ج ك پ ورتالىق كوميتەتىنىڭ شەتەلمەن بايلانىس جاساۋ ءبولىمى جانە ج ك پ گۋاڭشي جۋاڭزۋ اۆتونوميالى رايوندىق پارتكومى 11 – ايدىڭ 26 – كۇنى «جاڭا داۋىردەگى جۇڭگو — شىعىس وڭتۇستىك ازيا ەلدەرى وداعىنىڭ سەلبەستىگىن ىلگەرىلەتۋ: ساياسي پارتيالاردىڭ جاۋاپكەرشىلىگى مەن مىندەتتى بولۋى» اتتى تاقىرىپتا گۋاڭشيدىڭ ناننيڭ قالاسىندا جۇڭگو كوممۋنيستىك پارتياسىنىڭ شىعىس وڭتۇستىك ازيا ەلدەرى وداعىنداعى ساياسي پارتيالارمەن بولعان تۇڭعىش رەتكى كەڭەسىن وتكىزدى.
ج ك پ ورتالىق كوميتەتى شەتەلمەن بايلانىس جاساۋ ءبولىمىنىڭ باستىعى سۇڭ تاۋ ماجىلىستە پارتيا 19 – كەزەكتى ورتالىق كوميتەتى بەسىنشى جالپى ءماجىلىسىنىڭ رۋحىن ءتۇيىندى تۇردە تانىستىردى ءارى باس شۋجي شي جينپيڭ مەن شىعىس وڭتۇستىك ازيا ەلدەرى وداعى باسشىلارىنىڭ بىرگە جەتەكشىلىك ەتۋىندە، جۇڭگو مەن شىعىس وڭتۇستىك ازيا ەلدەرى وداعىنىڭ ىندەتكە قارسى وڭىرلىك سەلبەستىكتى الدىمەن ورىستەتىپ، وسى وڭىردەگى ىندەتتەن ساقتانۋ – تىزگىندەۋىنىڭ جانە ەكونوميكانىڭ، قوعامنىڭ دامۋىنىڭ قالپىنا كەلۋىنىڭ تۇگەلدەي دۇنيە ءجۇزىنىڭ الدىڭعى قاتارىندا تۇرعانىن ءبىلدىردى. بۇل رەتكى كەڭەس ەكى جاقتىڭ ساياسي جاقتا ءوزارا سەنىمىنىڭ اناعۇرلىم جوعارىلاعانىنىڭ بەلگىسى. ءبىز شىعىس وڭتۇستىك ازيا ەلدەرىندەگى ساياسي پارتيالارمەن بىرگە، ساياسي جاقتا ورتاق تانىم قالىپتاستىرىپ، ناقتى سەلبەستىكتەردى ىلگەرىلەتىپ، جۇڭگو — شىعىس وڭتۇستىك ازيا ەلدەرى وداعى قارىم – قاتىناسىنىڭ جاڭا دەڭگەيگە كوتەرىلۋىن ىلگەرىلەتۋدى، دۇنيە ءجۇزىنىڭ بەيبىت دامۋىنا ۇلەس قوسۋدى قالايمىز.
شىعىس وڭتۇستىك ازيا ەلدەرى وداعىنان ماجىلىسكە قاتىناسقان ساياسي پارتيالاردىڭ باسشىلارى مىنانى ءبىلدىردى: ج ك پ 19 – كەزەكتى ورتالىق كوميتەتى بەسىنشى جالپى ءماجىلىسى جۇڭگونىڭ كەلەشەكتەگى دامۋىنا اناعۇرلىم شۇعىلالى بولاشاق جاراتۋمەن بىرگە، دۇنيە جۇزىندەگى ءار ەلگە دە اناعۇرلىم مول دامۋ ورايىن سيلايدى. شىعىس وڭتۇستىك ازيا ەلدەرى وداعىنداعى ساياسي پارتيالار وسى رەتكى كەڭەستى جاڭا باستاما ەتىپ، جۇڭگو كوممۋنيستىك پارتياسىمەن بىرگە، ءار ەلدىڭ تاتۋ كورشىلىك تاماشا ساياساتتى اتقارۋىن، ءوزارا ءتيىمدى سەلبەستىكتەردى ىلگەرىلەتۋىن، جۇڭگو — شىعىس وڭتۇستىك ازيا ەلدەرى وداعىنىڭ اناعۇرلىم تىعىز ستراتەگيالىق سەرىكتەستىك قارىم – قاتىناسىن جاراتۋعا ساياسي پارتيالاردىڭ اناعۇرلىم مول كۇش قوسۋىن باتىل قولدايمىز.
شىعىس وڭتۇستىك ازيا ەلدەرىندەگى 40 قا جۋىق ساياسي پارتيانىڭ باسشىلارىنان 20 نەشە ادام، پارلامەنت باستىقتارىنان 5 ادام، سونداي – اق، ەلىمىزدىڭ شىعىس وڭتۇستىك ازيا ەلدەرى وداعىندا تۇراتىن باس ەلشىسى قاتارلىلار بەينە كەسكىن ارقىلى ماجىلىسكە قاتىناستى، شىعىس وڭتۇستىك ازيا ەلدەرى وداعىنىڭ جۇڭگودا تۇراتىن باس ەلشىسى ناق مايدانداعى ماجىلىسكە قاتىناستى. ماجىلىستە «جۇڭگو كوممۋنيستىك پارتياسى مەن شىعىس وڭتۇستىك ازيا ەلدەرىندەگى ساياسي پارتيالاردىڭ جۇڭگو — شىعىس وڭتۇستىك ازيا ەلدەرى وداعى سەلبەستىگىن ىلگەرىلەتۋ جونىندەگى ورتاق دارىپتەمەسى» ماقۇلداندى.
http://kazakh.people.com.cn/155419/15831083.html
