شينجياڭدىق ازامات گۋاڭشيدە ءورت ىشىنەن ادام قۇتقارىپ شىقتى

日期:2022年08月08日
来源:新疆日报
【字体:

قۇتقارىلۋشى: ”مەن شينجياڭدىقتاردىڭ جۇرەكتىلىگى مەن ىزگىلىگىن شىنايى سەزىندىم“

□ انار بۇلت \ شينجياڭ گازەتىنىڭ تىلشىلەرى ليۋ يميڭ، گو چيان

  وتقا ورانعان جەڭىل اۆتوكولىككە ءبىر قادام جاقىنداعان سايىن، لاۋلاعان ءورتتىڭ ىستىق جالىنى مەن جانىنا جولاتپاس اپتاپ دەمى ونان ارى ۇدەي تۇسەدى. ”جالاڭداعان جالىن تەرىمىزدى قاقتاپ تىرىستىرىپ بارادى، ءبىراق ءبىزدىڭ تايساقتاۋىمىزعا بولمايدى، ادامدى قۇتقارىپ شىعۋىمىز كەرەك“، - دەدى 8 - ايدىڭ 6 - كۇنى تەلەفوندا تىلشىگە الىستاعى گۋاڭشيدە جۇرگەن ءانۋار ءومار بىرنەشە كۇننىڭ الدىندا ادام قۇتقارعان كەزدەگى جاعدايدى ەسكە الىپ.

  8 - ايدىڭ 1 - كۇنى تۇستەن بۇرىن ءبىر جەڭىل اۆتوكولىك G75 لانجوۋ - حايكوۋ جوعارى جىلدامدىقتى تاس جولىنىڭ گۋاڭشي جۋاڭزۋ اۆتونوميالى رايونى حىچى قالاسى دۋ - ان ياۋزۋ اۆتونوميالى اۋدانى ديسۋ قالاشىعى ماڭىنداعى بولىگىندە اۋدارىلىپ، ىزىنشە ءورت تۇتانىپ، لاۋلاپ جانا باستايدى. وسى تۇستان ءوتىپ بارا جاتقان ءانۋار ءومار، شۇي جاۋلياڭ، مامەتروزى احات، مامەتجان ءومارجان تورتەۋى تاباندا قۇتقارۋعا، كومەكتەسۋگە كىرىسەدى. وسى 2 كۇندە وقيعادا جارالانعان ادام ءۇشىن ەمدەۋ قاراجاتى جينالىپ جاتقانىن ەستىگەن ءانۋار مەن ونىڭ سەرىكتەرى تاعى دا ەرلىك ىستەپ، 10 مىڭ يۋان جىلۋ اتادى، سونداي - اق گۋاڭشي مەديتسينالىق داشۋەسىنە قاراستى 1 - شيپاحاناعا بارىپ، ودان حال سۇرادى.

  ”سىزدەردىڭ سونشاما قاتەرلى جاعدايدا قول ۇشىن بەرىپ كومەكتەسكەندەرىڭىزگە، شىنىندا، كوپ راقىمەت، سىزدەر مەنىڭ كۇيەۋىمە 2 - رەت ءومىر سيلادىڭىزدار“، - دەدى 8 - ايدىڭ 7 - كۇنى جارالانعان داي دوشاننىڭ ايەلى ليۋ فىن ءانۋاردى كورگەن سوڭ قاتتى تولقىپ. ءۇيى حوتان ايماعىندا تۇراتىن، بيىل 38 جاستاعى ءانۋار ءوز جەرىندە اۆتوكولىك جۇرگىزۋشىلەردى تاربيەلەۋ مەكتەبىن اشقان. بيىل 5 - ايدا ول شينجياڭنىڭ اس - سۋ ماركاسى ”حوتان قاقتامالارىمەن“ گۋاڭشيدىڭ ليۋجوۋىنا بارىپ دامۋعا بەل بايلايدى.

