شينحۋا اگەنتتىگىنىڭ 7 - ايدىڭ 18 - كۇنى بەيجيڭنەن بەرگەن حابارى (ءتىلشى ليۋ حۋا). 7 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن الجيريا زۇڭتۇڭى تىبونمەن كەڭەس وتكىزدى.
شي جينپيڭ بىلاي دەپ اتاپ كورسەتتى: بيىل − جۇڭگو مەن الجيريانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى. 65 جىلدىڭ الدىندا يمپەرياليزمگە جانە وتارشىلدىققا قارسى تۇرىپ، ۇلتتىڭ تاۋەلسىزدىگىنە، ازاتتىعىنا قول جەتكىزۋ سىندى ورتاق ءىس ءبىز ەكى ەلدى ءبىر جولعا باستادى. 65 جىلدان بەرى جۇڭگو مەن الجيريا باستان - اياق جاپا - ماشاقاتتى بىرگە وتكەرىپ، ءوزارا قارايلاسىپ، ءوزارا ءتۇسىنىسىپ، ءوزارا قولداپ، بىرگە دامۋ جانە ۇلتتى گۇلدەندىرۋ جولىنداعى شىنايى دوس، تابيعي سەرىكتەرگە اينالدى. جۇڭگو جاق جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدە، الجيريا جاق ”جاڭا الجيريا“ قۇرۋدى كۇش سالا ىلگەرىلەتۋدە. جۇڭگو جاق الجيريا جاقپەن بىرگە قۇلشىنىپ، ءداستۇرلى دوستىقتى ساۋلەلەندىرە ءتۇسىپ، جۇڭگو − الجيريا جان - جاقتى ستراتەگيالىق سەرىكتەستىك قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: ەكى جاق ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءوزارا قولداۋ كورسەتۋى كەرەك. الجيريا جاقتىڭ تايۋان، شينجياڭعا ساياتىن، ادامدىق ۇقىق سياقتى ماسەلەلەردە تۋى ايقىن تۇردە جۇڭگونىڭ ادىلەتتى تۇرعىسىن قولداعاندىعىنا العىس ايتامىز، جۇڭگو جاق الجيريا جاقتىڭ مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن باتىل قولدايدى، الجيريا جاقتىڭ ءوز مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، سىرتقى كۇشتەردىڭ الجيريانىڭ ىشكى ىسىنە كيلىگۋىنە قارسى تۇرادى. ەكى جاق ”ءبىر بەلدەۋ، ءبىر جولدى“ بىرگە قۇرۋ سياقتى ماڭىزدى سەلبەستىك حۇجاتتارىن قول ۇستاسا ويداعىداي تياناقتاندىرىپ، نەگىزدىك قۇرىلعى، مۇناي حيميا ونەركاسىبى، كەن ونىمدەرى، اۋىل شارۋاشىلىعى سياقتى ءداستۇرلى سالالارداعى سەلبەستىكتى تەرەڭدەتىپ، عارىش، يادرو ەنەرگياسى، ينفورماتسيا - حابارلاسۋ، تۋىندامالى ەنەرگيا سياقتى جوعارى تەحنيكا سالاسىنداعى سەلبەستىكتى كەڭەيتىپ، سەلبەستىكتىڭ جاڭا ارتۋ تۇيىندەرىن جەتىلدىرۋ كەرەك. جۇڭگو جاق الجيريا جاققا قولىنان كەلگەنىنشە ۇزدىكسىز كومەك بەرۋدى، الجيريانىڭ ەكونوميكالىق، قوعامدىق دامۋىنا قولداۋ كورسەتۋدى قالايدى، الجيريانىڭ اناعۇرلىم كوپ ساپالى ونىمدەرىن يمپورت ەتۋدى قالايدى، جۇڭگو كاسىپورىندارىن الجيرياعا بارىپ سەلبەستىك ورىستەتۋگە ىنتالاندىرادى جانە قولدايدى. بيىل جۇڭگونىڭ الجيرياعا ەمدەۋ اترەتىن جىبەرگەندىگىنىڭ 60 جىلدىعى. 60 جىلدان بەرى جۇڭگو جاق الجيريا جاققا 3522 ەمدەۋ - كۇتىمدەۋ قىزمەتكەرىن (رەت) جىبەرىپ، 27 ميلليوننان استام ناۋقاستى (رەت) ەمدەپ، 2 ميلليون 70 مىڭنان استام نارەستەنى دۇنيەگە اكەلىپ، جۇڭگو − الجيريا دوستىعىنىڭ ەسكەرتكىشىن ورناتتى. جۇڭگو جاق الجيريا جاقپەن ەمدەۋ - دەنساۋلىق ساقتاۋ سەلبەستىگىن ۇزدىكسىز تەرەڭدەتىپ، الجيريا جاقتى ۇكىمەتتىك وقۋ سيلىعى سانىمەن قامداپ، اقپارات، ساياحات، جاستار، دەنە تاربيە، اقىل - پاراسات قويماسى سياقتى سالالارداعى دوستىق سەلبەستىكتى ىلگەرىلەتىپ، ەكى ەلدىڭ حالىق رايى نەگىزىن بەكەمدەۋدى قالايدى.
