شينحۋا اگەنتتىگىنىڭ 11 - ايدىڭ 18 - كۇنى بانگكوگتان بەرگەن حابارى (تىلشىلەر جياڭ گوپىڭ، ۋاڭ يۋانيۋان). جەرگىلىكتى ۋاقىت 11 - ايدىڭ 18 - كۇنى تۇستەن كەيىن مەملەكەت ءتوراعاسى شي جينپيڭ بانگكوگتا پاپۋا - جاڭا گۆينەيانىڭ زۇڭليى ماراپەمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن پاپۋا - جاڭا گۆينەيا جاقسى دوس، جاقسى سەرىكتەس، جاقسى باۋىرلاس، وركەندەپ كەلە جاتقان ەلدەردىڭ ىنتىماقتاسا سەلبەسۋىنىڭ، ءوزارا پايدا جەتكىزىپ، بىرگە يگىلىككە كەنەلۋىنىڭ ۇلگىسى. جۇڭگو جاق پاپۋا - جاڭا گۆينەيامەن اناعۇرلىم جوعارى دەڭگەيدەگى، اناعۇرلىم ءوزارا تيىمدىلىك جاسايتىن جان - جاقتى ستراتەگيالىق سەرىكتەستىك قارىم - قاتىناس ورناتىپ، جۇڭگونىڭ تىنىق مۇحيت ارال ەلدەرىمەن اناعۇرلىم تىعىز تاعدىرلاس ورتاق تۇلعاسىن ورناتۋ ءۇشىن جەتەكتەۋ جانە ۇلگى كورسەتۋ رولىن ساۋلەلەندىرۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق پاپۋا - جاڭا گۆينەيامەن ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، ەگىن، ورمان، بالىق شارۋاشىلىعى، نەگىزدىك قۇرىلعىلار، ەكونوميكالىق ەرەكشە رايون قۇرىلىسى، اپاتتان ساقتانۋ، اپاتتان قۇتقارۋ، جاسىل دامۋ سياقتى سالالارداعى سەلبەستىكتى كەڭەيتۋدى قالايدى، پاپۋا - جاڭا گۆينەيانىڭ باسىمدىققا يە ونىمدەرىن يمپورت ەتۋدى ۇلعايتادى، جۇڭگو كاسىپورىندارىن پاپۋا - جاڭا گۆينەياعا بارىپ قارجى قوسىپ، سەلبەستىك جاساۋعا جىگەرلەندىرەدى. الەمدىك دامۋ باستاماسىن بىرگە تياناقتاندىرىپ، جۇڭگونىڭ تىنىق مۇحيت ارال ەلدەرىمەن كليمات وزگەرىسىنە توتەپ بەرۋ، كەدەيلىكتى ازايتۋ، اۋىل شارۋاشىلىعى، اپاتتان ساقتانۋ، جۇنساۋ تەحنيكاسى، شۇعىل جاعدايعا توتەپ بەرۋ زاتتىق ماتەريالدارى سياقتىلارعا قاتىستى 6 ۇلكەن سەلبەستىك تۇعىرىنان ويداعىداي پايدالانىپ، ەلەكتر تورى، جۇنساۋ جانە ءشول كۇرىشى تەحنيكاسى بويىنشا كومەكتەسۋ سياقتى نىسانداردى ويداعىداي اتقارادى. جۇڭگو جاق پاپۋا - جاڭا گۆينەيانىڭ جەر سىلكىنىسىنەن كەيىنگى قايتا قۇرۋ قىزمەتىنە ءمان بەرەدى، سول ءۇشىن كومەك بەرۋدى قالايدى. مەن پاپۋا - جاڭا گۆينەيا بۇتۇكا مەكتەبىنىڭ دامۋىنا نازار اۋدارىپ كەلەمىن، پاپۋا - جاڭا گۆينەيانىڭ قاجەتى بويىنشا، مەكتەپكە وقىتۋشى جىبەرۋدى، وقىتۋ جابدىقتارى سياقتى زاتتىق ماتەريالدارمەن قامداۋدى قالايمىز.
