شينحۋا اگەنتتىگى كولەمدى ادەبي حابار جاريالادى
«بەيبىت دامۋدىڭ ۇلكەن ارناسىن قول ۇستاسا قالىپتاستىرۋ − ءتوراعا شي جينپيڭنىڭ بريكس ەلدەرى باسشىلارىنىڭ 15 - رەتكى ديدارلاسۋى جەلىلەس قيمىلدارىنا قاتىناسقاندىعى جونىندە»
شينحۋا اگەنتتىگىنىڭ 8 - ايدىڭ 26 - كۇنى يوحاننەسبۋرگتەن بەرگەن حابارى. شينحۋا اگەنتتىگى 8 - ايدىڭ 26 - كۇنى «بەيبىت دامۋدىڭ ۇلكەن ارناسىن قول ۇستاسا قالىپتاستىرۋ − ءتوراعا شي جينپيڭنىڭ بريكس ەلدەرى باسشىلارىنىڭ 15 - رەتكى ديدارلاسۋى جەلىلەس قيمىلدارىنا قاتىناسقاندىعى جونىندە» اتتى كولەمدى ادەبي حابار جاريالادى.
ماقالادا بىلاي دەلىندى: تاعى ءبىر رەت ون مىڭ شاقىرىمدىق ساپار شەگىپ، تاعى ءبىر رەت ۇزاق جول باستى.
8 - ايدىڭ سوڭى، وڭتۇستىك جارتى شاردىڭ العاشقى كوكتەمى، ءتوراعا شي جينپيڭ افريكا سىندى ءۇمىت پەن ومىرشەڭدىك كۇشكە تولعان وسى قۇرلىققا تاعى تابان تىرەپ، كورىكتى ”كەمپىرقوساق ەلى“ − وڭتۇستىك افريكاعا كەلدى.
8 - ايدىڭ 22 - كۇنى تۇستەن كەيىن وڭتۇستىك افريكانىڭ اكىمشىلىك استاناسى پرەتورياداعى مەملەكەتتىك قيمىلىن اياقتاتقاننان كەيىن، ءتوراعا شي جينپيڭ اۆتوكولىككە وتىرىپ يوحاننەسبۋرگكە كەلىپ، بريكس ەلدەرى باسشىلارىنىڭ 15 - رەتكى ديدارلاسۋىنا قاتىناستى.
كۇن شۇلەن شۇعىلاسىن توگىپ، ۇزىننان - ۇزاققا سوزىلعان جاسىل الەم كوز باۋراپ، بايتاق دالا شۋاققا شومدى. ۇلكەندى - كىشىلى كوشەلەرگە ىلىنگەن ۇگىت كەرمە تۋلارى، بريكس 5 ەلىنىڭ مەملەكەت تۋى باسىلعان الىپ جارنامالار، جۇزدەرىنەن ىقىلاستى كۇلكى ەسكەن جەرگىلىكتى تۇرعىندار... ”التىن قالا“ بريكستىڭ سيلى قوناقتارىن شىن ىقىلاسپەن قارسى الدى.
بريكس ەلدەرى باسشىلارى كەلدى، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ 60 نەشە باسشىسى نەمەسە ۋاكىلى كەلدى، بىرلەسكەن مەملەكەتتەر ۇيىمى سياقتى حالىقارالىق جانە وڭىرلىك ۇيىمداردىڭ جاۋاپتىلارى دا كەلدى... حالىقارالىق مەديالار بىلاي دەپ شولۋ جاسادى: جۋىقتاعى جىلداردان بەرگى ”الەمدىك وڭتۇستىكتەگى“ ەڭ ىقپالدى مەملەكەت باسشىلارى مەن ۇكىمەت باسشىلارىنىڭ ديدارلاسۋى رەتىندە، يوحاننەسبۋرگ ديدارلاسۋى حالىقارالىق ءتارتىپ وزگەرىسىنىڭ جاڭا شىمىلدىعىن اشادى.
ماقالادا مىنالار اتاپ كورسەتىلدى: جۇڭگو − بريكس سەلبەستىگىنىڭ ماڭىزدى ىلگەرىلەتۋشىسى، باستاۋشىسى، وركەندەپ كەلە جاتقان ەلدەردىڭ بىرلەسىپ ءوزىن الۋەتتەندىرۋىندەگى تىرەكتى كۇش، ءاربىر ارەكەتىنە كۇللى الەم نازار اۋدارادى.
