11 - ايدىڭ 27 - كۇنى كەش، قوناقتار ماناس اۋدانىنداعى حىڭحى الاڭى حايياتوۋ چۋانچۋانشياڭ حوگو دۇكەنىندە ءدامدى تاعام جەۋدە. كەشكى ەكونوميكانى جانداندىرىپ، بازاردىڭ ومىرشەڭدىك كۇشىن تاسقىنداتۋ ءۇشىن، ماناس اۋدانى ءتۇرلى تيجارات ورىندارىن ماناس كەشكى ساياحاتى، كەشتە ءدامدى تاعامداردان اۋىز ءتيۋ سياقتى تۇتىنۋ كاسىپ كۇيىن دامىتۋعا شابىتتاندىردى، سونىمەن كوپتەگەن ساۋداگەرلەر ساتۋدى جەبەۋ قيمىلىن جولعا قويىپ قاريدارلاردى باۋرادى. □ سۋرەتتى انار بۇلت / شينجياڭ گازەتىنىڭ ءتىلشىسى زوۋ ي تۇسىرگەن
11 - ايدىڭ 25 - كۇنى ساعات 21، قاس قارايا ءتۇستى، قاراقاش ءدامدى تاعامدار الاڭىنداعى ساياحاتشىلار بارعان سايىن كوبەيىپ، ساۋداگەر مامەتتۇرسۇن مامەتيمىن دە قاربالاستاي ءتۇستى.
”ماعان ءبىر قاسقان اسقاباق ءمانتى بەرىڭىز“، ”مەن ءبىر قاسقان پەتر ءمانتى الامىن“. ونىڭ جينبي ءمانتى دۇكەنىندەگى 3 قىزمەتكەر قاربالاستىققا ءتۇستى. 11 - ايدىڭ 17 - كۇنى ءدامدى تاعامدار الاڭى اشىلعاننان بەرى دۇكەننىڭ ساۋداسى بارعان سايىن جاقسارىپ، ءار كۇنگى تيجارات كىرىسى 3500 يۋان اينالاسىندا بولدى.
جينبيءمانتى دۇكەنىمەن ىرگەلەس وتىرعان ساۋداگەر قادىرنيسا تۇرسۇنتوحتى ىپ - ىستىق قياق كۇرىشىن الىپ شىعىپ، اعاش قاسىقپەن قياق كۇرىشتى مىقتاپ جانشىدى، ونان سوڭ ايران شەلەكتى جاپقان اق كەزدەمەنى اشىپ، قوپ - قويۋ اپپاق ايراندى قياق كۇرىشكە قۇيدى، ەڭ سوڭىندا تاعى ءبىر قاسىق ءانجۇر توسابىن قوستى. نەبارى 2 مينۋتقا جەتپەيتىن ۋاقىتتا، تاماقتانۋشى ءشايدا تۇرعۇن اڭساپ جۇرگەن ايران قياق كۇرىشىن جەي باستادى.
”قاقتالعان جۇمىرتقا، قاقتالعان جۇمىرتقا!“. ايعاي جەر جارادى، تاياۋ جەردەگى جايماعا تاۋىق جۇمىرتقاسى، قاز جۇمىرتقاسى، كەپتەر جۇمىرتقاسى تولتىرا ءتىزىلىپتى... ۇلكەندى - كىشىلى جۇمىرتقالاردىڭ ەڭ ۇلكەنى تۇيە قۇس جۇمىرتقاسى ەكەن.
ساۋداگەر گۇلجانات ءماتنياز ايعاي سالىپ، ءبىرتالاي تاماقتانۋشىنى شاقىرىپ الدى. ول قاز جۇمىرتقاسىنىڭ توبەسىن شەبەرلىكپەن تەسىپ، جۇمىرتقا اعىن توگىپ تاستاپ، تاۋىق جۇمىرتقاسىنىڭ، كەپتەر جۇمىرتقاسىنىڭ جۇمىرتقا سارىسىن قۇيىپ، وعان بال، ماقسارى گۇلى مەن ءوزى جاساعان دامدەندىرگىشتەردى قوسىپ، ونان سوڭ كومىر كۇلىنە قويىپ 8 مينۋت قاقتاعان سوڭ، ەڭ ءوتىمدى ”ءۇش جۇمىرتقا، ءبىر جۇلدىزدى“ دايىنداي قويدى. ”كۇنىنە 500 يۋان اينالاسىندا كىرىس كىرگىزەمىن“، - دەدى ول.
