شينحۋا اگەنتتىگىنىڭ 12 - ايدىڭ 13 - كۇنى نانجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس 12 - ايدىڭ 13 - كۇنى تۇستەن بۇرىن نانجيڭدە نانجيڭ زور قىرعىنىندا قازا بولعاندارعا ارنالعان 2022 - جىلعى مەملەكەتتىك ازا ءبىلدىرۋ سالتىن دابىرالى وتكىزدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي قاتىناستى جانە ءسوز سويلەدى.
ازا ءبىلدىرۋ سالتى جۇڭگوعا شاپقىنشىلىق جاساعان جاپون ارمياسىنىڭ نانجيڭدە جۇرگىزگەن زور قىرعىنىندا قازا بولعان باۋىرلاستارعا ارنالعان ەسكەرتكىش سارايدىڭ جينالىس الاڭىندا وتكىزىلدى. الاڭ ايبىندى دا جىم - جىرت كۇيگە شومىپ، مەملەكەت تۋى جارتىلاي ءتۇسىرىلدى.
ءار سالانىڭ 3000داي ۋاكىلى كەۋدەلەرىنە اق گۇل قاداپ، ىزەتپەن ءۇنسىز تۇردى. ءدال ساعات 10دا، ازا ءبىلدىرۋ سالتى باستالىپ، «جۇڭحۋا حالىق رەسپۋبليكاسىنىڭ مەملەكەت ءانى» ورىندالدى. مەملەكەت ءانى ورىندالىپ بولعان سوڭ، بۇكىل الاڭداعىلار نانجيڭ زور قىرعىنىندا قازا بولعاندارعا ءۇنسىز ازا ءبىلدىردى، سونىمەن ءبىر ۋاقىتتا، نانجيڭ قالاسىندا اۋە شابۋىلىنان قورعانۋ دابىلى قاعىلىپ، اۆتوموبيلدەر توقتاپ گۋدوك شالىپ، جۇرگىنشىلەر تۇرا قالىپ ءۇنسىز ازا ءبىلدىردى. ازا ءبىلدىرۋ اياقتاعان سوڭ، «مەملەكەتتىك ازا بىلدىرۋگە ارناۋ مۋزيكاسىنىڭ» اۋەنىندە ازاتتىق ارميا قۇرمەت قاراۋىلى ۇلكەن اترەتىنىڭ 16 قۇرمەت قاراۋىلى 8 گۇل شەڭبەردى ازا ءبىلدىرۋ تەكشەسىنە قۇرمەتپەن قويدى.
وسىدان سوڭ، ساي چي ءسوز سويلەدى. ول مىنالاردى ءبىلدىردى: بۇگىن ءبىز وسى ارادا نانجيڭ زور قىرعىنىندا قازا بولعاندارعا ارنالعان مەملەكەتتىك ازا ءبىلدىرۋ سالتىن دابىرالى وتكىزىپ، نانجيڭ زور قىرعىنىندا جازىقسىز قازا بولعانداردى تەرەڭ ساعىنىشپەن ەسكە الىپ، جاپون شاپقىنشىلارىنىڭ اياۋسىز قىرعىنىنا ۇشىراپ قازا بولعان باۋىرلاستاردى ەسكە الىپ، جۇڭگو حالقىنىڭ جاپون شاپقىنشىلارىنا قارسى سوعىسىنىڭ جەڭىسى ءۇشىن ومىرلەرىن ارناعان توڭكەرىستىك ارداگەر قۇرباندار مەن ۇلت قاھارماندارىن ەسكە الىپ، جۇڭگو حالقىمەن قول ۇستاسا وتىرىپ جاپون شاپقىنشىلارىنا قارسى تۇرۋدا ومىرلەرىن ارناعان حالىقارالىق جاۋىنگەرلەر مەن حالىقارالىق دوستاردى ەسكە الىپ، جۇڭگو حالقىنىڭ بەيبىت دامۋ جولىمەن بۇلجىماي جۇرەتىن اسقاق تىلەگىن بەينەلەپ، جۇڭگو حالقىنىڭ تاريحتى ەستەن شىعارمايتىن، وتكەندى ۇمىتپايتىن، بەيبىتشىلىكتى قاستەرلەيتىن، بولاشاققا جول اشاتىن مىزعىماس تۇرعىسىن جاريالاپ وتىرمىز.
ساي چي بىلاي دەپ اتاپ كورسەتتى: تالاي ۇرپاق ادامنىڭ كۇرەس جۇرگىزىپ، ايانباي شايقاسۋىندا مەملەكەتىمىزدە جەر - كوكتى ءدۇر سىلكىندىرگەن وزگەرىستەر جارىققا شىقتى، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا قادام تاستاپ، حالىق جاپپاي دوڭگەلەك داۋلەتتى تۇرمىس كەشىرىپ، جۇڭحۋا ۇلتى دۇنيە جۇزىندەگى ۇلتتار قاتارىندا ەڭسە كوتەردى، مىنە بۇل ءبىزدىڭ قازا بولعان باۋىرلاستارىمىز بەن قازا بولعان ارداگەر قۇرباندار ءۇشىن جۇباتۋ.
