شينحۋا اگەنتتىگىنىڭ 3 - ايدىڭ 1 - كۇنى بەيجيڭنەن بەرگەن حابارى (ءتىلشى ليۋ حۋا). 3 - ايدىڭ 1 - كۇنى مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەت ىستەرى ساپارىمەن كەلگەن بەلورۋسسيانىڭ زۇڭتۇڭى لۋكاشەنكومەن كەڭەس وتكىزدى.
شي جينپيڭ بىلاي دەپ اتاپ كورسەتتى: بىلتىر 9 - ايدا ءبىز سامارحاندا جۇڭگو − بەلورۋسسيا قارىم - قاتىناسىنىڭ ورنىن بارلىق جاعدايدا بىردەي جان - جاقتى ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى بىرگە جاريالاپ، ەكى ەلدىڭ ءتۇرلى سالاداعى سەلبەستىگىنە قۋاتتى قوزعاۋشى كۇش قوستىق. بيىل جۇڭگونىڭ جۇڭگو كوممۋنيستىك پارتياسى 20 - قۇرىلتايىنىڭ رۋحىن جاپپاي دايەكتىلەندىرۋىندەگى باستاما جىلى، جۇڭگونىڭ جوعارى ساپالى دامۋى مەن وسىزامانداندىرۋ ءۇردىسى بەلورۋسسيانى قامتىعان دۇنيە جۇزىندەگى ءارقايسى ەلگە جاڭا وراي اكەلەدى. ورنىقسىزدىققا، ايقىنسىزدىققا تولى حالىقارالىق جاعداي الدىندا، جۇڭگو جاق بەلورۋسسيا جاقپەن بىرگە قۇلشىنىپ، ەكى ەل قارىم - قاتىناسىنىڭ جوعارى دەڭگەيدە اقاۋسىز، ورنىقتى دامۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو − بەلورۋسسيا دوستىعى مىزعىماس بەكەم، ەكى جاق ساياسي سەنىمدىلىكتى ۇزدىكسىز ارتتىرىپ، قاشان دا ءبىر - ءبىرىنىڭ ناعىز دوسى جانە جاقسى سەرىگى بولۋى كەرەك. جۇڭگو جاق بەلورۋسسيا جاقتىڭ تايۋانعا ساياتىن، شينجياڭعا ساياتىن، شياڭگاڭعا ساياتىن، ادامدىق ۇقىق سياقتى ماسەلەلەردە جۇڭگو جاقتىڭ ورىندى تۇرعىسىن باتىل قولداعاندىعىن بارىنشا القايدى. ەكى جاق ءبىر - ءبىرىنىڭ تاڭداعان دامۋ جولىن باتىل قولداپ، قارسى جاقتىڭ ءوز ەلىنىڭ وزەكتى مۇددەسىن قورعاۋىن قولداۋى، سىرتقى كۇشتەردىڭ ىشكى ىسكە كيلىگۋىنە قارسى تۇرۋى، ەكى ەلدىڭ يەلىك ۇقىعى مەن ساياسي حاۋىپسىزدىگىن قورعاۋى كەرەك. ەكى ەلدىڭ ۇكىمەت ارالىق سەلبەستىك كوميتەتىنىڭ رولىن تولىق ساۋلەلەندىرىپ، ەكونوميكا - ساۋدا سەلبەستىگىن كەڭەيتىپ، جۇڭگو − بەلورۋسسيا ونەركاسىپ باقشاسىن ويداعىداي قۇرىپ، ”ءبىر بەلدەۋ، ءبىر جولدى“ بىرگە قۇرۋدى نەگىزگى جەلى ەتىپ، جۇڭگو − ەۆروپا كەزەكشى پويەزى سياقتى ۇلاستىرۋ - تۇتاستىرۋ قۇرىلىسى سەلبەستىگىن ىلگەرىلەتۋى كەرەك. ەمدەۋ، دەنساۋلىق ساقتاۋ سەلبەستىگىن تەرەڭدەتىپ، جەرگىلىكتى ورىنداردىڭ سەلبەستىگىن كەڭەيتىپ، گۋمانيتارلىق اۋىس - كۇيىستى جيىلەتىپ، جۇڭگو − بەلورۋسسيا دوستىعىن جۇرت جۇرەگىنە اناعۇرلىم تەرەڭ ۇيالاتۋ كەرەك.