قاربىز كاۋاپ ءدامدى تاعامدار الاڭىنداعى ەڭ ەرەكشە ءدامدى - قۇجىردىڭ ءبىرى. قاربىزدىڭ قابىعى قاقتالىپ ءسال قارايعاندا ساۋداگەر مۇرادىل ءمامات ” قاربىز قاقپاعىن“ شەبەرلىكپەن اشتى، ەت سورپاسىنىڭ حوش ءيىسى مۇرىندى جارادى. ”قاربىزدى ءتىلىپ قاربىز ەتىن الىپ تاستاپ، بوس قاربىزدىڭ ىشىنە تۋرالىپ دايىندالعان قوي ەتىن سالىپ، سۋ قۇيىپ، وعان 10 نەشە ءتۇرلى دامدەندىرگىش قوسىپ، تونارعا سالىپ 3 ساعات قاقتايمىز“، - دەپ مۇرادىل قوناقتارعا قاربىز كاۋاپ جاساۋ ءادىسىن تانىستىردى.
”بۇل جەردەگى قاقتالعان كەپتەر مەن ايران قياق كۇرىش وتە ءدامدى ەكەن“، - دەدى دوسىنا سەرىك بولىپ كەلگەن رۋحيا ءانۋار قۋانا. رۋحيا قاراقاش اۋدانى قاراساي قالاشىعى بالاباقشاسىنىڭ وقىتۋشىسى، ول دوسىمەن بىرگە اپتا سايىن اۋدان قالاشىعىنا بارىپ تاماقتانىپ تۇرادى. ”جاڭادان اشىلعان قاراقاش ءدامدى تاعامدار الاڭىنىڭ ورتاسى جاقسى، ءدامدى - قۇجىرلارى مول، بۇل كەلمەۋگە بولمايتىن كەشكى اسحانا“، - دەدى رۋحيا.
قاقتالعان بالىق، سامسا، قاقتالعان تۇتاس قوي ەتىنىڭ حوش ءيىسى اڭقيدى، كەپتەر سورپاسى، قارىنعا تۇيىلگەن ەت، جۇگەرى ۇنى كوجەسىنىڭ بۋى بۇرقىرايدى، ەرەكشە پيسا، ماتاڭ، انار شىرىنى ادامنىڭ سىلەكەيىن شۇبىرتادى... ساعات 22دەن 30 مينۋت وتسە دە، بۇل ارادا شىراقتار سامالاداي جارقىراپ، ءان اۋەلەپ، ءبي بيلەنىپ، ءتۇرلى ءدامدى - قۇجىرلاردىڭ حوش ءيىسى ارالاسىپ، وت جالىنى شالقيدى، ساياحاتشىلار جەرگىلىكتى تۇرعىندارمەن بىرگە ءدامدى - قۇجىرلاردان اۋىز ءتيىپ، ۇلتتىق سالت - سانانى سەزىنىپ، تىنىش، بەرەكەلى تۇرمىس ءۇشىن بىرگە توست كوتەردى.
”قازىر ءدامدى تاعامدار الاڭىنا جيىنى 80 ساۋداگەر ىرگە تەپكەن، تيجارات ۋاقىتى ءار كۇنى ساعات 12دەن 24كە دەيىن. جۇمىس باستالىسىمەن كوپتەگەن جەرگىلىكتى تۇرعىندار مەن سىرت جەرلەردەن كەلگەن ساياحاتشىلاردى زات ساتىپ الۋعا، ءدامدى - قۇجىرلاردان اۋىز تيۋگە، كونسەرت نومىرلەرىن تاماشالاۋعا باۋرادى، كۇندىك ورتاشا قوناق سانى 5000نان اسىلدى“، - دەدى قاراقاش ءدامدى تاعامدار الاڭىندا جۇمىس جۇرگىزۋگە جاۋاپتى شينجياڭ گوھار زەمين حالىقارالىق ساۋدا شەكتى جاۋاپكەرشىلىك سەرىكتەستىگىنىڭ باس ديرەكتورى روزىمامات ابليز.
