شينحۋا اگەنتتىگىنىڭ 3 ـ ايدىڭ 25 ـ كۇنى بەيجيڭنەن بەرگەن حابارى (ٴتىلشى ليۋ حۋا). 3 ـ ايدىڭ 25 ـ كۇنى تۇستەن كەيىن مەملەكەت ٴتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن دومينيكا زۇڭليى سكەرريدپەن كەزدەستى.
شي جينپيڭ بىلاي دەپ اتاپ كورسەتتى: دومينيكا كارايب وڭىرىندەگى ماڭىزدى مەملەكەت ٴارى جۇڭگونىڭ وسى وڭىردەگى سەنىم ارتۋعا تاتيتىن جاقسى دوسى، جاقسى سەرىگى. ديپلوماتيالىق قارىم ـ قاتىناس ورناتقان 20 جىلدان بەرى جۇڭگو _ دومينيكا باستان ـ اياق ٴوزارا قۇرمەت ەتىپ، تەڭ تۇرعىدا ٴوزارا مامىلە جاساپ، ساياسي ٴوزارا سەنىمدىلىكتى ۇزدىكسىز كۇشەيتتى، ٴار سالاداعى اۋىس ـ كۇيىسى، سەلبەستىگى قارىشتاپ دامىپ، حالىقتار دوستىعى كۇن سايىن تەرەڭدەدى، جۇڭگو _ دومينيكا قارىم ـ قاتىناسى تۇستىك ەلدەر سەلبەستىگىنىڭ تيپتىك ۇلگىسىنە اينالدى. جۇڭگو جاق دومينيكا جاقتىڭ جۇڭگوعا باستان ـ اياق دوستىق كورسەتۋگە تاباندى بولعاندىعىن بارىنشا القايدى، دومينيكا جاقپەن بىرگە وتكەن 20 جىلداعى ەكى ەل قارىم ـ قاتىناسىنىڭ دامۋىنداعى تابىستى تاجىريبەلەردى قورىتىندىلاپ، دامۋ ستراتەگيالارىن ٴتۇيىلىستىرۋدى كۇشەيتىپ، دوستىق قارىم ـ قاتىناستى سەلبەسىپ تەڭ يگىلىككە كەنەلۋدىڭ قوزعاۋشى كۇشىنە اينالدىرىپ، جۇڭگو _ دومينيكا قارىم ـ قاتىناسىنىڭ اناعۇرلىم كوپ جەتىستىككە قول جەتكىزۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.
شي جينپيڭ بىلاي دەپ باسا دارىپتەدى: جۇڭگو _ دومينيكا قارىم ـ قاتىناسىنىڭ ٴساتتى دامۋىنداعى تەتىك ەكى ەلدە جوعارى دەڭگەيدەگى ساياسي ٴوزارا سەنىمدىلىك بولعاندىعىندا، ٴبىر ـ ٴبىرىنىڭ وزەكتى مۇددەسىنە جانە ٴجىتى قاداعالاپ وتىرعان ىستەرىنە ساياتىن كەلەلى ماسەلەلەردە ٴوزارا تۇسىنگەندىگىندە، ٴوزارا قولداعاندىعىندا. جۇڭگو جاق دومينيكا حالقىنىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن باتىل قولدايدى، دومينيكا جاقپەن دوستىق بارىس ـ كەلىستى جيىلەتىپ، ەل باسقارۋ تاجىريبەسى جونىندەگى اۋىس ـ كۇيىستى كۇشەيتۋدى قالايدى. دومينيكا جاقتىڭ جۇڭگو ۇلگىسىندەگى وسىزامانداندىرۋدىڭ جۇردەك پويەزىنە وتىرىپ، ەكى ەلدىڭ ەكونوميكا ـ ساۋدا، نەگىزدىك قۇرىلعى قۇرىلىسى، اۋىل شارۋاشىلىعى، ەمدەۋ ـ دەنساۋلىق ساقتاۋ سياقتى سالالارداعى سەلبەستىگىن كەڭەيتۋىن قارسى الادى. جۇڭگو جاق دومينيكانىڭ ەكونوميكالىق، قوعامدىق دامۋىنا شاماسىنىڭ جەتىسىنشە ۇزدىكسىز كومەك كورسەتۋدى قالايدى. جۇڭگو جاق دومينيكا جاقپەن گۋمانيتارلىق اۋىس ـ كۇيىستى كەڭەيتۋدى قالايدى، دومينيكالىق اناعۇرلىم كوپ جاس وقۋشىلاردىڭ جۇڭگوعا كەلىپ ٴبىلىم اسىرۋىن قارسى الادى، الداعى جەردە دومينيكا جاقتى وقۋ سيلىعى جانە باۋلۋ سياقتى ورايلارمەن ۇزدىكسىز قامدايدى. ەكى جاق دومينيكا مەملەكەتتىك داشۋەسىنىڭ كۇڭزى ساباقحاناسىن بىرگە ويداعىداي قۇرىپ، دومينيكادا كاسىپتىك تەحنيكالىق باۋلۋ سەلبەستىگىن ورىستەتۋ جونىندە تالقى جۇرگىزۋى كەرەك.
