ما جۇن:
شەبەرلىگىمدى ارتتىرىپ، ناۋقاستارعا ءتىپتى دە جاقسى قىزمەت وتەيمىن
□ انار بۇلت \ شينجياڭ گازەتىنىڭ ءتىلشىسى سۋ لۋپيڭ
4 - ايدىڭ 26 - كۇنى تاڭەرتەڭ، شينجياڭ مەديتسينا داشۋەسىنە قاراستى جۇڭي شيپاحاناسىنىڭ (اۆتونوميالى رايوندىق جۇڭي شيپاحاناسى) CCUىندە (ايدارشا ارتەريانىڭ قابىنۋىنان بولاتىن جۇرەك اۋرۋى سالماقتى ناۋقاستاردى باقىلاۋ - كۇتىمدەۋ ءۇيى) سەسترا ما جۇن كەزەك قابىلداۋشى قىزمەتتەسىنە كوڭىل بولۋگە ءتيىستى ناۋقاستاردىڭ جاعدايىن ءبىر - بىرلەپ تاپسىرىپ جاتىر.
2016 - جىلى 21 جاستاعى ما جۇن اۆتونوميالى رايوندىق جۇڭي شيپاحاناسىنا قىزمەتكە كەلگەندە، اينالىپ قىزمەت ىستەيتىن العاشقى ءبولىمى CCU بولدى. ۇستازدارىنىڭ ماماندىق بىلىمدەرى مەن شەبەرلىكتەرى ارقىلى تالاي ناۋقاستى ءولىم اۋزىنان امان الىپ قالعانىن كورگەن ول بۇل كاسىپتىڭ قۇنىن تەرەڭ سەزىندى. اينالىپ قىزمەت ىستەۋ مەرزىمى تولعاننان كەيىن، ول CCUگە قايتىپ كەلىپ قىزمەت ىستەۋدى تاڭدادى.
”CCUدەگى ناۋقاستاردىڭ اۋرۋ جاعدايى جاي اۋرۋلار اۋماعىنداعى ناۋقاستاردان الدەقايدا كۇردەلى بولادى، مەن ءالى جاسپىن، كوبىرەك ۇيرەنگىم كەلەدى“. سەسترالار باستىعى مەن ساقا سەسترالاردىڭ كومەكتەسۋى مەن جەتەكتەۋىندە ما جۇن ءوز قىزمەت ورنىنا تەز ۇيىرلەسىپ، جەدەل قۇتقارۋعا سايكەسىپ، ناۋقاستاردى كۇتىمدەي باستادى.
ما جۇن ءوزى جالعىز تۇنگى كەزەكشىلىكتە وتىرعان ءبىر ءتۇنى تاڭعى ساعات 4تە جۇرەك اۋرۋىمەن قوسا جوعارى قان قىسىمى، ديابەت اۋرۋلارى بار ءبىر ناۋقاس تۇتقيىل دۇنيە سالدى.
ما جۇن مەن كەزەكشى شيپاگەر ناۋقاسقا دەرەۋ ءبىر قىدىرۋ جەدەل قۇتقارۋ شارالارىن جاساپ، ۇزاق ۋاقىت بويى كەزەكتەسىپ كەۋدە سىرتىنان جۇرەگىن باسىپ، ءبىر ساعاتتان استام قۇتقارۋ جۇرگىزسە دە ناۋقاستىڭ جانىن ولىمنەن اراشالاپ قالا المادى.
بۇل ىستەن كەيىن ما جۇن ءوزىنىڭ دارمەنسىزدىگىن تەرەڭ سەزىندى، ءتىپتى جاسىپ تا قالدى. سەسترالار باستىعى مەن بولىمدەگى شيپاگەر - سەسترالاردىڭ كومەگىندە ما جۇن سول ءبىر مەزگىلدىك ەسەيۋدى باستان كەشىردى، بۇل ءىس تە ونىڭ ءوزىنىڭ ماماندىق ءبىلىمى مەن شەبەرلىگىن ارتتىرىپ، بار كۇشىمەن ناۋقاستىڭ ءومىرىن قۇتقارۋ بەكىمىن نىعايتا ءتۇستى.