شي جينپيڭ بىلاي دەپ باسا دارىپتەدى: جۇڭگو تىنىق مۇحيت ارال ەلدەرىمەن دوستىق قارىم - قاتىناستى دامىتۋدا تەڭ مامىلە جاساۋعا، ءوزارا قۇرمەت ەتۋگە، سەلبەسىپ، بىرگە يگىلىككە كەنەلۋگە، اشىق تا سيىسىمدى بولۋعا تاباندى بولىپ، 3 - جاققا باعىتتامايدى، وڭىرلىك قىرقىسۋمەن اينالىسۋعا قىزىقپايدى. جۇڭگو جاق پاپۋا - جاڭا گۆينەيا قاتارلى تىنىق مۇحيت ارال ەلدەرىمەن حالىقارالىق جانە وڭىرلىك ىستەردە سايكەسۋدى، سەلبەسۋدى كۇشەيتىپ، ناعىز كوپ جاقتىلىققا تاباندى بولىپ، حالىقارالىق قارىم - قاتىناستاردىڭ نەگىزگى ولشەمىن قورعاپ، حالىقارالىق ادىلدىكتى، تۋراشىلدىقتى قورعاپ، ازيا - تىنىق مۇحيت ءوڭىرى مەن دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن جەبەۋدى قالايدى.
ماراپە مىنالاردى ءبىلدىردى: ءتوراعا شي جينپيڭنىڭ كەمەڭگەر باسشىلىعىندا، جۇڭگو ۇلى دامۋ تابىستارىنا قول جەتكىزىپ، گۇلدەنۋدى، ورنىقتىلىقتى جۇزەگە اسىردى، ءجۇز ميلليونعا جۋىق ادام كەدەيلىكتەن ارىلىپ، باقىتتى تۇرمىسقا كەنەلدى. ءتوراعا شي جينپيڭنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ جالعاستى سايلانعاندىعىنا توتەنشە قۋانامىن. پاپۋا - جاڭا گۆينەيانىڭ جۇڭگومەن دوستىعى ۋاقىت وتكەن سايىن جاڭارا تۇسەدى. جۇڭگو پاپۋا - جاڭا گۆينەيا ەكونوميكاسىنىڭ دامۋىنا جۇنساۋ تەحنيكاسى سياقتى قالتقىسىز كومەك بەردى. پاپۋا - جاڭا گۆينەيا ءبىر جۇڭگو ساياساتىن ۇزدىكسىز باتىل اتقارىپ، جۇڭگونىڭ يەلىك ۇقىعى مەن تەرريتوريا تۇتاستىعىن قورعاۋىن باتىل قولدايدى، جۇڭگومەن ەكونوميكا - ساۋدا سياقتى سالالارداعى سەلبەستىكتى تەرەڭدەتۋگە بۇلجىماي كۇش سالىپ، جاستار، وقۋ - اعارتۋ سياقتى گۋمانيتارلىق اۋىس - كۇيىستى نىعايتادى. اناعۇرلىم كوپ جۇڭگو كاسىپورىندارىنىڭ پاپۋا - جاڭا گۆينەياعا بارىپ قارجى قوسىپ، سەلبەستىك جاساۋىن قارسى الامىز. پاپۋا - جاڭا گۆينەيانىڭ جۇڭگومەن قارىم - قاتىناسىنىڭ ونان ارى دامۋىن ەشقانداي كۇش بوگەي المايدى. پاپۋا - جاڭا گۆينەيا تىنىق مۇحيت ارال ەلدەرى ءوڭىرىنىڭ جۇڭگومەن قارىم - قاتىناسىنىڭ دامۋىن ۇزدىكسىز بەلسەنە جەبەۋدى قالايدى.
ديڭ شۋەشياڭ، ۋاڭ ي، حى ليفىڭ قاتارلىلار كەزدەسۋگە قاتىناستى.
