قۇرىلىس جۇرگىزۋدىڭ التىن مەزگىلىن مىقتى يگەرىپ، نىسان قۇرىلىسىن ونان ارى جەدەلدەتتى
− قوس مەرەكە دەمالىسى مەزگىلىندەگى شينجياڭنىڭ ءتۇيىندى نىسان قۇرىلىستارىنا نازار
انار بۇلت \ شينجياڭ گازەتىنىڭ ءتىلشىسى شى شين
جۇڭچيۋ، مەملەكەت مەرەكەسى سىندى قوس مەرەكە دەمالىسى كەزىندە شينجياڭداعى كوپتەگەن ءتۇيىندى نىسانداردىڭ قۇرىلىسشىلارى كۇز ماۋسىمىنداعى قۇرىلىس جۇرگىزۋدىڭ التىن مەزگىلىن بەلسەنە مىقتى يگەرىپ، نىسانداردىڭ ەرتە سالىنۋىن، ەرتە ىسكە قوسىلۋىن بار كۇشپەن ىلگەرىلەتىپ، قاجىرلى ەڭبەكتەرى جانە ماڭداي تەرلەرى ارقىلى مەرەكە اسەم كورىنىس قالىپتاستىردى.
10 - ايدىڭ 1 - كۇنى كۇن شايداي اشىق، جانعا جايلى كۇز سامالى ەسۋدە. داشىشيا سۋ يگىلىگى تورابى ينجەنەريا قۇرىلىسىنىڭ جۇمىس باسىندا 2000عا جۋىق قۇرىلىسشى توسپانى تىندىرۋ، ەلەكتر تاراتۋ زاۆود ءۇيىنىڭ قىسىمدى بولات ترۋباسىن ورناتۋ سياقتى قىزمەتتەرمەن قاربالاستاۋدا. داشىشيا سۋ يگىلىگى تورابى ينجەنەرياسى مەملەكەتتىڭ 172 سۋ ۇنەمدەۋ، سۋمەن قامداۋ كەلەلى سۋ يگىلىگى ينجەنەرياسىنىڭ ءبىرى، سۋارۋ، تاسقىننان ساقتانۋ، ەلەكتر تاراتۋ سياقتى جالپىلىق يقۋاتقا يە.
”ينجەنەرياعا قوسىلعان قارجىنىڭ جارتىسىنان كوبى تياناقتانىپ بولدى، ەلەكتر تاراتۋ زاۆود ءۇيىنىڭ سۋ استى قۇرىلىم قۇرىلىسىنىڭ تۇتاس لەنيا بويىنشا توبەسى جابىلدى، توسپانىڭ تىندىرىلعان بيىكتىگى 169 مەتر“. شينجياڭ گىجوۋبا داشىشيا سۋ يگىلىگى تورابى اشۋ شەكتى سەرىكتەستىگى ينجەنەريا باسقارۋ ءبولىمىنىڭ ورىنباسار باستىعى لي سۇڭلين بىلاي دەدى: مەجەمەن، 11 - ايدىڭ سوڭىندا قۇرىلىستىڭ نەگىزگى زاۆود ۇيلەرى سالىنىپ بولىپ، مەتال قۇرىلىمدى جانە ەلەكتر گەنەراتور اگراگاتتارىن ورناتۋ جۇمىسىنا كىرىسەمىز.
ۇستەمەلەپ جۇمىس ىستەپ قۇرىلىس ۋاقىتىن ۇتىپ، قايراتتى تاسقىنداتىپ، اياق الىستى جەدەلدەتتى. مەرەكە دەمالىسى كەزىندە جاقىندا قۇرىلىس باستاعان شينجياڭ 750 كيلوۆولتتىق تارىم اينالمالى تورى قۇرىلىسىنىڭ ەڭ سوڭعى ءبىر بۋىنى − حوتان − نيە − چەرشەن − چارقىلىق 750 كيلوۆولتتىق ەلەكتر جەتكىزۋ، كەرنەۋ وزگەرتۋ ينجەنەرياسىنىڭ جۇمىس باسىندا، نىسان باسقارۋشىلار مەن قۇرىلىس جۇرگىزۋشىلەر جۇمىس ورىندارىنان تاپجىلماي، كەزەكتەگى ءتيىمدى كليمات شارت - جاعدايىنان تولىق پايدالانا وتىرىپ، ينجەنەريا قۇرىلىسىن جەدەلدەتتى.