شي جينپيڭ بىلاي دەپ اتاپ كورسەتتى: دۇنيە ءجۇزى ءجۇز جىلدا بولماعان زور وزگەرىستەرگە ءدوپ كەلۋدە، دۇنيە ءجۇزىنىڭ بەيبىتشىلىگى مەن دامۋىن قورعاۋدىڭ مىندەتى اۋىر، جولى ۇزاق. جۇڭگو مەن بەلورۋسسيا حالىقارانىڭ ادىلدىگىن، تۋراشىلدىعىن بىرگە قورعاۋشى. جۇڭگو جاق بەلورۋسسيا جاقتىڭ الەمدىك دامۋ باستاماسىن، الەمدىك حاۋىپسىزدىك باستاماسىن قولداعاندىعىن القايدى، بەلورۋسسيا جاقپەن بىرگە بىرلەسكەن مەملەكەتتەر ۇيىمى سياقتى كوپ جاقتى تۇعىردا سايكەسۋدى، سەلبەسۋدى كۇشەيتىپ، الەمدىك سىن - سايىستارعا بىرگە توتەپ بەرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.
لۋكاشەنكو جۇڭگو كوممۋنيستىك پارتياسى 20 - قۇرىلتايىنىڭ جەڭىسپەن اشىلعاندىعىن تاعى ءبىر مارتە قىزۋ قۇتتىقتادى، ول مىنالاردى ءبىلدىردى: ءتوراعا شي جينپيڭ جۇڭگو حالقىنىڭ بارىنشا قادىرلەۋىنە بولەنگەن، دۇنيە جۇزىندە اسقاق بەدەلگە يە، مەن قاتتى سۇيىنەمىن. ءتوراعا شي جينپيڭنىڭ پارمەندى باسشىلىعىندا جۇڭگونىڭ ۇزدىكسىز تىڭ شۇعىلالى جەتىستىكتەرگە قول جەتكىزەتىندىگىنە كامىل سەنەمىن. بەلورۋسسيا حالقى جۇڭگو حالقىمەن باستان - اياق تىلەكتەس، ءارقانداي ۋاقىتتا دا جۇڭگومەن باتىل بىرگە تۇرادى. بەلورۋسسيا جاق جۇڭگو جاقتىڭ ءوزىنىڭ وزەكتى مۇددەسىن قورعاۋىن باتىل قولدايدى، ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسىن، الەمدىك حاۋىپسىزدىك باستاماسىن جانە الەمدىك دامۋ باستاماسىن باتىل قولدايدى، وعان بەلسەنە ات سالىسادى. بەلورۋسسيا جاق جۇڭگو جاقپەن عىلىم - تەحنيكا، ونەركاسىپ، اۋىل شارۋاشىلىعى، ساياحات سياقتى سالالارداعى سەلبەستىكتى كۇشەيتۋدى، جۇڭگو − ەۆروپا كەزەكشى پويەزى مەن بەلورۋسسيا − جۇڭگو ونەركاسىپ باقشاسى قۇرىلىسىن ىلگەرىلەتۋدى قالايدى، جۇڭگو كاسىپورىندارىنىڭ بەلورۋسسياعا بارىپ قارجى قوسۋىن، جەرگىلىكتى ورىنداردىڭ اۋىس - كۇيىسىن جانە گۋمانيتارلىق اۋىس - كۇيىستى كۇشەيتۋىن قارسى الادى. جۇڭگو دۇنيە ءجۇزىنىڭ بەيبىتشىلىگىن قورعاۋداعى مىزعىماس تىرەك. بەلورۋسسيا جاق جۇڭگو جاقپەن بىرگە كەلەلى حالىقارالىق، وڭىرلىك ماسەلەلەردە سايكەسۋدى كۇشەيتىپ، حالىقارالىق، وڭىرلىك حاۋىپسىزدىكتى، ورنىقتىلىقتى قورعاۋعا بىرگە كۇش سالۋدى قالايدى. جۇڭگونىڭ جۋىق ارادا اشىلاتىن مەملەكەتتىك ەكى ءماجىلىسىنىڭ تولىق تابىستى بولۋىن تىلەيمىن، مۇنىڭ جۇڭگونىڭ جانە دۇنيە ءجۇزىنىڭ بولاشاعىنا ماڭىزدى ىقپال جاسايتىندىعىنا سەنەمىن.
