەلىپ وتىرعان قيىن ماسەلە ەدى. بۇل ماسەلەنى شەشۋ ءۇشىن، جاڭ پىڭجياڭ كەشتە ينتەرنەت جەلىسىندە جەرگىلىكتى ەلەكتروندى ساۋدامەن اينالىسۋشىلاردى تاۋىپ، كۇندىز ءبىر - بىرلەپ ىزدەپ باردى. شينجياڭ ميچۋان استىق - ماي ساتىپ الۋ - ساتۋ شەكتى سەرىكتەستىگى ولارمەن سەلبەسكەن تۇڭعىش سەرىكتەستىك.
سول كەزدە استىق - ماي تۇرىندەگى تاۋارلاردىڭ زات اينالىمى اقىسىنىڭ جوعارى بولۋى كاسىپورىننىڭ ەلەكتروندى ساۋدا جاعىنداعى دامۋىنا تۇساۋ بولعان، بۇلتتىق قامبامەن سەلبەسكەننەن كەيىن، اقىرى ماسەلە شەشىلدى. بەيجيڭدەگى ءبىر الارمان ءبىر قالتا كۇرىش ساتىپ الدى، جاڭ پىڭجياڭنىڭ زات جونەلتىپ، تۇڭعىش رەت جەدەل جەتكىزۋ تالونىن شىعارعان كەزدەگى قۋانىشتى كوڭىل كۇيى كۇنى بۇگىنگە دەيىن ەسىندە ەكەن.
سەلبەسىپ ەلەكتروندى ساۋدامەن اينالىسۋدىڭ اۋىزدان - اۋىزعا تارالۋىنا ىلەسە، جاڭ پىڭجياڭمەن سەلبەسەتىن ەلەكتروندى ساۋدا كاسىپورىندارى دا بارعان سايىن كوبەيە ءتۇستى. ”جۇزدەن استام كاسىپورىن بىرگە بۇلتتىق قامبادان زات جونەلتتى، زات اينالىمى سەرىكتەستىكتەرى دە وزىندىك قۇندى تومەندەتىپ، بىزبەن سەلبەسۋگە پەيىل بولدى“. جاڭ پىڭجياڭنىڭ ايتۋىنشا، بۇگىنگى تاڭدا بۇلتتىق قامبادان زات جونەلتۋ ارقىلى شينجياڭعا جەتكىزىلەتىن پوچتا اقىسىن كوتەرۋدى جۇزەگە اسىردىق، بۇل تۇتىنۋشىلارعا پايدالى بولىپ قانا قويماي، ەلەكتروندى ساۋدا كاسىپورىندارىنا دا پايدالى.
دوۋيىن APP ەلەكتروندى ساۋدا كاسىپورنى ”جياڭجيە ىدىس - اياقتارىنىڭ“ جاۋاپتىسى ۋاڭ حانىمنىڭ ايتۋىنشا، بۇلتتىق قامبادان زات جونەلتۋ ارقىلى ول ％40 وزىندىك قۇندى ۇنەمدەگەن، ال، بۇلتتىق قامبا زاتتاردى ساقتاپ بەرۋ سياقتى قىزمەت وتەۋلەردى ازىرلەيدى، بۇل ونىڭ اناعۇرلىم زور زەيىن - زەردەمەن ساتۋ جۇمىستارىن ويداعىداي ىستەۋىنە مۇمكىندىك بەرگەن.
بولاشاقتاعى دامۋىنان زور ءۇمىت كۇتەمىز
جاڭ پىڭجياڭ كاسىپ سالا وزگەرىسىنە ۇنەمى نازار اۋدارىپ وتىرادى. 2021 - جىلى 5 - ايدا ادام كۇشى بايلىعى جانە قوعامدىق قامتاماسىزداندىرۋ مينيسترلىگى «جاڭا كاسىپ − قامداۋ تىزبەگى باسقارۋشىلارىن جۇمىستاندىرۋدى گۇلدەندىرۋدىڭ قازىرگى احۋالى» اق تىستى كىتابىن جاريالادى، وندا الداعى 5 جىلدا ەلىمىزدىڭ قامداۋ تىزبەگىن باسقارۋشىلارعا سۇرانىسىنىڭ جالپى مولشەرى 6 ميلليون اينالاسىنا جەتەتىندىگى ايتىلدى.
