از ۇلتتاردىڭ 11 - كەزەكتى مەملەكەتتىك ءداستۇرلى سپورت جارىسى باستالدى
از ۇلتتاردىڭ 11 - كەزەكتى مەملەكەتتىك ءداستۇرلى سپورت جارىسى 9 - ايدىڭ 8 - كۇنى حىناننىڭ جىڭجوۋ قالاسىندا سالتاناتپەن باستالدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ ياڭ باستالۋ سالتىنا قاتىناستى.
ەجەلگى استانا جىڭجوۋدا شام - شىراقتار سامالاداي جايناپ، ورتا جازىق دالاسىنداعى جۇرتشىلىق شاتتىققا شومدى. وليمپيك دەنە تاربيە ورتالىعىنىڭ سپورت الاڭىندا 56 ۇلت ءبىر جەردە باس قوسىپ، ىنتىماقتاسا العا ىلگەرىلەۋدىڭ اسقاق سيمفونياسىن بىرگە ورىندادى. ساعات 20دا اشىلۋ سالتى رەسمي باستالدى، ءارقايسى ۋاكىلدەر ۇيىرمەلەرى مەن الاڭداعى 40 مىڭعا تاياۋ كورەرمەن مەملەكەت تۋى قۇرمەت اترەتىنىڭ الاڭعا كىرۋىن قارسى الدى. ۇلتتىق مەرەكەلىك كيىم كيگەن ءار ۇلت سپورتشىلارى كوتەرىڭكى رۋح، ارشىندى قاداممەن ءجۇرىپ كەلەدى. ءارقايسى ۋاكىلدەر ۇيىرمەلەرى 30 سەكۋند توقتاپ ويىن كورسەتىپ، جۇڭحۋا مادەنيەتىنىڭ الۋان گۇلدى باقشاسىنىڭ ايشىقتى كەلبەتىن كورسەتىپ، كورەرمەندەردى ءتانتى ەتتى.
ساعات 20دان 50 مينۋت وتكەندە، ۋاڭ ياڭ: جۇڭحۋا حالىق رەسپۋبليكاسىنىڭ 11 - كەزەكتى از ۇلتتار ءداستۇرلى سپورت جارىسى باستالدى! دەپ جاريالادى. سول ساتتە تۇنگى اسپاندا كوزدىڭ جاۋىن الاتىن اسەم وت - شاشۋلار شاشىلىپ، جىڭجوۋ وليمپيك دەنە تاربيە ورتالىعى شاتتىق تەڭىزىنە اينالدى.
ىلە - شالا ”جۇڭحۋا ۇلتىنىڭ بەرەكەلى شاڭىراعى. قول ۇستاسىپ جاڭا داۋىردە اتويلاي العا باسايىق“تى نەگىزگى تاقىرىپ ەتكەن تارتىمدى ادەبيەت - كوركەمونەر كونسەرتى باستالدى. ”جۇڭحۋاعا ماداق“، ”كەرەمەت حىنان“، “ارمانمەن قاۋىشۋ“ اتتى 3 تاراۋدان تۇراتىن كونسەرتتە جۇڭحۋا ۇلتىنىڭ شۇعىلالى مادەنيەتى ايگىلەنىپ، جاڭا جۇڭگونىڭ 70 جىلداعى ۇلى تابىستارى جىرلانىپ، جۇڭحۋا ۇلتىنىڭ ۇلى گۇلدەنۋىنىڭ جارقىن بولاشاعى كورسەتىلدى. كونسەرتتىڭ ەڭ سوڭىندا ءار ۇلت باۋىرلاستار ”مەن جانە مەنىڭ وتانىم“ اتتى ءاندى تەرەڭ سۇيىسپەنشىلىكپەن بىرگە شىرقادى. الاڭدا جاڭا جۇڭگونىڭ 70 جىلدىق مەرەي تويىنىڭ سيمۆولى بولعان ”70“ سيفرى كورىندى، ۇلى وتاننىڭ گۇلدەنىپ - كوركەيۋىن بىرگە تىلەدى.
