شينحۋا اگەنتتىگىنىڭ 7 - ايدىڭ 19 - كۇنى بەيجيڭنەن بەرگەن حابارى. 7 - ايدىڭ 19 - كۇنى مەملەكەت ءتوراعاسى شي جينپيڭ جۇڭگو مەن كامبودجانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى بايلانىسىمەن كامبودجانىڭ پاتشاسى سيحامونيمەن ءوزارا قۇتتىقتاۋ تەلەگرامماسىن جولدادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم - قاتىناس ورناتقان 65 جىلدان بەرى جۇڭگو − كامبودجا قارىم - قاتىناسى حالىقارالىق اۋمالى - توكپەلى جاعدايدىڭ سىنىنان ءوتىپ، ۋاقىت وتكەن سايىن بەكەمدەلدى. بيىل جىل باسىندا ءبىز بەيجيڭدە شىن ىقىلاسپەن كەزدەسىپ ءارى كوپ رەت ءوزارا حات جانە تەلەگرامما جولداسىپ، جۇڭگو − كامبودجا تاعدىرلاس ورتاق تۇلعاسى قۇرىلىسىنىڭ جوعارى ساپالى، جوعارى دەڭگەيلى، جوعارى ولشەمدى جاڭا داۋىرگە وتۋىنە بىرگە جەتەكشىلىك ەتتىك. جۇڭگو مەن كامبودجانىڭ ”الماستىڭ التى قىرى“ سەلبەستىك جۇلگەسى ۇزدىكسىز تەرەڭدەدى، ناقتىلاندى، ”ونەركاسىپتى دامىتۋ ءدالىزى“ جانە ”بالىق، كۇرىش ءدالىزى“ قۇرىلىسى بەلسەندى ىلگەرىلەۋشىلىككە قول جەتكىزدى، جۇڭگو مەن كامبودجانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى جانە جۇڭگو − كامبودجا دوستىق جىلى جەلىلەس قۇتتىقتاۋ قيمىلدارى دابىرالى وتكىزىلدى. مەن جۇڭگو − كامبودجا قارىم - قاتىناسىنىڭ دامۋىنا ايرىقشا ءمان بەرەمىن، سيحاموني پاتشامەن بىرگە قۇلشىنىپ، جۇڭگو − كامبودجا دوستىعىنىڭ اناعۇرلىم مول جەمىس بەرۋىن ىلگەرىلەتىپ، ەكى ەل حالقىنا ناقتى پايدا جەتكىزۋدى قالايمىن.
سيحاموني مىنالاردى ءبىلدىردى: كامبودجا مەن جۇڭگونىڭ ءداستۇرلى دوستىعى ارىدان باستاۋ الادى. ەكى ەل وسكەلەڭ تۇردە ءوزارا سەنىم ارتىپ، ءوزارا پايدا جەتكىزىپ، تەڭ يگىلىككە كەنەلۋ نەگىزىندە جان - جاقتى ستراتەگيالىق سەلبەستىك سەرىكتەستىك قارىم - قاتىناس ورناتىپ، تاعدىرلاس ورتاق تۇلعانى قول ۇستاسا قۇرىپ، ”مىزعىماس“ دوستىق ورناتتى. جاڭا جاعدايدا كامبودجا مەن جۇڭگونىڭ دوستىق قارىم - قاتىناسى مەن ءوزارا پايدا جەتكىزۋ سەلبەستىگىنىڭ، ءسوز جوق، ۇزدىكسىز بەكەمدەلەتىندىگىنە، ەكى ەلدىڭ ”مىزعىماس“ دوستىعىنىڭ، ءسوز جوق، ۇرپاقتان - ۇرپاققا جالعاساتىندىعىنا كامىل سەنەمىن. كامبودجا جاق جۇڭگو جاقپەن ءار سالاداعى سەلبەستىكتى قول ۇستاسا تەرەڭدەتىپ، ەكى ەلگە جانە ەكى ەل حالقىنا يگىلىك جەتكىزىپ، ءوڭىردىڭ، اۋەلى، دۇنيە ءجۇزىنىڭ بەيبىتشىلىگىن، ورنىقتىلىعىن جانە گۇلدەنۋىن جەبەۋدى قالايدى.
سول كۇنى مەملەكەتتىك كەڭەستىڭ زۇڭليى لي چياڭ مەن كامبودجانىڭ باس ءۋازىرى حۇڭسىن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: بيىل جۇڭگو مەن كامبودجانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى جانە جۇڭگو − كامبودجا دوستىق جىلى، جۇڭگو − كامبودجا قارىم - قاتىناسى تىڭ باستامادا تۇر. مەن باس ءۋازىر حۇڭسىنمەن بىرگە ەكى ەلدىڭ ءارقايسى تاراۋلارىنىڭ، جەرگىلىكتى ورىندارىنىڭ تىزە قوسا سەلبەسۋىنە جەتەكشىلىك ەتىپ، جۇڭگو مەن كامبودجانىڭ جان - جاقتى ستراتەگيالىق سەلبەستىگىنىڭ اناعۇرلىم كوپ ناقتى جەتىستىكتەرگە قول جەتكىزۋىن ىلگەرىلەتۋدى قالايمىن.
حۇڭسىن مىنالاردى ءبىلدىردى: كامبودجا جاق ءبىر جۇڭگو ساياساتىن باتىل اتقارادى، جۇڭگو جاق ورتاعا قويعان ”ءبىر بەلدەۋ، ءبىر جول“ باستاماسى، الەمدىك دامۋ باستاماسى، الەمدىك حاۋىپسىزدىك باستاماسى سياقتى كەلەلى باستامالاردى قولدايدى، جۇڭگو جاقپەن كامبودجا − جۇڭگو تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتىپ، ەكى ەلدىڭ جانە ەكى ەل حالقىنىڭ ورتاق مۇددەسىن قورعاۋدى قالايدى.
