كورىكتى جۇڭگو قۇرىلىسىن جاپپاي ىلگەرىلەتىپ، تابيعي مونوپوليالىق بۋىنداردى باقىلاۋ - باسقارۋ ءتۇزىلىس - مەحانيزمىن اقاۋسىزداندىرۋ كەرەك

شي جينپيڭ ورتالىق كوميتەت رەفورمانى جاپپاي تەرەڭدەتۋ كوميتەتىنىڭ 3 - رەتكى ءماجىلىسىن باسقارىپ اشىپ، بىلاي دەپ باسا دارىپتەدى

كورىكتى جۇڭگو قۇرىلىسىن جاپپاي ىلگەرىلەتىپ، تابيعي مونوپوليالىق بۋىنداردى باقىلاۋ - باسقارۋ ءتۇزىلىس - مەحانيزمىن اقاۋسىزداندىرۋ كەرەك

لي چياڭ، ۋاڭ حۋنيڭ، ساي چي قاتىناستى

　　شينحۋا اگەنتتىگىنىڭ 11 - ايدىڭ 7 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى، ورتالىق كوميتەت رەفورمانى جاپپاي تەرەڭدەتۋ كوميتەتىنىڭ مەڭگەرۋشىسى شي جينپيڭ 11 - ايدىڭ 7 - كۇنى تۇستەن كەيىن ورتالىق كوميتەت رەفورمانى جاپپاي تەرەڭدەتۋ كوميتەتىنىڭ 3 - رەتكى ءماجىلىسىن باسقارىپ اشتى، ءماجىلىس «كورىكتى جۇڭگو قۇرىلىسىن جاپپاي ىلگەرىلەتۋ جونىندەگى پىكىردى»، «مەملەكەت مەنشىگىندەگى مال - مۇلىك تيجاراتى مەجە ەسەپ ءتۇزىمىن ونان ارى كەمەلدەندىرۋ جونىندەگى پىكىردى»، «تابيعي مونوپوليالىق بۋىنداردى باقىلاۋ - باسقارۋ ءتۇزىلىس - مەحانيزمىن اقاۋسىزداندىرۋ جونىندەگى اتقارۋ پىكىرىن»، «مامانداردىڭ الەۋمەتتىك شەشىم جاساۋعا ات سالىسۋ ارەكەتىن باقىلاۋ - باسقارۋدى كۇشەيتۋ جونىندەگى جەتەكشى پىكىردى»، «ەكولوگيالىق ورتانى اۋماقتارعا ءبولىپ باسقارۋ - تىزگىندەۋدى كۇشەيتۋ جونىندەگى جەتەكشى پىكىردى» قاراپ ماقۇلدادى.

