شينحۋا اگەنتتىگىنىڭ 4 ـ ايدىڭ 9 ـ كۇنى بەيجيڭنەن بەرگەن حابارى (ٴتىلشى ۋاڭ بين). 4 ـ ايدىڭ 9 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا رەسەيدىڭ سىرتقى ىستەر مينيسترى لاۆروۆپەن كەزدەستى.
شي جينپيڭ لاۆروۆقا پۋتين زۇڭتۇڭعا ىستىق ىقىلاستى سالەمىن جەتكىزۋدى ايتتى. شي جينپيڭ بىلاي دەپ اتاپ كورسەتتى: بيىل جۇڭگو مەن رەسەيدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى. جۇڭگو مەن رەسەي ەكى ەل ٴىرى ەلدەردىڭ، كورشىلەس ەلدەردىڭ جاراسىمدى بىرگە جاساسۋىنىڭ، سەلبەسىپ تەڭ يگىلىككە كەنەلۋىنىڭ شىت جاڭا جولىمەن قول ۇستاسا ٴجۇرىپ، ەكى ەلدى جانە ەكى ەل حالقىن باقىتقا كەنەلتتى ٴارى حالىقارالىق ادىلدىككە، تۋراشىلدىققا اقىل ـ پاراسات پەن كۇش ـ قۋات قوستى. پۋتين زۇڭتۇڭ ەكەۋىمىز تىعىز بارىس ـ كەلىستى ۇزدىكسىز ساقتاپ، جۇڭگو _ رەسەي قارىم ـ قاتىناسىنىڭ باستان ـ اياق ٴساتتى، ورنىقتى العا قاراي دامۋىنا شىنايى كەپىلدىك ەتۋدى ٴبىر اۋىزدان قۇپتادىق. ەكى جاق ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتاۋدى جانە جۇڭگو _ رەسەي مادەنيەت جىلىن وتكىزۋدى وراي ەتىپ، پۋتين زۇڭتۇڭ ەكەۋىمىز كەلىسكەن ٴبىر قىدىرۋ ماڭىزدى ورتاق تانىمداردى جاپپاي تياناقتاندىرۋ كەرەك.
شي جينپيڭ بىلاي دەپ باسا دارىپتەدى: جۇڭگو جاق رەسەي حالقىنىڭ ٴوزىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن قولدايدى، رەسەي جاقتىڭ لاڭكەستىككە سوققى بەرۋىن، قوعامنىڭ حاۋىپسىزدىگىن، ورنىقتىلىعىن قورعاۋىن قولدايدى. جۇڭگو جاق باستان ـ اياق جۇڭگو _ رەسەي قارىم ـ قاتىناسىنىڭ دامۋىنا ايرىقشا ٴمان بەرەدى، رەسەي جاقپەن بىرگە ەكى جاقتى بايلانىستى نىعايتىپ، بريكس ەلدەرى، شاڭحاي سەلبەستىك ۇيىمى سياقتى كوپ جاقتى ستراتەگيالىق ىستەستىكتەردى كۇشەيتىپ، اناعۇرلىم كوپ جاۋاپكەرشىلىكتى ايگىلەپ، تەپە ـ تەڭ، اشىق، جاريا، سيىسىمدى بولۋ رۋحىمەن ”الەمدىك وڭتۇستىك“ ەلدەرىن ىنتىماقتاستىرىپ، الەمدىك باسقارۋ جۇيەسىنىڭ وزگەرىسىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋعا پارمەندى جەتەكشىلىك ەتۋدى قالايدى.
لاۆروۆ پۋتين زۇڭتۇڭنىڭ ٴتوراعا شي جينپيڭگە جولداعان ىقىلاستى سالەمىن جانە ىزگى تىلەگىن جەتكىزدى. ول مىنالاردى ٴبىلدىردى: ٴتوراعا شي جينپيڭنىڭ پارمەندى باسشىلىعىندا، جۇڭگو دۇنيە ٴجۇزىن جالت قاراتقان تابىستارعا قول جەتكىزىپ، وزگە ەلدەردىڭ بىرگە دامۋدى جۇزەگە اسىرۋىنا ماڭىزدى وراي ازىرلەدى، رەسەي جاق بۇعان ايرىقشا سۇيىنەدى. رەسەيدىڭ سىرتقى ساياساتتا الدىمەن ويلاستىراتىن باعىتى _ جۇڭگومەن قارىم ـ قاتىناستى جاپپاي بەكەمدەۋ، دەڭگەيىن ٴوسىرۋ. پۋتين زۇڭتۇڭنىڭ ٴساتتى سايلانىپ تاعى دا مىندەت وتەۋى رەسەي _ جۇڭگو قارىم ـ قاتىناسىنىڭ ۇلاسپالىلىعىنا كەپىلدىك ەتتى. رەسەي _ جۇڭگو قارىم ـ قاتىناسى تەڭ تۇرعىدا ٴوزارا تيىمدىلىك جەتكىزۋ نەگىزىندە قۇرىلعان، قىرعي قاباقتىق سوعىس كەزىندەگى وداقتاستىق قارىم ـ قاتىناستان اسىپ ٴتۇسىپ، كۇشتى سەرپىمدىلىگىن كورسەتتى. رەسەي جاق جۇڭگو جاقپەن بىرگە ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن مۇقيات تياناقتاندىرىپ، ەكى جاقتى جانە كوپ جاقتى ىستەستىكتى كۇشەيتىپ، باسقا ”الەمدىك وڭتۇستىك“ ەلدەرىمەن بىرگە ىنتىماقتى، سەلبەستىكتى كۇشەيتىپ، اناعۇرلىم ٴادىل، ادىلەتتى حالىقارالىق ٴتارتىپ قالىپتاستىرۋدى ىلگەرىلەتۋگە ۇلەس قوسۋدى قالايدى.
ۋاڭ ي كەزدەسۋگە قاتىناستى.
