− شينجياڭدى اشۋ، كوركەيتۋ مەدالىنىڭ يەگەرى حى ۋىنشيان تۋرالى
انار بۇلت \ شينجياڭ گازەتىنىڭ ءتىلشىسى ۋاڭ نا
5 - ايدىڭ 1 - كۇنى حالىقارالىق ەڭبەكشىلەر مەرەكەسى، جەدەل جەتكىزۋشى حى ۋىنشيان ءۇشىن بۇل قاتارداعى قاراپايىم كۇندەردىڭ ءبىرى عانا، جولدامالاردى بولۋمەن، جولدامالار تاپسىرىپ الۋمەن، جەتكىزىپ بەرۋمەن تاڭ سارىدەن قاراڭعى تۇسكەنشە تىنىم المايتىن ول كوزى ءۇيىر شاعىن اۋماقتارعا كىرىپ، تانىس تۇرعىندارعا جولىعىپ، 210 جولدامانى قاز - قالپىندا امان - ساۋ قاريداردىڭ قولىنا تاپسىرىپ بەردى.
حى ۋىنشياننىڭ ەڭبەكشىلەر مەرەكەسى ونىڭ ءار كۇنگى قىزمەتىنىڭ اينا - قاتەسىز كوشىرمەسى. جۇڭتۇڭ جەدەل جەتكىزۋى ءۇرىمجى قالاسى تيانشان رايونى 1 - بولىمىنە قوسىلعان 13 جىلدان بەرى جىلدىڭ 360 كۇنگە جۋىق ۋاقىتىندا حى ۋىنشيان قاشاندا جولداما جەتكىزۋ جولىندا كەتىپ بارا جاتادى، ءار جولدامانى يەسىنىڭ قولىنا تاپسىرىپ بەرۋدى قامتاماسىز ەتۋ ونىڭ ءار دايىم بەرىك ۇستاناتىن كاسىپتىك پەيىلى.
سىچۋاندىق حى ۋىنشيان مەن ونىڭ ايەلى ۇرىمجىگە 2007 - جىلى كەلىپتى، باستابىندا ءبىر تاعامجاي اشىپ كۇن كورۋدى ويلاپ جۇرەتىن ول عايىپتان تايىپ، جەدەل جەتكىزۋشى كاسىبىن تاڭداعان. ون نەشە جىلدان بەرى جەتكىزگەن جولدامالاردىڭ جالپى سانى 500 مىڭعا تاياعان حى ۋىنشيان ءار جولعى جەتكىزۋ ىسىنە ءارقاشان مۇقيات قاراپ، شىن ىقىلاسىنىڭ ارقاسىندا قاريدارلارىنىڭ جاقسى باعاسى مەن سەنىمىنە يە بولدى.
2018 - جىلى جازدا سەرىكتەستىكتىڭ جابدىقتاردى باپتاۋ - سىناق ەتۋ سەبەبىنەن تۇرپان قالاسىنا جەتكىزىلۋگە ءتيىس ءبىر جەدەل جولداما ۋاقىتىندا جەتكىزىلمەي قالۋ حاۋپى تۋىپ، جولداما جىبەرۋشى ايرىقشا تىقىرشيدى. حى ۋىنشيان قاريدارعا ىرىقتىلىقپەن سەبەبىن تۇسىندىرەدى جانە سەرىكتەستىكتىڭ جولدامالاردى ءبولۋ ورتالىعىنا بارىپ الگى جولدامانى الىپ شىعىپ، پويەزعا وتىرىپ قاريدار تالاپ ەتكەن ۋاقىتتا جەتكىزىپ بەرەدى. حى ۋىنشياننىڭ بۇل ارەكەتىنەن اسەرلەنگەن الگى قاريدار وسىدان سوڭ جۇڭتۇڭ جەدەل جەتكىزۋىنىڭ ادال قاريدارىنا اينالادى.
حى ۋىنشيان جاۋاپتى بولعان اۋماقتا قارتتار كوبىرەك ەدى، جالعىز تۇراتىن كەيبىر قارتتاردىڭ ءجۇرىس - تۇرىسى قولايسىز بولعاندىقتان، ول ارا كىدىك تۇرمىستىق بۇيىمدار ساتىپ الىپ ولارعا بارىپ امانداسىپ تۇرادى. وسى سۇيىسپەنشىلىگى مەن جىلى مەيىرىنىڭ ارقاسىندا حى ۋىنشيان كوپشىلىكتىڭ شىنايى مويىنداۋى مەن قۇرمەتتەۋىنە يە بولادى.
بىردە، ءبىر قارت تەلەۆيزوردان 2000 يۋاننان استامعا دەنساۋلىق كۇتىمدەۋ بۇيىمىن ساتىپ الىپ، سىناپ كورگەن سوڭ ءونىمى جاقسى بولماعان سوڭ قايتارىپ تاستاۋعا بەكيدى، ءبىراق قالاي ىستەرىن بىلمەي اڭكى - تاڭكى بولادى. اقىرى الگى قاريا حى ۋىنشيانگە كەلىپ، جولدامانى سەن جەتكىزىپ بەرگەنسىڭ، زاتتى سەن قايتارىپ، اقشاسىن الىپ بەر دەپ جابىسادى.
