شي جينپيڭ جاڭا داۋىردە ورتا بولىك وڭىرلەردىڭ ەڭسە كوتەرۋىن ىلگەرىلەتۋ اڭگىمە ٴماجىلىسىن باسقارىپ اشىپ، بىلاي دەپ باسا دارىپتەدى
ورتا بولىك وڭىرلەردىڭ ەڭسە كوتەرۋىن اناعۇرلىم بيىك باستامادا تىڭعىلىقتى ىلگەرىلەتۋ كەرەك
لي چياڭ، ساي چي، ديڭ شۋەشياڭ قاتىناستى
3 ـ ايدىڭ 20 ـ كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ حۋنان ولكەسىنىڭ چاڭشا قالاسىندا جاڭا داۋىردە ورتا بولىك وڭىرلەردىڭ ەڭسە كوتەرۋىن ىلگەرىلەتۋ اڭگىمە ٴماجىلىسىن باسقارىپ اشتى ٴارى ماڭىزدى ٴسوز سويلەدى.
□ سۋرەتتى شينحۋا اگەنتتىگىنىڭ ٴتىلشىسى ۋاڭ يە تۇسىرگەن
شينحۋا اگەنتتىگىنىڭ 3 ـ ايدىڭ 20 ـ كۇنى چاڭشادان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 3 ـ ايدىڭ 20 ـ كۇنى تۇستەن كەيىن حۋنان ولكەسىنىڭ چاڭشا قالاسىندا جاڭا داۋىردە ورتا بولىك وڭىرلەردىڭ ەڭسە كوتەرۋىن ىلگەرىلەتۋ اڭگىمە ٴماجىلىسىن باسقارىپ اشتى ٴارى ماڭىزدى ٴسوز سويلەدى. ول بىلاي دەپ باسا دارىپتەدى: ورتا بولىك وڭىرلەر _ ەلىمىزدىڭ ماڭىزدى استىق ٴوندىرىس بازاسى، ەنەرگيا ـ شيكىزات بازاسى، وسى زامانعى جابدىق جاساۋ جانە جوعارى تەحنيكا كاسىپ سالاسى بازاسى ٴارى جالپىلىق قاتىناس ـ تاسىمال تورابى، بۇكىل ەلدە اسا ماڭىزدى ورىنعا يە. پارتيا ورتالىق كوميتەتىنىڭ ورتا بولىك وڭىرلەردىڭ ەڭسە كوتەرۋىن ىلگەرىلەتۋ جونىندەگى جەلىلەس ساياسات ـ شارالارىنىڭ دايەكتىلەنۋىن، تياناقتانۋىن بۇلجىماي ويداعىداي يگەرىپ، جوعارى ساپالى دامۋدى ىلگەرىلەتۋدىڭ بىرىككەن كۇشىن قالىپتاستىرىپ، جۇڭگو ۇلگىسىندەگى وسىزامانداندىرۋ قۇرىلىسىندا ورتا بولىك وڭىرلەردىڭ ەڭسە كوتەرۋىنىڭ تىڭ تاراۋىن قۇلشىنا جازۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى ديڭ شۋەشياڭ اڭگىمە ماجىلىسىنە قاتىناستى.
اڭگىمە ماجىلىسىندە مەملەكەتتىك دامۋ جانە رەفورما كوميتەتىنىڭ مەڭگەرۋشىسى جىڭ شانجيە، سانشي ولكەلىك پارتكومنىڭ شۋجيى تاڭ دىڭجيە، انحۇي ولكەلىك پارتكومنىڭ شۋجيى حان جۇن، جياڭشي ولكەلىك پارتكومنىڭ شۋجيى يىن حۇڭ، حىنان ولكەلىك پارتكومنىڭ شۋجيى لوۋ ياڭشىڭ، حۋبەي ولكەلىك پارتكومنىڭ شۋجيى ۋاڭ مىڭحۇي، حۋنان ولكەلىك پارتكومنىڭ شۋجيى شىن شياۋميڭ ىلگەرىندى ـ كەيىندى سوزگە شىعىپ، ورتا بولىك وڭىرلەردىڭ ەڭسە كوتەرۋىن ىلگەرىلەتۋ جونىندە قىزمەت احۋالىنان مالىمەت بەردى، ۇسىنىس ـ پىكىرلەرىن ورتاعا قويدى.