شي جينپيڭ بىلاي دەپ باسا دارىپتەدى: جۇڭگو جاق تەرەزەسى تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن جانە جالپىعا بىردەي، قامتىمدى بولعان ەكونوميكانىڭ جاھاندانۋىن دارىپتەيدى، مەملەكەتتەردى ۇلكەن ـ كىشى، كۇشتى ـ ٴالسىز دەپ ٴبولىپ ـ جارماۋدى قۋاتتايدى، بارلىعى دا حالىقارالىق قوعامنىڭ تەرەزەسى تەڭ مۇشەسى. جۇڭگو جاق شاعىن ارالدى وركەندەپ كەلە جاتقان ەلدەردىڭ كليمات وزگەرىسى سالاسىنداعى ٴجىتى قاداعالاپ وتىرعان ىستەرى مەن تالاپ ـ تىلەكتەرىنە باسا ٴمان بەرەدى، دومينيكانىڭ حالىقارالىق جانە وڭىرلىك ىستەردە بەلسەندى رول اتقارۋىن قولدايدى، دومينيكا جاقپەن سايكەسۋدى، سەلبەسۋدى كۇشەيتىپ، تۇستىك ەلدەر سەلبەستىگىن تەرەڭدەتىپ، وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. جۇڭگو جاق كارايب ەلدەرىمەن قارىم ـ قاتىناسىنا وسكەلەڭ ٴمان بەرەدى، دومينيكا جاقتىڭ كارايب ورتاق تۇلعاسىنىڭ كەزەكتى ٴتوراعاسى مىندەتىن وتەگەن كەزدە جۇڭگو ـ كارايب ەلدەرى سەلبەستىگىن ىلگەرىلەتۋدە ماڭىزدى رول اتقارعاندىعىن القايدى، كارايب وڭىرىندەگى ەلدەردىڭ مەملەكەتتىڭ گۇلدەنىپ ـ كوركەيۋىن، دامۋىن كوزدەۋىن، بۇقارانىڭ قۇت ـ ىرىسىن ارتتىرۋىن ۇزدىكسىز قولداۋدى قالايدى.
