بريكستىڭ مۇشە كوبەيتۋى بريكس سەلبەستىگىنىڭ جاڭا باستاماسى، بريكس سەلبەستىگى مەحانيزمىنە جاڭا ومىرشەڭدىك كۇش قوسادى دەپ باسا دارىپتەدى
شينحۋا اگەنتتىگىنىڭ 8 - ايدىڭ 24 - كۇنى يوحاننەسبۋرگتەن بەرگەن حابارى (تىلشىلەر ليۋ حۋا، ليۋ ۋانلي). جەرگىلىكتى ۋاقىت 8 - ايدىڭ 24 - كۇنى تۇستەن بۇرىن مەملەكەت ءتوراعاسى شي جينپيڭ يوحاننەسبۋرگتە بريكس ەلدەرى باسشىلارىنىڭ 15 - رەتكى ديدارلاسۋى بويىنشا ەرەكشە تىلشىلەر ماجىلىسىنە قاتىناستى.
ءماجىلىس ساۋد ارابياسىن، ەگيپەتتى، اراب بىرىككەن امىرلىگىن، ارگەنتينانى، يراندى، ەفيوفيانى بريكس ۇلى شاڭىراعىنىڭ رەسمي مۇشەسى بولۋعا ۇسىنىس ەتكەندىكتەرىن جاريالادى.
شي جينپيڭ ماڭىزدى ءسوز سويلەدى. شي جينپيڭ بىلاي دەپ اتاپ كورسەتتى: بريكس ەلدەرىنىڭ بارلىعى ماڭىزدى ىقپالعا يە ەلدەر، دۇنيە ءجۇزىنىڭ بەيبىتشىلىگى مەن دامۋى جونىندە ماڭىزدى جاۋاپكەرشىلىك ارقالاپ وتىر. بۇل رەتكى ديدارلاسۋدا ءبىز قازىرگى حالىقارالىق جاعداي، بريكس ەلدەرى سەلبەستىگى سياقتى ماسەلەلەردى ارقاۋ ەتە وتىرىپ ىشكەرىلەي پىكىر اۋىستىرىپ، كەڭ كولەمدە ورتاق تانىمعا كەلىپ، باسشىلار ءماجىلىسى جارناماسىن جاريالاپ، سۇبەلى تابىستارعا قول جەتكىزدىك.
شي جينپيڭ بىلاي دەپ اتاپ كورسەتتى: بەس ەل باسشىلارى ساۋد ارابياسىن، ەگيپەتتى، اراب بىرىككەن امىرلىگىن، ارگەنتينانى، يراندى، ەفيوفيانى بريكس ۇلى شاڭىراعىنىڭ مۇشەسى بولۋعا ۇسىنىس ەتۋگە ءبىر اۋىزدان قوسىلدى. جۇڭگو جاق وسى ەلدەردى قۇتتىقتايدى، ءتوراعا ەل وڭتۇستىك افريكانىڭ جانە رامافوسا زۇڭتۇڭنىڭ جاساعان قۇلشىنىستارىن بارىنشا القايدى.
شي جينپيڭ بىلاي دەپ باسا دارىپتەدى: وسى جولعى مۇشە كوبەيتۋ تاريحي سيپاتتى بولدى، ول بريكس ەلدەرىنىڭ وركەندەپ كەلە جاتقان ەلدەرمەن ىنتىماقتاسۋ، سەلبەسۋ بەكىمىن ايگىلەدى، بۇل حالىقارالىق قوعامنىڭ ارمان - تىلەگىنە ۇيلەسەدى، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ ورتاق مۇددەسىنە ۇيلەسەدى. وسى جولعى مۇشە كوبەيتۋ ءارى بريكس سەلبەستىگىنىڭ جاڭا باستاماسى، بريكس سەلبەستىگى مەحانيزمىنە جاڭا ومىرشەڭدىك كۇش قوسىپ، دۇنيە ءجۇزىنىڭ بەيبىتشىلىك جانە دامۋ كۇشىن اناعۇرلىم زورايتادى. ءبىر نيەتپەن سەلبەسسەك بولعانى بريكس سەلبەستىگىنىڭ بولاشاعى نۇرلى، بريكس ەلدەرىنىڭ بولاشاعىنان زور ءۇمىت كۇتۋگە بولاتىندىعىنا سەنەمىن. بىرگە قۇلشىنىپ، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ ىنتىماقتاسىپ، سەلبەسىپ دامۋعا ۇمتىلۋىنىڭ جاڭا تاراۋىن جازايىق!
وڭتۇستىك افريكا زۇڭتۇڭى رامافوسا باسقاردى، برازيليا زۇڭتۇڭى لۋلا، ءۇندىستان زۇڭليى مودي جانە رەسەي زۇڭتۇڭى پۋتين (ينتەرنەت جەلىسىندە) قاتىناستى.
ءماجىلىس «بريكس ەلدەرى باسشىلارىنىڭ 15 - رەتكى ديدارلاسۋى يوحاننەسبۋرگ جارناماسىن» ماقۇلدادى ءارى جاريالادى.
ساي چي، ۋاڭ ي قاتارلىلار ماجىلىسكە قاتىناستى.
