جالپىلىق اياق الىس بىلتىرعى ۇقساس مەزگىلدەگىدەن تەز بولدى
انار بۇلت \ شينجياڭ گازەتىنىڭ ءتىلشىسى ليۋ ي 5 - ايدىڭ 20 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، 5 - ايدىڭ 17 - كۇنىنە دەيىن بۇكىل رايوننىڭ كوكتەمگى استىق تۇقىمىن ءسىڭىرۋ قىزمەتى نەگىزىنەن اياقتالىپ، جالپىلىق اياق الىس بىلتىرعى ۇقساس مەزگىلدەگىدەن تەز بولعان، مەجەمەن نىسانا - مىندەت ءساتتى ورىندالادى ەكەن.
تانىستىرۋعا قاراعاندا، بيىل بۇكىل رايون تۇسىرگەن استىق ءوندىرىسىنىڭ شەكتەمەلى نىسانا - مىندەتى 35 ميلليون 600 مىڭ مۋ بولعان. قازىر بۇكىل رايون 13 ميلليون 60 مىڭ مۋ جەرگە دۇمبە ءبيداي ەگۋدى تياناقتاندىرىپ، جوسپارداعى مىندەت ارتىعىمەن ورىندالعان. جازدىق ءبيداي، ەگىلىپ جاتقان جۇگەرى، اتباس بۇرشاقتىڭ ەگۋ مىندەتى جوسپاردان ارتىعىمەن تياناقتانعان، باسقا استىق داقىلدارىنىڭ تۇقىمىن ءسىڭىرۋ دە نەگىزىنەن اياقتالعان.
بيىل اۆتونوميالى رايون استىق، سونداي - اق ماڭىزدى اۋىل شارۋاشىلىق ونىمدەرىندە ءوندىرىستى ورنىقتىرۋ، قامداۋعا كەپىلدىك ەتۋ قىزمەتىنە باسا ءمان بەرىپ، اسىتق حاۋىپسىزدىگىندە پارتكوم مەن ۇكىمەت بىردەي جاۋاپكەرشىلىك ارقالاۋدى جاپپاي تياناقتاندىرىپ، ”ءۇش ويپات، ءبىر اڭعار“ نەگىزگى ءوندىرىس رايوندارىنىڭ استىق ءوندىرىسىن ورنىقتىرىپ، استىق پەن جەم - شوپكە بىردەي پايدالانىلاتىن جۇگەرى ەگىسىن كەڭەيتىپ، استىق تۇقىمى سىڭىرىلگەن اۋداننىڭ وتكەن جىلداعىدان تومەن بولماۋىنا شىنايى كەپىلدىك ەتىپ، استىق ءوندىرىس قابىلەتىن ورنىقتى جوعارىلاتتى. جەر - جەر جارامدى شارالاردى جولعا قويىپ، ىسىلعان ادىستەردى شىعارىپ، ەگىستىك جەردى قورعاۋدىڭ ەڭ قاتاڭ ءتۇزىمىن جاپپاي تياناقتاندىرىپ، وسى زامانعى اۋىل شارۋاشىلىعى قۇرىلعى، جابدىق ورەسىن ۇزدىكسىز جوعارىلاتىپ، استىق القاپتارىن قورعاۋ، ەگىستىك جەر بايلىعىنان عىلمي، ۇيلەسىمدى پايدالانۋ ستراتەگياسىن شىن مانىندە ناقتى تياناقتاندىرىپ، استىق حاۋىپسىزدىگىنىڭ ىرىقتىلىق ۇقىعىن مىقتاپ يگەردى.
اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى ەگىس كاسىبى جانە اۋىل شارۋاشىلىق دارىلەرى باسقارماسىنىڭ باستىعى تاڭ ي - ۋ تانىستىرىپ بىلاي دەدى: تاماشا كليمات شارت - جاعدايى مەن جەتكىلىكتى ەگىس دايىندىعىنىڭ ارقاسىندا، بيىل بۇكىل رايونداعى كوكتەمگى تۇقىم ءسىڭىرۋ اياق الىسى تۇتاس تۇلعا بويىنشا بىلتىرعى سول تۇستاعىدان تەز بولىپ، استىق تۇقىمىن ءسىڭىرۋ جوسپار مىندەتى ءساتتى ىلگەرىلەدى. قازىر استىق وندىرىلەتىن نەگىزگى وڭىرلەر باستاپقى مەزگىلدەگى كليمات الا كەلگەن ءتيىمسىز ىقپالداردى جەڭىپ، بۇكىل رايونداعى دۇمبە ءبيدايدا السىزدەرىن جەبەپ كۇشەيتۋ تۇگەلدەي جۇزەگە اسىپ، شىعىسى جاقسى بولدى. وڭتۇستىك شينجياڭ وڭىرىندەگى دۇمبە ءبيداي ءدان الۋ مەزگىلىنە ءساتتى ءوتتى، سولتۇستىك شينجياڭ وڭىرىندەگى دۇمبە ءبيداي ىركەس - تىركەس ماساق تارتىپ ءوسۋ كەزەڭىنە ءوتتى.
كەلەسىدە رايونىمىزدىڭ ءار دارەجەلى اۋىل شارۋاشىلىعى، اۋىل - قىستاق تاراۋلارى استىق داقىلدارىنىڭ تۇقىمىن ءسىڭىرۋ مىندەتىن ۇزدىكسىز ويداعىداي تياناقتاندىرادى، اسىرەسە، جەر جاڭعاعى، اتباس بۇرشاق سياقتى مايلى داقىلدارىنىڭ تۇقىمىن ءسىڭىرۋدى ويداعىداي تياناقتاندىرادى. اۋا رايى، سۋ يگىلىگى سياقتى تاراۋلارمەن بىرگە عىلمي جولمەن اپاتتان ساقتانۋ، اپات زيانىن ازايتۋ شارالارىن تياناقتاندىرىپ، اپات سيپاتتى اۋا رايىن الدىن الا ەسكەرتۋدى، تۇجىرىمداۋدى كۇشەيتىپ، داقىلداردى دەرت - دەربەزدەن، زياندى جاندىكتەردەن قورعاۋ - تىزگىندەۋدى كۇشەيتەدى. سونىمەن بىرگە تەحنيكتەردى اتىز باستارىنا بارىپ تەحنيكالىق جەتەكشىلىك قىزمەت وتەۋىن ورىستەتۋگە ورنالاستىرىپ، شارۋالاردىڭ استىق ءوسىرۋ ورەسىن جوعارىلاتىپ، تۇتاس جىلدا استىقتان مول ءونىم الۋدىڭ نەگىزىن بەكەمدەيدى.
