شينحۋا اگەنتتىگىنىڭ 10 - ايدىڭ 14 - كۇنى بەيجيڭنەن بەرگەن حابارى. 10 - ايدىڭ 14 - كۇنى مەملەكەت ءتوراعاسى شي جينپيڭ مالديۆتىڭ زۇڭتۇڭى ساليحپەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن مالديۆتىڭ دوستىق بارىس - كەلىسى ارىدان جالعاسقان. ديپلوماتيالىق قارىم - قاتىناس ورناتقان 50 جىلدان بەرى ەكى ەل باستان - اياق ءبىر - بىرىنە قۇرمەت ەتىپ، ءوزارا قولداۋ كورسەتىپ، ۇلكەن - كىشى ەلدەردىڭ تەڭ تۇرعىدا مامىلە جاساۋىنىڭ، ءوزارا تيىمدىلىك جاساپ، تەڭ يگىلىككە كەنەلۋىنىڭ ۇلگىسىن ورناتتى. سوڭعى جىلداردان بەرى ەكى جاق قيىندىقتى بىلەك بىرىكتىرە جەڭىپ، ءوزارا قارايلاسىپ، عاسىرلىق ىندەتتىڭ سىن - سايىسىنا قول ۇستاسا توتەپ بەرىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، ناعىز كوپ جاقتىلىقتى قورعاپ جانە جەبەپ، جۇڭگو - مالديۆ قارىم - قاتىناسىنا جاڭا قوزعاۋشى كۇش قوسىپ، جاڭا بولاشاق اشتى. مەن جۇڭگو - مالديۆ قارىم - قاتىناسىنىڭ دامۋىنا ايرىقشا ءمان بەرەمىن، ساليح زۇڭتۇڭمەن بىرگە قۇلشىنىپ، جۇڭگو مەن مالديۆتىڭ بولاشاققا بەت العان جان - جاقتى دوستىق سەلبەستىك سەرىكتەستىك قارىم - قاتىناسىنىڭ نىق قاداممەن العا باسۋىن ىلگەرىلەتۋدى، ەكى ەلدى جانە ەكى ەل حالقىن اناعۇرلىم كوپ باقىتقا كەنەلتۋدى قالايمىن.
ساليح مىنالاردى ءبىلدىردى: مالديۆ - جۇڭگو قارىم - قاتىناسى ەكى جاققا ورتاق ۇزاق تاريحي قاينار كوز، يەلىك ۇقىق تەڭدىگى جانە ءوزارا قۇرمەت ەتۋ نەگىزىندە قۇرىلعان ءارى مالديۆ ۇكىمەتىنىڭ ءبىر جۇڭگو پرينسيبىن باتىل اتقارعان بەرىك نەگىزىندە قۇرىلعان. جۇڭگو مالديۆتىڭ ەكونوميكالىق، قوعامدىق جانە مادەنيەت دامۋىنا اسا زور ۇلەس قوستى. ەكى ەلدىڭ 50 جىلدان بەرى ورناتقان ۇزاق ۋاقىتتىق دوستىق سەلبەستىك قارىم - قاتىناسىنىڭ، ءسوز جوق، تەرەڭدەي جانە كەڭەيە تۇسەتىندىگىنە سەنەمىن.