كوپشىلىكتىڭ ٴسوزىن تىڭداعاننان كەيىن، شي جينپيڭ ماڭىزدى ٴسوز سويلەدى. ول بىلاي دەپ اتاپ كورسەتتى: الدىڭعى رەتكى ورتا بولىك وڭىرلەردىڭ ەڭسە كوتەرۋىن ىلگەرىلەتۋ اڭگىمە ٴماجىلىسى اشىلعان 5 جىلدان بەرى، ورتا بولىك وڭىرلەردىڭ ەكونوميكاسى جالپى تۇلعالىق جاقتان ورنىقتى بولىپ، جاڭالىق اشا دامۋ قوزعاۋشى قۋاتى ۇزدىكسىز كۇشەيىپ، كاسىپ سالاسى نەگىزى كورنەكتى جاقسارىپ، رەفورما جاساۋ، ەسىك اشۋ جاعىندا تىڭ قادام تاستالىپ، قوعامدىق ىستەر جاپپاي دامىپ، حالىقتىڭ تۇرمىس ورەسى ۇزدىكسىز جوعارىلاپ، جاسىل، تومەن كومىر قىشقىل گازدى بولۋعا قاراي تيبىن وزگەرتۋ قادامى جەدەلدەپ، ورتا بولىك وڭىرلەردىڭ دامۋى اناعۇرلىم بيىك باستاماعا كوتەرىلدى. سونىمەن بىرگە ورتا بولىك وڭىرلەردىڭ ەڭسە كوتەرۋىن ىلگەرىلەتۋ ٴالى دە كوپتەگەن قيىنشىلىقتار مەن سىن ـ سايىستارعا ٴدوپ كەلىپ وتىرعاندىعىن، شىن مانىندە زەرتتەپ شەشۋ كەرەك ەكەندىگىن كورە ٴبىلۋىمىز كەرەك.
شي جينپيڭ بىلاي دەپ باسا دارىپتەدى: عىلىم ـ تەحنيكادا جاڭالىق اشۋ ارقىلى كاسىپ سالاسىندا جاڭالىق اشۋعا جەتەكشىلىك ەتىپ، جاڭا ساپالى وندىرگىش كۇشتەردى بەلسەنە جەتىلدىرۋ جانە دامىتۋ كەرەك. ناقتى تۇلعالىق ەكونوميكا سىندى نەگىزدى تياناق ەتىپ، وزىق جاساۋ كاسىبىن زورايتىپ، كۇشەيتىپ، جاڭاشا ونەركاسىپتەندىرۋدى بەلسەنە ىلگەرىلەتىپ، ٴداستۇرلى كاسىپ سالالارىن جاڭالاپ، دەڭگەيىن كوتەرىپ، جاڭادان گۇلدەنگەن كاسىپ سالالارىن جەتىلدىرىپ، زورايتىپ، بولاشاق كاسىپ سالالارىن العا ٴوتىپ ورنالاستىرىپ، قۇرىپ، وزىق جاساۋ كاسىبىن تىرەك ەتكەن وسىزاماندانعان كاسىپ سالاسى جۇيەسىن جەدەل قۇرۋ كەرەك. عىلىم ـ تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭدەي توعىسۋىنا اناعۇرلىم ٴمان بەرىپ، كەلەلى عىلىم ـ تەحنيكادان قامال الۋدى كۇشەيتىپ، كاسىپ سالاسىندا جاڭالىق اشا دامۋدىڭ تەحنيكالىق تىرەگىن، قابىلەتىن كۇشەيتۋ كەرەك. كاسىپورىننىڭ جاڭالىق اشۋداعى تۇلعالىق ورنىن كۇشەيتىپ، جوعارعى، تومەنگى بۋىندار تىعىز سەلبەسكەن جاڭالىق اشۋ بىرىككەن تۇلعاسىن قالىپتاستىرىپ، ٴوندىرۋ، وقىتۋ، زەرتتەۋ توعىسقان جاڭالىق اشۋدى جەبەپ، عىلىم ـ تەحنيكا جەتىستىكتەرىنىڭ رەال وندىرگىش كۇشكە اينالۋىن جەدەلدەتۋ كەرەك. جاساۋ كاسىبىندەگى كەلەلى تەحنيكالاردى جاڭالاۋ، دەڭگەيىن كوتەرۋدى جانە زور كولەمدە جابدىقتاردى جاڭالاۋ ينجەنەرياسىن ىشكەرىلەي اتقارىپ، جاساۋ كاسىبىنىڭ وزىقتانىپ، زەردەلىلەنىپ، جاسىلدانىپ دامۋىن ىلگەرىلەتىپ، ٴداستۇرلى كاسىپ سالالارىنىڭ جاڭا تىرشىلىك تىنىسىن، ومىرشەڭدىك كۇشىن قاۋلاتۋ كەرەك.
