شينحۋا اگەنتتىگىنىڭ 4 ـ ايدىڭ 8 ـ كۇنى بەيجيڭنەن بەرگەن حابارى (ٴتىلشى سۇن ي). 4 ـ ايدىڭ 8 ـ كۇنى مەملەكەت ٴتوراعاسى شي جينپيڭ بەيجيڭ حالىق سارايىندا فرانسيا مەريە قور قوعامىنىڭ ٴتوراعاسى مەريەمەن جانە ونىڭ حانىمىمەن كەزدەستى.
شي جينپيڭ مەريەنىڭ جانە ونىڭ حانىمىنىڭ، سونداي ـ اق مەريە قور قوعامىنىڭ ۇزاق ۋاقىتتان بەرى جۇڭگو _ فرانسيا قارىم ـ قاتىناسىنىڭ دامۋىنا، جۇڭگونىڭ دەنساۋلىق ساقتاۋ، سالاماتتىق ىستەرىنە كوڭىل ٴبولىپ جانە قولداۋ كورسەتىپ كەلگەندىگىن القادى.
شي جينپيڭ بىلاي دەپ باسا دارىپتەدى: قازىر دۇنيە ٴجۇزى 100 جىلدا بولماعان زور وزگەرىس جاعىدايىنا ٴدوپ كەلىپ، وزگەرىس پەن بىلىقپالىق قاباتتاسقان اۋمالى ـ توكپەلى مەزگىلگە ٴوتتى. ادامزات قوعامىنىڭ جاڭا تيپتى ايدارشا ۆيرۋس ىندەتى سياقتى دەنساۋلىق ساقتاۋ، سالاماتتىق سىن ـ سايىستارىنا توتەپ بەرۋمەن بىرگە، پالەستينا _ يزرايل قاقتىعىسى، ۋكراينا داعدارىسى سياقتى وڭىرلىك قاقتىعىستارعا دا بەتپە ـ بەت كەلۋىنە تۋرا كەلدى. جۇڭگو جاق باستان ـ اياق بەيبىتشىلىكتى دارىپتەيدى، سوعىستى قالامايدى، سوعىستى توقتاتىپ بەيبىتشىلىكتى جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ۇندەيدى. بيىل جۇڭگو مەن فرانسيانىڭ ديپلوماتيالىق قارىم ـ قاتىناس ورناتقاندىعىنىڭ 60 جىلدىعى. 60 جىلدان بەرى سان ۇرپاق ادامدار جۇڭگو _ فرانسيا قارىم ـ قاتىناسىن جالعاستىرىپ جانە دامىتىپ، ەكى ەل دوستىعى ۋاقىت وتكەن سايىن بەكەمدەلە ٴتۇستى. جۇڭگو جاق جۇڭگو _ فرانسيا دوستىعىن قاستەرلەيدى، فرانسيا جاقپەن جوعارى جىكتەگىلەردىڭ بارىس ـ كەلىسىن اناعۇرلىم كۇشەيتىپ، اۋىس ـ كۇيىستى، سەلبەستىكتى جيىلەتىپ، جۇڭگو _ فرانسيا قارىم ـ قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋدى قالايدى. ۇزاق ۋاقىتتان بەرى جۇڭگو مەن فرانسيا دەنساۋلىق ساقتاۋ، سالاماتتىق سالاسىندا ٴبىر قىدىرۋ سەلبەستىك ورىستەتىپ، سۇبەلى جەتىستىكتەرگە قول جەتكىزدى. مەريە قور قوعامىنىڭ جۇڭگو جاقپەن سەلبەستىكتى ۇزدىكسىز تەرەڭدەتۋىن قارسى الامىز.
مەريە مىنالاردى ٴبىلدىردى: ٴتوراعا شي جينپيڭنىڭ قاربالاستىق ىشىندە ۋاقىت شىعارىپ كەزدەسكەندىگىنە العىس ايتامىن، بۇل فرانسيا حالقىنا دەگەن دوستىق سۇيىسپەنشىلىكتى تولىق ايگىلەدى، ادامدى تەبىرەنتەدى. مەنىڭ جۇڭگومەن بارىس ـ كەلىسىم جانە دوستىق سۇيىسپەنشىلىگىم 46 جىلدىڭ الدىندا باستالعان. تالاي جىلدان بەرى مەن جۇڭگونىڭ دامۋىنا، العا باسۋىنا قاشاندا نازار اۋدارىپ جانە ٴسۇيىنىپ كەلەمىن. مەريە قور قوعامى فرانسيا _ جۇڭگو دوستىعىن جانە دەنساۋلىق ساقتاۋ، سالاماتتىق سەلبەستىگىن ۇزدىكسىز بەلسەنە جەبەيدى.
ۋاڭ ي كەزدەسۋگە قاتىناستى.
