انار بۇلت \ شينجياڭ گازەتىنىڭ ءتىلشىسى لي ياڭ 8 - ايدىڭ 6 - كۇنى ۇرىمجىدەن حابارلايدى. 8 - ايدىڭ 5 - كۇنى تۇستەن كەيىن جۇڭگو شينجياڭ ۇيعۇر اۆتونوميالى رايونى − رەسەي التاي شەكارا ءوڭىر رايونى دوستىق، سەلبەستىك كەڭەسى ءۇرىمجى مەن بارناۋلدا ءبىر ۋاقىتتا وتكىزىلىپ، ەكى جاقتىڭ ءوزارا تيىمدىلىك جەتكىزىپ سەلبەسۋىن تەرەڭدەتۋ جونىندە پىكىر اۋىستىردى.
اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ءتوراعاسى ەركىن تۇنياز كەڭەسكە قاتىناستى ءارى ءسوز سويلەدى. رەسەي التاي شەكارا ءوڭىر رايونىنىڭ اكىمى، ۇكىمەت ءتوراعاسى ۆيكتور تومينك كەڭەسكە قاتىناستى ءارى ءسوز سويلەدى.ەركىن تۇنياز شينجياڭنىڭ ەكونوميكالىق، قوعامدىق دامۋىنىڭ قاتىستى جاعدايلارىن تانىستىردى. ول بىلاي دەدى: جۇڭگو كوممۋنيستىك پارتياسىنىڭ 18 - قۇرىلتايىنان بەرى شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، شينجياڭ باستان - اياق حالىقتى وزەك ەتكەن دامۋ يدەياسىنا تاباندى بولىپ، ءار ۇلت بۇقاراسىنىڭ تاماشا تۇرمىسقا دەگەن تالپىنىسىن قاناعاتتاندىرۋدى كۇرەس نىساناسى ەتىپ،ءار ۇلت بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز كۇشەيتتى. شينجياڭ رەسەيدىڭ التاي شەكارا ءوڭىر رايونىمەن جاعراپيالىق جاقتان جالعاسقان، گەوگرافيالىق جاقتان كورشى، وركەنيەتتەرى تۇتاسقان، زاماندار بويى دوس، اۋىس - كۇيىسى، سەلبەستىگى تەرەڭ، دامۋ بولاشاعى كەڭ. ءبىز جۇڭگو − رەسەي ەكى ەل مەملەكەت باسشىلارىنىڭ كەزدەسۋدە كەلىسكەن ماڭىزدى ورتاق تانىمدى مۇقيات دايەكتىلەندىرىپ، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە بويسۇنىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن ىلگەرىلەتىپ، التاي شەڭبەرى ءوڭىرى سەلبەستىك مەحانيزمىنەن تولىق پايدالانىپ، ەكونوميكا - ساۋدا، ساياحات، ەمدەۋ، ءدارى - دارمەك، ىندەتتەن ساقتانۋ، اۋىل شارۋاشىلىعى، وقۋ - اعارتۋ سياقتى سالالارداعى سەلبەستىكتى ۇزدىكسىز تەرەڭدەتىپ، جاستاردىڭ بارىس - كەلىسىن، اۋىس - كۇيىسىن كۇشەيتەمىز.
سونىمەن بىرگە حالىق تىلەگىن ۇلاستىرۋدى نىسانا ەتىپ، ەكى رايوننىڭ ءتىپتى دە كوپ نەگىزگى ساتى اۋدان، قالا، رايوندارىنىڭ دوس قالالار قارىم - قاتىناسىن ورناتۋىن ىلگەرىلەتىپ، ەكى جاق حالىق بۇقاراسىنىڭ اناعۇرلىم ەتەنە، بەرەكەلى بولۋىن جەبەيمىز.
ۆيكتور تومينك مىنالاردى ءبىلدىردى: التاي شەكارا ءوڭىر رايونى مەن شينجياڭ ۇزاق ۋاقىتتىق سەلبەستىك، اۋىس - كۇيىس جاساۋ تاريحىنا يە. جاقىنداعى جىلداردان بەرى ەكى جاقتىڭ ءوزارا تۇسىنىستىگى مەن سەنىمى ۇزدىكسىز نىعايىپ، وڭىرلىك سەلبەستىكتى كۇشەيتۋ ورتاق تانىمعا جانە ءىس جۇزىندىك ارەكەتكە اينالدى. بيىل 7 - ايدا ءتوراعا شي جينپيڭ شينجياڭعا كەلىپ كوزدەن كەشىردى، بۇل جۇڭگونىڭ شينجياڭنىڭ دامۋىنا مەملەكەت دەڭگەيىنەن ايرىقشا ءمان بەرەتىندىگىن اڭعارتادى، بۇل شينجياڭ جونىنەن ايتقاندا ءارى وراي، ءارى جاۋاپكەرشىلىك. ءبىز ەكى جاقتىڭ ساياحات، عىلىم - تەحنيكا، ەكونوميكا - ساۋدا، نەگىزدىك قۇرىلعىلار قۇرىلىسى سياقتى سالالارداعى سەلبەستىكتى كۇشەيتىپ، ەكى جاقتىڭ ەكونوميكالىق، قوعامدىق دامۋىن بىرگە جەبەۋدى شىنايى ءۇمىت ەتەمىز. سونىمەن بىرگە بارناۋل قالاسى، جاڭا التايسكى قالاسى، رۋبتسوۆسكى قالاسى مەن جۇڭگو جاقتىڭ 3 دوس قالاسى اراسىنداعى ناقتى سەلبەستىكتى كۇشەيتىپ، ەكى جاقتىڭ حالىقتارى اراسىنداعى دوستىقتى ۇزدىكسىز تەرەڭدەتۋدى ءۇمىت ەتەمىز.
ماجىلىستە ەكى جاقتىڭ عىلىم - تەحنيكا، وقۋ - اعارتۋ، اۋىل شارۋاشىلىعى سياقتى سالالارداعى ۋاكىلدەرى ءسوز سويلەدى، دوس قالالاردىڭ ۋاكىلدەرى سەلبەستىكتى تەرەڭدەتۋ جونىندە پىكىر اۋىستىردى.
ۇعىسۋعا قاراعاندا، سىرتقى سەلبەستىك اۋىس - كۇيىس تۇعىرىن ورناتىپ، جىبەك جولى ەكونوميكالىق بەلدەۋى قۇرىلىسىنىڭ تەرەڭدەۋىن، ناقتىلانۋىن ىلگەرىلەتۋ ءۇشىن، رايونىمىز ”شينجياڭ جاقسى سەرىك“ دەگەن تاقىرىپتا قاتىستى مەملەكەتتەردىڭ جەرگىلىكتى ۇكىمەتتەرىمەن جەلىلەس دوستىق، سەلبەستىك كەڭەسىن وتكىزەدى ەكەن.