”قازىر قۇرىلىس جۇرگىزۋدىڭ التىن مەزگىلى، ءبىر ءسات تە بوساڭسۋعا بولمايدى، ءبىر كۇندى دە زايا جىبەرۋگە بولمايدى“. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى قۇرىلىس بولىمشە سەرىكتەستىگىنىڭ نىسان ديرەكتورى لي جۇن بىلاي دەدى: جەلى ينجەنەرياسى، نەگىزىنەن، حوتان ايماعى مەن بايىنعولين موڭعۇل اۆتونوميالى وبلىسىندا، جەلىنىڭ جارتىسىنان استامى قۇمدى ءشولدىڭ قويناۋىندا، ينجەنەريا قۇرىلىسى ماتەريال تاسىمالداۋ، تاعان شۇڭقىرىنىڭ وپىرىلۋى، سونداي - اق قازۋ سياقتى قيىن ماسەلەلەرگە ءدوپ كەلدى. بۇدان سىرت، ينجەنەريا جەلىسى بويىنداعى توراڭعى ورمانى كەڭ ءارى بىتىك وسكەن. توراڭعىنى قورعاۋ ءۇشىن، قۇرىلىس جۇرگىزۋشى جاق ىلگەرىندى - كەيىندى مۇنارانىڭ ورنىن جىلجىتۋ، ءىشىنارا جەلى جولدارىن انتەك رەتتەۋ، تەمىر مۇنارانىڭ بيىكتىگىن جوعارىلاتۋ سياقتى شارالاردى قولدانىپ، ەلەكتر تورى قۇرىلىسى مەن ەكولوگيالىق ورتانىڭ جاراسىمدى قاتار ءومىر ءسۇرۋىن جۇزەگە اسىرۋدى ىلگەرىلەتتى.
جياڭجۇنمياۋ − نوم تەمىر جولىنىڭ كوبەيتىپ سالىناتىن 2 - جەلى نىسانىندا 9 - ايدىڭ 28 - كۇنى جۇمىس باستاپ، قۇرىلىس جۇرگىزىلدى، سالىنىپ بولعاننان كەيىن كومىر سياقتى كوپ تۇتىنىلاتىن تاۋارلاردىڭ شينجياڭنان شىعۋىنداعى سولتۇستىك التىن ارناسىنا اينالادى.
”مەرەكەدەن بۇرىن قۇرىلىس جۇرگىزۋ جوسپارى، ادام ۇيىمداستىرۋ، زاتتىق ماتەريالداردى زاپاس ساقتاۋ سياقتى دەمالىس كەزىندە قۇرىلىس جۇرگىزۋ جونىندە جان - جاقتى، ەگجەي - تەگجەيلى ورنالاستىرۋ جاسالىپ، مەرەكە كەزىندە قۇرىلىستىڭ قارقىنىن باياۋلاتپاۋىنا، ينجەنەريانىڭ توقتاپ قالماۋىنا شىنايى كەپىلدىك ەتىلدى“، - دەدى شينجياڭ جياڭجۇنمياۋ − نوم تەمىر جولى شەكتى سەرىكتەستىگى ينجەنەريا ءبولىمىنىڭ ديرەكتورى گو يانچۇن.
گۇرىلدەگەن ماشينا داۋىستارى، دانەكەرلەۋدە شاشىراعان وت ۇشقىندارى، جىبەك جولى ەكونوميكالىق بەلدەۋى وزەكتى رايونى قاتىناس تورابى ورتالىعىنىڭ ماڭىزدى تىرەگى بولعان ءۇرىمجى اۋەجايىن كەڭەيتىپ سالۋ ينجەنەرياسىنىڭ جۇمىس باسىنان دا دابىرالى جۇمىس جۇرگىزۋ كورىنىسى مەن مۇندالادى.