سكەرريد مىنالاردى ٴبىلدىردى: 20 جىلدىڭ الدىندا مەن جۇڭگومەن ديپلوماتيالىق قارىم ـ قاتىناس ورناتۋ سىندى دۇرىس شەشىم جاسادىم، دومينيكا مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 20 جىلدىعىن قۇتتىقتاۋ ساتىندە جۇڭگودا تاعى ساپاردا بولعاندىعىما وتە قۋانىشتىمىن. دومينيكا ـ جۇڭگو قارىم ـ قاتىناسى ٴوزارا سەنىمدىلىكتى، ٴوزارا قۇرمەت ەتۋدى، ٴوزارا قولداۋدى نەگىز ەتكەن. 20 جىلدان بەرى دومينيكا ـ جۇڭگو قارىم ـ قاتىناسىنىڭ مازمۇنى ۇزدىكسىز بايىپ، جەتىستىگى ەرەكشە قوماقتى بولدى. جۇڭگو ۇلى مەملەكەت رەتىندە، كەدەيلەردى سۇيەمەلدەۋ، دامۋ سياقتى سالالاردا الەمدى جالت قاراتقان تابىستارعا قول جەتكىزىپ عانا قويماي، دومينيكا سياقتى لاتىن امەريكاسىنداعى ەلدەردىڭ جانە دۇنيە ٴجۇزىنىڭ بەيبىتشىلىگى مەن دامۋىنا دا ماڭىزدى ۇلەس قوستى. جۇڭگو جاقتىڭ دومينيكا حالقى جاراتىلىستىق اپاتقا جانە جاڭا تيپتى ايدارشا ۆيرۋس ىندەتىنە ۇشىراعان كەزدەردە دومينيكا حالقىمەن باستان ـ اياق باتىل بىرگە بولىپ، ەڭ الدىمەن قىمباتتى كومەك جانە قولداۋ كورسەتكەندىگىنە العىس ايتامىن. جۇڭگونىڭ قولداۋى مەن سەلبەستىگىن دومينيكانىڭ بارلىق جەرىنەن كورۋگە بولادى، ول دومينيكا جاقتىڭ ٴوز ەلىنىڭ تاۋەلسىزدىگى مەن دامۋىن قورعاۋىنا ايرىقشا كۇش ۇستەدى. دومينيكا جاق ٴتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن ٴبىر قىدىرۋ الەمدىك باستامانى بارىنشا القايدى جانە وعان سۇيىنەدى، بۇل قازىرگى تاڭدا دۇنيە ٴجۇزىنىڭ ىنتىماعىن، سەلبەستىگىن كۇشەيتۋ، دامۋدى، گۇلدەنىپ ـ كوركەيۋدى بىرگە جەبەۋ جونىنەن اسا ماڭىزدى. دومينيكا جاق ٴبىر جۇڭگو پرينسيبىنە باتىل بويسۇنادى، جۇڭگونىڭ بۇكىلدەي بىرلىككە كەلۋدى جۇزەگە اسىرۋ سىندى ادىلەتتى ٴىسىن قولدايدى، جۇڭگونىڭ ىشكى ىسىنە كيلىگەتىن ٴارقانداي ارەكەتكە قارسى تۇرادى. دومينيكا جاق جۇڭگو جاقپەن ستراتەگيالىق تىلدەسۋدى كۇشەيتىپ، حالىقتار دوستىعىن تەرەڭدەتىپ، جاپپاي سەلبەستىكتى كۇشەيتىپ، بارلىق جاعدايدا بىردەي ستراتەگيالىق سەرىكتەس بولىپ، دومينيكا ـ جۇڭگو قارىم ـ قاتىناسىن اناعۇرلىم جوعارى دەڭگەيگە كوتەرۋدى قالايدى. دومينيكا جاق كارايب ەلدەرىنىڭ جۇڭگومەن قارىم ـ قاتىناسىن دامىتۋىن جەبەۋدە ۇزدىكسىز بەلسەندى رول اتقارۋدى قالايدى. دومينيكا جاق تا جۇڭگو جاقپەن حالىقارالىق ىستەردەگى تىلدەسۋدى، سايكەسۋدى جيىلەتىپ، ٴبىر قىدىرۋ الەمدىك باستامانى بەلسەنە تياناقتاندىرىپ، حالىقارالىق ادىلدىكتى، تۋراشىلدىقتى بىرگە قورعاپ، دۇنيە ٴجۇزىنىڭ بەيبىتشىلىگى مەن دامۋىن جەبەۋدە بەلسەنە ۇلەس قوسۋدى كۇتەدى.
ۋاڭ ي كەزدەسۋگە قاتىناستى.