شي جينپيڭ بىلاي دەپ اتاپ كورسەتتى: جۇڭگو جاق الجيريا جاقپەن تۇڭعىش كەزەكتى جۇڭگو - اراب ەلدەرى باسشىلار ءماجىلىسىنىڭ جەتىستىكتەرىن جەدەل تياناقتاندىرىپ، جۇڭگو - الجيريا ناقتى سەلبەستىگىنىڭ ”8 ۇلكەن ورتاق ارەكەتىن“ ويداعىداي اتقارىپ، جۇڭگو - افريكا سەلبەستىك تالقى مىنبەرى جۇلگەسىندە سەلبەستىكتى كۇشەيتىپ، تالقى مىنبەرى داكار ءماجىلىسىنىڭ تابىستارىن ويداعىداي تياناقتاندىرىپ، جاڭا داۋىردەگى جۇڭگو − اراب ەلدەرى، جۇڭگو − افريكا تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. الجيريانىڭ 2024 - جىلدان 2025 - جىلعا دەيىنگى بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ بەيتۇراقتى القا ەلى بولىپ سايلانعانىن قۇتىقتايمىز، الجيريا جاقپەن بىرلەسكەن مەملەكەتتەر ۇيىمى سياقتى كوپ جاقتى ورىنداردا سايكەسۋ مەن سەلبەسۋدى كۇشەيتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن باتىل قورعاۋدى، ناعىز كوپ جاقتىلىقتى امالياتتا ايگىلەپ، حالىقارالىق ادىلدىك پەن ادىلەتتىلىكتى قورعاۋدى، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
تىبون مىنالاردى ءبىلدىردى: جۇڭگو الجيريانىڭ ەڭ ماڭىزدى دوسى جانە سەرىگى. جۇڭگو جاقتىڭ ۇزاق ۋاقىتتان بەرى الجيريا جاققا ءتۇرلى قىمباتتى قولداۋ كورسەتكەندىگىنە العىس ايتامىن، الجيريا جاق جۇڭگو جاقتىڭ تايۋان، شينجياڭعا ساياتىن وزەكتى مۇددە ماسەلەسىندەگى تۇرعىسىن باتىل قولدايدى، جۇڭگو جاق العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى، ”ءبىر بەلدەۋ، ءبىر جولدى“ بىرگە قۇرۋعا بەلسەنە ات سالىسۋدى، الجيريا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن تەرەڭدەتىپ، الجيريانىڭ مەملەكەتتىڭ ەكونوميكالىق، قوعامدىق دامۋىن جۇزەگە اسىرۋىنا دەم بەرۋدى قالايدى. الجيريا جاق جۇڭگو كاسىپورىندارىنىڭ الجيرياعا كەلىپ قارجى قوسۋىن، سەلبەستىك ورىستەتۋىن قارسى الادى، تاماشا شارۋاشىلىق ساۋدا ورتاسىن ازىرلەۋدى قالايدى، اناعۇرلىم كوپ جۇڭگولىق ساياحاتشىنىڭ الجيرياعا ساياحاتتاۋعا بارۋىن قارسى الادى، جۇڭگو جاقپەن ءار سالاداعى ناقتى سەلبەستىكتى كۇشەيتىپ، گۋمانيتارلىق اۋىس - كۇيىستى، سەلبەستىكتى تەرەڭدەتۋدى قالايدى. قازىر حالىقارالىق جاعداي بىركەلكى ەمەس، جۇڭگو جاقتىڭ اناعۇرلىم اشىق، سيىسىمدى دۇنيە ءجۇزىن قۇرۋدى ىلگەرىلەتۋدە، اناعۇرلىم ءادىل، ۇيلەسىمدى حالىقارالىق ءتارتىپ قالىپتاستىرۋدا شەشۋشى رول اتقارعاندىعىنا العىس ايتادى، جۇڭگو جاقتىڭ پالەستينا سياقتى وڭىرلەردىڭ قولامتالى ماسەلەلەرىن ءادىل شەشۋدە، ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن جەبەۋدە سىندارلى رول اتقارعاندىعىن القايدى. جۇڭگو جاقپەن حالىقارالىق جانە وڭىرلىك ىستەردەگى ستراتەگيالىق ىستەستىكتى نىعايتۋدى قالايدى. الجيريا جاق جۇڭگو − اراب ەلدەرى سەلبەستىك تالقى مىنبەرىنىڭ جانە جۇڭگو − افريكا سەلبەستىك تالقى مىنبەرىنىڭ جۇڭگو − اراب ەلدەرى، جۇڭگو − افريكا قارىم - قاتىناسىنىڭ دامۋىن جەبەۋدە ساۋلەلەندىرگەن ماڭىزدى رولىن ايرىقشا تۇراقتاندىرادى، جۇڭگو جاقپەن بىرگە قۇلشىنىپ، جۇڭگو − اراب ەلدەرى، جۇڭگو − افريكا سەلبەستىگىن تىڭ دەڭگەيگە كوتەرىپ، ەكى جاقتىڭ حالقىن اناعۇرلىم ويداعىداي باقىتقا كەنەلتۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى اۋىل شارۋاشىلىعى، قاتىناس، عىلىم - تەحنيكا، تەلەگراف، قالانىڭ باياندى دامۋى، ساۋدا، عارىش، تەكسەرۋ - كارانتيندەۋ، ەنەرگيا، وقۋ - اعارتۋ، دەنە تاربيە سياقتى سالالارداعى كوپ ءتۇرلى ەكى جاقتى سەلبەستىك حۇجاتتارعا قول قويۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن الجيريا دەموكراتيالىق حالىق رەسپۋبليكاسىنىڭ بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ حالىق سارايىنىڭ سولتۇستىك ۇلكەن زالىندا تىبونعا ارناپ قارسى الۋ سالتىن وتكىزدى.
تىبون كەلگەندە تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ، قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن الجيريا ەكى ەلدىڭ مەملەكەت ءانىن ورىندادى. تىبون شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
سول كۇنى كەشتە شي جينپيڭ حالىق سارايىنىڭ جينسى زالىندا تىبونعا ارناپ قارسى الۋ قوناعاسىن بەردى.
ۋاڭ ي جوعارىداعى قيمىلدارعا قاتىناستى.