شي جينپيڭ بىلاي دەپ اتاپ كورسەتتى: باسقا كەلەلى دامۋ ستراتەگيالارىمەن ۇشتاستىرۋدى كۇشەيتىپ، جاڭا دامۋ ارناسىمەن اناعۇرلىم ويداعىداي توعىسۋ جانە وعان تىرەك بولۋ كەرەك. بەيجيڭ _ تيانجين _ حىبەي، چاڭجياڭ اتىراۋى، گۋاڭدۇڭ _ شياڭگاڭ _ اۋمىن ۇلكەن شىعاناق رايونىمەن تەرەڭ ٴتۇيىلىستىرۋدى كۇشەيتىپ، چاڭجياڭ ەكونوميكالىق بەلدەۋىن دامىتۋمەن، حۋاڭحى وزەنى الابىنىڭ ەكولوگياسىن قورعاۋمەن جانە جوعارى ساپالى دامىتۋمەن توعىستىرىپ بىرلەسە قيمىلداۋدى كۇشەيتۋ كەرەك. كاسىپ سالالارىنىڭ ساتىلى تۇردە ويىسۋىن ٴتارتىپتى قابىلداپ، كاسىپ سالالارىنىڭ ورنالاسىمىن ساپالىلاندىرۋ كەرەك. وسىزاماندانعان قاتىناس نەگىزدىك قۇرىلعىلارى جۇيەسى قۇرىلىسىن كۇشەيتىپ، ورتا بولىك وڭىرلەردىڭ ۇلكەن ارنالىق جاعدايىن كۇشەيتۋ كەرەك. ٴوڭىر ىشىندە، ولكەلەر ارا سەلبەستىك مەحانيزمىن ورناتىپ، اقاۋسىزداندىرىپ، ٴوڭىردىڭ سايكەستى دامۋ ورەسىن جوعارىلاتۋ كەرەك. چاڭجياڭنىڭ ورتا اعارىنداعى قالالار شوعىرى مەن ورتا جازىقتاعى قالالار شوعىرىنىڭ دامۋىن زور كۇشپەن جەبەپ، قالا شەڭبەرلەرى اراسىنداعى سايكەستى بىرلەسە قيمىلداۋدى كۇشەيتىپ، توڭىرەگىندەگى وڭىرلەردىڭ دامۋىنا اناعۇرلىم ويداعىداي ىقپال جاساۋ، جەتەكشىلىك ەتۋ كەرەك.
شي جينپيڭ بىلاي دەپ باسا دارىپتەدى: تەرەڭ قاتپارلى رەفورما جاساۋ مەن جوعارى دەڭگەيدەگى ەسىك اشۋدى ٴبىر تۇتاس جوسپارلاپ ىلگەرىلەتىپ، اناعۇرلىم باسەكەلىك قۋاتقا يە ىشكى قۇرلىقتىق ەسىك اشۋ بيىگىن ۇزدىكسىز تۇلعالاۋ كەرەك. فاكتورلاردى بازارلاندىرۋ رەفورماسىن تەرەڭدەتىپ، بازار شارۋاشىلىعى نەگىزگى ٴتۇزىمىن كەمەلدەندىرىپ، جەرگىلىكتى قورعامپازدىق ارەكەتتەرىن جاپپاي اداقتاپ جانە تۇزەتىپ، ٴتۇرلى وندىرگىش كۇش فاكتورلارىنىڭ ٴوڭىر اتتاپ ۇيلەسىمدى اۋىسۋى مەن ساپالى ورنالاسۋىن ىلگەرىلەتىپ، بۇكىل ەل بويىنشا بىرلىككە كەلگەن ٴىرى بازار قۇرىلىسىنا اناعۇرلىم ويداعىداي قاتىناسۋ كەرەك. تۇزىمدىك ەسىك اشۋدى ورنىقتى كەڭەيتىپ، ”ٴبىر بەلدەۋ، ٴبىر جولدى“ بىرگە قۇرۋمەن تەرەڭ توعىسىپ، جاڭا ازيا _ ەۆروپا ۇلى قۇرلىق كوپىرىمەن، باتىس بولىك قۇرلىق ـ تەڭىز جاڭا ارناسىمەن ىرىقتى تۇردە ٴتۇيىلىسىپ، ەركىن ساۋدا سىناق رايونىن جوعارى ولشەممەن قۇرىپ، اناعۇرلىم كوپ جوعارى ىقپالعا يە سىرتقا ەسىك اشۋ سەلبەستىك تۇعىرىن قالىپتاستىرىپ، ەل ٴىشى، حالىقارا سىندى قوس اينالىمدى ۇلاستىرۋ جاعىندا اناعۇرلىم زور رول اتقارۋ كەرەك. بازارلانعان، زاڭمەن باسقارىلاتىن، حالىقارالانعان شارۋاشىلىق ـ ساۋدا ورتاسىن قۇرۋدى كۇشەيتىپ، ەل ٴىشى ـ سىرتىنداعى فاكتورلار بايلىعىن باۋراۋ قۋاتىن ارتتىرۋ كەرەك. ”ەكىدەن استە اۋىتقىماۋعا“ تاباندى بولىپ، مەملەكەت مەنشىگىندەگى كاسىپورىنداردىڭ كۇشەيۋىن، ساپالىلانۋىن، زورايۋىن قولداپ، حالىقتىق كاسىپورىنداردىڭ دامۋ ورتاسىن اناعۇرلىم ساپالىلاندىرۋ كەرەك.
شي جينپيڭ بىلاي دەپ اتاپ كورسەتتى: ەكولوگيالىق ورتانى قورعاۋدى جانە جاسىل، تومەن كومىر قىشقىل گازدى دامۋدى سايكەستى ىلگەرىلەتىپ، كورىكتى ورتا بولىك قۇرۋدى جەدەلدەتۋ كەرەك. لاستانۋدان ساقتانۋ جانە ونى وڭاۋدان قامال الۋ شايقاسىن ۇزدىكسىز ىشكەرىلەي ويداعىداي جۇرگىزىپ، ۇلكەن وزەن ـ داريالاردىڭ جانە ماڭىزدى كولدەردىڭ ەكولوگيالىق ورتاسىن جۇيەلى وڭاۋدى، جان ـ جاقتى وڭاۋدى، سايكەستى وڭاۋدى كۇشەيتىپ، قالا ـ قالاشىقتارداعى تۇرمىستىق لاس سۋدى جيناۋ جانە ٴبىر جاقتى ەتۋ قۇرىلعىلارىنىڭ ولقىلىقتارىن جەدەل تولىقتاۋ كەرەك. كاسىپ سالاسى، ەنەرگيا، قاتىناس ـ تاسىمال قۇرىلىمىنىڭ جاسىل، تومەن كومىر قىشقىل گازدى تيپ وزگەرتۋىن ىلگەرىلەتىپ، جاسىل، تومەن كومىر قىشقىل گازدى كاسىپ سالالارىن جەدەل جەتىلدىرىپ، زورايتىپ، بايلىقتان ۇنەمدى، شوعىرلى، قايتالامالى پايدالانۋدى كۇشەيتۋ كەرەك. الاپتاردىڭ ەندىك باعىتتاعى ەكولوگياسىن قورعاۋ بويىنشا تولەم بەرۋ مەحانيزمى مەن ەكولوگيالىق ونىمدەردىڭ قۇنىن جۇزەگە اسىرۋ مەحانيزمىن كەمەلدەندىرىپ، كاسىپ سالاسىنىڭ ەكولوگيالانۋى مەن ەكولوگيانىڭ كاسىپ سالالانۋىن ىلگەرىلەتۋ كەرەك.