ەكى ەلدىڭ مەملەكەت باسشىلارى ۋكراينا داعدارىسى سياقتى ماسەلەلەر جونىندە دە پىكىر اۋىستىردى. شي جينپيڭ بىلاي دەپ اتاپ كورسەتتى: جۇڭگو جاقتىڭ ۋكراينا داعدارىسىنداعى تۇرعىسى دايەكتى، ايقىن، ۋكراينا داعدارىسىن ساياسي جولمەن شەشۋ جونىندەگى جۇڭگو تۇرعىسى حۇجاتىن جاريالادىق. جۇڭگو تۇرعىسىنىڭ وزەگى − راقايلاسۋعا، كەلىسسوز وتكىزۋگە جەبەۋ. ساياسي جولمەن شەشۋ باعدارىنا تاباندى بولىپ، قىرعي قاباق سوعىسى ويى اتاۋلىنى تاستاپ، ءار ەلدىڭ حاۋىپسىزدىككە قاتىستى ءجىتى قاداعالاپ وتىرعان ۇيلەسىمدى ىستەرىنە قۇرمەت ەتىپ، بىركەلكى، ءونىمدى، باياندى ەۆروپا حاۋىپسىزدىگى جۇلگەسىن ورناتۋ كەرەك. قاتىستى ەلدەر الەمدىك ەكونوميكانى ساياسيلاندىرۋدى، قۇرالعا اينالدىرۋدى دوعارىپ، سوعىس توقتاتۋعا، داعدارىستى بەيبىت جولمەن شەشۋگە ءتيىمدى ىستەردى شىنايى ىستەۋى كەرەك. لۋكاشەنكو مىنانى ءبىلدىردى: بەلورۋسسيا جاق جۇڭگو جاقتىڭ ۋكراينا داعدارىسىن ساياسي جولمەن شەشۋ جونىندەگى تۇرعىسى مەن قۋاتتاماسىن بۇكىلدەي قۇپتايدى جانە قولدايدى، بۇل داعدارىستى شەشۋ جونىنەن ماڭىزدى ءمان الادى.
كەڭەستەن كەيىن، ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن بەلورۋسسيا رەسپۋبليكاسىنىڭ جاڭا داۋىردە ەكى ەلدىڭ بارلىق جاعدايدا بىردەي جان - جاقتى ستراتەگيالىق سەرىكتەستىك قارىم - قاتىناسىن ىشكەرىلەي دامىتۋ جونىندەگى بىرلەسكەن مالىمدەمەسىنە» بىرگە قول قويدى ءارى ەكونوميكا - ساۋدا، ونەركاسىپ، اۋىل شارۋاشىلىعى، كەدەن، عىلىم - تەحنيكا، دەنساۋلىق ساقتاۋ، ساياحات، دەنە تاربيە، جەرگىلىكتى ورىندار سياقتى سالالارداعى كوپ تۇردەگى ەكى جاقتى سەلبەستىك حۇجاتىنا قول قويۋعا كۋا بولدى.
كەڭەستەن ىلگەرى، شي جينپيڭ حالىق سارايىنىڭ سولتۇستىك زالىندا لۋكاشەنكونى قارسى الۋ سالتىن وتكىزدى.
لۋكاشەنكو جەتكەندە، تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن بەلورۋسسيا ەكى ەلدىڭ مەملەكەت ءانىن ورىندادى. لۋكاشەنكو شي جينپيڭنىڭ سەرىك بولۋىمەن جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
كەڭەستەن كەيىن، شي جينپيڭ حالىق سارايىنىڭ جينسى زالىندا لۋكاشەنكونى قارسى الۋ قوناعاسىن وتكىزدى.
ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