  ”وقيعا بولعان كۇنى مەن 2 دوسىممەن، دۇكەندەگى ءبىر قىزمەتشىمەن بىرگە دۋ - انعا بارىپ، سول جەردەگى قوي ەتى بازارىن تەكسەرمەك بولعان جولدا وسى ىسكە كەزدەستىك“، - دەدى ءانۋار.

  سول كۇنى اۆتوكولىك جۇرگىزىپ كەلە جاتقان ءانۋار جول شەتىندە اق ءتۇتىن بۋداقتاپ جاتقانىن الىستان بايقاپ، جاقىنداپ كەلگەندە قويۋ ءتۇتىن استىندا ءبىر جەڭىل اۆتوكولىكتىڭ اۋدارىلىپ، وتقا ورانىپ جاتقانىن كورەدى. ءانۋار اۆتوكولىگىن جالما - جان شۇعىل جاعدايعا ارنالعان كولىك جولاعىنا توقتاتا سالىپ، ءورت سوندىرگىشتى الىپ، 3 سەرىگىمەن بىرگە وقيعا ورنىنا جۇگىرىپ جەتىپ بارادى ءارى تاباندا ساقشىعا حابارلايدى.

  ”جانىنا بارعان كەزدە شىرعالاڭعا ۇشىراعان اۆتوكولىكتىڭ الدىڭعى جاعىندا ءبىر ادامنىڭ جەردە سۇلىق جاتقانىن كورىپ، دەرەۋ ونى سالقىن جەرگە ارقالاپ اپاردىم“، - دەيدى ءانۋار.

  حىچى قالالىق قوعام حاۋىپسىزدىگى مەكەمەسى قاتىناس ساقشى تارماق اترەتى جوعارى جىلدامدىقتى تاس جول باسقارۋ 2 - ۇلكەن اترەتى كولىك شىرعالاڭى ورتا اترەتىنىڭ باستىعى مو يۇڭشۋەنىڭ تانىستىرۋىنشا، اۆتوكولىكتىڭ الدىندا ەسىنەن تانىپ جاتقان ادام شوفەردىڭ جانىنداعى ورىندا وتىرعان داي كىچياڭ ەكەن. شىرعالاڭ تۋىلعان سوڭ، ول ءوزىن قۇتقارىپ، شىرعالاڭعا ۇشىراعان كولىكتەن ورمەلەپ شىعىپتى.

  ەسىنەن تانعان جارالانۋشىنى جايعاستىرىپ قويعان سوڭ، ءانۋار وقيعا ورنىنا قايتا ورالادى. بۇل كەزدە سەرىگى شۇي جاۋلياڭ ءوتىپ بارا جاتقان اۆتوكولىكتەردەن كومەك سۇراي ءجۇرىپ، قاتىناسقا جەتەكشىلىك ەتىپ، قايتالاي كولىك شىرعالاڭى تۋىلۋدىڭ الدىن الادى، ءانۋار ءورت سوندىرگىشپەن ءورتتى سوندىرمەككە ۇمتىلادى، جانىنداعى باسقا 2 سەرىگى دە ورتكە ورانعان كولىككە جاقىنداپ جاعدايدى تەكسەرەدى.

  ”مۇندا ءبىر ادام بار ەكەن“! وقيعا ورنىندا مامەتروزى ايعاي سالىپ، اۋدارىلعان اۆتوكولىكتىڭ ۇستىنە شىعىپ، ىشىندە قامالىپ قالعان ادامدى تارتىپ شىعارماق بولادى. وسى كەزدە ورتەنىپ جاتقان اۆتوكولىكتە كەنەت جارىلىس تۋىلىپ، اۆتوكولىكتىڭ ۇستىنە شىققان مامەتروزى دۇمپۋدەن قۇلاپ تۇسەدى.