باستالۋ سالتىنىڭ الدىندا، ۋاڭ ياڭ جۇڭگو از ۇلتتار ءداستۇرلى سپورت مادەنيەت كورمەسىن جانە حىنان ولكەسىنىڭ ەكونوميكالىق، قوعامدىق دامۋ تابىستارى كورمەسىن ەكسكۋرسيالاپ، سپورت جارىسىن ۇيىمداستىرۋ القاسىنىڭ بارلىق مۇشەلەرىن، سپورتشىلاردىڭ ۋاكىلدەرىن جانە قىزمەتكەرلەردىڭ ۋاكىلدەرىن قابىلدادى. ول بىلاي دەپ اتاپ كورسەتتى: از ۇلتتاردىڭ مەملەكەتتىك سپورت جارىسىن وتكىزۋ − از ۇلتتاردىڭ ءداستۇرلى مادەنيەتىن قورعاۋ مەن دامىتۋدىڭ ماڭىزدى شاراسى، ۇلتتاردىڭ ارالاسۋىن، ىشتەسۋىن، توعىسۋىن جەبەۋدىڭ ماڭىزدى تۇعىرى، ۇلتتار ىنتىماعى، العاباسارلىعى ىستەرىن جاسامپازدىقپەن ىلگەرىلەتۋدىڭ ماڭىزدى تۇتقاسى، پارتيانىڭ ۇلت ساياساتىنىڭ ابزالدىلىعىنىڭ ماڭىزدى بەينەسى. باس شۋجي شي جينپيڭنىڭ ۇلت قىزمەتى جونىندەگى ماڭىزدى بايىمداۋىن ىشكەرىلەي ۇيرەنىپ، ۇعىنىپ، پارتيانىڭ ۇلت ساياساتىن جاپپاي دايەكتىلەندىرىپ، ۇلتتاردىڭ ىنتىماقتاسا كۇرەس جۇرگىزۋىنە، بىرگە گۇلدەنىپ دامۋىنا تاباندى بولىپ، جۇڭحۋا ۇلتى ورتاق تۇلعا تانىمىن سومداپ، ۇلتتاردىڭ اناردىڭ دانىندەي تىعىز ۇيىسۋىن ىلگەرىلەتىپ، ۇلتتار ىنتىماعىنىڭ ”ەڭ جوعارى سيلىق ساۋىتىن“ بىرگە كوتەرىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا تالماي كۇرەس جۇرگىزۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى سۇن چۇنلان، جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، ورتالىق كوميتەت بىرلىكساپ ءبولىمىنىڭ باستىعى يوۋ چۋان باستالۋ سالتىنا قاتىناستى. مەملەكەتتىك ساياسي كەڭەستىڭ ورىنباسار ءتوراعاسى، مەملەكەتتىك ۇلت ىستەرى كوميتەتىنىڭ مەڭگەرۋشىسى باتىر باستالۋ ءسوزىن سويلەدى. حىنان ولكەلىك پارتكومنىڭ شۋجيى ۋاڭ گوشىڭ قارسى الۋ ءسوزىن سويلەدى. مەملەكەتتىك دەنە تاربيە باس مەكەمەسىنىڭ باستىعى گوۋ جۇڭۋىن باستالۋ سالتىن باسقاردى.
وسى كەزەكتى سپورت جارىسى 9 كۇنگە جالعاسادى، بۇكىل ەلدەگى 31 ولكەنىڭ (اۆتونوميالى رايون، توتە قاراستى قالا)، شينجياڭ ءوندىرىس - قۇرىلىس بيڭتۋانىنىڭ، ازاتتىق ارميانىڭ ۋاكىلدەر ۇيىرمەلەرىنەن، سونداي - اق تايۋان از ۇلت ۋاكىلدەر ۇيىرمەسىنەن 7009 سپورتشى ساداق اتۋ، جاياۋ تارتىس، سۋدا بامبۋكپەن قالقۋ سياقتى 17 جارىس تۇرىنە جانە 194 ويىن كورسەتۋ تۇرىنە قاتىناسادى. سپورت جارىسى كەزىندە ۇلتتاردىڭ كولەمدى ويىن - ساۋىعى سياقتى مادەنيەت قيمىلدارى دا وتكىزىلەدى.
