شينحۋا اگەنتتىگىنىڭ 11 - ايدىڭ 21 - كۇنى بەيجيڭنەن بەرگەن حابارى. 11 - ايدىڭ 21 - كۇنى مەملەكەت ءتوراعاسى شي جينپيڭ وركەندەپ كەلە جاتقان ەلدەر عىلىمدار اكادەمياسىنىڭ 16 - كەزەكتى ءىلمي جينالىسىنا جانە 30 - كەزەكتى اكادەميكتەر جينالىسىنا قۇتتىقتاۋ حات جولدادى.
شي جينپيڭ بىلاي دەپ اتاپ كورسەتتى: جۇڭگو جاق نەگىزدىك عىلىمنىڭ دامۋىنا ايرىقشا ءمان بەرەدى، وركەندەپ كەلە جاتقان ەلدەردى قامتىعان دۇنيە جۇزىندەگى ءار ەلمەن بىرگە حالىقارالىق عىلىم - تەحنيكا سالاسىندا ەسىك اشۋدى، سەنىمدىلىكتى جانە سەلبەستىكتى ونان ارى نىعايتىپ، عىلىمدى گۇلدەندىرۋ، دامىتۋ ارقىلى ءار ەل حالقىن باقىتقا كەنەلتىپ، الەمدىك دامۋ باستاماسىن ىلگەرىلەتۋگە، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن تياناقتاندىرۋعا، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ۇلەس قوسۋدى قالايدى.
وركەندەپ كەلە جاتقان ەلدەر عىلىمدار اكادەمياسىنىڭ 16 - كەزەكتى ءىلمي جينالىسى جانە 30 - كەزەكتى اكادەميكتەر جينالىسى سول كۇنى جىجياڭ ولكەسىنىڭ حاڭجوۋ قالاسىندا اشىلدى، نەگىزگى تاقىرىبى: ”نەگىزدىك عىلىمدارمەن وركەندەپ كەلە جاتقان ەلدەردىڭ دالەلدى شەشىم جاساۋىن جانە باياندى دامۋىن ىلگەرىلەتۋ“، وركەندەپ كەلە جاتقان ەلدەر عىلىمدار اكادەمياسى ۇيىمداستىردى، جىجياڭ داشۋەسى وتكىزدى، جۇڭگو عىلىم - تەحنيكا قوعامى مەن جۇڭگو عىلىمدار اكادەمياسى سەلبەسىپ وتكىزدى.