شي جينپيڭ بىلاي دەپ باسا دارىپتەدى: قالا مەن اۋىلدىڭ توعىسپالى دامۋىنا تاباندى بولىپ، اۋىل ـ قىستاقتى جاپپاي گۇلدەندىرۋدى تىڭعىلىقتى ىلگەرىلەتۋ كەرەك. اۋدان ورتالىقتارىن ماڭىزدى دانەكەر ەتكەن جاڭاشا قالا ـ قالاشىقتانۋ قۇرىلىسىن ىلگەرىلەتىپ، قالا مەن اۋىل اراسىندا الەۋمەتتىك بايلىقتىڭ بىركەلكى ورنالاستىرىلۋى مەن ٴوندىرىس فاكتورلارىنىڭ ەركىن اۋىسۋىن ىلگەرىلەتىپ، قالالاردىڭ نەگىزدىك قۇرىلعىلارى مەن الەۋمەتتىك قىزمەت وتەۋىنىڭ اۋىل ـ قىستاققا قاراي كەڭەيۋىن جەبەۋ كەرەك. اۋىل ـ قىستاق نەگىزدىك قۇرىلعىلارىن ونان ارى جاقسارتىپ، اۋىل ـ قىستاق ورتاسىن وڭاۋدى كۇشەيتىپ، اۋىل شارۋاشىلىعىنىڭ ۇيلەسىمدى كولەمدەنگەن تيجاراتىن ىلگەرىلەتىپ، 1 ـ، 2 ـ، 3 ـ كاسىپتەردىڭ توعىسپالى دامۋىن جەبەۋ كەرەك. اۋىل ـ قىستاق رەفورماسىن ونان ارى تەرەڭدەتىپ، اۋىل شارۋاشىلىعىن كۇشەيتۋ، اۋىل ـ قىستاققا تيىمدىلىك جاساۋ، حالىقتىڭ بايۋىن قولداۋ ٴتۇزىمىن كەمەلدەندىرىپ، اۋىل شارۋاشىلىعىنىڭ، اۋىل ـ قىستاقتىڭ دامۋ ومىرشەڭدىك كۇشىن تولىق تاسقىنداتۋ كەرەك. اۋدان ٴوڭىرى ەكونوميكاسىن كۇش سالا دامىتىپ، جاڭا ارتۋ ٴتۇيىنىن قالىپتاستىرۋ كەرەك. توڭكەرىستىك بايىرعى رايوندار مەن دامۋى كەنجە اۋدانداردىڭ (قالا، رايون) گۇلدەنۋىنە، دامۋىنا ايرىقشا ٴمان بەرىپ، الەۋمەتتىك قىزمەت وتەۋدەگى ولقىلىقتاردى تولىقتاپ، ەرەكشەلىككە يە كاسىپ سالالارىن دامىتىپ، زورايتىپ، ىشكى دامۋ قوزعاۋشى كۇشىن ارتتىرۋ كەرەك. قايتالاي كەدەيلەسۋدەن ساقتانۋدى قاداعالاۋ جانە كومەكتەسۋ ـ سۇيەمەلدەۋ مەحانيزمىن اقاۋسىزداندىرىپ، كولەمدى قايتالاي كەدەيلەسۋدىڭ تۋىلۋىنان ساقتانۋ كەرەك. اۋىل ـ قىستاق مادەنيەتىن گۇلدەندىرۋدى كۇش سالا جەبەپ، ەسكى سالت ـ سانانى وزگەرتۋدى ىلگەرىلەتۋ كەرەك. پارتيا ۇيىمى باسشىلىعىنداعى ٴوزىن ـ ٴوزى باسقارۋ، زاڭمەن باسقارۋ، مورالمەن باسقارۋ ٴوزارا ۇشتاسقان نەگىزگى ساتى باسقارۋ جۇيەسىن اقاۋسىزداندىرىپ، جاڭا داۋىردەگى ”فىڭچياۋ تاجىريبەسىنە“ تاباندى بولىپ جانە ونى دامىتىپ، قارا كۇشتەردى الاستاۋدى، سۇرقيا كۇشتەردى جويۋدى ۇدايىلاندىرۋدى جۇزەگە اسىرىپ، بەلسەندى، اقاۋسىز قوعامدىق ەكولوگيا قالىپتاستىرۋ كەرەك.