بۇل جاڭ پىڭجياڭنىڭ وسى ءبىر جاڭا كاسىپتىڭ بۇدان كەيىنگى دامۋىنا بولعان ءۇمىتىن بەكەمدەي ءتۇستى. وسى سالادا سان شىنىعۋدى باستان كەشىرىپ 6 جىل ىستەگەن جاڭ پىڭجياڭ قامداۋ تىزبەگىن باسقارۋشىلاردىڭ جەرگىلىكتى ورىندا جۇيەلى تاربيەلەنۋى كەمشىل بولعاندىقتان ماماندانعان دارىندىلاردىڭ تاپشىلىعىن جانە كاسىپپەن شۇعىلدانۋدا كەزدەسكەن ماسەلەلەردىڭ دەر كەزىندە شەشىلمەۋى سياقتى ماسەلەلەردى تۋدىرعاندىعىن دا بايقادى.
بۇل جونىندە اۆتونوميالى رايوندىق پارتكوم پارتيا مەكتەبى (اكىمشىلىك شۋەيۋانى) ەكونوميا وقىتۋدى زەرتتەۋ ءبولىمىنىڭ ورىنباسار مەڭگەرۋشىسى، دوتسەنت ابدۇقيۇم سالام تالداۋ جاساپ، بىلاي دەپ قارادى: قامداۋ تىزبەگىن باسقارۋشىلار كاسىپورىننان قاريدارعا دەيىن، ءونىم وندىرۋدەن قىزمەت كورسەتۋ سياقتى جاقتارعا دەيىن باسى مەن اياعىن جالعاستىرۋ، ءبىر تۇتاس جوسپارلاپ ءتۇيىلىستىرۋ رولىن اتقارىپ وتىر. جاڭا جۇمىستانۋ فورماتسياسى رەتىندە، قامداۋ تىزبەگىن باسقارۋشىنىڭ دامۋ بولاشاعى كەڭ. ”رايونىمىزدىڭ وقۋ - اعارتۋ، ادام كۇشى بايلىعى جانە قوعامدىق قامتاماسىزداندىرۋ تاراۋلارى دا قامداۋ تىزبەگى ءپانىن وقىتۋ جۇيەسىن ورناتىپ، قامداۋ تىزبەگى دارىندىلارىن باۋلۋدىڭ ماماندىق سيپاتىنا كەپىلدىك ەتۋى؛ قامداۋ تىزبەگى كاسىپتىك باۋلۋ جۇيەسىن ورناتىپ، قامداۋ تىزبەگىن باسقارۋدىڭ كاسىبيلەنۋىن قامتاماسىز ەتۋ كەرەك“، - دەدى ول.
جاڭ پىڭجياڭدى قۋاندىرعانى، 2018 - جىلى قامبا قۇرىلعاننان بەرى، شينجياڭ جوۋجي بۇلتتىق قامبا قامداۋ تىزبەگىن باسقارۋ شەكتى سەرىكتەستىگىنىڭ كاسىپتىك ناتيجەسى بارعان سايىن جاقسارعان، قازىرگە دەيىن وسى سەرىكتەستىك بۇكىل ەلدەگى 300دەن استام كاسىپورىنمەن سەلبەستىك كەلىسىمىن جاساسقان، مۇنىڭ ىشىندە شينجياڭنىڭ جەرگىلىكتى ورتا، شاعىن، ۇساق كاسىپورىندارى جۇزدەن اسادى، ءار ايدا ورتا ەسەپپەن 80 مىڭعا تاياۋ تاپسىرىس قامبادان شىعادى ەكەن.
”وڭىرلىك تۇتىنۋ ادەتىن يگەرۋ ارقىلى تۇتىنۋشىلارعا مويىندالىپ، ەكشەلىپ قالعان ونىمدەردى ءوتىمدى تاۋارعا اينالدىرۋ وسى كاسىپتەگى باقىت سەزىمى مەن تابىس سەزىمى بولىپ تابىلادى“. وسى جاڭا كاسىپ جونىندە جاڭ پىڭجياڭ: ”قامداۋ تىزبەگىندە ەڭ جاقسى ناتيجەگە ۇمتىلۋىم ءۇشىن جىلدام جۇگىرۋىم كەرەك“، - دەدى.
