مەملەكەت ءتوراعاسى شي جينپيڭ 2 - ايدىڭ 5 - كۇنى حالىق سارايىندا كامبودجانىڭ باس ءۋازىرى حۇڭسىنمەن كەزدەستى.
شي جينپيڭ مىنانى اتاپ كورسەتتى: كەزەكتە، جۇڭگو ۇكىمەتى مەن حالقى جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىنە بار كۇش - قۋاتىمەن قارسى اتتانۋدا، تاۋقىمەتتى كۇندە شىنايى سۇيىسپەنشىلىك ايگىلەنەدى. وسىنداي ەرەكشە ساتتە، كامبودجا حالقى ءبىز جاقتا تۇردى. سيحاموني پاتشا مەن مونيلە پاتشا انا بىزدەن ارناۋلى حال سۇرايتىندىقتارىن جانە قولداۋ كورسەتەتىندىكتەرىن ءبىلدىردى، ونان دا ماڭىزدىسى، باس ءۋازىر مىرزا جۇڭگو جاقتى تالاي رەت كۇش سالا قولدادى، ونىڭ ۇستىنە بۇگىن جۇڭگوعا ارنايى ساپارلاي كەلىپ، جۇڭگو مەن كامبودجانىڭ مىزعىماس دوستىعى مەن ءوزارا سەنىمىن ايگىلەپ، تار جول، تايعاق كەشۋلەردى بىرگە وتكەرۋ سىندى جۇڭگو مەن كامبودجانىڭ تاعدىرلاس ورتاق تۇلعاسىنىڭ وزەكتى ءمانىن ۇعىندىردى. جۇڭگو جاق مۇنى ايرىقشا القايدى.
شي جينپيڭ مىنانى باسا دارىپتەدى: جۇڭگو پارتياسى مەن ۇكىمەتى جۇڭگو حالقى مەن حالىقارالىق قوعامعا وسكەلەڭ جاۋاپتى بولۋ پوزيتسياسىمەن ەڭ ءۇزىلدى - كەسىلدى، ەڭ قاتاڭ ساقتانۋ - تىزگىندەۋ شارالارىن قولداندى. قازىر ساقتانۋ - تىزگىندەۋ قىزمەتىندە بەلسەندى ونىمدىلىككە قول جەتكىزۋدە. جۇڭحۋا ۇلتى − تالاي جاپا - ماشاقاتتى باستان وتكەرىپ كەلەدى. جۇڭگونىڭ وسى رەتكى ىندەتتەن ساقتانۋ - تىزگىندەۋ توسقاۋىل شايقاسىندا جەڭىسكە جەتۋگە سەنىمى بەكەم، قابىلەتى قاپتال جەتەدى، مۇمكىندىگى دە بار. ءبىز ۇزدىكسىز اشىق، جاريا بولۋ پوزيتسياسىن ۇستانىپ، كامبودجانى قامتىعان ءار ەلمەن سەلبەستىكتى كۇشەيتىپ، ىندەتكە بىرگە ءونىمدى توتەپ بەرىپ، بۇكىل جەر شارىنىڭ جانە ءوڭىردىڭ الەۋمەتتىك دەنساۋلىق حاۋىپسىزدىگىن قورعايمىز. ءبىز جۇڭگودا وقىپ جاتقان وقۋشىلاردى دا قامتىعان كامبودجانىڭ جۇڭگوداعى ازاماتتارىنا ءوز ەلىمىزدىڭ ازاماتتارىنداي مامىلە جاسايمىز، ولاردىڭ تۇرمىسى مەن سالاماتتىعىن قامتاماسىزداندىرامىز.
شي جينپيڭ مىنانى باسا دارىپتەدى: جاڭا ءبىر جىلدا جۇڭگو جاق كامبودجا جاقپەن جوعارى جىكتەگىلەردىڭ تىعىز بارىس - كەلىسىن ساقتاپ، جۇڭگو - كامبودجا تاعدىرلاس ورتاق تۇلعاسى ارەكەت جوسپارىن تياناقتاندىرىپ، جۇڭگو - كامبودجا قارىم - قاتىناسىن تاعى دا تىڭ ساتىعا كوتەرۋدى قالايدى.
حۇڭسىن مىنالاردى ءبىلدىردى: مەنىڭ وسىنداي ەرەكشە ساتتە جۇڭگوعا كەلۋ شەشىمىن جاساۋىم كامبودجا ۇكىمەتى مەن حالقىنىڭ جۇڭگو ۇكىمەتى مەن حالقىنىڭ ىندەتكە قارسى اتتانۋىن بار كۇشپەن قولدايتىندىعىن ايگىلەۋ ءۇشىن بولىپ تابىلادى. جۇڭگونىڭ ەڭ قيىن كەزدەرىندە، كامبودجا حالقى جۇڭگو حالقىمەن مىزعىماستان بىرگە بولىپ، جاپا - ماشاقاتتى بىرگە كورىپ، ۋاقىتتىق ماشاقاتتى بىرگە جەڭەدى. ولار ناعىز ”اينىماس دوستار“. جۇڭگو جاقتىڭ جۇڭگوداعى كامبودجا ازاماتتارىنىڭ تۇرمىسى مەن سالاماتتىعىنا كوڭىل بولگەندىگىنە جانە قامتاماسىزداندىرعاندىعىنا العىس ايتامىن، وسى رەتكى ساپارىم ارقىلى ولاردىڭ سەنىمىن كۇشەيتۋدى ءۇمىت ەتەمىن. ىندەت الدىندا، كەيبىر مەملەكەتتەر ءىشىنارا ۇشقارى شەكتەۋ شارالارىن قولداندى، مۇنىسى جارامايدى، ۇرەيلەنۋ ىندەتتەن الدەقايدا قورقىنىشتى. كامبودجا جاق جۇڭگومەن ۇزدىكسىز قالىپتى سەلبەستىكتى جانە قارىم - قاتىناستى ورىستەتىپ، جۇڭگو جاقپەن بىرگە كامبودجا - جۇڭگو تاعدىرلاس ورتاق تۇلعاسىن قۇرۋعا كۇش سالادى.
ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