شي جينپيڭ بىلاي دەپ اتاپ كورسەتتى: جوعارى ساپالى دامۋ مەن جوعارى دەڭگەيلى حاۋىپسىزدىكتىڭ ٴبىرىن ـ ٴبىرى جەبەۋىنە تاباندى بولىپ، استىق، ەنەرگيا، بايلىق حاۋىپسىزدىگىن قامتاماسىز ەتۋ قابىلەتىن قۇلشىنا جوعارىلاتۋ كەرەك. استىق وندىرىسىندەگى يقۋاتتىق رايون، ماڭىزدى اۋىل شارۋاشىلىق ونىمدەرىن ٴوندىرۋ، قورعاۋ رايونى جانە ەرەكشەلىككە يە اۋىل شارۋاشىلىق ونىمدەرى ابزال رايونى قۇرىلىسىن جوعارى ساپامەن ىلگەرىلەتىپ، جاسىل اۋىل شارۋاشىلىق ونىمدەرىن ٴوندىرۋ، وڭدەۋ، قامداۋ بازالارىنان ٴبىر توبىن قۇرىپ، استىق سياقتى ماڭىزدى اۋىل شارۋاشىلىق ونىمدەرىمەن ورنىقتى، حاۋىپسىز قامداۋعا شىنايى كەپىلدىك ەتۋ كەرەك. كومىر، سيرەك كەزدەسەتىن جەر ەلەمەنتتەر سياقتى بايلىقتاردى اشۋ، پايدالانۋ دەڭگەيىن ونان ارى جوعارىلاتىپ، كومىر سياقتى قازىندى ەنەرگيالارمەن ەڭ تومەنگى شەكتەن تۇسىرمەي قامتاماسىزداندىرۋ قابىلەتىن كۇشەيتىپ، جاڭاشا ەنەرگيا جۇيەسىن جەدەل قۇرىپ، ٴداستۇرلى ەنەرگيا جانە جاڭا ەنەرگيا سىندى كوپ ەنەرگيانىڭ ٴبىرىن ـ ٴبىرى تولىقتاۋىنا، ىشكەرىلەي توعىسۋىنا ٴمان بەرۋ كەرەك.
شي جينپيڭ سوڭىندا بىلاي دەپ باسا دارىپتەدى: ورتالىقتىڭ وڭىرلەردىڭ سايكەستى دامۋىنا باسشىلىق ەتۋ گرۋپپاسى ٴبىر تۇتاس جوسپارلاپ سايكەستىرۋدى جانە قۋزاۋ ـ جەتەكشىلىك ەتۋدى كۇشەيتۋى، ورتالىقتىڭ قاتىستى تاراۋلارى قولداۋ تەبىنىن ارتتىرىپ، جاڭا داۋىردە ورتا بولىك وڭىرلەردىڭ ەڭسە كوتەرۋىن ىلگەرىلەتۋدىڭ ساياسات ـ شارالارىن اقىلداسىپ العا قويۋى كەرەك. جەرگىلىكتى پارتكومدار مەن ۇكىمەتتەر تۇلعالىق جاۋاپكەرشىلىكتى ارقالاپ، پارتيا ورتالىق كوميتەتىنىڭ شەشىمدەرىن، ورنالاستىرۋلارىن باتىل دايەكتىلەندىرىپ، ٴتۇيىندى قىزمەت مىندەتتەرىنىڭ، كەلەلى رەفورما ىستەرىنىڭ ناقتى تياناقتانۋىن ىلگەرىلەتۋى كەرەك. نەگىزگى تاقىرىپتىق تاربيەنىڭ جەتىستىكتەرىن بەكەمدەپ، كەڭەيتىپ، ادال، كىرشىكسىز، جاۋاپكەرشىلىك ارقالايتىن جوعارى ساپالى، ماماندانعان كادرلار قوسىنىن كۇش سالا سومداپ، باعالاۋ، ىنتالاندىرۋ ٴتۇزىمىن ورناتىپ، كەمەلدەندىرىپ، كادرلاردى باتىلدىقپەن ٴورىس اشۋعا، جاۋاپكەرشىلىك ارقالاپ، ىسكەرلىك كورسەتۋگە ىنتالاندىرۋ كەرەك.
