ءان - ءبي تەاترى «مەكەنگە ماحابباتتا»:
كورشىلەردىڭ تەرەڭ سۇيىسپەنشىلىگى جاندى بەينەلەندى
4 - ايدىڭ 9 - كۇنى ءان - ءبي تەاترى «مەكەنگە ماحاببات» ءۇرىمجى قالاسىندا قويىلدى.
□سۋرەتتى انار بۇلت \ شينجياڭ گازەتىنىڭ ءتىلشىسى تاڭ يۇڭ تۇسىرگەن
انار بۇلت \ شينجياڭ گازەتىنىڭ ءتىلشىسى جاۋ مەي 4 - ايدىڭ 9 - كۇنى ۇرىمجىدەن حابارلايدى. قۇيقىلجىعان اكارديون ءۇنى، ويناقى ورىس ءبيى، ارىندى توست كوتەرۋ ءانى، دۋماندى تيتتۋپ ءبيى... 4 - ايدىڭ 9 - كۇنى كەشتە ءۇرىمجى قالالىق چينجۇي تەاترى ۇيىرمەسىنىڭ شينجۇڭ تەاترحاناسىندا ءان - ءبي تەاترى «مەكەنگە ماحاببات» اسەرلى سەزىممەن ورىندالدى، كورەرمەندەر تەرەڭ اسەرگە بولەنىپ، ساحنا استىندا القاۋ جانە شارىقتاعان شاپالاق ءۇنى توقتاۋسىز كوتەرىلدى.
”«مەكەنگە ماحاببات» شاۋەشەكتە تۇرمىس كەشىرىپ جاتقان ءبىر جۇپ ەرلى - زايىپتىنىڭ التىن تويىن قۇتتىقتاۋدى دەرەك ەتۋ ارقىلى كورشى - قولاڭ، تۋىس - تۋعان، دوس - جاراندارىنىڭ التىن تويى بولعان قارتتارعا دەگەن ىزگى تىلەگىن اڭگىمە جەلىسى ەتىپ، ءار ۇلتتىڭ وزىندىك ەرەكشەلىككە يە ءارى ءوزارا توعىسقان مۋزيكا، ءبي ەلەمەنتتەرىنەن پايدالانىپ، تارباعاتايداعى كوپ ۇلتتىڭ بەرەكە - بىرلىكتە بولعان، ءبىر ءۇيلى جانداي، توننىڭ ىشكى باۋىنداي تەرەڭ سۇيىسپەنشىلىگىن ايگىلەدى“، - دەدى «مەكەنگە ماحابباتتىڭ» باس رەجيسسەرى گۇلناز اسەيىنقان.
”وسىناۋ ۇلتتىق سالت - ساناعا باي شەكارا وڭىردەگى شاعىن قالاشىقتا 29 باۋىرلاس ۇلت جاسايدى، ولار بەرەكە - بىرلىكتى، ىنتىماقتى، تاتۋ - ءتاتتى، مەيماندوس، بۇل ارا حالىق ونەرپازدارىنىڭ كورىكتى مەكەنىنە اينالدى“... جۇرگىزۋشىنىڭ تەرەڭ سۇيىسپەنشىلىككە تولى تۇسىندىرۋىمەن ءان «ومىرگە تىلەك»، ءبي «سۇلۋ قىز»، «گارابۋشكا»، ءان - ءبي «ناچيا» التىن تويى بولعان ەرلى - زايىپتىلاردىڭ قۇتتىقتاۋ سالتىندا ىركەس - تىركەس ورىندالىپ، تارتىمدى ويىندار ساحنانى شارىقتاۋ شەگىنە كوتەردى.