　　شي جينپيڭ ءماجىلىستى باسقارعاندا بىلاي دەپ باسا دارىپتەدى: كورىكتى جۇڭگو قۇرۋ − جاپپاي سوتسياليستىك وسىزاماندانعان مەملەكەت قۇرۋدىڭ ماڭىزدى نىساناسى، 2035 - جىلى كورىكتى جۇڭگو نىساناسىن نەگىزىنەن جۇزەگە اسىرۋدى كوزدەپ، لاستانۋدان ساقتانۋ جانە ونى جونگە سالۋدان قامال الۋدى ۇزدىكسىز ىشكەرىلەي ىلگەرىلەتىپ، دامۋ تاسىلىندە جاسىل بولۋعا ويىسۋدى جەدەلدەتىپ، ەكولوگيالىق جۇيەنىڭ الۋان تۇرلىلىگىن، ورنىقتىلىعىن، باياندىلىعىن جوعارىلاتىپ، حاۋىپسىزدىك تومەنگى شەگىن بەرىك ساقتاپ، قامتاماسىزداندىرۋ جۇيەسىن اقاۋسىزداندىرىپ، ەكولوگيالىق ورتانىڭ تۇبىرىنەن جاقسارۋىن جۇزەگە اسىرۋدى ىلگەرىلەتۋ كەرەك. مەملەكەت مەنشىگىندەگى مال - مۇلىك تيجاراتى مەجە ەسەبى − مەملەكەت مەجە ەسەپ جۇيەسىنىڭ ماڭىزدى قۇرامداس بولىگى، مەملەكەت مەنشىگىندەگى مال - مۇلىك تيجاراتى مەجە ەسەپ ءتۇزىمىن كەمەلدەندىرىپ، اتقارۋ كولەمىن كەڭەيتىپ، يقۋاتىن، رولىن كۇشەيتىپ، كىرىس - شىعىستى باسقارۋدى اقاۋسىزداندىرىپ، قارجىنىڭ ونىمدىلىگىن جوعارىلاتۋ كەرەك. تابيعي مونوپوليالىق بۋىنداردى باقىلاۋ - باسقارۋ ءتۇزىلىس - مەحانيزمىن اقاۋسىزداندىرىپ، ءتۇزىم جوباسىن كۇشەيتىپ، باقىلاۋ - باسقارۋ جۇيەسىن كەمەلدەندىرىپ، باقىلاۋ - باسقارۋ قابىلەتىن جوعارىلاتىپ، مەملەكەت مەنشىگىندەگى شارۋاشىلىقتىڭ تابيعي مونوپوليالىق بۋىنداردى تىزگىندەۋ قۋاتىن كۇشەيتىپ، وسىزاماندانعان نەگىزدىك قۇرىلعىلار جۇيەسىن قۇرۋدىڭ قاجەتىن اناعۇرلىم ويداعىداي قاناعاتتاندىرىپ، مەملەكەت حاۋىپسىزدىگىن اناعۇرلىم ويداعىداي قامتاماسىزداندىرۋ كەرەك. الەۋمەتتىك شەشىم جاساۋعا اناعۇرلىم ويداعىداي قىزمەت وتەۋدى جانە تىرەك بولۋدى تياناق ەتىپ، مامانداردىڭ الەۋمەتتىك شەشىم جاساۋعا ات سالىسۋ ارەكەتىن باقىلاۋ - باسقارۋدى كۇشەيتىپ، ءتۇزىلىس - مەحانيزمدى كەمەلدەندىرىپ، ءتارتىپتى، ولشەمدى جۇيەگە ءتۇسىرىپ، جالپى بارىستىق باسقارۋدى كۇشەيتىپ، اركىم ءوز تالانتىن ايگىلەيتىن، ومىرشەڭدىككە باي، سالتى دۇرىس، ستيلى پاك بولعان مامانداردىڭ الەۋمەتتىك شەشىم جاساۋعا ات سالىسۋ ورتاسىن قالىپتاستىرۋ كەرەك. ەكولوگيالىق ورتانى اۋماقتارعا ءبولىپ باسقارۋ - تىزگىندەۋ ەكولوگيالىق ورتا بويىنشا قاينارىنان ساقتانۋ جۇيەسىندە نەگىزدىك سيپاتتى رولعا يە، جوعارى دەڭگەيدە جوبالاۋدى كۇشەيتىپ، ءتۇزىم جۇيەسىن كەمەلدەندىرىپ، ەكولوگيا يقۋاتىن قامتاماسىزداندىرۋ مەن قورشاعان ورتا ساپاسىن جاقسارتۋدى نىسانا ەتىپ، ەكولوگيالىق ورتانى اۋماقتارعا ءبولىپ پارىقتاندىرا دالمە - ءدال باسقارۋ - تىزگىندەۋدى جۇزەگە اسىرۋدى ىلگەرىلەتۋ كەرەك.

　　جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى، ورتالىق كوميتەت رەفورمانى جاپپاي تەرەڭدەتۋ كوميتەتىنىڭ ورىنباسار مەڭگەرۋشىلەرى لي چياڭ، ۋاڭ حۋنيڭ، ساي چي ماجىلىسكە قاتىناستى.