ءار رەت ناۋقاستار بولمەسىن ارالاپ تەكسەرۋدە، ما جۇن ناۋقاستاردىڭ جاعدايىن مۇقيات ەستەلىككە الاتىن بولدى؛ 3 كەزەكتىك قىزمەتتىڭ قايسى كەزەگىنە تۋرا كەلسە دە، قانداي ماسەلەگە جولىقسا دا ول ەڭ الدىمەن باسقالاردان كومەك سۇرايتىن جانە ماسەلەنى شەشەتىن بولدى؛ ءبولىم كۋرسىنىڭ بىرەۋىنەن دە قالىپ كورمەگەن ول ءار رەتكى ەمتيحانعا تولىق دايىندىق كورەتىن بولدى. ”CCU كوپتەگەن پاندەرمەن قاتىساتىندىقتان شيپاحانا ءبىزدى ۇنەمى قاتىستى بولىمدەرگە بارىپ ۇيرەنۋگە جىبەرىپ تۇردى. قازىر ناۋقاستا شۇعىل جاعداي تۋىلعاندا مەن ءتىپتى دە سابىرلى بولاتىن دەڭگەيگە جەتتىم“، - دەدى ما جۇن.
ما جۇننىڭ 70 نەشە جاستاعى ءبىر قاريانىڭ ءومىرىن ءساتتى قۇتقارعان بارىسى الىگە دەيىن ەسىندە. بۇل قاريانىڭ جۇرەگى سوعۋدان كەنەت توقتاپ قالدى دا، ما جۇن مەن قىزمەتتەستەرى جەدەل قۇتقارۋدىڭ التىن ۋاقىتىن قولدان بەرمەي، شيپاگەرلەرمەن سايكەسىپ، قاريانىڭ جۇرەگى مەن وكپەسىن قايتا جانداندىرۋ ارەكەتىن ىستەدى، ۆەنانىڭ بايلاۋىن شەشىپ، تۇتىكتەردى العاندا قاريانىڭ جۇرەك سوعۋى بىرتىندەپ قالپىنا كەلە باستادى. شيپاگەرلەر مەن سەسترالاردىڭ دەن قويا ەمدەۋى مەن كۇتىمدەۋىنىڭ ارقاسىندا ءبىر اپتادان كەيىن قاريا ساۋىعىپ شيپاحانادان شىقتى. وسى ساتتە ما جۇن قاتتى قۋاندى: ”سول كەزدە قاريانىڭ جۇرەگى سوعۋدان توقتاپ قالعان بولاتىن، ءبىز ونى قۇتقارىپ الدىق!“ وسى ءىس ما جۇنگە بۇرىن بولىپ كورمەگەن تابىس سەزىمىن سيلادى.
CCUدەگى سەسترا قىزمەتكەر رەتىندە، جۇرەك پەن وكپەنى قايتا جانداندىرۋدىڭ ماڭىزدىلىعىن ابدەن بىلەتىن ما جۇن قىزمەتتەن تىس ۋاقىتتارىندا ءتۇرلى تاسىلدەر ارقىلى ماڭايىنداعىلارعا وسىعان قاتىستى بىلىمدەر مەن ادىستەردى جالپىلاستىردى. ”پارتيا مەن ۇكىمەت بىزدەي ەمدەۋ قىزمەتكەرلەرىنە ەرەكشە قامقورلىق جاساپ، كوڭىل ءبولدى، شيپاحانا بىزگە كەڭ دامۋ تۇعىرىن ازىرلەدى. مەن ءوز قۇلشىنىسىم ارقىلى ءتىپتى دە كوپ ناۋقاستارعا كومەكتەسسەم دەيمىن“، - دەدى ما جۇن.