بريكس ەلدەرى ساۋدا - ونەركاسىپشىلەر تالقى مىنبەرىنىڭ جابىلۋ سالتىندا ارناۋ ءسوز سويلەگەننەن بريكس ەلدەرى باسشىلارىنىڭ ديدارلاسۋىندا ماڭىزدى ءسوز سويلەگەنگە دەيىن، بريكس ەلدەرى باسشىلارىنىڭ دايدارلاسۋى بويىنشا ەرەكشە تىلشىلەر ماجىلىسىنە قاتىناسۋدان ”بريكس+“ باسشىلارىنىڭ كەڭەسىنە قاتىناسقانعا دەيىن... 8 - ايدىڭ 22 - كۇنىنەن 24 - كۇنىنە دەيىن، 2 جارىم كۇندەگى 10 نەشە رەتكى ەكى جاقتى، كوپ جاقتى قيمىلدا ءتوراعا شي جينپيڭ بريكستەگى ارىپتەستەرىمەن تىعىز بايلانىس جاساپ، بريكس مەحانيزمىنىڭ دامۋ جوباسىن كەسكىندەپ، ازيا، افريكا، لاتىن امەريكاسى ەلدەرى باسشىلارىمەن ىشكەرىلەي اڭگىمەلەسىپ، بەيبىت گۇلدەنىپ - كوركەيۋ جولىن بىرگە قاراستىردى.
دۇنيە ءجۇزى ءتوراعا شي جينپيڭنىڭ ”بريكس ۋاقىتىنا“ زەر سالعاندا، بريكس ۇلى شاڭىراعىنىڭ قارىشتاپ دامىعان كۇشتى تىنىسىن سەزدى، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ ىنتىماعىنىڭ، سەلبەستىگىنىڭ كۇشتى ءداۋىر ءۇنىن ەستىدى، ءتىپتى دە ماڭىزدىسى، جاڭا داۋىردەگى جۇڭگونىڭ بورىش ارقالاۋىن كوردى.
ماقالا 3 بولىككە بولىنگەن: ىنتىماق، سەلبەستىك: ”مەيلى توسقاۋىلدار قانشالىقتى بولسىن، بريكس ەلدەرى سىندى بەلسەندى، ورنىقتى، ىزگىلىككە ۇمتىلعان وسىناۋ كۇش، ءسوز جوق، قارىشتاپ داميدى“. بىرلەسىپ ءوزىن الۋەتتەندىرۋ: ”كوپتىڭ كۇشىمەن ىستەلگەن ءىس جەڭىسكە جەتپەي قويمايدى؛ كوپتىڭ پاراساتىمەن ىستەلگەن ءىس ورىندالماي قويمايدى“. تاعدىرلاس بولۋ: ”تاريح ماياتنيگىنىڭ قالاي قاراي بەيىمدەلۋى ءبىزدىڭ تاڭداۋىمىزعا بايلانىستى“.
ماقالادا بىلاي دەلىندى: افريكا − قاراپايىمدىلىققا ءارى مول اقىل - پاراساتقا تولعان قۇرلىق. وڭتۇستىك افريكانىڭ ۋبانتۋ رۋحى ”ءبىزدىڭ بولعاندىعىمىزدان مەن بارمىن“ دەگەندى دارىپتەپ، ادامداردىڭ ءوزارا ارقا سۇيەيتىنىن، ايرىلا المايتىنىن باسا دارىپتەيدى؛ جۇڭحۋا ۇلتى ”حالىققا مەيىرىمدى بولۋعا، تىرشىلىكتى قادىرلەۋگە، الەمنىڭ ۇلى بىرلىگىنە“ تالپىنادى. ارامىز شالعاي بولسا دا، ۇستانىمىمىز ۇلاسىپ جاتىر.
ماقالادا مىنالار اتاپ كورسەتىلدى: وڭتۇستىك افريكانى تياناق ەتىپ، افريكاعا كوز جىبەردى؛ بريكستى تياناق ەتىپ، دۇنيە جۇزىنە كوز جىبەردى؛ ”جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدى“ تياناق ەتىپ، ”ءارقانداي ءبىر ەلدىڭ دۇنيە ءجۇزىنىڭ وسىزامانداندىرۋ ۇردىسىندە قاتاردان قالماۋىنا“ كوز جىبەردى. ءتوراعا شي جينپيڭنىڭ بريكس ساپارى افريكا بايتاق دالاسىنىڭ ادامزاتتىڭ تاعدارلاس ورتاق تۇلعاسىن قۇرۋدى ىلگەرىلەتەتىن جۇڭگو كۇشىنە، جۇڭگو ۇلەسىنە پارمەندى كۋا بولۋىنا مۇمكىندىك جاسادى.