　　ءماجىلىس مىنالاردى اتاپ كورسەتتى: پارتيا 18 - قۇرىلتايىنان بەرى ەلىمىزدىڭ ەكولوگيالىق وركەنيەت قۇرىلىسىندا نازاريادان امالياتقا دەيىن تاريحي سيپاتتى، بۇرىلىس سيپاتتى، جالپى جاعداي سيپاتتى وزگەرىس تۋىلدى، ەكونوميكانىڭ، قوعامنىڭ جوعارى ساپالى دامۋىنىڭ جاڭا قاجەتى، حالىق بۇقاراسىنىڭ ەكولوگيالىق ورتانىڭ جاقسارۋى جونىندەگى جاڭا تىلەگى بويىنشا، كورنەكتى ەكولوگيالىق ماسەلەلەردى شوعىرلى شەشۋ سەرپىنىن ارتتىرىپ، ەكولوگيالىق وركەنيەت ءتۇزىمى قۇرىلىسىن كۇش سالا ويداعىداي يگەرىپ، الدىمەن اتقارۋ، ىزدەنىس جاساۋ، ۇلگى كورسەتۋ، جەتەكتەۋ رولىن ويداعىداي ساۋلەلەندىرىپ، جالپى حالىقتىق ارەكەت ورىستەتىپ، ءىشىنارا بولىكتەر مەن جالپى جاعدايدىڭ سايكەسۋىن، ۇستىنەن وڭاۋ مەن تۇبىرىنەن وڭاۋدىڭ ساباقتاسۋىن، قازىرگى كەز بەن ۇزاق بولاشاقتىڭ ۇشتاسۋىن ىلگەرىلەتۋ كەرەك. ۇيىمدىق باسشىلىقتى كۇشەيتىپ، جەرگىلىكتى ورىننىڭ ءىس جۇزىندىگىمەن ۇشتاستىرىپ تۇرگە ايىرىپ شارا اتقارىپ، اۋماقتارعا ءبولىپ جونگە سالىپ، ەگجەي - تەگجەيلىلەندىرە قۇرىپ، ناقتى ارەكەتتەر ارقىلى كورىكتى جۇڭگو نىساناسىنىڭ بىرتىندەپ رەالدىققا اينالۋىن ىلگەرىلەتۋ كەرەك.

　　ءماجىلىس مىنالاردى باسا دارىپتەدى: مەجە ەسەپ قىزمەتى پارتيا مەن مەملەكەتتىڭ ەركىن بەينەلەيدى، پارتيانىڭ باسشىلىعىنا تاباندى بولىپ جانە ونى كۇشەيتىپ، كۇشتى شوعىرلاندىرا وتىرىپ ءىرى ءىس تىندىراتىن ءتۇزىم ارتىقشىلىعىن ساۋلەلەندىرىپ، نازاردى مەملەكەت مەنشىگىندەگى شارۋاشىلىقتىڭ ورنالاسىمىن ساپالىلاندىرۋدى جانە قۇرىلىمىن رەتتەۋدى ىلگەرىلەتۋگە شوعىرلاندىرىپ، مەملەكەت مەنشىگىندەگى مال - مۇلىكتىڭ مەملەكەت حاۋىپسىزدىگىنە، حالىق شارۋاشىلىعىنىڭ جان جۇيەسىنە ساياتىن ماڭىزدى كاسىپتەرگە جانە شەشۋشى سالالارعا شوعىرلانۋىن، مەملەكەت جوسپارى مەن حالىق تۇرمىسىنا ساياتىن الەۋمەتتىك قىزمەت وتەۋ، شۇعىل جاعدايعا توتەپ بەرۋ قابىلەتى، الەۋمەتتىك يگىلىك سالالارى سياقتىلارعا شوعىرلانۋىن، بولجامپازدىق، ستراتەگيالىق جاڭادان گۇلدەنگەن كاسىپ سالالارىنا شوعىرلانۋىن ىلگەرىلەتىپ، جاڭا دامۋ ارناسىن قۇرۋعا، جوعارى ساپالى دامۋدى ىلگەرىلەتۋگە اناعۇرلىم ويداعىداي قىزمەت وتەۋ كەرەك. ”ۇنەمشىل بولۋ“ يدەياسىنا باستان - اياق تاباندى بولىپ، قازىنا بايلىعىن عىلمي ءبىر تۇتاس جوسپارلاۋ مەن ۇيلەسىمدى ۇلەستىرۋدى كۇشەيتىپ، مەجە ەسەپ كىرىس - شىعىس كولەمىن ۇيلەسىمدى تۇراقتاندىرىپ، حالىق تۇرمىسىن قامتاماسىزداندىرۋدى جانە جاقسارتۋدى ءبىر تۇتاس جوسپارلاپ، استا - توك، ىسىراپشىلدىق سياقتى جايتتەردى تيۋ كەرەك. مەجە ەسەپتى زاڭ بويىنشا تۇراقتاندىرۋعا تاباندى بولىپ، مەجە ەسەپ تەجەمىن كۇشەيتىپ، مەجە ەسەپ ونىمدىلىگىن باسقارۋدى ىلگەرىلەتىپ، حالىق قۇرىلتايىنىڭ باقىلاۋ رولىن ساۋلەلەندىرۋ كەرەك.

