مەملەكەتتىك كەڭەستىڭ زۇڭليى لي كىچياڭ 9 - ايدىڭ 15 - كۇنى كەشتە حالىق سارايىندا دۇنيە جۇزىلىك ەكونوميكا فورۋمى دۇنيە ءجۇزى كاسىپورىنشىلارىنىڭ ارنايى سۇحپاتىنا قاتىناسىپ، ارناۋ ءسوز سويلەدى ءارى كاسىپورىنشىلاردىڭ ۋاكىلدەرىمەن پىكىر اۋىستىردى. سۇحپات ءماجىلىسى بەينە جازبا تاسىلىمەن وتكىزىلەدى، دۇنيە جۇزىلىك ەكونوميكا فورۋمىنىڭ ءتوراعاسى شۆاب ءماجىلىستى باسقاردى، دۇنيە جۇزىندەگى 600 گە جۋىق كاسىپورىنشى ماجىلىسكە قاتىناستى.
لي كىچياڭ سوزىندە مىنالاردى ءبىلدىردى: قازىر دۇنيە ءجۇزى كولەمىندە جاڭا تيپتى ايدارشا ۆيرۋس وكپە قابىنۋ ىندەتى جالپى بەتتىك تىزگىندەلمەي، حالىقتىڭ باس اماندىعىنا اۋىر قاتەر ءتوندىرىپ، دۇنيە ءجۇزى ەكونوميكاسىنا اۋىر سوققى جاساۋدا. جۇڭگونىڭ مەملەكەت ءتوراعاسى شي جينپيڭ ادامزاتتىڭ تاعدىرلاس ورتاق تۇلعا ەكەنىن، ىندەتكە توتەپ بەرۋ مەن ەكونوميكانى قالپىنا كەلتىرۋدە ىنتىماقتاسىپ سەلبەستىك جاساۋ جولىمەن ءجۇرۋى كەرەكتىگىن دارىپتەدى. دۇنيە جۇزىلىك سىن - سايىس الدىندا حالىقارالىق قوعام كەڭ كولەمدە ورتاق تانىم ۇيىستىرىپ، ىندەتتەن ساقتانۋ - تىزگىندەۋ مەن ەكونوميكالىق دامۋدى سايكەستى ىلگەرىلەتىپ، ىندەتتى ەرتەرەك جەڭۋى ءارى دۇنيە ءجۇزى ەكونوميكاسىنىڭ قايتا گۇلدەنۋىن ىلگەرىلەتۋى كەرەك.
لي كىچياڭ جۇڭگونىڭ قازىرگى ەكونوميكالىق جاعدايىن تانىستىرعاندا بىلاي دەدى: ىندەت جۇڭگو ەكونوميكاسىنا اۋىر ىقپال جاساعان جاعدايدا ءبىز ىندەتتەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلاپ ىلگەرىلەتتىك، ەكونوميكا ورنىقتى جوعارىلادى، سوڭعى بىرنەشە ايدا نەگىزگى كورسەتكىشتەردىڭ قالپىنا كەلۋى جۇڭگو ەكونوميكاسىنىڭ وراسان زور سەرپىمدىلىك قۋاتى بار ەكەنىن ايگىلەدى. جۇڭگودا 120 ميلليون بازار تۇلعاسى بار، جۇڭگو حالقى ەڭبەكشىل، پاراساتتى. ءجۇز ميلليوننان استام بازار تۇلعاسىن، اسىرەسە، مولشەرى كوپ، اۋماعى كەڭ ورتا، شاعىن، ۇساق كاسىپورىنداردى، جەكە ونەركاسىپشىلەر مەن ساۋداگەرلەردى ساقتاپ قالعاندا بيىل قالا - قالاشىقتاردا تىڭنان 9 ميلليوننان استام ادامدى جۇمىستاندىرۋ نىساناسىن جۇزەگە اسىرۋعا، ەكونوميكانىڭ نەگىزگى جاعدايىن ورنىقتىرۋعا ءارى بولاشاق دامۋ ءۇشىن نەگىز قالاۋعا بولادى.
http://kazakh.people.com.cn/155419/15824457.html