نىسان بولىمىنە كىرگەندە، قابىرعاعا ىلىنگەن ”شايقاس جۇرگىزۋ كارتاسى“ ەرەكشە كوز تارتادى، نىساننىڭ ءاربىر قۇرىلىس مەرزىمىندەگى نىسانالارى بىردەن انىق كورىنەدى. جۇڭگو قۇرىلىس توبى شينجياڭ قۇرىلىس ينجەنەرياسى ءۇرىمجى اۋەجايىن كەڭەيتىپ سالۋ ينجەنەريا قاتىناس ورتالىعى نىسانىنىڭ ديرەكتورى ليۋ حاييان تانىستىرىپ بىلاي دەدى: قاتىناس ورتالىعى − جاساندى زەردە، ۇلكەن ساندى مالىمەت، بۇلتتىق ەسەپتەۋ، ينتەرنەت سياقتىلاردى ءبىر تۇلعالاندىرعان وسىزاماندانعان كولىك اۋىسۋ ورتالىعى. ينجەنەريا كولىك اۋىسۋ ورتالىعى مەن اشىق اۆتوكولىك توقتاتۋ قويماسى سىندى ەكى ۇلكەن رايوندى قامتيدى، جالپى قۇرىلىس كولەمى 340 مىڭ شارشى مەتر. قازىر ءدال نىساننان قامال الۋ مەزگىلى، 700دەن استام جۇمىسشى قوس مەرەكە دەمالىسىندا جۇمىس ورىندارىنان تاپجىلماي، وڭتۇستىك اۆتوكولىك قويماسى راشەتكاسىن ورناتۋ، سولتۇستىك اۆتوكولىك قويماسىنىڭ بولات قۇرىلىمدى ءدالىزىن سالۋ، كولىك اۋىسۋ ورتالىعىن اسەمدەپ اشەكەيلەۋ سياقتى جۇمىستاردى ىستەۋدە.
شينجياڭ مەديتسينا داشۋەسىنە قاراستى 8 - شيپاحانانىڭ الەۋمەتتىك دەنساۋلىق ساقتاۋ، قۇتقارۋ - ەمدەۋ ورتالىعى نىسانىنىڭ قۇرىلىس الاڭى دا قىزۋ دۋمانعا بولەندى. بۇل نىساننىڭ قۇرىلىس اۋماعى 110 مىڭ شارشى مەتردەن اسادى، جالپىلىق ىشكى اۋرۋلار ءبولىمى عيماراتى، جالپىلىق سىرتقى اۋرۋلار ءبولىمى عيماراتى، سونداي - اق امبولاتوريا، شۇعىل قۇتقارۋ عيماراتى قاتارلىلاردى قامتيدى. ”وسى حالىق تۇرمىسى نىسانىنىڭ ەرتەرەك سالىنىپ بولۋىنا شىنايى كەپىلدىك ەتۋ قالىڭ قۇرىلىسشىلاردىڭ ورتاق تىلەگى“. وسى نىساننىڭ ديرەكتورى شيان ۋيدىڭ تانىستىرۋىنشا، قازىر سىرتقى اۋرۋلار ءبولىمى عيماراتىنىڭ 12 - ، 13 - قاباتىنا بولات قۇرىلىم ورناتىلۋدا، امبولاتوريا عيماراتى قالانبا تامىنىڭ 2 - رەتكى قۇرىلىمى اياقتاۋ الدىندا تۇر، ىشكى اۋرۋلار ءبولىمى، سىرتقى اۋرۋلار ءبولىمى عيماراتى قالانبا تامىنىڭ 2 - رەتكى قۇرىلىمى جانە ورتتەن ساقتانۋ بور بوياۋىن جاعۋ جۇمىسى جۇرگىزىلۋدە. توبەنى جوندەۋ قۇرىلىسى، جەر بەتى قۇرىلىسى بىردەي جۇرگىزىلىپ، جاپپاي اسەمدەۋ، اشەكەيلەۋ ساتىسىنا وتۋگە نەگىز قالاندى.
قۇرىلىستىڭ التىن مەزگىلىن مىقتى يگەرۋدە ءتۇيىندى نىسان قۇرىلىسىنا جاۋاپتى ءارقايسى ورىندار جاۋاپكەرشىلىكتى شىنايى قاتايتىپ، باقىلاۋ - باسقارۋدى كۇشەيتىپ، قۇرىلىس جۇرگىزۋگە جانە ساپا حاۋىپسىزدىگىنە بار كۇشپەن شىنايى كەپىلدىك ەتۋدە.
نىسان مىقتى يگەرۋدىڭ ارقاسىندا، دامۋ قاجىرلىلىقپەن ىستەۋدىڭ ارقاسىندا قولعا كەلەدى. بيىل جىل باسىنان بەرى شينجياڭ نازاردى ءتۇيىندى ايماق، وبلىس، قالالارعا، ءتۇيىندى كاسىپتەرگە، ءتۇيىندى كاسىپورىندارعا شوعىرلاندىرىپ، قىزمەت وتەۋ ارقىلى ونىمدىلىكتى جەبەپ، ورنالاستىرۋ ارقىلى اياق الىستى جەبەپ، نىسان قۇرىلىستارىن بار كۇشپەن ىلگەرىلەتىپ، تۇتاس جىلداعى تۇراقتى مۇلىككە قارجى قوسۋعا جاڭا قوزعاۋشى كۇش ۇستەدى.