　　ءماجىلىس مىنالاردى اتاپ كورسەتتى: ەلەكتر قۋاتى، مۇناي - تابيعي گاز، تەمىر جول سياقتى كاسىپتەردىڭ جەلى بۋىندارىندا تابيعي مونوپوليالىق سيپات بار، ولار − ەلىمىزدىڭ مەملەكەت مەنشىگىندەگى شارۋاشىلىق ورنالاسىمىنىڭ ماڭىزدى سالاسى. باقىلاۋ - باسقارۋ ءتۇزىمى جۇيەسىن اقاۋسىزداندىرىپ، باقىلاۋ - باسقارۋ قابىلەتى قۇرىلىسىن كۇشەيتىپ، تابيعي مونوپوليالىق بۋىندارداعى مەملەكەتتىڭ كەلەلى ستراتەگياسى مەن جوبا - مىندەتتەرىن تياناقتاندىرۋ، مەملەكەت حاۋىپسىزدىگى جاۋاپكەرشىلىگىن اتقارۋ، قوعامدىق جاۋاپكەرشىلىكتى اتقارۋ، تيجارات كولەمى مەن تيجارات ارەكەتى سياقتى جاقتارداعى باقىلاۋ - باسقارۋدى ءتۇيىندى تۇردە كۇشەيتىپ، تابيعي مونوپوليالىق بۋىنداردا تۇرعان كاسىپورىنداردىڭ نازاردى نەگىزگى جاۋاپكەرشىلىككە، نەگىزگى كاسىپكە شوعىرلاندىرۋىن ىلگەرىلەتىپ، مەملەكەت مەنشىگىندەگى مال - مۇلىكتىڭ تور تۇرىندەگى نەگىزدىك قۇرىلعىلارعا ۇسىنىلىمىن ارتتىرىپ، تىرەكتىك تور جەلىسىنىڭ حاۋىپسىزدىگىن، سەنىمدىلىگىن جوعارىلاتۋ كەرەك. تابيعي مونوپوليالىق بۋىنداردا مونوپوليالىق كاسىپتەر مەن باسەكەلىك كاسىپتەردىڭ ورىستەتىلۋ كولەمىنە باقىلاۋ - باسقارۋ جۇرگىزىپ، مونوپوليالىق باسىمدىقتان پايدالانىپ جوعارعى، تومەنگى جاعىنداعى باسەكەلىك بۋىندارعا ۇزارۋىنان ساقتانۋ كەرەك.