”بۇل كونسەرت حالىققا وتە جاناسىمدى بولىپ، ادامداردى ەرىكسىز ارتيستەرمەن بىرگە ءان ايتىپ، بىرگە بيلەۋگە باۋرايدى ەكەن. باعدارلامادا ءار ۇلتتىڭ ونەرى ايگىلەنگەندەي بولعانىمەن، ءىس جۇزىندە شاۋەشەكتەگى ءار ۇلتتىڭ ىقىلاستى، تاباندى، جاراسىمدى، تاتۋ - ءتاتتى باقىتتى تۇرمىسى بەينەلەنىپ، كورگەن ادامدى تەرەڭ اسەرگە بولەيدى“، - دەدى كورەرمەن ياڭ سۇڭيىڭ.
”بالا كەزىمدە شاۋەشەكتە تۇردىم، ءۇيىمىزدىڭ ماڭىندا ءار ۇلت كورشىلەرىمىز تۇراتىن، جايشىلىقتا ءبىز ۇنەمى ءبىر - ءبىرىمىزدىڭ ۇيىمىزگە قىدىرىپ، ءبىر - بىرىمىزگە كومەكتەسەتىنبىز. بۇل كونسەرت شاۋەشەكتەگى ءار ۇلتتىڭ ىستىق ىقىلاستى مەيماندوستىعىن، ىنتىماقتى، تاتۋ - ءتاتتى دوستىعىن شىنايى بەينەلەپتى ءارى مەنى سول ءبىر تاماشا تۇرمىس ەستەمەسىنە جانە ارمانعا باستاپ اپارعانداي بولدى“، - دەدى كورەرمەن ما يۇيحان.
«مەكەنگە ماحابباتتا» اتانىڭ رولىن العان پارحات ابىلاحات 5 جىلدىڭ الدىندا وسى تەاتر گرۋپپاسىنا كەلگەن، وسى رولدى سومداۋ بارىسىن ايتقاندا تەرەڭ اسەرگە بولەندى. ”ءار جولى جۇبايىم ماعان ’50 جىلدان بەرى، ماعان كەڭ پەيىلدىلىكپەن مامىلە جاساعانىڭا راقىمەت‘ دەگەن وسى ءبىر بولىكتى ورىنداعان كەزدە مەن ەرىكسىز كوزىمە جاس الامىن. مەنىڭ وتباسىم كوپ ۇلتتى وتباسى، ءبىزدىڭ كورشى - قولاڭىمىز دا ءار ۇلت باۋىرلاستارى، سوندىقتان مەن وسىنداي ءبىر ۇلكەن وتباسىندا تۇرمىس كەشىرۋدەمىن، ەگەر ءوزارا سيىسىمدى باۋىرمال بولماساق، باقىتتى، بالداي ءتاتتى تۇرمىس بولمايتىندىعىن بىلەمىن“، - دەدى پارحات.
گۇلناز بىلاي دەدى: «مەكەنگە ماحابباتتىڭ» تاعى ءبىر ەرەكشەلىگى قاتىناسقان ارتيستەردىڭ ％40ى سول جەردە تۋىپ - وسكەن حالىق ونەرپازدارى، ولاردىڭ ىشىندە ەگىنشى - مالشىلار، جەكە ساۋدا - ونەركاسىپشىلەر، ەركىن كاسىپكەرلەر قاتارلىلار بار.
تارباعاتاي ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى چاي حۇڭحۋا بىلاي دەدى: «مەكەنگە ماحاببات» 2012 - جىلى تۇڭعىش رەت قويىلعاننان قازىرگە دەيىن شىنياڭ قالاسى، قارامايلى قالاسى، مايتاۋ قالاسى سياقتى 10عا جۋىق قالادا مادەنيەت اۋىس - كۇيىسى بويىنشا ارالاپ كورسەتىلدى، ”ءبىز بۇل تەاتردى تارباعاتاي ايماعىنىڭ ساياحات - مادەنيەت تانىسقىسىنا اينالدىرىپ، ونىڭ تارباعاتايدان شىعۋىن، ءتىپتى دە كوپ ادامعا تارباعاتايلىقتاردىڭ باقىتتى تۇرمىسىن ايگىلەۋىن ءۇمىت ەتەمىز“.