ساي چي بىلاي دەپ باسا دارىپتەدى: تاريحتاعى زوبالاڭدى ۇمىتۋعا بولمايدى، العا باسقان قادامىمىز ەشقاشان كىدىرمەيدى. العا باسۋ جولىندا ءبىز جۇڭگو كوممۋنيستىك پارتياسىنىڭ باسشىلىعىنا بۇلجىماي تاباندى بولىپ، جۇڭگو ۇلگىسىندەگى وسىزامانداندىرۋدى بۇلجىماي ىلگەرىلەتىپ، كۇرەسكەرلىك رۋحتى بۇلجىماي ساۋلەلەندىرىپ، ادامزاتتىڭ تاعدىرلاس ورتاق تۇلعاسىن قۇرۋدى بۇلجىماي ىلگەرىلەتۋىمىز كەرەك.
ساي چي بىلاي دەپ اتاپ كورسەتتى: جۇڭگو كوممۋنيستىك پارتياسى جۇڭحۋا ۇلتىنىڭ مىڭ جىلدىق ۇلى ءىسىن مۇرات ەتىپ، ادامزاتتىڭ بەيبىتشىلىگى مەن دامۋىنىڭ اسقاق ىستەرى ءۇشىن كۇش سالىپ كەلەدى، جاۋاپكەرشىلىگى تەڭدەسسىز زور، بورىشى شەكسىز داڭقتى. جاڭا داۋىردەگى جاڭا جورىقتا بۇكىل پارتيا، بۇكىل ارميا، بۇكىل ەلدەگى ءار ۇلت حالقى شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، تاريحتى اينا ەتىپ، بولاشاققا جول اشىپ، جىگەرلەنە ۇمتىلىپ، ەرلىكپەن العا باسىپ، جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋى كەرەك. جۇڭگو حالقى دۇنيە ءجۇزى حالقىمەن قول ۇستاسا وتىرىپ، ادامزاتتىڭ اناعۇرلىم كوركەم بولاشاعىن اشۋعا پەيىل!
ساي چيدىڭ سوزىنەن كەيىن، نانجيڭ قالاسىنداعى جاستار مەن وسپىرىمدەردىڭ 85 ۋاكىلى «بەيبىتشىلىك جارناماسىن» وقىدى، قوعامنىڭ ءار سالاسىنان كەلگەن 6 ۋاكىل ”بەيبىتشىلىك ۇلكەن قوڭىراۋىن“ سوقتى. 3 مارتە ۇرىلعان قوڭىراۋدىڭ سالماقتى داۋىسىنا ىلەسە، 3000 بەيبىتشىلىك كوگارشىنى قازا بولعاندارعا دەگەن شەكسىز قايعىلى ساعىنىشتىڭ جانە دۇنيە ءجۇزىنىڭ بەيبىتشىلىگىنە دەگەن شەكسىز اڭساۋدىڭ اماناتىن الىپ قانات سەرمەپ، كوككە سامعادى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق ساياسي - زاڭ كوميتەتىنىڭ شۋجيى چىن ۋىنچيڭ ازا ءبىلدىرۋ سالتىن باسقاردى. مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى چىن جۋ، مەملەكەتتىك كەڭەستىڭ مۇشەسى ۋاڭ يۇڭ، مەملەكەتتىك ساياسي كەڭەستىڭ ورىنباسار ءتوراعاسى لۋ جانگۇڭ جانە ورتالىق اسكەري ىستەر كوميتەتىنىڭ مۇشەسى، اسكەري ىستەر كوميتەتى ساياسي قىزمەت ءبولىمىنىڭ مەڭگەرۋشىسى مياۋ حۋا قاتىناستى.
جاپون شاپقىنشىلارىنا قارسى سوعىسقا قاتىناسقان ساقا جاۋىنگەرلەردىڭ، قارت جولداستاردىڭ ۋاكىلدەرى، ورتالىقتاعى پارتيا، ۇكىمەت، ارميا، بۇقارالىق ۇيىمداردىڭ قاتىستى تاراۋلارىنداعى جانە شىعىس بولىك سوعىستىق رايونىنداعى، جياڭسۋ ولكەسىندەگى، نانجيڭ قالاسىنداعى جاۋاپتى جولداستار، دەموكراتيالىق پارتيا - توپتاردىڭ ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، نانجيڭ زور قىرعىنىندا امان قالعانداردىڭ، سونداي - اق قازا بولعان باۋىرلاستاردىڭ تۋعان - تۋىستارىنىڭ ۋاكىلدەرى، ەل ىشىندەگى قاتىستى نەگىزگى تاقىرىپتىق ەسكەرتكىش سارايلارىنىڭ (مۇراجاي)، قاتىستى جوعارى مەكتەپتەردىڭ جانە اقىل - پاراسات قويماسى ماماندارىنىڭ ۋاكىلدەرى، ءدىن سالاسىنىڭ ۋاكىلدەرى، نانجيڭدە تۇراتىن اسكەري ءبولىم وفيتسەر - اسكەرلەرىنىڭ ۋاكىلدەرى، جياڭسۋ ولكەسىندەگى ءار سالا جۇرتشىلىعىنىڭ ۋاكىلدەرى، ت. ب ازا ءبىلدىرۋ سالتىنا قاتىناستى.
2014 - جىلى 2 - ايدىڭ 27 - كۇنى مەملەكەتتىك 12 - كەزەكتى حالىق قۇرىلتايى تۇراقتى كوميتەتىنىڭ 7 - رەتكى ءماجىلىسى قاۋلى ماقۇلداپ، زاڭ شىعارۋ فورماسىمەن 12 - ايدىڭ 13 - كۇنىن نانجيڭ زور قىرعىنىندا قازا بولعاندارعا ارنالعان مەملەكەتتىك ازا ءبىلدىرۋ كۇنى ەتىپ بەلگىلەگەن.