　　ءماجىلىس مىنالاردى باسا دارىپتەدى: ماماندار − رەفورمانى، دامۋدى ىلگەرىلەتەتىن ماڭىزدى پاراسات بايلىعى، ماماندار قوسىنىن ساياسي جاقتان جەتەكتەۋدى كۇشەيتىپ، مامانداردىڭ الەۋمەتتىك شەشىم جاساۋعا ات سالىسۋىن ساياساتتىق جاقتان قامتاماسىزداندىرۋ جانە ىنتالاندىرۋ شاراسىن كەمەلدەندىرىپ، مامانداردىڭ بەلسەندىلىگى مەن ىرىقتىلىعىن تولىق جۇمىلدىرۋ كەرەك. مامانداردى تاڭداۋدان باعالاۋعا، باقىلاۋعا دەيىنگى جالپى بارىستىق، جالپى تىزبەكتىك باسقارۋ ءتۇزىمى جۇيەسىن ورناتىپ، اقاۋسىزداندىرىپ، مامانداردىڭ الەۋمەتتىك شەشىم جاساۋعا ات سالىسۋىنىڭ تۇزىمدىك ولشەمىن سالاعا، تۇرگە ءبولىپ كەمەلدەندىرىپ، مامانداردىڭ الەۋمەتتىك شەشىم جاساۋعا ات سالىسۋ قىزمەت جاۋاپكەرشىلىگىن تۇراقتاندىرىپ، ۇقىق - مىندەتى جانە قاتىستى جاۋاپكەرشىلىگى سياقتىلاردى ايقىنداپ، وسى مامانداردى پارتيا مەن ۇكىمەتتىڭ عىلمي شەشىم جاساۋىنا بەلسەندى تۇردە ۇسىنىس قويىپ، كەڭەس بەرۋگە جىگەرلەندىرۋ كەرەك.

　　ءماجىلىس مىنالاردى اتاپ كورسەتتى: ەكولوگيالىق ورتانى اۋماقتارعا ءبولىپ باسقارۋ - تىزگىندەۋدى كۇشەيتىپ، نەگىزگى تۇلعالى يقۋاتتىق اۋماق ستراتەگياسىن تياناقتاندىرىپ، مەملەكەت جەرى كەڭىستىگىن جوبالاۋ مەن پايدالانۋدى باسقارۋدى ءتۇيىلىستىرىپ، نازاردى وڭىرلىك، الاپتىق كورنەكتى ەكولوگيالىق ورتا ماسەلەسىنە شوعىرلاندىرىپ، ەكولوگيالىق ورتانى اۋماقتارعا ءبولىپ باسقارۋ - تىزگىندەۋ جوباسىن كەمەلدەندىرىپ، ماسەلەنى پارىقتاۋدان شەشۋ جوباسىنا دەيىنگى اۋماقتارعا، تۇرلەرگە ءبولىپ باسقارۋ - تىزگىندەۋ شاراسىن ورناتۋ كەرەك. جەرگىلىكتى ءار دارەجەلى پارتكومدار مەن ۇكىمەتتەردىڭ تۇلعالىق جاۋاپكەرشىلىگىن تياناقتاندىرىپ، ەكولوگيالىق ورتانى اۋماقتارعا ءبولىپ باسقارۋ - تىزگىندەۋ جەتىستىكتەرىنەن پايدالانىپ، مەملەكەت پەن جەرگىلىكتى ورىننىڭ كەلەلى دامۋ ستراتەگياسىنىڭ اتقارىلۋىنا قىزمەت وتەپ، ءتۇرلى اشۋ، قورعاۋ، قۇرۋ قيمىلدارىنا عىلمي جەتەكشىلىك ەتۋ كەرەك.

　　ورتالىق كوميتەت رەفورمانى جاپپاي تەرەڭدەتۋ كوميتەتىنىڭ مۇشەلەرى ماجىلىسكە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار ماجىلىسكە سىرتتاي قاتىناستى.