  ”مەن ءورتتىڭ توسىننان لاپ ەتىپ بيىك كوتەرىلگەنىن كوردىم، ىلە - شالا جويقىن ءدۇمپۋ تۋىلىپ، ءبىر اعاي اۆتوكولىك ۇستىنەن قۇلاپ ءتۇستى. جاڭاعى بىرنەشە ادام ىلە - شالا اۆتوكولىككە قايتا شىعادى دەپ كىم ويلاعان، ءسويتىپ ولار اۆتوكولىكتىڭ ىشىندە قامالىپ قالعان دوسىمدى قۇتقارماققا كىرىستى. سول شاقتا مەن ايرىقشا اسەرلەندىم، وسى اعايلارعا جولىققان ءبىزدىڭ، شىنىندا، باعىمىز بار ەكەن“ دەيدى داي كىچياڭ ەسىن جيعاننان كەيىن كورگەن جايتتەردى ەسكە الىپ.

  ”دۇمپۋدەن قۇلاپ تۇسكەندە، اۆتوكولىكتە مۇنان دا اۋىر جارىلىس بولىپ جۇرمەسىن دەپ ىشتەي قاتتى قورىقتىم“، - دەيدى مامەتروزى ەسكە الىپ، - ”اۆتوكولىكتەگى ادامنىڭ ’قۇتقارىڭدار‘ دەگەنىن ەستىگەندە، مەن جانتالاسا ورنىمنان تۇرىپ، قايتا اۆتوكولىككە جارماستىم، بار ويلاعانىم ادام قۇتقارۋ بولدى“!

  ولاردىڭ تىزە قوسا قۇلشىنۋىندا، اۆتوكولىكتە قامالىپ قالعان ەندى ءبىر ادام داي دوشان دا قۇتقارىلىپ شىعادى.

  ”سول كەزدە ونىڭ اياعى تۇگەل ورتكە ورانىپ جاتتى، ءبىز اعاش بۇتاقتارىمەن سابالاپ، ءورتتى سوندىردىك“، - دەيدى ءانۋار، ول ءوزى مەن سەرىكتەرىنىڭ بىلەكتەرىن اعاش بۇتاعى سابالاعان جانە لاۋلاعان جالىن كۇيدىرگەن جاراقاتتارعا تولىپ كەتكەنىن شىرعالاڭنان كەيىن عانا بايقاپتى.

  جارالانعان ەكىنشى ادامدى جايعاستىرىپ بولعان سوڭ، ءانۋار قولىنا قايتا ءورت سوندىرگىش الىپ، وقيعا ورنىنا بارادى، بۇل كەزدە اۆتوكولىكتە تاعى ءبىر رەت جارىلىس بولىپ، وتتىڭ جالىنى تۇتاس اۆتوكولىكتى دەرەۋ جالماپ، جانىنا ادام بارا المايتىن كۇيگە جەتەدى.

  ”ءورت تىم كۇشتى بولدى، ءبىزدىڭ ءورت سوندىرگىشىمىز ءورتتىڭ جالىنىن باسا المادى، اۆتوكولىكتەگى جۇرگىزۋشىنى قۇتقارىپ قالۋعا شارا تاپپادىم“، - دەدى تەلەفوننىڭ ارعى جاعىنداعى ءانۋار اشىنىشتى ۇنمەن، - ”ءبىز تاعى ءبىراز شاپشاڭ قيمىلداعان بولساق، مۇمكىن ونى قۇتقارىپ شىعار ەدىك“.

  ءىس جۇزىندە ءانۋار مەن ونىڭ سەرىكتەرى اۆتوكولىكتەرىن توقتاتىپ، جارالانعان ءبىر ادامدى قۇتقارىپ شىققانشا نە ءبارى 4 − 5 مينۋت قانا كەتكەن ەدى. كوپ ۇزاماي قاتىناس ساقشىلارى، ءورت سوندىرۋشىلەر جانە جەدەل جاردەم كولىگى وقيعا ورنىنا كەلىپ، جالاڭداعان ءورتتى كوپ ۇزاماي سوندىرەدى.

  شىرعالاڭعا ۇشىراعان اۆتوكولىكتەگى باسقا 2 ادام باقىتقا قارسى كوز جۇمادى.

