شينحۋا اگەنتتىگىنىڭ 4 ـ ايدىڭ 24 ـ كۇنى بەيجيڭنەن بەرگەن حابارى. 4 ـ ايدىڭ 24 ـ كۇنى مەملەكەت ٴتوراعاسى شي جينپيڭ تۇڭعىش كەزەكتى ”جۇڭگو _ لاتىن امەريكاسى جانە كارايب ەلدەرى عارىش سەلبەستىك تالقى مىنبەرىنە“ قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: بيىل مەنىڭ لاتىن امەريكاسى جاقتىڭ باسشىلارىمەن بىرگە جۇڭگو _ لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى قۇرىلعاندىعىن جاريالاعاندىعىمىزدىڭ 10 جىلدىعى. 10 جىلدان بەرى جۇڭگو _ لاتىن امەريكاسى جانە كارايب ەلدەرى ورتاق تۇلعاسى تالقى مىنبەرى اياسىندا جۇڭگو _ لاتىن امەريكاسى جانە كارايب ەلدەرىنىڭ ٴار سالاداعى دوستىق سەلبەستىگى قارىشتاپ دامىپ، جۇڭگو _ لاتىن امەريكاسى جانە كارايب ەلدەرى قارىم ـ قاتىناسىنىڭ تەڭ، ٴوزارا ٴتيىمدى، جاڭالىق اشاتىن، اشىق، حالىققا ٴتيىمدى جاڭا داۋىرگە ٴوتۋىن ىلگەرىلەتتى. مەن تاياۋ جىلداردان بەرى، جۇڭگو مەن لاتىن امەريكاسى جانە كارايب ەلدەرىنىڭ عارىش سەلبەستىگىندە سۇبەلى تابىستارعا قول جەتكىزگەندىگىن قۋانىشپەن كورىپ وتىرمىن. ەكى جاق الىستان سەزۋ جاساندى سەرىگى، حابارلاسۋ جاساندى سەرىگى جانە تەرەڭ كەڭىستىك بەكەتى تورابى سياقتى سالالارداعى سەلبەستىكتە ۇزدىكسىز تىڭ ىلگەرىلەۋشىلىككە قول جەتكىزدى، بۇل عىلىم ـ تەحنيكانىڭ العا باسۋىن ىلگەرىلەتۋدە، وڭىرلىك ٴوزارا بايلانىستى كۇشەيتۋدە، حالىق تۇرمىسىنىڭ قۇت ـ ىرىسىن ارتتىرۋدا ماڭىزدى رول اتقاردى. جۇڭگو لاتىن امەريكاسىمەن جانە كارايب ەلدەرىمەن بىرگە تۇڭعىش كەزەكتى جۇڭگو _ لاتىن امەريكاسى جانە كارايب ەلدەرى عارىش سەلبەستىك تالقى مىنبەرىن باستاما ەتىپ، جوعارى دەڭگەيدەگى جۇڭگو _ لاتىن امەريكاسى جانە كارايب ەلدەرى عارىش سەلبەستىك سەرىكتەستىك قارىم ـ قاتىناسىن ورناتىپ، عارىش تەحنيكاسىنىڭ ەكى جاق حالقىن اناعۇرلىم ويداعىداي يگىلىككە كەنەلتۋىن جەبەپ، جۇڭگو مەن لاتىن امەريكاسى جانە كارايب ەلدەرىنىڭ تاعدىرلاس ورتاق تۇلعاسىن قۇرۋدى ۇزدىكسىز ىلگەرىلەتۋدى قالايدى.
تۇڭعىش كەزەكتى ”جۇڭگو _ لاتىن امەريكاسى جانە كارايب ەلدەرى عارىش سەلبەستىك تالقى مىنبەرى“ سول كۇنى حۋبەيدىڭ ۋحانىندا اشىلدى، مىنبەردى جۇڭگو مەملەكەتتىك عارىش مەكەمەسى مەن حۋبەي ولكەلىك حالىق ۇكىمەتى بىرگە باسقارىپ وتكىزدى.