قارتتىڭ جالعىز تۇراتىندىعىن، جانىندا زات قايتارۋىنا كومەكتەسەتىن بالا - شاعاسىنىڭ جوق ەكەنىن بىلگەن حى ۋىنشيان بۇل جۇمىستى ءوز موينىنا الادى، ساتۋشى جاقپەن جانە زاۆودپەن كوپ رەت سويلەسىپ ءجۇرىپ اقىرى زاتتى قايتارتىپ، اقشاسىن ءبىر تيىنىن كەمىتپەي قارتتىڭ قولىنا تاپسىرادى، قارت بۇدان ايرىقشا اسەرلەنەدى.
بۇل سياقتى ىستەردى قانشا رەت ىستەگەنى ارينە حى ۋىنشياننىڭ ەسىندە جوق. جىلدار بويى جولداما جەتكىزۋ بارىسىندا ول شينجياڭداعى جەدەل جەتكىزۋ كاسىبىنىڭ شاپشاڭ دامۋىنا كۋا بولدى. 2009 - جىلى حى ۋىنشيان العاش جۇمىسقا قابىلدانعاندا تيانشان رايونىندا سەرىكتەستىكتىڭ تەك 4 جەدەل جەتكىزۋشىسى عانا بار ەدى، كۇنىنە بار - جوعى 200دەي جولداما جەتكىزىلىپ، 100 جولداما تاپسىرىپ الىناتىن. ال قازىر تيانشان رايونىنان 5 بولىمشە سەرىكتەستىك اشقان سەرىكتەستىكتىڭ جەدەل جەتكىزۋشىلەر سانى 100دەن اسسا، كۇنىنە جەتكىزەتىن جولدامالارى 20 مىڭنان، قابىلداپ الاتىن جولدامالارى 10 مىڭنان اسادى.
وسىزاماندانىپ، سيفرلانىپ، ينفورماتسيالانىپ دامۋدىڭ قاجەتىنە ۇيلەسۋ ءۇشىن، كوپتەگەن جەدەل جەتكىزۋ سەرىكتەستىكتەرى ىلگەرى - كەيىن ەلەكتروندىق تاپسىرىس بەرۋ - الۋ جانە جەدەل جەتكىزۋشىلەردىڭ ارناۋلى قول تەلەفونى APPىن ىسكە قوستى، ءداستۇرلى 5 پاراقتى تۇبىرتەك 2 پاراقتى تۇبىرتەككە، ءبىر پاراقتى تۇبىرتەككە وزگەرىپ، جەلىدەن تاپسىرىس بەرۋ قولمەن تۇبىرتەك جازۋدىڭ ورنىن باسىپ، قاريدارعا دا، جەدەل جەتكىزۋشىگە دە قولايلىلىق اكەلدى.
”بۇل وزگەرىستەر جەدەل جەتكىزۋ كاسىبىنىڭ شاپشاڭ دامىعاندىعىنىڭ بەلگىسى“، - دەيدى حى ۋىنشيان، ”مەنىڭ جالاقىم 2009 - جىلى العاش جۇمىسقا قابىلدانعاندا ايىنا 3000 يۋان ەدى، قازىر ايىنا ورتاشا ەسەپپەن 9000 يۋانعا ءوستى. بىرتىندەپ وسكەن جالاقى تابىسىمىز بەن مەرەكەلىك يگىلىكتەرىمىزدەن سىرت، سەرىكتەستىگىمىزدىڭ جەدەل جەتكىزۋشىلەرى جەدەل جەتكىزۋشىلەرگە قامقورلىق قورى، شياۋگىباۋ − توپتىق جازاتايىم قامسىزداندىرۋى سياقتىلاردان يگىلىكتەندى، بۇل ءبىزدىڭ قىزمەتتى اناعۇرلىم الاڭسىز ىستەۋىمىزگە مۇمكىندىك بەرىپ، باۋىر باسۋشىلىق سەزىمىمىز بەن باقىت سەزىمىمىزدى ونان ارى كۇشەيتتى.
شينجياڭدى اشۋ، قۇرۋ مەدالىنا يە بولعاندا قانداي اسەردە بولعانىن سۇراعاندا حى ۋىنشيان ءوزىنىڭ تەك ءوز جۇمىسىن جاقسى ىستەگەندىگىن، وسى ماراپاتتى جاڭا باستاما ەتىپ، ونان ارى قۇلشىنا قىزمەت ىستەپ، قاريدارلارعا اناعۇرلىم ساپالى قىزمەت وتەيتىندىگىن ايتىپ اعىنان اقتارىلدى.