  ”قۇتقارۋعا كىرىسۋدەن بۇرىن، ولار اۆتوكولىك ءنومىر تاقتاسى ينفورماتسياسىن ىجداعاتپەن جازىپ الىپ، قاتىناس ساقشىلارىنىڭ جاعدايدى ىشكەرىلەي تەكسەرۋىنە قولايلىلىق تۋعىزعان. قۇتقارۋ - كومەكتەسۋ كەزىندە، ولاردان ءبىر ادام توقتاۋسىز قاتىناسقا جەتەكشىلىك ەتىپ، 2 - رەت وقيعا تۋىلۋدىڭ الدىن العان. ولار ەر جۇرەك قانا ەمەس، وتە مۇقيات ەكەن“، - دەيدى مو يۇڭشۋە، ونىڭ ايتۋىنشا، قاتىستى تاراۋلار وقيعا ورنىنا كەلگەن سوڭ، ءانۋار مەن ونىڭ سەرىكتەرى قاتىستى تاراۋلاردىڭ شىرعالاڭنىڭ سوڭىن جايعاستىرۋ، ءبىر جاقتى ەتۋ قىزمەتىن ورىستەتۋىنە سايكەسىپ، وقيعا ورنىنا كەلىپ جەتكەن مەديتسينالىق قىزمەتكەرلەردىڭ قۇتقارىلعان جارالانۋشىعا جەدەل قۇتقارۋ - ەمدەۋ جۇرگىزۋىنە جاردەمدەسەدى.

  ”اعايلار بىزگە كومەكتەسىپ، ۋكول قۇمىراسىن كوتەرىپ تۇردى، بىزگە كۇنقاعار شاتىر تاۋىپ اكەلىپ قۇرىپ بەرىپ، وزدەرى كۇنگە قاقتالىپ تۇردى“، - دەيدى داي كىچياڭ، - ”بۇرىن شينجياڭدىقتار اق كوڭىل، قوناقجاي بولادى دەپ ۇنەمى ەستۋشى ەدىم، بۇل جولى شينجياڭدىقتاردىڭ جۇرەكتىلىگى مەن ىزگىلىگىن شىنايى سەزىندىم“.

  ءانۋار مەن ونىڭ سەرىكتەرىنىڭ ەرلىكپەن ادام قۇتقارعان اڭگىمەسى ينتەرنەت قولدانۋشىلاردىڭ نازارىنا ءىلىنىپ، القاۋىنا بولەندى، ءبىراق، ول ۇيدەگىلەر الاڭداپ قالماسىن دەپ، بۇل ءىستى ولارعا ايتپاعان ەكەن.

  ”اكە - شەشەم ۇشەۋىمىز بۇل ءىستى دوستار شەڭبەرىنەن بىلدىك، اۋىز جۇزىندە كىنالاعانىممەن، مەن ونى ماقتانىش ەتەمىن“، - دەيدى ءانۋاردىڭ سوناۋ حوتان قالاسىنداعى ايەلى ءشامشىنۇر ابدوللا.

  ءانۋار جايشىلىقتا دا اق جۇرەك جان ەكەن. ءار جىلعى ورتالاۋ مەكتەپ ەمتيحانى، جوعارى مەكتەپ ەمتيحانى كەزىندە ول اۆتوكولىك جۇرگىزۋشىلەرىن تاربيەلەۋ مەكتەبىنىڭ اۆتوكولىك توبىن مەيىر جەتكىزىپ وقۋشىلاردى ەمتيحانعا جەتكىزىپ قويۋ قيمىلىن ورىستەتۋگە ۇيىمداستىرادى، سونداي - اق، ۇنەمى قىزمەتشىلەرىن لەي فىڭنان ۇيرەنۋ قيمىلىنا جۇمىلدىرىپ، ءجۇرىس - تۇرىسى قولايسىز قارتتاردى اپارىپ - اكەلىپ قويادى ەكەن.

  ”بارلىعىمىز اعا - باۋىر، اپەكە - سىڭلىلەرمىز، ءبارىمىز ءبىر ءۇيدىڭ ادامىمىز. ادام قۇتقارۋ ءبىز ىستەۋگە ءتيىس ءىس“، - دەيدى ءانۋار.