زات تاسىمال مولشەرى سايكەس مەزگىلدەگىدەن ％7.6 ارتتى
انار بۇلت \ شينجياڭ گازەتىنىڭ تىلشىلەرى چىن چياڭۋي، لۋ فىڭباۋ 5 - ايدىڭ 7 - كۇنى ۇرىمجىدەن حابارلايدى. 5 - ايدىڭ 7 - كۇنى ساعات 9دان 35 مينۋت وتكەندە، جىلدامدىق وزگەرتكىش، پوليەتيلەن، موتور تىرەگى سياقتى زاتتاردى تولتىرا تيەپ قايتقان جۇڭگو − ەۆروپا كەزەكشى پويەزى الاتاۋ ساعاسى شەكارا وتكەلىنەن كىردى، بۇل بيىل الاتاۋ ساعاسى شەكارا وتكەلىنەن قاتىناعان 2000 - جۇڭگو − ەۆروپا كەزەكشى پويەزى. سول كۇنى ساعات 18گە دەيىن بيىل الاتاۋ ساعاسى شەكارا وتكەلىنەن كىرىپ - شىققان جۇڭگو − ەۆروپا كەزەكشى پويەزى جالپى 2014 بولىپ، زات تاسىمال مولشەرى جيىنى ءبىر ميلليون 625 مىڭ تونناعا جەتىپ، سايكەس مەزگىلدەگىدەن ％7.6 ارتتى.
تەمىر جول تاراۋىنىڭ ساناعىنا قاراعاندا، 5 - ايدىڭ 7 - كۇنى ساعات 18گە دەيىن الاتاۋ ساعاسى شەكارا وتكەلىنەن كىرگەن كەزەكشى پويەز 857، شىققان كەزەكشى پويەز 1157 بولىپ، شەكارادان كىرىپ - شىققان كەزەكشى پويەز سانى بىلتىرعى سايكەس مەزگىلدەگىمەن نەگىزىنەن قارايلاس بولىپ، كۇنىنە ورتاشا قاتىناعان جۇڭگو − ەۆروپا كەزەكشى پويەزى 16عا، ءبىر كۇندە ەڭ جوعارى قاتىناعاندا 24كە جەتكەن. جۇڭگو − ەۆروپا كەزەكشى پويەزىنا تيەلگەن زاتتاردىڭ ءتۇرى اۆتوكولىك جانە كەسەك بولشەك، ماقتا ءجىپ، ەلەكتروندى ءونىم سياقتى 8 ۇلكەن تۇر بويىنشا 200 نەشە ءتۇردى قامتىعان.
بيىل جىل باسىنان بەرى شەكارا وتكەلى تاسىمال ارناسىن ىركىلىسسىزدەندىرىپ، جۇڭگو − ەۆروپا كەزەكشى پويەزىنىڭ جوعارى ءونىمدى قاتىناۋىن قامتاماسىز ەتۋ ءۇشىن، قاتىستى تاراۋلار بىرلەسىپ ارەكەتتەنىپ، سايكەسۋدى كۇشەيتىپ، ءتۇرلى قولايلى شارالاردى اتقاردى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى الاتاۋ ساعاسى بەكەتى قازاقستان جاقتىڭ شەكارا وتكەلى بەكەتىمەن كەڭەسىپ، سايكەسىپ، قازاقستان جاقتىڭ زات ءتۇرى مەن اۆتوكولىك سانىن 3 كۇن بۇرىن الدىن الا ۇعىستى؛ الاتاۋ ساعاسى كەدەنى ”گۋانتيەتۇڭ“، ”تيەلۋكۋايتۇڭ“ جاڭا ۇلگىسىنىڭ تياناقتانۋىن بەلسەنە ىلگەرىلەتىپ، ”جۇڭگو − ەۆروپا كەزەكشى پويەزىنىڭ جاسىل ارناسىن“ جانە ارناۋلى تەرەزە اشىپ، قاعازسىز مالىمدەۋ، اۆتوماتتى تەكسەرىپ قويا بەرۋ سياقتى قولايلىلاندىرۋ شاراسىن اتقاردى؛ شينجياڭ شەكارادان كىرىپ - شىعۋ شەكارا قورعانىسى تەكسەرۋ باس پۋنكتى الاتاۋ ساعاسى شەكارادان كىرىپ - شىعۋ شەكارا قورعانىسى تەكسەرۋ پۋنكتى حالىققا قولايلى، كاسىپورىندارعا ءتيىمدى 12 ءتۇرلى شارا اتقارىپ، جۇڭگو − ەۆروپا كەزەكشى پويەزىن تەكسەرۋ - سارالاۋ جىلدامدىعىن كۇش سالا جوعارىلاتتى.
”كەزەكتە الاتاۋ ساعاسى شەكارا وتكەلىنەن قاتىناۋ سانى ءبىرشاما كوبى چاڭان ءنومىرلى، چۇڭچيڭ − شينجياڭ − ەۆروپا، جىڭجوۋ − شينجياڭ − ەۆروپا جانە شينجياڭنىڭ جەرگىلىكتى جۇڭگو − ەۆروپا كەزەكشى پويەزدارى، وسى كەزەكشى پويەزدار جالپى قاتىناۋ مولشەرىنىڭ ％50تەن استامىن ۇستايدى. زات تاسىمال مولشەرىنىڭ ارتۋىنداعى نەگىزگى سەبەپ، جىڭ−جوۋ − شينجياڭ − ەۆروپا، حىفەي − شينجياڭ − ەۆروپا جانە شينجياڭنىڭ جەرگىلىكتى كەزەكشى پويەزدارىنىڭ ءتيىمسىز جاعدايدا ارتۋىنىڭ ارقاسىندا بولدى“، - دەدى الاتاۋ ساعاسى كەدەنى باقىلاۋ - باسقارۋ 2 - ءبولىمىنىڭ 4 - دارەجەلى ۇيىمداستىرۋشىسى داۋرىنا.
كەزەكتە الاتاۋ ساعاسى شەكارا وتكەلىنەن جالپى قاتىناعان جۇڭگو − ەۆروپا كەزەكشى پويەزىنىڭ سانى 24 مىڭ بولىپ، قاتىناۋ لەنياسىنىڭ سانى 78گە جەتىپ، ەل ىشىندەگى 24 ولكە، رايون، قالانى قامتىپ، گەرمانيا، پولشا، رەسەي سياقتى 18 ەلگە جەتتى.