لي چياڭ سوزىندە مىنالاردى ٴبىلدىردى: باس شۋجي شي جينپيڭنىڭ ماڭىزدى ٴسوزىنىڭ رۋحىن مۇقيات ۇيرەنىپ، ٴتۇسىنىپ، ىشكەرىلەي دايەكتىلەندىرىپ، تياناقتاندىرىپ، ورتا بولىك وڭىرلەردى تۇتاس مەملەكەت كارتاسىنا، جاڭا دامۋ ارناسىن قالىپتاستىرۋعا تىرەك بولۋ جاعدايىنا قويا وتىرىپ ورنىن تۇراقتاندىرىپ، وي جۇگىرتىپ، وڭىرلىك ورىن باسىمدىعىن، بايلىق باسىمدىعىن دامۋ باسىمدىعىنا اينالدىرۋعا قۇلشىنۋ كەرەك. ورتا بولىكتەگى وڭىرلەر باسقا وڭىرلەردىڭ دامۋ ستراتەگياسىمەن ىرىقتىلىقپەن ٴتۇيىلىسىپ، شىعىس بولىكتەگى وڭىرلەردىڭ كاسىپ سالاسىنداعى جاڭالىق اشۋ بايلىعىن بەلسەنە ەنگىزىپ، باتىس بولىكتەگى وڭىرلەرگە ىقپال جاساۋ، جەتەكتەۋ رولىن كۇشەيتىپ، سىرتقا ەسىك اشۋ دەڭگەيىن جوعارىلاتۋى كەرەك. ارتىقشىلىقتاردى شىڭداپ، ولقىلىقتاردى تولىقتاۋعا كۇش سالىپ، جاڭاشا قالا ـ قالاشىقتاندىرۋ، جاسىل، تومەن كومىر قىشقىل گازدى دامۋ سياقتى جاقتاردا باسىمدىقتى ساۋلەلەندىرىپ، كومەسكى كۇشتى جارىققا شىعارىپ، ٴوڭىردىڭ ىشكى سەلبەستىكتى كۇشەيتۋىن، جالپى تۇلعالىق جاقتان بىرلەسە قيمىلداۋىن ىلگەرىلەتىپ، ورتا بولىك وڭىرلەردىڭ جالپى تۇلعالىق ناقتى قۋاتى مەن باسەكەلىك قۋاتىن جوعارىلاتۋ كەرەك.
ديڭ شۋەشياڭ سوزىندە مىنالاردى ٴبىلدىردى: پارتيا 20 ـ قۇرىلتايىنىڭ رۋحىن جانە باس شۋجي شي جينپيڭنىڭ ماڭىزدى ٴسوزىنىڭ رۋحىن ىشكەرىلەي ۇيرەنىپ، دايەكتىلەندىرىپ، جوعارى ساپالى دامۋ تالابىمەن تىعىز بايلانىستىرىپ، ورتا بولىك وڭىرلەردىڭ ەڭسە كوتەرۋىن ىلگەرىلەتۋدە ۇزدىكسىز تىڭ ونىمدىلىككە قول جەتكىزۋ كەرەك. عىلىم ـ تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن كۇشەيتىپ، جەرگىلىكتى جاعدايعا قاراي جاڭا ساپالى وندىرگىش كۇشتەردى جەدەل دامىتۋ كەرەك. استىق، ەنەرگيا بايلىق حاۋىپسىزدىگىن قامتاماسىز ەتۋ قابىلەتىن كۇش سالا جوعارىلاتىپ، جوعارى ساپالى دامۋ مەن جوعارى دەڭگەيدەگى حاۋىپسىزدىكتىڭ ٴتيىمدى ىقپالداستىعىن جۇزەگە اسىرۋ كەرەك. مەملەكەت بويىنشا بىرلىككە كەلگەن ٴىرى بازار قۇرىلىسى مەن جوعارى دەڭگەيدەگى ەسىك اشۋ سەلبەستىگىن تەرەڭدەتىپ، دامۋدىڭ ىشكى قوزعاۋشى كۇشى مەن ومىرشەڭدىك كۇشىن ۇزدىكسىز كۇشەيتۋ كەرەك. ەكولوگيالىق ورتانى قورعاۋدى تاباندىلىقپەن مىقتى يگەرىپ، جوعارى ساپالى دامۋدىڭ جاسىل نەگىزگى ٴتۇسىن بەكەمدەۋ كەرەك.
لي گانجيە، حى ليفىڭ، ۋ جىڭلۇڭ، مۋ حۇڭ اڭگىمە ماجىلىسىنە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى جەرلەردەگى، قاتىستى كاسىپورىندارداعى جاۋاپتى جولداستار اڭگىمە ماجىلىسىنە قاتىناستى.
