11 – ايدىڭ 26 – كۇنى وتكىزىلگەن مەملەكەتتىك كەڭەس اقپارات كەڭسەسىنىڭ اقپار جاريالاۋ ماجىلىسىنەن ۇعىسۋىنشا، ەلىمىزدىڭ جاعراپيالىق بەلگى ونىمدەرىنىڭ قاتىستى ءونىم قۇنى ءبىر تريلليون يۋاننان اسقان، كەدەيلىك قالپاعىن تۇگەلدەي الىپ تاستاعان 832 كەدەي اۋداننىڭ %60تەن استامى جاعراپيالىق بەلگىلەرگە يە. جاعراپيالىق بەلگى كاسىبىن دامىتۋ جەر ـ جەردىڭ وڭىرلىك ەرەكشەلىككە يە ەكونوميكانى دامىتۋداعى، كەدەيلىكتەن دالمە ـ ءدال ارىلتۋداعى ماڭىزدى جولىنا اينالدى.
مەملەكەتتىك ءبىلىم مەنشىك ۇقىعى مەكەمەسىنىڭ ورىنباسار باستىعى گان شاۋنيڭ تانىستىرىپ بىلاي دەدى: 10 – ايدىڭ سوڭىنا دەيىن جاعراپيالىق بەلگىلەردى قورعاۋ ونىمدەرىنەن جيىنى 2385ى بەكىتىلدى، جاعراپيالىق بەلگىلەردىڭ ساۋدا ماركاسى جيىنى 5935 دانا بولدى، تەكسەرىپ بەكىتۋ ارناۋلى بەلگىسىن ىستەتكەن كاسىپورىن 9224كە جەتتى، جاعراپيالىق بەلگىسى بار 24 ءونىمدى قورعاۋ ۇلگى رايونىن قۇرىپ، مەملەكەتتىڭ كەدەيلەردى سۇيەمەلدەۋ، وركەندەتۋ قىزمەتىندەگى بارلىق ءتۇيىندى اۋدان، شوعىرلى ەرەكشە كەدەي رايون، سونداي – اق، «ءۇش رايون، ءۇش وبلىس» تۇگەلدەي قامتىلدى.
سوڭعى جىلداردان بەرى، مەملەكەتتىك ءبىلىم مەنشىك ۇقىعى مەكەمەسى جاعراپيالىق بەلگىلەردەن پايدالانۋدى جەبەۋ ينجەنەرياسىن باستاپ، كورنەكتى ونىمدىلىككە قول جەتكىزدى. 2019 - جىلدان بەرى، مەملەكەتتىڭ جاعراپيالىق بەلگىلەرىنەن پايدالانۋدى جەبەۋ ينجەنەرياسى نىسانىنان 21ىن ورىستەتىپ، كەزەكتە جالپى تىكەلەي قوسىلعان قارجى 10 ميلليون يۋان بولىپ، بۇل ورتا، باتىس بولەكتەگى 17 ولكەنى قامتىعان مەملەكەت دارەجەلى 43 كەدەي اۋدانداعى داتۇڭحۋاڭحۋا قاتارلى 32 جاعراپيالىق بەلگىگە سايادى. جەرگىلىكتى ۇكىمەتتەردىڭ سايكەستى جۇمسالىمى 120 ميلليون يۋاننان استى، جاعراپيالىق بەلگى كاسىبىنىڭ ءونىم قۇنى 21 ميلليارد يۋاننان استى، قاتىستى ونىمدەردى مانەرلەۋ، ساۋدا زات اينالىمى، ساياحات كاسىبى قاتارلى ءونىم قۇنى 4 ميلليارد يۋان بولدى، كەدەي وتباسىلارىنىڭ ىشكى دامۋ قوزعاۋشى كۇشىن ءونىمدى تۇردە قاۋلاتىپ، كاسىپتەنۋگە باستاعان كەدەي جان سانى 600 مىڭنان استى.
مەملەكەتتىك ءبىلىم مەنشىك ۇقىعى مەكەمەسى پايدالانۋدى جەبەۋ مەڭگەرمەسىنىڭ باستىعى لي شياۋيۇن بىلاي دەدى: كەلەسى قادامدا «قابىلەتتى جوعارىلاتۋ، مەحانيزم ورناتۋ، ايگىلى ماركا جەتىلدىرۋدى» ارقاۋ ەتىپ، جاعراپيالىق بەلگى ونىمدەرىمەن كەدەيلەردى سۇيەمەلدەۋ قىزمەتىن ۇزدىكسىز ىلگەرىلەتەدى. ءبىرىنشى، كەدەي رايونداردىڭ جاعراپيالىق بەلگىسى جونىندەگى كاسىپتىك جەتەكشىلىكتى كۇشەيتىپ، ارناۋلى كۋرس اشىپ، مامانداردى نەگىزگى ساتىلارعا بارىپ، كاسىپتىك بىلىمدەردى كەڭىنەن ۇگىتتەۋگە جانە دەلو مىسالدارىن قولدانۋعا ۇيىمداستىرۋ؛ ەكىنشى، كەدەي رايونداردىڭ جاعراپيالىق بەلگىسى احۋالىن تەكسەرۋدى جالعاستى قانات جايدىرىپ، كاسىپتىڭ كومەسكى كۇشىن اشىپ، جاعراپيالىق بەلگىسى بار ونىمدەردى باقىلاۋ جەلىسىن قۇرىپ، ۇقىققا قول سۇعۋ، جالعاندىق ىستەۋ ارەكەتتەرىنە قاتاڭ سوققى بەرىپ، ءونىم ساپاسىنا كەپىلدىك ەتۋ؛ ءۇشىنشى، جاعراپيالىق بەلگى ماركاسىن قورعاۋ جانە اشىپ پايدالانۋدى كۇشەيتىپ، بازاردىڭ يەلەۋ مولشەرى جوعارى، ەكونوميكالىق ونىمدىلىگى جاقسى، ىقپالى كۇشتى، جەتەكتەۋ قۋاتى كۇشتى، ءبىرشاما جوعارى اتاعى بار ءبىر توپ جاعراپيالىق بەلگى ماركالارىن جەتىلدىرىپ، كەدەي رايونداردىڭ بايلىق ەرەكشەلىگى ابزالدىلىعىمەن ۇشتاسۋىن دارىپتەپ، جاڭا ۇلگىنى، جاڭا فورماتسيانى دامىتىپ، جاعراپيالىق بەلگى مەن ينتەرنەت، ەلەكتروندىق ساۋدا، مادەنيەت، ەكولوگيالىق ساياحات سياقتى كاسىپتەردىڭ ىشكەرىلەي توعىسۋىن ىلگەرىلەتىپ، ەكونوميكالىق ونىمدىلىكتى ەسەلەپ ارتتىرۋ اسەرىن جۇزەگە اسىرۋ كەرەك.
http://kazakh.people.com.cn/155425/15831106.html
